Ganagui Ma̱ꞌan Jesús yùhuìj nej sí gi̱nikòꞌ rukuj
10
Hiôꞌ ni̱ gakḯn Ma̱ꞌan Jesús nej yùhuìj nej sí ꞌna̱ꞌ ga̱huin chru̱n riñanj, ni̱ gaꞌhuij si gi̱nikaj su̱n nej sôꞌ riñan nej nanè kï̱j huaa, ni̱ gi̱ri̱ nej sôꞌ nej nanè kï̱j huaa ruhuâ nimân nej guiì, ni̱ gi̱ꞌhiaj nej sôꞌ si ga̱na̱huin nej guiì aꞌnanꞌ ngà daran nej yiꞌìi ni̱ huê danj giꞌhiaj nej sôꞌ si ga̱na̱huin daranꞌ nej guiì aꞌngaj nneè kú.
2 Nânj huin nej siyu̱gui nej yùhuìj nej apóstol: Gàꞌ si̱nï̱n ꞌnaꞌ siyu̱gui Simón, ni̱ huê sôꞌ huin sí gùꞌnàj Pedro, ni̱ Andrés huin dinḯn sôꞌ; ni̱ Jacobo ngà Juan huin daꞌní Zebedeo;
3 Felipe, Bartolomé, Tomás, Mateo, sí gaꞌnêj sanꞌanj an, Jacobo huin daꞌní Alfeo, Lebeo, ni̱ huê sôꞌ gùꞌnàj Tadeo,
4 Simón sí ꞌna̱ꞌ riñan hioꞌó Kanán ngà Judas Iscariote, ni̱ sí nânj huin sí guduꞌhuêj Ma̱ꞌan Señor.
Gaꞌnḯn Ma̱ꞌan Jesús gaꞌanj gànàtàꞌ nej yùhuìj sí gaꞌnaꞌ ga̱huin chru̱n riñanj si-nùguànꞌ Ma̱ꞌan Ñaꞌanj an
5 Nej yùhuìj sí nânj gaꞌnḯn Ma̱ꞌan Jesús gaꞌanj, ni̱ gaꞌnïnj suun riñan nej sôꞌ, ni̱ gata gu̱nïn nej sôꞌ:
—Si̱ gaꞌanj nej suj ñan màn nej sí nàsìnùnj un, ni̱ si̱ gatûj nej suj ruhuâ yumanꞌ snàꞌànj huin yiñán nej sí màn Samaria mánj.
6 Ga̱ꞌa̱nj gànàtàꞌ si̱nï̱n nej suj si-nùguànꞌ Ma̱ꞌan Ñaꞌanj an riñan nej matsïj gaꞌanj ni̱ꞌhia̱ huin dukuâ Israel.
7 Ga̱ꞌa̱nj nej suj, ni̱ ga̱ta̱j nej suj: Gàꞌ gahuin nìchrùnꞌ Ma̱ꞌan sa ni̱ka̱j su̱n neꞌ yàtàꞌa.
8 Gi̱ꞌhiaj nej suj ga̱na̱huin nej guiì aꞌnanꞌan ni̱ gi̱ꞌhiaj nej suj si ga̱na̱huin nej guiì nnùn yiꞌì lepra, gi̱ꞌhiaj nej suj si ga̱na̱huin nìꞌnàꞌ nej guiì gàꞌ gahuiꞌi ni̱ gi̱ri̱ nej suj sa kï̱j ï ruhuâ nimân nej guiì; ni̱ ganahuin ra̱ꞌa chre nej suj sunuj u, ni̱ gàꞌhuìꞌ chre nej suj sunuj dânj riñan aꞌngô nej guiì.
