2
Aj Titzꞌjik Jesus
1 Ntons tuj aj tyempji te César Agústo a te twitzaleꞌ kꞌulul mandad, bꞌix oxik tkꞌuluꞌ mandad tzan ktzꞌibꞌan kyibꞌ kyaqil kye xjal jaꞌchq tuj kyamaqꞌx aj jaꞌ eꞌitzꞌjik. 2 Aj ntzani te tbꞌay-el aj ktzꞌibꞌan kyibꞌ kye xjal tuj kyamaqꞌx tuj tyemp aj nkꞌulun mandad te Kirina tuj Siry. 3 Kyaqil kye xjal eꞌaj tuj kyamaqꞌx tzan ktzꞌibꞌan kyibꞌ. 4 Astilji te Chep owetz tuj te amaqꞌ Nasaret tuj tkwentil Galiley bꞌix ojax Belen, aj tamaqꞌ te Dawid oqtxiꞌ, oxik tzi tzan tpaj ax tetz jun tijajil Dawid. 5 Ntons oxik Belen tzꞌibꞌal tibꞌ junx tukyꞌi Liy, aj txuꞌjelb bꞌix te Liy chꞌinky tuq tkyꞌix. 6 Ntons, aj man tuq ateꞌ Belen, te Liy opon tyemp tetz tzan titzꞌjik te tal. 7 Tzi owitzꞌjik te tbꞌay tal bꞌix owok tbꞌalqꞌiꞌ tam te neꞌ bꞌix oqex twatzaꞌ tuj jun chok kye aloꞌmj tzan tpaj ojetq kyenoj kye posad jaꞌ tzan kykaj.
Aj Kypon Kye Angel Swal Tpakbꞌalil Kyukyꞌi Kye Pastoriyon
8 Ntons, qaynin tzi tuj Belen, ateꞌ tuq txqꞌan pastoriyon aj nkyekꞌulun kwent tuq kyaloꞌ qonikꞌan. 9 Bꞌix derepent jun ángel tlajen Qajawil ojaw kanet kywitz bꞌix owok bꞌan xhkꞌatun aj jaꞌ tuq akyeqet tzan tpaj xhchqitzꞌunal te Qajawil, bꞌix kyetz bꞌan nkyexobꞌ tuq. 10 Per te ángel oxik tqꞌumaꞌ ikxjani: “¡Kꞌon kxobꞌ! Wetz ma kyinꞌul qꞌumal jun tpakbꞌalil galan etetz, bꞌix okyechalajel kyaqil xjal tiꞌj. 11 Ajnaꞌl maꞌtx tzꞌitzꞌjik jun koloyon etiꞌj, a tetz te Koloyon Aj Qꞌumankaj Tuq Oqtxiꞌ, a tetz te Tajawil Tiꞌj Kyaqil. Maꞌtx tzꞌitzꞌjik tuj tamaqꞌ te Dawid. 12 Bꞌix tzan tel enikyꞌ tiꞌj te neꞌ, otzajel ekambꞌaꞌ watzanqex tuj jun chok kye aloꞌmj bꞌix bꞌatzꞌoꞌ tuj tam.” 13 Bꞌix derepent ejaw kanet bꞌan kyꞌilaꞌj txqꞌanky ángel tlajen Dios tzajnaqeꞌ tuj kaꞌj, bꞌix nxik kyqꞌumaꞌ tuq tbꞌanil yol te jiqꞌbꞌil te Qtata Dios: 14 “Qet jiqꞌbꞌaꞌxwit te Qtata Dios kyaqil tuj kaꞌj, bꞌix yatzun twitz txꞌoꞌtxꞌ inkynaꞌon kye xjal jun chewsbꞌil kykꞌuꞌj, kyetz aj bꞌan ganimeꞌ tzan Qtata Dios.”
15 Ya ma kyeꞌaj kye ángel tuj kaꞌj, kye pastoriyon eꞌokten yoliyon [tzan kxik eꞌel te neꞌ]. “Qwaꞌqnajji tuj Belen eꞌel kyaqil aj maꞌtx tzaj tqꞌumaꞌ te Qajawil qetz.” 16 Ntons nkyekayayan tuq tzan kxik eꞌel te neꞌ, bꞌix otzaj kykambꞌaꞌ te Liy bꞌix te Chep, bꞌix te neꞌ watzanqex tuq tuj kchok kye aloꞌmj. 17 Ya ma tzꞌok kyen te neꞌ, kye pastoriyon eꞌokten qꞌumal kyaqil aj ojetq tuq xik qꞌumaꞌ kyetz tzan te ángel, 18 bꞌix kyaqil kye xjal aj eꞌok chaꞌon kyyol kye pastoriyon ebꞌajlabꞌan tiꞌj. 19 Yatzun te Liy, kyaqil ntzani cha tuq atqex tuj tanim. 20 Ya ma kyemeltzꞌjik kye pastoriyon, bꞌan nqet tuq kyjiqꞌbꞌaꞌ te Qtata Dios bꞌix nxik ksiꞌ tuq pixon te tetz tzan tpaj aj ojetq tzꞌok kchaꞌoꞌ bꞌix aj ojetq tzꞌok kyen, kyaqil aj ojetq tuq kyꞌik iktzaꞌx aj oxik qꞌumaꞌ kyetz tzan te ángel.
