Gaꞌnḯn Ma̱ꞌan Jesús gaꞌanj gànàtàꞌ nej yùhuìj sí gaꞌnaꞌ ga̱huin chru̱n riñanj si-nùguànꞌ Ma̱ꞌan Ñaꞌanj an
9
Nga gisîj nagiꞌhiaj chre̱ꞌ Ma̱ꞌan Jesús nej yùhuìj nej sí gaꞌnaꞌ ga̱huin chru̱n riñanj,
ni̱ giꞌhia si ga̱na̱huin nùkuaj nej sij,
ni̱ giꞌhia si gi̱nikaj su̱n nej sij riñan daranꞌ nej sa kï̱j ï ni̱ ga̱ꞌhue ga̱na̱huin daranꞌ nej guiì aꞌnanꞌan gi̱ꞌhiaj nej sij.
2 Ni̱ gaꞌnḯn Ma̱ꞌan Jesús gaꞌanj nej sij guendâ gànàtàꞌ nej sij si-nùguànꞌ Ma̱ꞌan Ñaꞌanj an,
ni̱ gaꞌnïnꞌ sunj si gi̱ꞌhiaj nej sij ga̱na̱huin nej guiì aꞌnanꞌan.
3 Ni̱ gata gu̱nïn nej sij:
—Si̱ ginikaj nej suj sa ya̱ nej suj nga huaj nej suj ruhuâ chrej e,
ni̱ si̱ ginikaj nej suj chrun du̱guꞌnïnꞌ nej suj riñan hioꞌóo,
ni̱ si̱ gaꞌhue gi̱nikaj nej suj nnanj,
ni̱ rachrúun,
ni̱ sanꞌanj an,
ni̱ si̱ ga̱ꞌhue gi̱nikaj nej suj huìj atsìj i guendâ gi̱nun nej suj.
4 Ni̱ ahuin na̱nj hueꞌ ña̱n ga̱tu̱ nej suj,
ni̱ gùnàj nej suj hiuj dânj,
nda gui ga̱hui̱ nej suj ga̱ꞌa̱nj nej suj.
5 Ni̱ si nun ga̱ꞌhue̱j nej sij ga̱na̱huin raꞌa nej sij nej suj,
ni̱ ga̱hui̱ nej suj ruhuâ yumanꞌ snàꞌànj dânj,
ni̱ na̱gunanꞌ nej suj hioꞌó hia̱j màn riki siganï̂nj nej suj ni̱ oꞌ huin sa gànàtàꞌ dàj giꞌhiaj nej sij ngà nej suj.
6 Ni̱ nga gahui nej sij gaꞌanj nej sij ni̱ gachîn nej sij ñan màn nej ranchu,
ni̱ ganataꞌ nej sij si-nùguànꞌ Ma̱ꞌan Ñaꞌanj an riñan nej guiì màn hiuj dânj ni̱ giꞌhiaj nej sij si ga̱na̱huin nej guiì aꞌnanꞌan dànèꞌ gahuin ñan guchiꞌ nej sij.
Gahuiꞌ Juan Bautista
7 Ni̱ gunïn síchìj Herodes tetrarca daranꞌ nej sa sàꞌ giꞌhiaj Ma̱ꞌan Jesús;
ni̱ guruguiꞌ chìꞌ ruhuâ sôꞌ dadinꞌ gataj daranꞌ nej guiì,
si ganaꞌnï̂nj Juan siganï̂nj nej nîman;
8 Ni̱ aꞌngô da̱ꞌa̱j nej guiì gataj:
Si Elías huin sa gaꞌnaꞌ ñûn;
ni̱ aꞌngô da̱ꞌa̱j ninj gataj:
Si ꞌngo̱ nej profeta gane diû ri̱ki ganaꞌnï̂nj siganï̂nj nej nîman.
9 Ni̱ gataj Herodes:
—Ñùnj gaꞌnïnꞌ su̱n ni̱ gaꞌneꞌ nej sij ahui Juan;
hiôꞌ ni̱ ahuin sí huin sí nânj dadinꞌ ûta gunḯn sa giꞌhiaj sôꞌ ràꞌaj.
Ni̱ ûta huin ruhuâ sôꞌ gi̱niꞌin sôꞌ Ma̱ꞌan Jesús.
