16
Aj Txik Kyqaniꞌ Kye Xjal Tukyꞌi Jesus Tzan Tkꞌulun Junky Seny Aj Telponx Tetz Tlajen Qtata Dios
1 Kye aj bꞌuchꞌuj Parisey bꞌix kye aj bꞌuchꞌuj Sadusey, kyetz ebꞌajpon tukyꞌi Jesus tzan tqet tuq kyeqꞌiꞌ. Oxik kyqꞌumaꞌ kyetz tetz tzan tuq tqet tkꞌuluꞌ jun seny tzan tuq tqet tyekꞌuꞌ [qa bꞌanꞌax Dios tuq lajol tetz].* 2 Per yaji te Jesus oxik tqꞌumaꞌ kyetz ikxjani: “Tuj jun qaleꞌ etetz nxik eqꞌumaꞌ ikxjani: “Ajnaꞌl tzul qꞌijal tzan tpaj te txekaꞌj kyaq.” 3 Bꞌix tuj jun qꞌeqoꞌ etetz nxik eqꞌumaꞌ ikxjani: “Ajnaꞌl tzul jabꞌ tzan tpaj te txekaꞌj bꞌan kyaq bꞌix muj.” Qa etetz nꞌel enikyꞌ bꞌan galan tiꞌj te twitz kaꞌj, ¿tistil kꞌontiꞌl nꞌel enikyꞌ tidiꞌ telponx te aj nkyꞌik ajnaꞌl? 4 Kye xjal aj pur nyaꞌtx galan kyenabꞌlin bꞌix aj oje kaj kykolaꞌ tzan kynaꞌon Qtata Dios tukyꞌi jun tkꞌuꞌjlal, kyetz nkyeqanin jun seny; per nlay qet kꞌulet jun seny ikxji sinoke aꞌox aj okyꞌik tiꞌj te Jonas [oqtxiꞌ].”* Ntons ebꞌajkaj tsiꞌ bꞌix owex tzi.
Te Yekꞌbꞌil Tiꞌj Te Malsbꞌil Aj Telponx Tiꞌj Te Kxnaqꞌtzbꞌen Kye Xnaqꞌtzon Aj Nyaꞌtx Bꞌanꞌax Kyitzaꞌ
5 Ntons ya ma kyekyꞌik kye txnaqꞌatz tuj te junky palaj te aꞌ, owok kyen kꞌontiꞌl oxik kynaꞌoꞌ tzan txik kyin te wabꞌj. 6 Ntons te Jesus oxik tqꞌumaꞌ kyetz ikxjani: “Instzaj echaꞌoꞌ, intok esiꞌ enabꞌl tiꞌj te malsbꞌil* aj kye aj bꞌuchꞌuj Parisey bꞌix kye aj bꞌuchꞌuj Sadusey.” 7 Kye txnaqꞌatz okyyolij kxol ikxjani: “[Nyolin ikxniꞌn] tzan tpaj kꞌontiꞌl ma tzaj qin te wabꞌj.”
8 Bꞌix komo te Jesus owel tnikyꞌ aj nkybꞌisuꞌ tuq, oxik tqꞌumaꞌ kyetz ikxjani: “Etetz kꞌontiꞌl witꞌlik nim ekꞌuꞌj wiꞌj. ¿Tistil etetz nkxbꞌisun qa kꞌontiꞌl eqꞌiꞌ qweꞌ? 9 ¿Tiꞌtzun, minaꞌx tox tuj ewiꞌ? Bꞌix ax ¿kꞌontiꞌl naꞌik etitzaꞌ tiꞌj te jwebꞌ wabꞌj kxol jwebꞌ mil (5000) xjal bꞌix jatebꞌ chiꞌl ojaw echimoꞌ aj osobrin?* 10 ¿Bꞌix ax kꞌontiꞌl naꞌik etitzaꞌ kye wuq wabꞌj kye kaj mil (4000) xjal, bꞌix jatebꞌ chiꞌl ojaw echimoꞌ aj osobrin?* 11 ¿Tistil kꞌontiꞌl nꞌel enikyꞌ? Wetz kꞌontiꞌl nkyinyolin tiꞌj te wabꞌj. Per intok esiꞌ enabꞌl tiꞌj te malsbꞌil kye aj Parisey bꞌix kye aj Sadusey.” 12 Ntons kye txnaqꞌatz owel kynikyꞌ kꞌontiꞌl tuq nyolin te Jesus tiꞌj te malsbꞌil wabꞌj, sinoke tzan tok ksiꞌ kynabꞌl tuq tiꞌj te aj nkxnaqꞌtzaꞌ kye aj Parisey bꞌix kye aj Sadusey.