Aj Txik Kyin Te Neꞌ Jesus Tuj Te Nin Jay Nabꞌil Qtata Dios
21 Ya ma jakon jun saman tzan tok siꞌ techalul te neꞌ,* owok ksiꞌ tbꞌi Jesus, axkix te tbꞌi aj oxik qꞌumaꞌ te Liy tzan te ángel aj minaꞌ tuq tkaj kyꞌaqwaj.* 22 Bꞌix yaji, ya ma kyꞌik te tyemp aj tgan tuq te Kawbꞌil tzan kykaj saq tuj twitz Qtata Dios [tzan tpaj titzꞌjlen te kꞌwaꞌl], kyetz oxik kyin te kꞌwaꞌl Jerusalen tzan tkaj kyqꞌapoꞌ tuj tqꞌabꞌ Qajawil, iktzaꞌx tzꞌibꞌankaj tuj te Kawbꞌil aj okaj tsiꞌ Moisés oqtxiꞌ.* 23 Komo tzꞌibꞌankaj tuj tkawbꞌil te Qajawil ikxjani: “Kyaqil tbꞌay kꞌwaꞌl ichan owokel qꞌumaꞌ pawankaj te Qajawil.”* 24 Ntons ebꞌajxwaꞌq qꞌapol te kypresent te Qajawil iktzaꞌx qꞌumankaj tuj Tkawbꞌil ikxjani: “Kabꞌeꞌ tal alpagr qatzun kabꞌeꞌ tal tirisculji.”*
25 Ntons, tuj aj tyempji nnajan tuq tuj Jerusalen jun xjal tbꞌi Simeón. Tetz jun xjal aj nbꞌet tuq tuj tumeꞌl tuj twitz Qtata Dios bꞌix bꞌan nxjanin tuq Qtata Dios bꞌix loꞌik tuq tkꞌuꞌj tujbꞌaꞌn te Qtata Dios ojawel tin tuq kykꞌuꞌj kye aj tijajil Israel [tzan te Koloyon Aj Qꞌumankaj Oqtxiꞌ], bꞌix te Txew Dios atqet tuq tukyꞌiꞌl. 26 Te Txew Dios ojetq tuq xik tqꞌumaꞌ tetz, nlay tuq kamik qa minaꞌ tuq tok ten te Koloyon Aj Qꞌumankaj Oqtxiꞌ aj oje kaj swaꞌ tzan te Qtata Dios. 27 Aj qꞌijji te Txew Dios oxik tqꞌumaꞌ tuj tanim tzan txik tuj te Nin Jay Nabꞌil Qtata Dios. Aj tpon kyeqꞌiꞌ kye kꞌwaꞌlon te neꞌ Jesus tzan kykꞌulun iktzaꞌxkix te Kawbꞌil ntqꞌumaꞌ, 28 te Simeón ojaw xhcheleꞌ te neꞌ bꞌix oyolin yol jiqꞌbꞌil te Qtata Dios, oxik tqꞌumaꞌ te Qtata Dios ikxjani: 29 “Wajaw, ajnaꞌl bꞌaꞌn tzan nkamik tzan tpaj maꞌtx achewsaj nkꞌuꞌj iktzaꞌx otzaj aqꞌumaꞌ wetz. 30 Komo ajnaꞌl maꞌtx tzꞌok wen tukyꞌi kykabꞌil nwitz te Koloyon aj maꞌtx tzaj alajoꞌ, 31 bꞌix maꞌtx bꞌantik awitzaꞌ ikxji tzan tok kchaꞌoꞌ kyaqil xjal twitz txꞌoꞌtxꞌ. 32 Te ja ntzani owokel jun chkꞌatunal tuj kywitz kye xjal aj nyaꞌtx tijajil Israel, bꞌix te jun jiqꞌbꞌil kye aj tijajil Israel.”*
33 Ntons, te kꞌwaꞌlon bꞌix te alon bꞌan nkyelabꞌan tuq tiꞌj te aj otqꞌumaj te Simeón tiꞌj te neꞌ. 34 Ntons te Simeón ax eqet tkyꞌiwlaꞌ kye kꞌwaꞌlon bꞌix oxik tqꞌumaꞌ tetz te Liy ikxjani: “Tzaj achaꞌoꞌ, ja neꞌni oje kaj siꞌ tzan kxik tsiꞌ tuj il kyꞌilaꞌj qxjalil aj tijajil Israel, per ax okoloyon kyiꞌj kyꞌilaꞌj txqꞌanky qxjalil.c Bꞌix tetz oje kaj siꞌ tzan sten qxol te jun seny per owelal ikꞌoꞌ. 35 Tzan tpaj tetz, owokel chaꞌoꞌ kyaqil aj nyolin tuj kyanim kye xjal. Bꞌix tzan tpaj aj okyꞌel tiꞌj awal, owokel jun nim xhchoꞌnal tuj awanim.”
36 Ntons ax atqet tuq txini jun xuj aj yolil tyol Dios, An tbꞌi. Tetz tmeꞌal Fanwel tuq, bꞌix tijajil Aser, bꞌix bꞌan bꞌiꞌxhtky tuq. Tetz cha wuq aqꞌbꞌi owok junan tukyꞌi tichmil 37 bꞌix yaji okaj byud. Ojetq tuq jakon kaj tuj oqal (84) aqꞌbꞌi tetz, bꞌix kꞌontiꞌl okaj tsiꞌ te Nin Jay Nabꞌil Qtata Dios, bꞌix bꞌajqꞌij bꞌix bꞌajaqꞌbꞌil tetz nnaꞌon tuq te Qtat, bꞌix nꞌipan tuq waꞌij tzan txnaqꞌtzan. 38 Ntons man tuq nyolin te tij [kyukyꞌi stat te Jesus], te bꞌiꞌxh opon kyukyꞌiꞌl bꞌix oxik tsiꞌ pixon te Qtata Dios tiꞌj te neꞌ bꞌix oxik tqꞌumaꞌ tiꞌj te neꞌ kyukyꞌi kyaqil kye xjal aj loꞌik kykꞌuꞌj tzan kykolpjik kye aj Jerusalen.
Aj Tjaw Kyꞌibꞌ Te Jesus
39 Ntons, ya ma kykꞌuluj kyaqil aj ntqꞌumaꞌ tuq te Kawbꞌil, yaji kyetz ebꞌajmeltzꞌjik tuj kyamaqꞌ Nasaret tuj tkwentil Galiley.* 40 Te kꞌwaꞌl jun rat stzaj bꞌix bꞌajqꞌij tuq ntzaj siꞌ mas tnabꞌl bꞌix te Qtata Dios nkꞌulun tuq nim bꞌan galan tukyꞌiꞌl.
41 Ntons kye stat te Jesus aqꞌbꞌiaꞌ tuq nkyexik tuj Jerusalen tuj te qꞌij Paskw,* 42 bꞌix te Jesus aj tjakon kabꞌlajuj aqꞌbꞌi tetz, ax tetz oxik kyukyꞌi stat tuj te qꞌij iktzaꞌx tuq naqꞌikeꞌ tzan kxik. 43 Ya ma mankun te qꞌij, ikjaꞌn tuq kyajtz kyjay, per te Jesus okajten tuj Jerusalen bꞌix kye stat kꞌontiꞌl owok ksiꞌ kynabꞌl tiꞌj. 44 Kyetz tuj kynabꞌl qa te Jesus ajun tuq kxol kye kyukyꞌiꞌl, ikxji kyetz ebꞌajxik bꞌix ojetq tuq xik kybꞌeteꞌ jun qꞌij kybꞌey. Per ya ma qet kyjoyoꞌ kxol kye kyfamily bꞌix kye xjal aj kyotzqiꞌ 45 kꞌontiꞌl owoknoj kyitzaꞌ. Ntons ebꞌajmeltzꞌjik junkyꞌel tuj Jerusalen joyol tetz.
46 Ya ma kyꞌik toxiꞌ qꞌij tuq tqetlen kyjoyoꞌ, owoknoj kywitz tuj te Nin Jay Nabꞌil Qtata Dios, witꞌlik tuq kxol kye xnaqꞌtzal Kawbꞌil, nchaꞌon tuq kyiꞌj bꞌix nxik tuq xhchaꞌoꞌ tidiꞌchq kyetz. 47 Bꞌix kyaqil kye aj nkyechaꞌon tuq tiꞌj bꞌan nkyelabꞌan tuq tzan tpaj tlistul bꞌix tzan tpaj titzaꞌ nꞌaj stzaqꞌbꞌeꞌ kyetz tukyꞌi jun tumeꞌl bꞌan galan. 48 Ya ma tzꞌoknoj tzan kye stat, kyetz oje kyelabꞌan tiꞌj. Tzaj te tnan, oxik tqꞌumaꞌ tetz ikxjani: “¿Wal, tistil ma akꞌuluj ikxjani qukyꞌila? Qetza nqojoyon awiꞌj, bꞌan nqobꞌisuna tuq awiꞌj.” 49 Te Jesus owaj stzaqꞌbꞌeꞌ kyetz ikxjani: “¿Tistil nkxjoyon tuq jaꞌchq? ¿Kꞌontiꞌl petzun tuq etebꞌen wetz presis tzan nten tuj tjay Ntat?” 50 Yatzun kyetz kꞌontiꞌl owel kynikyꞌ tiꞌj aj otzaj tyoliꞌ kyetz. 51 Ntons owaj kyukyꞌiꞌl tuj kyamaqꞌ Nasaret, bꞌix nꞌokslan tuq te kyetz. Yatzun te tnan, kyaqil ntzani cha tuq atqex tuj tanim. 52 Te Jesus bꞌajqꞌij at tuq mas tnabꞌl bꞌix jun rat stzaj, bꞌix nꞌel galan tuq tuj twitz Qtata Dios bꞌix tuj kywitz kye xjal.