Gaꞌhuiꞌ Ma̱ꞌan Jesús ya ùnꞌùnꞌ mîn síi
10 Nga nanikàj nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ ganataꞌ nej sôꞌ daranꞌ nej sa giꞌhiaj nej sôꞌ.
Ni̱ ni̱ka̱j Ma̱ꞌan Jesús gaꞌan nej sij ni̱ gahuin ane ngà nej sij riñan hioꞌó hua̱ nàkòo huin doꞌó yumanꞌ snàꞌànj gùꞌnàj Betsaida.
11 Ni̱ nga gunïn nej guiì si gaꞌanj Ma̱ꞌan Jesús yumanꞌ snàꞌànj dânj,
ni̱ nìkòꞌ ninj gaꞌanj ninj Ma̱ꞌan;
ni̱ ganahuin raꞌa Ma̱ꞌan ninj ni̱ ganataj si-nùguànꞌ Ma̱ꞌan Ñaꞌanj an riñan ninj,
ni̱ giꞌhia si ga̱na̱huin nej guiì aꞌnanꞌan.
12 Sani̱ gàꞌ ꞌna̱ꞌ gìnìn;
ni̱ gaꞌnaꞌ nichì nej yùhuìj sí gaꞌnaꞌ ga̱huin chru̱n riñan Ma̱ꞌan Jesús,
ni̱ gataj nej sôꞌ:
—Gànàꞌnï̀nj rèꞌ na̱nꞌ nej guiì,
daꞌnga ni̱ gaꞌanj ninj nej ranchu ni̱ riñan hioꞌó màn ganikàj rukû ña̱n màn nêꞌ nânj,
daꞌnga ni̱ gìrìꞌ ninj ñan gùnàj ninj ni̱ gìrìꞌ ninj sa ya̱ ninj;
dadinꞌ ña̱n màn nêꞌ nânj ni̱ hioꞌó nàkòo huin.
13 Ni̱ gataj Ma̱ꞌan Jesús:
—Gàꞌhuìꞌ nej suj sa ya̱ nej guiì nânj.
Ni̱ gataj nej sí ꞌna̱ꞌ ga̱huin chru̱un gu̱nïn Ma̱ꞌan Jesús:
—Man ùnꞌùnꞌ gè rachrúun ni̱ huìj gè yukuaj a nikaj nej ñûnj,
si ga̱ꞌa̱nj gi̱ra̱n nej ñûnj nihia yâ daranꞌ nej guiì rigì nânj sàꞌ.
14 Ni̱ màn daꞌngaꞌ ꞌngo̱ si̱ ùnꞌùnꞌ mîn nej síi.
Hiôꞌ ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
—Ga̱ta̱j nej suj si ga̱ꞌa̱nj ga̱ne nej guiì daꞌ yiꞌnïnꞌïn,
daꞌ huìj xia chi̱ꞌ daꞌ huìj xia chi̱ꞌ.
15 Ni̱ huê danj giꞌhiaj nej sôꞌ,
ni̱ gataj nej sôꞌ si ga̱ꞌa̱nj ga̱ne daranꞌ nej guiì riñan hioꞌóo.
16 Ni̱ gidaꞌa Ma̱ꞌan Jesús nej ùnꞌùnꞌ rachrúun ngà huìj yukuaj a,
ni̱ ganachi ni̱ka̱j ñanj neꞌ yàtàꞌa ni̱ gaꞌhuij si guruhuâ Ma̱ꞌan Ñaꞌanj an,
ni̱ gaꞌnej nej rachrúun ni̱ gaꞌhuij raꞌa nej sí gaꞌnaꞌ gahuin chru̱n riñanj ni̱ guneꞌ nej sôꞌ riñan nej guiì.
17 Ni̱ ya daranꞌ nej guiì ni̱ gunumân riki ninj;
ni̱ ganaranꞌ nej sij nej rachrún gunâj dânj,
ni̱ ganasîj nda yùhuìj yugûti nej rachrún dasû lij dânj ganachra ganaranꞌ nej sij.
Gataj Pedro si Cristo huin Ma̱ꞌan Jesús
18 Gahuin ꞌngo̱ gui dânj nga nne anêj Ma̱ꞌan Jesús aꞌmin ngà Ma̱ꞌan Ñaꞌanj an,
ni̱ nne nej sí gaꞌnaꞌ ga̱huin chru̱un ngà Ma̱ꞌan;
ni̱ gachín naꞌan nej sôꞌ ni̱ gata:
—Ahuin sa huín gataj nej guiì ràꞌaj.