9 ’Ni̱ nga ga̱ꞌa̱nj nej suj ni̱ si̱ gaꞌhue gi̱nun sanꞌanj oro, ngà sanꞌanj plata, ni̱ sanꞌanj kobre ruhuâ si-gosâ nej suj mánj;
10 Ni̱ si̱ gaꞌhue ga̱ta nej suj nnanj yati gi̱nun sa ya̱ nej suj nga huaj nej suj chrej e, ni̱ si̱ gaꞌhue gi̱nikaj nej suj huìj atsìj i gi̱nun nej suj ni̱ si̱ gaꞌhue gi̱nikaj nej suj aꞌngô ganïnj giꞌnïnj dakó nej suj, ni̱ gàꞌ si̱ gaꞌhue gi̱nikaj nej suj ꞌngo̱ chrun guendâ du̱guꞌnïnꞌ nej suj riñan hioꞌóo; dadinꞌ sí giꞌhiaj suun ni̱ hua̱ ni̱ña̱n si ga̱ duꞌhue sôꞌ.
11 ’Sani̱ nga gùchìꞌ nej suj ñan hua̱ ꞌngo̱ yumanꞌ snàꞌanj an nej si ñan hua̱ ꞌngo̱ yumanꞌan hua lij ni̱ ga̱tu̱ nej suj, ni̱ nàꞌhuìꞌ guentû nej suj ahuin ꞌngo̱ nej guiì màn hiuj dânj huin ꞌngo̱ guiì sàꞌa, ni̱ ga̱ne nej suj ruhuâ dukuâ guiì dânj nda gui ga̱hui̱ nej suj ruhuâ yumanꞌ dânj.
12 Ni̱ nga ga̱tu̱ nej suj ruhuâ ꞌngo̱ hueꞌe, ni̱ gi̱daꞌa nej suj raꞌa guiì dùkuà huin hueꞌ dânj.
13 Ni̱ si guiì sàꞌa huin guiì dùkuà hueꞌ dânj, ni̱ sa dïnꞌïnj hua̱ riñan nej suj dânj ga̱ꞌa̱nj riñan guiì dânj; ni̱ si sê guiì sàꞌa huin guiì nne ruhuâ hueꞌ dânj, ni̱ nànìkàj sa dïnꞌïnj dânj gàꞌnàj riñan nej suj.
14 Ni̱ si nun ga̱ꞌhue̱j nej guiì màn ruhuâ hueꞌ dânj ga̱na̱huin ra̱ꞌa ninj nuguanꞌ gaꞌmin nej suj riñan ninj, ni̱ nun ga̱ꞌhue̱j ninj gu̱nïn ninj nej nuguanꞌ gaꞌmin nej suj ni̱ ga̱hui̱ nej suj ruhuâ hueꞌ dânj ngà ruhuâ yumanꞌ snàꞌànj dânj, ni̱ na̱gunanꞌ nej suj hioꞌó hiaj màn riki dakó nej suj.
15 Yàngàꞌ hiaꞌ nï̀nꞌ gàtà ni̱ gui nga nagiꞌhiaj Ma̱ꞌan Ñaꞌanj an guenda riñan nej guiì, ni̱ dànanj ûta nìko gi̱ranꞌ sa̱ñu̱n nej guiì màn yumanꞌ nânj gàꞌ daꞌ nej guiì gimân yumanꞌ snàꞌànj Sodoma ngà yumanꞌ snàꞌànj Gomorra.
Diû gaꞌnaꞌ neꞌ ña̱an ni̱ ga̱ta̱ ra̱ꞌa nej síi nej sôꞌ nìkòꞌ rukû Ma̱ꞌan Jesús
16 ’Ni̱ꞌhia̱j nej suj, dadinꞌ gàꞌnï̀n ga̱ꞌa̱nj nej suj ni̱ ga̱huin nej suj dàj rûnꞌ huin nej matsïj ï siganï̂nj nej yuku stuj u; ni̱ gi̱ni̱ꞌhiaj nej suj; ni̱ dàj rûnꞌ hio yukuáa huê danj ga̱ hio nej suj, ni̱ ga̱huin nej suj guiì nìin dàj rûnꞌ giꞌhiaj yaꞌàan.