Aj Txik Tqꞌumaꞌ Te Xhpeꞌy Abꞌl Tuq Te Jesus
13 Ntons aj tpon Jesus tuj Sesarey tuj tkwentil Filipos, oxik xhchaꞌoꞌ kyukyꞌi kye txnaqꞌatz ikxjani: “¿Titzaꞌ nkyeyolin kye xjal wiꞌj [wetz] te Ichan Aj Tkꞌwaꞌal Dios [aꞌin]?” 14 Yaji kyetz oxik kyqꞌumaꞌ ikxjani: “Junjun nkyqꞌumaꞌ aꞌich te Waꞌnch Aj Swal Aꞌ, bꞌix junjunky nkyqꞌumaꞌ aꞌich Eliys, bꞌix junjunky nkyqꞌumaꞌ aꞌich Jeremiy qatzun junky kye aj yolil tyol Dios oqtxiꞌji.”* 15 Yaji tetz oxik tqꞌumaꞌ kyetz ikxjani: “Yatzun etetz tuj enabꞌl, ¿abꞌl aꞌin wetz?” 16 Tzaj te Xhpeꞌy,a owaj stzaqꞌbꞌeꞌ ikxjani: “Yatz aꞌich te aj Koloyon Aj Qꞌumankaj Oqtxiꞌ, yatz aꞌich Tkꞌwaꞌal Qtata Dios, te Qtata Dios aj itzꞌoj.”* 17 Ntons te Jesus owaj stzaqꞌbꞌeꞌ ikxjani: “Yatz Simon aj tkꞌajol Jonas,b galanx-alo yatz aꞌich tzan tpaj nyaꞌtx jun xjal ma tzaj qꞌuman te yatz ikxniꞌn sinoke a te Ntat aj atjax tuj kaꞌj. 18 Bꞌix owokel nqꞌumaꞌ yatz Xhpeꞌy, yatz aꞌich iktzaꞌ jun abꞌj [twitꞌlel jay]c bꞌix oqtel nkꞌuluꞌ awukyꞌiꞌl tzan kyok jun nim bꞌuchꞌuj kye aj nkyeꞌokslan wiꞌj, bꞌix nlay bꞌantik tzan kykaj tzyuꞌ tzan te kamikyj.d 19 Wetz oxeꞌl nsiꞌ te yatz jun awajwalil kyiꞌj kye aj akyeqet tuj tqꞌabꞌ te Qtat aj nnajan tuj kaꞌj,e bꞌix te aj nlay atzoqpij tzani twitz ja txꞌoꞌtxꞌni ax nlay kꞌamet [tukyꞌi te Qtata Dios] tuj kaꞌj, bꞌix te aj atzoqpiꞌtz tzani twitz txꞌoꞌtxꞌni, ax okꞌametel [tukyꞌi te Qtata Dios] tuj kaꞌj.”f
20 Yaji te Jesus oxik tkꞌuluꞌ mandad kye txnaqꞌatz tzan kꞌon tuq txik kyqꞌumaꞌ te nijunwt qa aji tuq tetz te Koloyon Aj Qꞌumankaj Oqtxiꞌ.
Aj Tyolin Jesus Tiꞌj Tkamiky
21 Bꞌeyx aj qꞌijji te Jesus owaqꞌik tzan txik tqꞌumaꞌ xtxolil kye txnaqꞌatz, a tgan tuq tzan txik Jerusalen, bꞌix tzan kypaj kye tijxjal bꞌix kye pal aj nim kyajwalil bꞌix kye xnaqꞌtzal Kawbꞌil, tzi tetz owokel tuq ten twitz xhchoꞌnal bꞌix okamel tuq bꞌix tuj toxiꞌn qꞌij tkamlen ojawel tuq anqꞌin. 22 Ntons te Xhpeꞌy owel tlaqꞌbꞌaꞌ kyiꞌj bꞌix oxik tqꞌumaꞌ ikxjani: “Tat, kꞌonxwit stzoqpij te Qtata Dios tzan tkyꞌik awiꞌj ikxji. Te nini nlay kyꞌik awiꞌj.”
23 Per te Jesus owox teꞌeꞌ tuj twitz te Xhpeꞌy bꞌix oxik tqꞌumaꞌ tetz ikxjani: “Intel apawaꞌ awibꞌ wiꞌj, Satanas.g Yatz cha agan tzan nqet tzꞌaqik. Yatz kꞌontiꞌl nchbꞌisun [tumeꞌl] iktzaꞌ te Qtata Dios sinoke nchbꞌisun iktzaꞌ kye xjal nkyebꞌisun.”
24 Yaji te Jesus oxik tqꞌumaꞌ kye txnaqꞌatz ikxjani: “Abꞌl aj tgan tzan tok lapet wiꞌj, a tgan tzan tkaj tkolaꞌ te aj cha nꞌel tganiꞌ, a tgan tzan sten dispwest tzan tok ten twitz tkamiky tzan npaj wetz,h bꞌix intok lapet wiꞌj. 25 Komo abꞌl aj cha njoyon tumeꞌl tzan tkolon tibꞌx tzan tanqꞌin, tetzji opoyonajkixiꞌ; yatzun te aj okamel tzan tpaj tokslbꞌen wiꞌj, tetz otkambꞌaꞌtz jun tanqꞌin.* 26 ¿At petzun jun tbꞌanil te jun xjal qa otkambꞌaꞌtz kyaqil aj at twitz txꞌoꞌtxꞌ per opoyonaj te tanim? [¡Kꞌontiꞌl!] ¿Bꞌix tidiꞌ bꞌaꞌn tzan txik tsiꞌ jun xjal tzan tkolet te tanim? [¡Chꞌinwt!] 27 Komo [wetz] te Ichan Aj Tkꞌwaꞌal Dios [aꞌin] kyinꞌul tukyꞌi nim wajwalil aj otzajel tsiꞌ Ntat bꞌix kyukyꞌi kye ángel aj nkyeꞌokslan te tetz, bꞌix yaji oxeꞌl nsiꞌ kye junjunchaq iktzaꞌx maꞌtx kykꞌuluj tzani twitz txꞌoꞌtxꞌ.* 28 Wetz oxeꞌl nqꞌumaꞌ etetz te bꞌanꞌax, junjun exol etetz aj atikxqet tzani, nlay kyekamik max oj wok kyen [wetz] te Ichan Aj Tkꞌwaꞌal Dios [aꞌin] oj nkꞌulun mandad tzani twitz txꞌoꞌtxꞌ.”