19 Ni̱ nanikàj nej sôꞌ ni̱ gataj nej sôꞌ:
—Da̱ꞌa̱j nej sij gataj si huê Ma̱ꞌân rèꞌ huin Juan Bautista;
ni̱ aꞌngô da̱ꞌa̱j nej sij gataj si huê Ma̱ꞌân rèꞌ huin Elías;
ni̱ aꞌngô da̱ꞌa̱j nej sij gataj si huê Ma̱ꞌân rèꞌ huin ꞌngo̱ nej sôꞌ gataj dàj ga̱huin nej sôꞌ gane diû nâ ni̱ ganaꞌnï̂nj sôꞌ siganï̂nj nej nîman.
20 Ni̱ gataj Ma̱ꞌan Jesús:
—Dàj anîn ruhuâ nej suj,
ni̱ ahuin sa huín taj nej suj ràꞌaj.
Hiôꞌ ni̱ nanikàj Pedro ni̱ gataj sôꞌ:
—Huê Ma̱ꞌân rèꞌ huin Cristo Daꞌní Ma̱ꞌan Ñaꞌanj an.
Gataj Ma̱ꞌan Jesús si ga̱huij
21 Sani̱ gataj Ma̱ꞌan Jesús gu̱nïn nej sí ga̱ꞌnaꞌ ga̱huin chru̱n riñanj,
si̱ gananï̂n nej sôꞌ nej nuguanꞌ nânj riñan gàꞌ si ꞌngo̱ rïn nej guiì,
ni̱ ûta duguta sunj riñan nej sôꞌ sisi̱ si̱ gananï̂n nej sôꞌ rayiꞌî nuguanꞌ nânj
22 ni̱ gata:
—Hua̱ ni̱ña̱n si̱ ûta gi̱ranꞌ sàñùnj,
ni̱ si̱ gininj hueꞌé riñan nej síchìj achij i,
ngà nej rej huin ña̱an ni̱ ngà nej sí chru̱n ley ni̱ gàhuìj,
sani̱ ga̱chin huàꞌnï̀nj gui ni̱ gànàꞌnï̀n siganï̂nj nej nîman.
23 Ni̱ gata riñan daranꞌ nej sí gaꞌnaꞌ ga̱huin chru̱n riñanj:
—Si hua̱ ꞌngo̱ nej suj ruhuâ gìnikòꞌ rukú,
ni̱ gu̱dunâj nej suj daranꞌ nej sa garanꞌ ruhuâ nneè kú nej suj,
ni̱ ga̱ ruhuâ nej suj gi̱ranꞌ sa̱ñu̱n nej suj daꞌ gui ni̱ gìnikòꞌ nej suj ñùnj.
24 Dadinꞌ daranꞌ nej guiì naꞌhuej ruhuâ gi̱ranꞌ sa̱ñu̱n,
ni̱ ga̱ꞌa̱nj ni̱ꞌhia ninj;
ni̱ daranꞌ nej guiì hua̱ ruhuâ gi̱ranꞌ sa̱ñu̱n rayiꞌí,
ni̱ ga̱na̱ni̱n ninj.
25 Dadinꞌ nùnj guèndà niꞌñanj si gìrìꞌ nej guiì daranꞌ nej sa màn ruhuâ yumiguìi ga̱ riñan ninj,
si gu̱durëꞌ ninj ma̱ꞌan ninj nej si ga̱ꞌa̱nj ni̱ꞌhia̱ ninj ràꞌaj.
26 Dadinꞌ nej guiì giriꞌ sinàꞌàj a rayiꞌí ngà rayiꞌî si-nùguànꞌànj,
ni̱ gìrìꞌ nàꞌà niꞌín guiì dânj nga ga̱ꞌna̱ꞌ gi̱nikaj sùnj,
ni̱ huê danj na̱nj gìrìꞌ Ma̱ꞌan Rê Ñaꞌanj an sinàꞌàj a rayiꞌî nej guiì dânj,
nga ga̱ꞌna̱ꞌ gi̱nikaj su̱n Ma̱ꞌan ngà nej ángel huin sa gèe.