17 Ni̱ ga̱ gudadû nej suj ma̱ꞌan nej suj riñan nej guiì, dadinꞌ ga̱ra̱n ruhuâ ninj rayiꞌî nej suj riñan nej yiꞌnïnꞌ nej sí ni̱ka̱j su̱n riñan yumanꞌan, ni̱ gàꞌhuìꞌ nej sôꞌ niꞌhiaj nej suj ruhuâ hueꞌ huin si-nùhuì nej sôꞌ.
18 Ni̱ gi̱nikaj nej sôꞌ ga̱ꞌa̱nj nej sôꞌ nej suj riñan nej sí huin rej rayiꞌî Maꞌán, guendâ ga̱huin nej suj sí ga̱nikïnꞌ ga̱na̱nï̱n rayiꞌí daꞌnga ni̱ gi̱ni̱ꞌin nej sôꞌ ñùnj, ni̱ huê danj na̱nj ga̱na̱nï̱n nej suj rayiꞌí riñan nej guiì nàsìnùnj un.
19 Sani̱ nga gi̱nikaj nej sôꞌ ga̱ꞌa̱nj nej sôꞌ nej suj riñan nej sí ni̱ka̱j suun, ni̱ si̱ giriñun ruhuâ nej suj dàj ga̱ta̱j nej suj ni̱ dàj ga̱ꞌmi̱n nej suj riñan nej sí dânj; dadinꞌ orâ nga ga̱nikïnꞌ nej suj riñan nej sôꞌ ni̱ Ma̱ꞌan Ñaꞌanj an huin sa ri̱ki̱ nuguanꞌan dàj ga̱ꞌmi̱n nej suj.
20 Dadinꞌ sê nej suj huin sa ga̱ꞌmi̱n orâ dânj mánj, Ma̱ꞌan Espíritu Santo huin sa ga̱ra̱n sun ga̱ꞌmi̱n nej suj.
21 ’Ni̱ ga̱ra̱n ruhuâ ꞌngo̱ sí dânj rayiꞌî dinḯn sôꞌ riñan nej sí ni̱ka̱j suun guendâ da̱gahuiꞌ nej sôꞌ sí dânj, ni̱ ga̱ra̱n ruhuâ aꞌngô sí dânj rayiꞌî daꞌní sôꞌ guendâ da̱gahuiꞌ nej sij; ni̱ ga̱ra̱n ruhuâ aꞌngô sí dânj rayiꞌî rej sôꞌ, ni̱ da̱gahuiꞌ nej sí dânj rej sôꞌ.
22 Ni̱ gi̱ni̱nj ꞌì nej suj riñan daranꞌ nej guiì rayiꞌî siyu̱guí; sani̱ nej guiì gunùkuaj ga̱nikïnꞌ ran nda gui gàhuìꞌ ninj, ni̱ nej guiì nânj huin sa ga̱na̱ni̱n.
23 Ni̱ nga gata ra̱ꞌa nej síi nej suj ꞌngo̱ yumanꞌ snàꞌànj ni̱ ga̱ꞌa̱nj nej suj aꞌngô yumanꞌ snàꞌànj; dadinꞌ yàngàꞌ hia nï̀nꞌ gàtà, ni̱ si̱ ganahuij nej suj ga̱che̱ nej suj daꞌ hua̱ nï̀nꞌ gàchràꞌ riñan hioꞌó Israel nga ga̱ꞌna̱ꞌ ñún mánj.
24 ’Gàꞌ si ꞌngo̱ sí ꞌna̱ꞌ gahuin chru̱un ni̱ nitaj si huin sôꞌ doj gàꞌ daꞌ si-maestrû sôꞌ mánj, ni̱ sí giꞌnïnj giꞌhiaj sun chre riñan si-yi̱ruꞌhue ni̱ nitaj si̱ huin sôꞌ doj gàꞌ daꞌ yiruꞌhue dânj mánj.
