2
Aj Kypon Qꞌolbꞌeyon Kye Xjal Xnaqꞌtzal Cheꞌw
1 Te Jesus owitzꞌjik tuj Belen, jun tal amaqꞌ tuj tkwentil Judey. Tuj aj tyempji nkꞌulun mandad tuq te Eródes. Ntons ebꞌajpon tuj Jerusalen txqꞌan xjal xnaqꞌtzal cheꞌw twitz kaꞌj, kyetz tzajnaqeꞌ tuq tuj palaj aj jaꞌ njakul qꞌij. 2 Kyetz oxik kchaꞌoꞌ [kxol kye xjal] ikxjani: “¿Jaꞌ atqet te kꞌulul mandad kyiꞌj kye aj tijajil Israel, te twitzaleꞌ kꞌulul mandad aj maꞌtx tzꞌitzꞌjik? Qetza maꞌtx xik qena te cheꞌw twitz kaꞌj aj telponx tiꞌj tetz, maꞌtx xik qena aj jaꞌ njakul qꞌij. Astilji qetza maꞌtx qoꞌulna tzan tqet qnaꞌoꞌ.”
3 Ya ma tzꞌok xhchaꞌoꞌ te Eródes te twitzaleꞌ kꞌulul mandad tuq tzi, tetz oje bꞌisun bꞌix ax kyaqil kye xjal aj nkyenajan tuq tuj Jerusalen, ax kyetz oje kyebꞌisun. 4 Eꞌok xtxokoꞌ kyaqil kye pal aj nim kyajwalil bꞌix kyaqil kye xnaqꞌtzal Kawbꞌil, bꞌix oxik xhchaꞌoꞌ kyetz jaꞌ tuq owitzꞌjel te Koloyon Aj Qꞌumankaj Oqtxiꞌ.a 5 Ntons kyetz oxik kyqꞌumaꞌ tetz ikxjani: “Tuj Belen tuj tkwentil Judey tzan tpaj ikxji okaj stzꞌibꞌaꞌ te aj yolil tyol Dios oqtxiꞌ: 6 “Etetz aj Belen tuj tkwentil Juda, etetz etamaqꞌ nyaꞌtx jun tal amaqꞌ aj kꞌontiꞌl-wit token, tzan tpaj exol etetz ojawel jun twitzaleꞌ kꞌulul mandad aj oxeꞌl txnaqꞌtzaꞌ kye aj nxjalil aj tijajil Israel.””*
7 Ntons te Eródes ewj etzaj tukꞌleꞌ kye xjal aj xnaqꞌtzal cheꞌw, bꞌix oxik xhchaꞌoꞌ kyetz janikꞌle tuq tjawlen kanet te cheꞌw. 8 Yaji ebꞌajxik tlajoꞌ Belen, oxik tqꞌumaꞌ kyetz ikxjani: “Pex waq txini bꞌix intok echaꞌoꞌ kyaqil tiꞌj te kꞌwaꞌl, bꞌix oj toknoj etitzaꞌ, eqꞌumaꞌtz wetz, tzan nxik wetz naꞌol tetz.”
9 Ntons kye xjal ebꞌajxik iktzaꞌx txiklen qꞌumaꞌ kyetz tzan te twitzaleꞌ kꞌulul mandad. Bꞌix te cheꞌw aj oxik kyen, atqet tuq tbꞌayon kywitz, bꞌix yaji owaꞌlet tajsik te luwar aj jaꞌ tuq atqet te kꞌwaꞌl. 10 Aj txik kyen te cheꞌw ojetq tuq waꞌlet, kyetz oje kyebꞌajchalaj. 11 Ya ma kyeꞌox tuj te jay, oxik kyen te kꞌwaꞌl bꞌix te Liy aj tnan; yaji ebꞌajqet mejlet bꞌix eꞌokten naꞌol te neꞌ. Ojaw kyjaqoꞌ te kykaxh bꞌix oxik kyoyeꞌ tetz oro, pom bꞌix mir. 12 Yaji otzaj qꞌumaꞌ kyetz tuj jun kywitzikꞌ tzan kꞌon tuq kymeltzꞌjik aj jaꞌ tuq atqet te Eródes, ntons ebꞌajmeltzꞌjik tuj kyamaqꞌ per tuj junky bꞌey.