27 Sani̱ yàngàꞌ hia nï̀nꞌ gàtà ni̱ hua̱ da̱ꞌa̱j nej guiì màn hiuj nânj,
ni̱ si̱ gahuiꞌ ninj dadinꞌ gi̱ni̱ꞌin ninj ga̱ꞌna̱ꞌ gi̱nikaj su̱n Ma̱ꞌan Ñaꞌanj an riñan ninj.
Nadunâ Jesús Ma̱ꞌan
28 Neꞌ rùkù nga gachîn ꞌngo̱ si tï̱nj gui nga gaꞌmin Ma̱ꞌan Jesús nej nuguanꞌ nânj,
ni̱ ni̱ka̱j Ma̱ꞌan gaꞌan Pedro,
Juan ni̱ Jacobo,
raa̱ ꞌngo̱ kï̱j ï guendâ ga̱ꞌmi̱n ngà Ma̱ꞌan Ñaꞌanj an.
29 Ni̱ nga nï̀nꞌ aꞌmin ngà Ma̱ꞌan Ñaꞌanj an,
ni̱ nadunâ riñan Ma̱ꞌan,
ni̱ ganahuin gàtsì nï̀nꞌ si-gaꞌanj ni̱ nda ran chre ganahuin atsîj dânj.
30 Ni̱ ni̱kï̱nꞌ huìj síi gaꞌmin nguèj sôꞌ ngà Ma̱ꞌan Jesús,
ni̱ ꞌngo̱ sôꞌ huin Moisés ni̱ aꞌngô sôꞌ huin Elías,
31 ni̱ nda raa̱n chre ganahuin rukû nej sij,
ni̱ narïsnaꞌanj nguèj sij ngà Ma̱ꞌan Jesús si hua̱ ni̱ña̱n si ga̱huij ruhuâ yumanꞌ snàꞌànj Jerusalén.
32 Ni̱ ûta gaꞌnaꞌ nnej e riñan Pedro ni̱ huê danj na̱nj gaꞌnaꞌ nnej e riñan nej sôꞌ nne ngà Pedro;
sani̱ gunùkuaj nej sij gane nìꞌnàꞌ nej sij,
ni̱ giniꞌin nej sij si nda raa̱n chre ganahuin Ma̱ꞌan Jesús,
ni̱ huê danj na̱nj nda raa̱n chre ganahuin nguèj sôꞌ ni̱kï̱nꞌ ngà Ma̱ꞌan Jesús.
33 Ni̱ nga guxun nej sôꞌ ma̱ꞌan nej sôꞌ riñan Ma̱ꞌan Jesús,
ni̱ gataj Pedro gu̱nïn Ma̱ꞌan Jesús:
—Maestrûj,
dùgùnàj hua̱j rûꞌhuaj si ga̱ne nêꞌ hiuj nânj;
ni̱ gi̱ꞌhioꞌ huàꞌnï̀nj hueꞌ rekoj o,
ꞌngo̱j gane Ma̱ꞌân rèꞌ,
ni̱ aꞌngoj gane Moisés,
ni̱ aꞌngoj gane Elías;
sani̱ nun niꞌin daꞌngaꞌ Pedro sa ga̱ꞌmi̱n sôꞌ mánj.
34 Nga nï̀nꞌ ga̱ꞌmi̱n Pedro nej nuguanꞌ nânj ni̱ gaꞌnaꞌ ꞌngo̱ nnga ni̱ garan;
ni̱ guyuꞌhuiꞌ nej sij nga giniꞌin nej sij gatûj nej sôꞌ siganï̂nj nga dânj.
35 Ni̱ gunïn nej sij gaꞌmin ꞌngo̱ sa gaꞌmin siganï̂nj nnga dânj,
ni̱ gata:
—Nânj huin Daꞌnî ni̱ ûta ꞌì ruhuâj niꞌín Ma̱ꞌan;
ni̱ gu̱nïn nej suj nej nuguanꞌ ga̱ta gu̱nïn nej suj.
