Gaꞌnḯn Juan Bautista nej sí ꞌna̱ꞌ ga̱huin chru̱n riñan sôꞌ si gàchìnj naꞌanj nej sôꞌ Ma̱ꞌan Jesús
11
Nga gisîj gaꞌnïnꞌ Ma̱ꞌan Jesús suun riñan nej yùhuìj sí ꞌna̱ꞌ ga̱huin chru̱n riñanj, gahui ni̱ gaꞌanj gi̱di̱ganj ni̱ ganataj si-nùguànꞌ Ma̱ꞌan Ñaꞌanj an riñan nej guiì màn yumanꞌ snàꞌànj huin yiñán nej sí ꞌna̱ꞌ ga̱huin chru̱n riñanj.
2 Ni̱ dukuâ gaꞌa nne Juan nga gunïn sôꞌ nej sa giꞌhiaj Ma̱ꞌan Cristo, ni̱ gaꞌnḯn sôꞌ gaꞌanj huìj nej sí gaꞌnaꞌ ga̱huin chru̱n riñan sôꞌ,
3 guendâ gàchìnj naꞌanj nej sôꞌ riñan Ma̱ꞌan Jesús:
—Ni̱ gataj nej sôꞌ nga guchiꞌ nej sôꞌ, huê Ma̱ꞌân rèꞌ huin sa ga̱ꞌna̱ꞌ nîꞌ, si gànàꞌhuìj nej ñûnj ga̱ꞌna̱ꞌ aꞌngô sij sàꞌ.
4 Nanikàj Ma̱ꞌan Jesús, ni̱ gata:
—Ga̱ꞌa̱nj nguèj suj ni̱ gànàtàꞌ nguèj suj riñan Juan sa gunïn nguèj suj ni̱ sa giniꞌin nguèj suj giꞌhiâ.
5 Ga̱ta̱j nguèj suj gu̱nïn Juan, giniꞌin nguèj ganayigï̀n rune ñan nej guiì du̱chri ni̱ gaché nej guiì go̱chro̱j o, ganahuin sàꞌ nneè kú nej guiì nnùn yiꞌì lepra ni̱ ganayiꞌnï̂nj hiuꞌuj tàj rakïj nej guiì sòꞌo, ganahuin nìꞌnàꞌ nej guiì gàꞌ gahuiꞌi ni̱ gunïn nej guiì ranꞌ àko nuguanꞌ gi̱ꞌhiaj ga̱na̱ni̱n ninj.
6 Ni̱ ûta ga̱ nìhiàꞌ ruhuâ nej guiì nun ga̱che̱j ruhuâ ni̱ nun ga̱na̱tu̱ ninj rayiꞌí.
7 Nga gaꞌanj nej sí dânj, ni̱ gayiꞌì Ma̱ꞌan Jesús ganataj rayiꞌî Juan riñan nej guiì màn hiuj dânj ni̱ gata:
—Nga gaꞌanj nej suj riñan hioꞌó hua̱ nàkòo ni̱ ahuin sa giniꞌin nej suj ràꞌaj. Giniꞌin nej suj ꞌngo̱ hio nagunanꞌ nanèe nîