6
Aj Tyolin Jesus Titzaꞌ Tzan Txik Qsiꞌ Jun Qoyej Kye Mebꞌaꞌ Xjal
1 “Kꞌon qet eyekꞌuꞌ kywitz kye xjal te ekꞌulbꞌen galan cha tzan etok eꞌeꞌ.a Qa ikxji nꞌekꞌuluꞌ, te Qtata Dios* aj atjax tuj kaꞌj nlay xik tsiꞌ etetz chꞌinwt. 2 Astilji oj etonen kyiꞌj kye mebꞌaꞌ xjal, kꞌon xik epakbꞌaꞌ jaꞌchq iktzaꞌ kye aj xmeletzꞌ nkykꞌuluꞌ tuj te jay nabꞌil Dios bꞌix tuj bꞌey cha tzan kyqet jiqꞌbꞌaꞌ tzan kye xjal. Wetz oxeꞌl nqꞌumaꞌ bꞌanꞌax etetz, kyetz cha aꞌox nini okykambꞌaꞌtz, [nlay kykꞌamoj junky tidiꞌ tukyꞌi Qtata Dios]. 3 Yatzun etetz oj etonen tiꞌj jun mebꞌaꞌ xjal, kꞌontiꞌl tzan txik eqꞌumaꞌ tukyꞌi nijunwt; 4 sinoke peꞌekꞌulun tuj jun tumeꞌl aj nlay tzꞌok ksiꞌ kynabꞌl kye txqꞌanky, bꞌix te Qtata Diosb aj nxik tkaꞌyiꞌ te aj nbꞌantik ewj, a tetz oxeꞌl tsiꞌ te aj ekambꞌaꞌtz.”
Aj Tyolin Jesus Titzaꞌ Tzan Qxnaqꞌtzan Tukyꞌi Qtata Dios
5 “Bꞌix oj exnaqꞌtzan kꞌon kxꞌok iktzaꞌ kye aj xmeletzꞌ, mer kygan tzan kxnaqꞌtzan waꞌlkeꞌ tuj te jay nabꞌil Dios bꞌix tuj kruser tzanjaꞌx tzan kyok en tzan kye xjal.* Wetz oxeꞌl nqꞌumaꞌ bꞌanꞌax etetz, kyetz cha aꞌox nini okykambꞌaꞌtz, [nlay kykꞌamoj junky tidiꞌ tukyꞌi Qtata Dios]. 6 Per yatzun etetz oj exnaqꞌtzan, okxꞌokex tuj ewatbꞌil bꞌix owelatz elamoꞌ te lamel bꞌix oxeꞌl exnaqꞌtzaꞌ te Etat aj atqet xhchukel etukyꞌiꞌl. Bꞌix te Qtata Diosc aj nxik tkaꞌyiꞌ te aj nbꞌantik ewj, a tetz oxeꞌl tsiꞌ te aj ekambꞌaꞌtz.
7 Ntons oj exnaqꞌtzan, kꞌon xik eqꞌumaꞌ kyꞌilaꞌj-el jun yol, komo nini kꞌontiꞌl token, iktzaꞌ nxik kxnaqꞌtzaꞌ kye aj nyaꞌtx tijajil Israel aj kꞌontiꞌl nkyeꞌokslan te Qtata Dios; kyetz tuj kynabꞌl qa oxeꞌl kyqꞌumaꞌ kyꞌilaꞌj-el, ikxji te Qtata Dios mas owokel tsiꞌ twiꞌ kyiꞌj. 8 Kꞌon kxꞌok etetz iktzaꞌ kyetz, komo te Qtata Diosd ya tebꞌenky te aj presis te etetz anke minaꞌ tuq txik eqaniꞌ.