36 Ni̱ nga gisîj gaꞌmin sa gaꞌmin dânj,
ni̱ giniꞌin nej sí ꞌna̱ꞌ ga̱huin chru̱un si ꞌngo̱ rïn Ma̱ꞌan Jesús nikïnꞌ hiuj dânj;
sani̱ dḯn gahuin duꞌhua nej sôꞌ,
ni̱ nej gui dânj ni̱ nun ga̱na̱nï̱n nej sôꞌ sa giniꞌin nej sôꞌ riñan gàꞌ si̱ ꞌngo̱ nej guiì.
Giꞌhiaj Ma̱ꞌan Jesús ganahuin ꞌngo̱ sí nu̱n nanè kï̱j huaa ruhuâ nimân
37 Ni̱ aꞌngô gui dânj nga gananinj nej sij yiꞌî kïj dânj,
ni̱ ûta gàꞌì nej guiì gahui gaꞌanj ganahuin ra̱ꞌa nej sij.
38 Ni̱ siganï̂nj nej guiì rìgì dânj nikïnꞌ ꞌngo̱ sí dânj ni̱ ûta nùkuaj gaꞌmin sôꞌ ni̱ gataj sôꞌ:
—Maestrûj,
gachín nìꞌhia riñan Ma̱ꞌân rèꞌ ni̱ ruhuâj si gi̱ni̱ꞌhiaj Ma̱ꞌân rèꞌ daꞌnin dadinꞌ aꞌnanꞌ sij,
ni̱ ꞌngo̱ rïn sij huin riñânj;
39 Ni̱ dàj na̱nj orâ ni̱ gidaꞌa ꞌngo̱ nanè kï̱j hua̱a sij,
ni̱ dàj na̱nj orâ ni̱ gayiꞌì sij ni̱ gaguâj hia sij giꞌhia,
ni̱ ûta nagunanj sij,
ni̱ nìkòꞌ ata̱nꞌan duꞌhua sij giꞌhiaj,
ni̱ ûta duguaꞌij sij,
ni̱ nda nuhuiꞌ si sàꞌ dan ganaꞌnï̂n raꞌa sij.
40 Ni̱ gachín ni̱ꞌhia riñan nej sí gaꞌnaꞌ ga̱huin chru̱n riñan Ma̱ꞌân rèꞌ si̱ gi̱ri̱ nej sôꞌ ruhuâ nimân daꞌnî nanè kï̱j hua̱ nânj,
sani̱ nun ga̱ꞌhue gi̱ri̱ nej sôꞌ mánj.
41 Nanikàj Ma̱ꞌan Jesús ni̱ gata gu̱nïn nej sí dânj:
—Aya̱ꞌ nej yiꞌnïnꞌ suj dadinꞌ nitaj si guyumân nìko ruhuâ nej suj,
yiꞌnïnꞌ giꞌhiaj gakï̱nꞌ suj gàꞌ manꞌ.
Nda andaj diû daꞌhuí gané ngà nej suj ni̱ ga̱ nùkuaj ruhuâj ngà nej suj gàꞌ únj.
Gi̱nikaj daꞌnîꞌ ga̱ꞌna̱ꞌ neꞌ dànanj na̱nj ánj.
42 Ni̱ nga gahuin nìchrùnꞌ silíj dânj riñan Ma̱ꞌan Jesús ni̱ dunatûj nanè kï̱j hua̱ dânj sôꞌ ni̱ ûta nùkuaj nagunanj silíj dânj;
sani̱ dugunïn gàꞌì Ma̱ꞌan nanè kï̱j hua dânj,
ni̱ giꞌhia si ganahuin silíj nânj,
ni̱ nagaꞌhuij silíj dânj raꞌa rej sôꞌ.
43 Ni̱ ûta gahuin ña̱ꞌanj ruhuâ daranꞌ nej guiì rayiꞌî sa nìko staꞌu giꞌhiaj Ma̱ꞌan Ñaꞌanj an.
Gataj ñûn Maꞌan Jesús si ga̱huij
Ni̱ ûta gahuin ña̱ꞌanj ruhuâ daranꞌ nej guiì rayiꞌî nej sa giꞌhiaj Ma̱ꞌan Jesús,
ni̱ gata gu̱nïn nej sí gaꞌnaꞌ gahuin chru̱n riñanj:
44 —Hueꞌê gu̱nïn nej suj nuguanꞌ gàtà;
dadinꞌ nàgàꞌhuìꞌ nej sij ñùnj raꞌa nej síi.