25 Sí ꞌna̱ꞌ ga̱huin chru̱un ni̱ ga̱ꞌhue ga̱huin sôꞌ dàj rûnꞌ huin si-maestrû sôꞌ, ni̱ sí giꞌnïnj giꞌhiaj sun chre ni̱ ga̱ꞌhue ga̱huin sôꞌ dàj rûnꞌ huin si-yi̱ruꞌhue sôꞌ. Ni̱ si dugûꞌnàj nej sij Beelzebú ñùnj dadinꞌ huín dàj rûnꞌ huin sí ni̱ka̱j ñuꞌunj riñan nej duguiꞌ, ni̱ gaꞌhue dànanj kï̱j doj ga̱ꞌmi̱n nej sij riñan nej suj guendâ nìkòꞌ nej suj rukú na̱nj ánj.
Ahuin si ri̱ña̱n daꞌhuîꞌ gi̱nun yuꞌhuiꞌ ruhuôꞌ ràꞌaj
26 ’Huê dânj ni̱ si̱ guyuꞌhuiꞌ nej suj niꞌin nej suj nej guiì, dadinꞌ gàꞌ si ꞌngo̱ nej rasu̱un nitaj si huaj gìyìꞌìj huì, ni̱ nùnj huin si ꞌnï̱nj huij sani̱ dàñùn gùrùguìꞌij gi̱ni̱ꞌin nej guiì.
27 Sa ganatá ñan hua̱ ru̱mi̱nꞌin riñan nej suj, ni̱ gànàtàꞌ nej suj neꞌ gu̱niꞌñanj an riñan nej guiì; nuguanꞌ ganatá nìchrùnꞌ yiꞌnḯn rakïj nej suj, ni̱ gànàtàꞌ nùkuaj nej suj nda yichrá hueꞌe riñan nej guiì.
28 Si̱ guyuꞌhuiꞌ nej suj niꞌin nej suj nej guiì da̱gahui nneè kú nej suj, dadinꞌ si̱ gaꞌhue da̱gahuiꞌ ninj ma̱ꞌan nimân nej suj mánj; gi̱nun yuꞌhuiꞌ ruhuâ nej suj niꞌin nej suj Ma̱ꞌan Ñaꞌanj an dadinꞌ ga̱ꞌhue gi̱ꞌhia ga̱ꞌa̱nj ni̱ꞌhia̱ ma̱ꞌan nimân nej suj ngà nneè kú nej suj ni̱ ga̱ꞌnïn ga̱ꞌa̱nj nej suj ruhuâ rúnâko gi̱nun nej suj.
29 ’Sê ꞌngo̱ sanꞌanj an du̱ꞌhue̱ huìj yilio ràꞌ saj ûnꞌ. Sani̱ nitaj si gininj gàꞌ si ꞌngo̱ nej xuj riñan hioꞌó, si nitaj permisu riki Ma̱ꞌan rê Ñaꞌanj an mánj.
30 Sani̱ ni̱ka̱j Ma̱ꞌan Ñaꞌanj an guenda andaj nìko huê mân ahui nej suj.
31 Huê danj, ni̱ si̱ guyuꞌhuiꞌ nej suj, dadinꞌ dànanj du̱ꞌhue̱ nej suj gàꞌ daꞌ ûta gàꞌì nej yilio na̱nj ánj.
Nej guiì ganataꞌ si niꞌin ninj Ma̱ꞌan Jesús riñan aꞌngô nej guiì
32 ’Ahuin na̱nj nej guiì ganataꞌ, si niꞌin ninj ñùnj riñan nej guiì, ni̱ huê danj na̱nj gànàtàj si niꞌín ninj riñan Ma̱ꞌan Rê nne yàtàꞌa.
33 Sani̱ ahuin na̱nj nej guiì nitaj si ganadigân ma̱ꞌan si niꞌin ninj ñùnj riñan nej guiì, huê danj na̱nj ñùnj ni̱ gàtà si nun niꞌín ninj riñan Ma̱ꞌan Rê Ñaꞌanj nne yàtàꞌa na̱nj ánj.