9 Ntons etetz peꞌexnaqꞌtzan waq ikxjani: “Qtata Dios aj atichjax tuj kaꞌj, intqet xjaniꞌxwit yatz abꞌi. 10 Intkajxwit kyaqil tuj aqꞌabꞌ naj. Intbꞌantikxwit tzani twitz txꞌoꞌtxꞌ kyaqil iktzaꞌx yatz agan, iktzaꞌx nbꞌantik tuj kaꞌj. 11 Instzaj asiꞌ chꞌin ajnaꞌl te qweꞌ aj nꞌoken bꞌajqꞌij. 12 Bꞌix intqet anajsaꞌ chꞌin te qchoj iktzaꞌx qetza nqet qnajsaꞌna te nyaꞌtx galan aj nkyekꞌulun kye txqꞌanky qiꞌja. 13 Bꞌix kꞌon atzoqpij chꞌin tzan tok qen twitz jun tidiꞌ aj oqotel tzꞌaqik titzaꞌ sinoke qoꞌel akoloꞌ chꞌin tiꞌj kyaqil aj nyaꞌtx galan.”e
14 Ntons etetz, qa oqtel enajsaꞌ te nyaꞌtx galan aj nkyekꞌulun kye txqꞌanky etiꞌj, ax te Qtata Diosf aj atjax tuj kaꞌj ax tetz oqtel tnajsaꞌ te echoj etetz;* 15 per qatzun nlay qet enajsaꞌ te nyaꞌtx galan aj nkyekꞌulun kye txqꞌanky etiꞌj, ax te Qtata Diosg nlay qet tnajsaꞌ te echoj.”*
Aj Tyolin Jesus Tiꞌj Te Oj Qipan Waꞌij Tzan Qxnaqꞌtzan
16 “Ntons etetz oj etipan waꞌij tzan exnaqꞌtzan, kꞌon qet ekꞌuluꞌ jun ewitz bꞌan bꞌis iktzaꞌ nkykꞌuluꞌ kye aj xmeletzꞌ tzanjaꞌx tzan kyok eꞌeꞌ nkyeꞌipan waꞌij. Wetz oxeꞌl nqꞌumaꞌ bꞌanꞌax etetz, kyetz cha aꞌox nini okykambꞌaꞌtz, [nlay kykꞌamoj junky tidiꞌ tukyꞌi Qtata Dios tzan tpaj kyipbꞌen waꞌij]. 17 Per yatzun etetz oj etipan waꞌij tzan exnaqꞌtzan, intqet ekꞌuluꞌ chꞌin etibꞌ galanh bꞌix intel etxꞌajoꞌ ewitz 18 tzan kꞌon tel kynikyꞌ kye xjal qa nkxꞌipan waꞌij, sinoke aꞌox tzan tok ten te Qtata Dios aj atqet xhchukel etukyꞌiꞌl, bꞌix komo tetz bꞌaꞌn tzan txik ten kyaqil, tetz otzajel tsiꞌ etetz te aj ekambꞌaꞌtz.”
A Tgan Tzan Tqet Qchimoꞌ Jqꞌinomal Tuj Kaꞌj
19 “Kꞌon qet echimoꞌ nim eqꞌinomal tzani twitz txꞌoꞌtxꞌ aj jaꞌ te pokꞌ bꞌix te oks npon kynajsaꞌ kyaqil,* bꞌix jaꞌ kye eleqꞌ nkyeꞌox elqꞌon. 20 Mejor intqet echimoꞌ nim eqꞌinomal tuj kaꞌj, aj jaꞌ te pokꞌ bꞌix te oks kꞌontiꞌl npon kynajsaꞌ, bꞌix jaꞌ kꞌontiꞌl nkyeꞌox kye eleqꞌ. 21 Komo tiꞌj te eqꞌinomal, ax tzi atok mas ekꞌuꞌj.”*
Te Yekꞌbꞌil Tiꞌj Te Aj Nꞌel Qganiꞌ Tukyꞌi Tbꞌaqꞌ Qwitz
22 “Kye tbꞌaqꞌ qwitz iktzaꞌ kye qꞌanalbꞌil te qchiꞌjel. Qa te tbꞌaqꞌ qwitz galan, ntons bꞌaꞌn tzan txik qen byenech te chkꞌatunal. 23 Per qa te tbꞌaqꞌ qwitz nyaꞌtx galan, ntons iktzaꞌ aqoqex tuj qlolj. Per qa etetz tuj enabꞌl nꞌenaꞌoꞌ jun chkꞌatunal tuj etanim, per qa te aj chkꞌatunalni nyaꞌtx tumeꞌl, ntons kyaqil pur bꞌan qlolj tuj etanim.”