45 Sani̱ nun ga̱ꞌhue ga̱ra̱n daꞌngaꞌ ruhuâ nej sí gaꞌnaꞌ ga̱huin chru̱un nej nuguanꞌ nânj,
dadinꞌ hua̱ nï̀nꞌ hua huì man riñan nej sôꞌ ni̱ nun ga̱ꞌhue ga̱ra̱n daꞌngaꞌ ruhuâ nej sôꞌ;
sani̱ yuꞌhuiꞌ nej sôꞌ gàchìnj naꞌanj nej sôꞌ nej nuguanꞌ nânj riñan Ma̱ꞌan Jesús.
Ahuin sí huin sa aꞌnïnꞌ doj ràꞌaj
46 Hiôꞌ ni̱ gayiꞌì nej sí gaꞌnaꞌ ga̱huin chru̱un ni̱ ganarïsnaꞌanj naꞌanj nej sôꞌ ni̱ gataj nej sôꞌ,
ahuin goꞌngo̱ nêꞌ gahuin sí gàꞌnï̀nꞌ doj gàꞌ únj.
47 Ni̱ giniꞌin Ma̱ꞌan Jesús,
si dànanj ganï̂n ruhuâ nimân nej sij,
ni̱ gidaꞌa ꞌngo̱ sílìj i,
ni̱ ganïnj yiꞌnïn.
48 Ni̱ gata:
—Ahuin na̱nj sí ganahuin ra̱ꞌa ꞌngo̱ sílìj i ngà siyu̱guí,
ni̱ ñùnj ganahuin ra̱ꞌa nej sôꞌ;
ni̱ ahuin na̱nj sí ganahuin ra̱ꞌa ñùnj,
ni̱ ganahuin ra̱ꞌa nej sôꞌ Ma̱ꞌan sa gaꞌnḯn gaꞌná;
dadinꞌ sí nagiꞌhiaj lij doj ma̱ꞌan siganï̂nj nej suj;
ni̱ sí dânj ga̱huin sí achij doj siganï̂nj nej suj.
Sí nitaj si gata rùhuà ñùnꞌ ni̱ huin sôꞌ ngòꞌ
49 Hiôꞌ ni̱ nanikàj Juan ni̱ gataj sôꞌ:
—Maestrûj,
giniꞌin nej ñûnj si giri ꞌngo̱ sí dânj nanè kï̱j hua̱a ruhuâ nimân nej guiì ngà siyu̱gui Ma̱ꞌân rèꞌ;
ni̱ nagiꞌhiaj ha̱i̱ nej ñûnj dadinꞌ nitaj si gaché sij ngà nêꞌ.
50 Ni̱ gataj Ma̱ꞌan Jesús:
—Si̱ nagiꞌhiaj ha̱i̱ nej suj mánj;
dadinꞌ sí nitaj si gata rùhuà nêꞌ ni̱ huin sij ngà nêꞌ.
Ranꞌ Ma̱ꞌan Jesús Jacobo ngà Juan
51 Nga gisîj diû na̱nꞌ ñûn Ma̱ꞌan Jesús yàtàꞌa,
ni̱ gaꞌan Jerusalén,
ni̱ nun ga̱nï̱n yuꞌhuiꞌ ruhuâj.
52 Ni̱ gaꞌnḯn Ma̱ꞌan Jesús gaꞌanj nej sí gaꞌnaꞌ ga̱huin chru̱n riñanj,
ni̱ gatûj nej sôꞌ ruhuâ yumanꞌ huin yiñán nej sí màn yumanꞌ Samaria guendâ gi̱ꞌhiaj yu̱gui nej sôꞌ ña̱n gùnàj nej sij.
53 Sani̱ nu̱n ga̱ꞌhue̱j nej sí màn yumanꞌ Samaria ga̱na̱huin ra̱ꞌa nej sôꞌ Ma̱ꞌan,
dadinꞌ dàj rûnꞌ huaj si neꞌ Jerusalén gàꞌàn huaj.
54 Ni̱ giniꞌin Jacobo ngà Juan sa giꞌhiaj nej sí nânj ngà nej sij ni̱ gataj nguèj sôꞌ:
—Señor ruhuâ Ma̱ꞌân rèꞌ si gi̱ꞌhiaj nguèj ñûnj si gi̱ni̱nj ñaꞌaan yàtàꞌa,
dàj rûnꞌ giꞌhiaj Elías,
ni̱ ga̱na̱huij nej sij ga̱ka̱ nîꞌ.