Giyichraꞌ da̱ꞌa̱j nej guiì giꞌhiaj Ma̱ꞌan Jesús
34 ’Si̱ ganï̂n ruhuâ nej suj si gaꞌná guendâ ga̱ dïnꞌïnj ruhuâ yumiguìi mánj, sê si̱ gaꞌná guendâ ga̱ dïnꞌïnj mánj, gaꞌná guendâ gùnï̀nꞌ nej guiì ngà nej duguiꞌ ninj.
35 Dadinꞌ gaꞌná guendâ gi̱ꞌhiâ si gu̱nï̱nꞌ ꞌngo̱ síi ngà rej sôꞌ, ni̱ gu̱nï̱nꞌ ꞌngo̱ siyànàa ngà nni, ni̱ gu̱nï̱nꞌ ꞌngo̱ siyànà yàkòꞌo ngà nni yìche.
36 Huê danj ni̱ nej guiì ga̱ta̱ rùhuà ꞌngo̱ síi ga̱huin nej ma̱ꞌan nej guiì màn ruhuâ dukuâ sôꞌ.
37 ’Guiì ꞌì ruhuâ niꞌin doj rej ngà nni gàꞌ daꞌ ñùnj, ni̱ si̱ gaꞌhue ga̱huin ninj guiì gi̱nikôꞌ rukú; ni̱ guiì ꞌì doj ruhuâ niꞌin daꞌnin naꞌu ngà daꞌnin yànà gàꞌ daꞌ ñùnj, ni̱ si̱ gaꞌhue gahuin ninj guiì gi̱nikòꞌ rukú;
38 Ni̱ guiì nitaj si hua̱ ruhuâ gi̱ranꞌ sa̱ñu̱n ni̱ nitaj si nìkòꞌ ninj rukú, hiôꞌ ni̱ si̱ gaꞌhue ga̱huin ninj guiì gi̱nikòꞌ rukú mánj.
39 Ni̱ guiì gunùkuaj giriꞌ daranꞌ nej sa màn ruhuâ yumiguìi nânj ga̱ riñan ninj, ni̱ ga̱ꞌa̱nj ni̱ꞌhia ninj; ni̱ guiì gaꞌnïnꞌ ruhuâ gàhuìꞌ rayiꞌí, ni̱ gùchìꞌ ninj ga̱ne ninj ngàj.
Ga̱na̱huin ro̱ꞌôꞌ nanìꞌhioꞌ gi̱ꞌhiaj Ma̱ꞌan Jesús
(Mr. 9:41)
40 ’Sí ganahuin ra̱ꞌa nej suj ni̱ ñùnj ganahuin ra̱ꞌa nej sôꞌ; ni̱ sí ganahuin ra̱ꞌa ñùnj, ni̱ ganahuin ra̱ꞌa nej sôꞌ Ma̱ꞌan sa gaꞌnḯn gaꞌná.
41 Sí ganahuin ra̱ꞌa ꞌngo̱ sí ganataꞌ dàj ga̱huin ni̱ guendâ huin sí dânj sí ganataꞌ dàj ga̱huin, ni̱ gu̱ña̱n ga̱ nanìꞌhiaj nguèj sôꞌ ga̱na̱huin ra̱ꞌa nguèj sôꞌ; ni̱ sí ganahuin ra̱ꞌa ꞌngo̱ sí giꞌhiaj sa nìkàa ni̱ guendâ huin sí dânj sí giꞌhiaj sa nìkàa, ni̱ gu̱ña̱n ga̱ nanìꞌhiaj nguèj sôꞌ ga̱na̱huin ra̱ꞌa nguèj sôꞌ.
42 Ni̱ ahuin na̱nj guiì gaꞌhuiꞌ ꞌngo̱ basû nne nu̱huij goꞌo nej guiì nitaj si ni̱ka̱j sun nìko, ni̱ guendâ huin ninj guiì nìkòꞌ rukú, yàngàꞌ hia nï̀nꞌ tâ ni̱ si̱ gahuin chre ꞌngo̱ sun giꞌhiaj ninj dadinꞌ dàñùn ga̱na̱huin ra̱ꞌa ninj nanìꞌhiaj ninj na̱nj ánj.