Te Qtata Dios Nkꞌulun Kwent Kye Aj Nkyeꞌokslan Tiꞌj
24 “Nijunwt bꞌaꞌn tzan tqꞌapon tibꞌ tuj kyqꞌabꞌ kabꞌeꞌ tajaw, tzan tpaj owokel tajqꞌojaꞌ te jun bꞌix te junky oqtel tganiꞌ, qatzun owokel lapet tiꞌj te jun bꞌix te junky owelal tikꞌoꞌ. Ax ikxji nlay bꞌantik tzan qaqꞌunan te Qtata Dios bꞌix ax te jqꞌinomal kykabꞌil.*
25 Wetz oxeꞌl nqꞌumaꞌ etetz, kꞌon kxbꞌisun tiꞌj tidiꞌ oxeꞌl ewaꞌaꞌ qatzun tiꞌj te etukꞌaꞌji tzan etanqꞌin, bꞌix ax kꞌontiꞌl tzan ebꞌisun tiꞌj te eqꞌanaq aj owokel esiꞌ. Te qanqꞌin nyaꞌtx aꞌox tzan qbꞌisun tiꞌj qukꞌaꞌ bꞌix tiꞌj jqꞌanaq. 26 Intok esiꞌ enabꞌl kyiꞌj kye pichꞌ aj nkyelipan twitz kaꞌj. Kyetz kꞌontiꞌl nkyeꞌawan bꞌix kꞌontiꞌl njaw kyin twitz kyawal, bꞌix kꞌontiꞌl nkyekꞌuꞌun tuj kykajon, per anke ikxji, te Qtata Diosi aj atjax tuj kaꞌj, tetz nkyexik tkꞌaꞌchaꞌ. ¡Bꞌix etetz mas ganimix aꞌix kywitz kye pichꞌ! 27 Anke qa qetz bꞌan nqobꞌisun nim, ¿tzun petzun nbꞌantik tzan etanqꞌin junky qꞌij mas twitz iktzaꞌx ekajlen siꞌx?
28 Bꞌix ¿tistil etetz bꞌan nkxbꞌisun tiꞌj te eqꞌanaq? Intok esiꞌ enabꞌl kyiꞌj kye ubꞌech liriosj tuj kꞌul, kyetz kꞌontiꞌl nkyeꞌaqꞌunan bꞌix kꞌontiꞌl nkyekyimon, 29 per anke ikxji, ni siker te Salomon [aj bꞌan qꞌinon tuq],* ni tetz bꞌaꞌn tuq tzan tok txqꞌaptzaꞌ tibꞌ iktzaꞌ kyetz. 30 Qa te Qtata Dios nkꞌulun kwent ikxji te kꞌul aj aꞌox akyeqet ajnaꞌl bꞌix ya nchiꞌj owokeyon meqꞌtzbꞌil te jorn, ntons ¡pyorx-alo etetz! Te Qtata Dios otzajel tsiꞌ te aj presis te etetz anke aꞌix xjal aj nyaꞌtx nim witꞌlik ekꞌuꞌj tiꞌj. 31 Ntons etetz kꞌon kxbꞌisun, kꞌontiꞌl tzan txik eqꞌumaꞌ ikxjani: “¿Tidiꞌ oxeꞌl qwaꞌaꞌ?” qatzun “¿Tidiꞌ oxeꞌl qukꞌaꞌ?” qatzun “¿Tidiꞌ owokel qsiꞌ qiꞌj?” 32 Tiꞌj kyaqil ntzani ax bꞌan nkyebꞌisun kye xjal aj kꞌontiꞌl nkyeꞌokslan te Qtata Dios, per yatzun etetz, at jun Etat aj atjax tuj kaꞌj aj tebꞌen kyaqil aj presis te etetz. 33 Ntons, mas twitz kyaqil aj nkxkꞌulun, intok esiꞌ ekꞌuꞌj tzan ejoyon tzan tqet etokslaꞌ titzaꞌ tgan te Qajawil, bꞌix tzan ekꞌulun kyaqil tuj tumeꞌl iktzaꞌ tetz tgan, bꞌix kyaqil te aj presis te etetz, tetz otzajel tsiꞌ. 34 Kꞌon kxbꞌisun tiꞌj te nchiꞌj, tzan tpaj te nchiꞌj bꞌaꞌn tzan ebꞌisun tiꞌj nchiꞌj. Bꞌajqꞌij at tidiꞌchq bꞌaꞌn tzan qbꞌisun tiꞌj.”