55 Hiôꞌ ni̱ nanikàj Ma̱ꞌan Jesús ni̱ dugunïn gàꞌij nguèj sij ni̱ gata gunïn nguèj sij:
—Nun niꞌin nguèj suj dàj hua nanè nimân nguèj suj mánj;
56 dadinꞌ nun gàꞌnàj guendâ gi̱ꞌhia si ga̱ꞌa̱nj ni̱ꞌhia̱ ma̱ꞌan nimân nej guiì mánj,
gaꞌná guendâ ga̱na̱ni̱n ninj na̱nj ánj.
Huê dânj ni̱ gaꞌanj nej sij aꞌngô ranchu giꞌhiaj Ma̱ꞌan Jesús.
Nej guiì ruhuâ gi̱nikòꞌ rukû Ma̱ꞌan Jesús
57 Nga nï̀nꞌ gaché nej sij hua̱j nej sij ruhuâ chrej e,
ni̱ gataj ꞌngo̱ sí dânj gu̱nïn Ma̱ꞌan Jesús:
—Señor,
dànèꞌ gahuin ga̱ꞌa̱nj Ma̱ꞌân rèꞌ ni̱ gi̱nikó rukû Ma̱ꞌân rèꞌ.
58 Ni̱ gataj Ma̱ꞌan Jesús gu̱nïn sí dânj:
—Nej yune ni̱ hua̱ ruhuâ huej e ganarânj ruhuâ nej yôꞌ,
ni̱ nej yataj aché yàtàꞌa ni̱ hua̱ sigï̂tï̀nj in ñan ganarânj ruhuâ nej yôꞌ;
sani̱ ñùnj ni̱ nitaj si̱ hua̱ ña̱n ga̱na̱ra̱n ruhuâj mánj.
59 Ni̱ gataj Ma̱ꞌan Jesús gu̱nïn aꞌngô sí dânj:
—Ga̱ꞌna̱ꞌ sòꞌ ni̱ gi̱nikôꞌ rukú.
Ni̱ gataj sí dânj:
—Señor,
ga̱ra̱n yina Ma̱ꞌân rèꞌ si gàꞌàn ni̱ nga gahuiꞌ rê ni̱ nga gisîj gachín sij ni̱ gàꞌnàj ni̱ gi̱nikó rukû Ma̱ꞌân rèꞌ.
60 Ni̱ gataj Ma̱ꞌan Jesús:
—Gu̱du̱nâj sòꞌ si nej sí gàꞌ gahuiꞌi ni̱ gàchìnꞌ nej sôꞌ sí gàꞌ gahuiꞌ ngà nej sôꞌ,
sani̱ sòꞌ ni̱ ga̱ꞌna̱ꞌ ni̱ ga̱ꞌa̱nj gànàtàꞌ si-nùguànꞌ Ma̱ꞌan Ñaꞌanj an riñan nej guiì.
61 Hiôꞌ ni̱ gataj aꞌngô sí dânj gu̱nïn Ma̱ꞌan Jesús:
—Señor;
gi̱nikó rukû Ma̱ꞌân rèꞌ,
sani̱ ga̱ra̱n yina Ma̱ꞌân rèꞌ si gàꞌ si̱nï̱n ga̱ꞌa̱nj gi̱da̱ꞌaj raꞌa nej duguiꞌí màn dukuá ni̱ gàꞌnàj.
62 Ni̱ gataj Ma̱ꞌan Jesús:
—Gàꞌ si̱ ꞌngo̱ sí gidaꞌa ne nga ganachej sôꞌ hioꞌóo,
ni̱ si̱ gaꞌhue nànìkàj sôꞌ gi̱ni̱ꞌhiaj sôꞌ neꞌ rùkù sôꞌ mánj,
ni̱ huê dànanj si gaꞌhue nànìkàj rùkù sí ruhuâ gi̱nikòꞌ rukú,
dadinꞌ si huê dànanj gi̱ꞌhiaj sôꞌ hiôꞌ ni̱ nitaj si hua̱ yu̱gui sôꞌ guendâ gi̱ꞌhiaj su̱n sôꞌ si-su̱n Ma̱ꞌan Ñaꞌanj an mánj.