Aj Txik In Te Jesus Tzan Kye Stat Tuj Amaqꞌ Ejipt
13 Ya aj ojetq tuq kyaj kye xnaqꞌtzal cheꞌw, jun ángel tlajen Qajawil ojaw kanet tuj twitzikꞌ te Chep, bꞌix oxik tqꞌumaꞌ: “Pajaw, intxik awin te kꞌwaꞌl bꞌix te tnan, bꞌix peꞌetoqik max Ejipt. Ax peꞌeten tzi max oj nxik qꞌumal yatz junkyꞌel, tzan tpaj te Eródes tetz owelal joyol te kꞌwaꞌl tzan tqet tkansaꞌ.”
14 Ntons te Chep ya ma tzaj kꞌasik tiꞌj twitzikꞌ, oxik tin te kꞌwaꞌl bꞌix te alon, bꞌix oxik kyukyꞌiꞌl aj aqꞌbꞌilji, ebꞌajxik max Ejipt, 15 bꞌix txini ekajten max aj tkamik te Eródes. Ikxji okyꞌik tzan tponkix tuq te aj ojetq tuq tqꞌumaj te Qajawil tukyꞌi te aj yolil tyol oqtxiꞌ ikxjani: “Otzaj wukꞌleꞌ te nkꞌwaꞌal max Ejipt.”*
Aj Kyqet Kansaꞌ Kye Neꞌ Tuj Tkwentil Amaqꞌ Belen
16 Ntons te Eródes ya ma tzꞌok ten ojetq tuq qet eqꞌiꞌ tzan kye xnaqꞌtzal cheꞌw, ntons otzaj nim tqꞌoj, bꞌix oxik tkꞌuluꞌ mandad tzan kyqet kansaꞌ kye tal ichan aj man tuq kyitzꞌjlen jun aqꞌbꞌi qatzun kabꞌeꞌ aqꞌbꞌiji tuj te amaqꞌ Belen bꞌix kyaqil kye luwar qaynin tzi, oxik tin tkwentil janikꞌlexiꞌ tuq aj stzaj kyqꞌumaꞌ kye xjal xnaqꞌtzal cheꞌw.
17 Ikxji oponkixiꞌ iktzaꞌx okaj stzꞌibꞌaꞌ te Jeremiy aj yolil tyol Dios oqtxiꞌ: 18 “Twiꞌ jun xuj oxik chaꞌoꞌ tuj amaqꞌ Rama, ajun oqꞌel bꞌix bꞌis; a te Rakel bꞌan nꞌoqꞌ tuq kyiꞌj tal, bꞌix kꞌon tuq tgan tzan tjaw in tkꞌuꞌj tzan tpaj ojetq tuq kye kamik kye tal.”*
19 Per ya ma kamik te Eródes, jun ángel tlajen Qajawil ojaw kanet twitz te Chep tuj twitzikꞌ tuj Ejipt, 20 bꞌix oxik tqꞌumaꞌ tetz te Chep ikxjani: “Pajaw waꞌlet, intxik awin te kꞌwaꞌl bꞌix te tnan bꞌix pameltzꞌjik tuj tkwentil Israel, tzan tpaj ajnaꞌl oje kyekamik kye aj kygan tuq tzan kykansan tetz.”
21 Ntons bꞌeyxnajji te Chep oxik tin te kꞌwaꞌl bꞌix te alon, bꞌix exik tuj tkwentil Israel. 22 Per ya ma tzꞌok xhchaꞌoꞌ te Chep qa te Arkelaw nkꞌulun mandad tuq tuj Judey tkyꞌixel te Eródes aj stat, te Chep otxobꞌlej tzan txik txini, bꞌix tzan tpaj otzaj qꞌumaꞌ tetz tuj twitzikꞌ ntons oxik tuj tkwentil Galiley, 23 bꞌix opon najayon tuj jun tal amaqꞌ tbꞌi Nasaret. Te ntzani okyꞌik tzan tponkix tuq iktzaꞌx okyqꞌumaj kye aj yolil tyol Dios oqtxiꞌ, qa [te koloyon kyiꞌj] “owokel qꞌumaꞌkix tuq jun aj Nasaret.”*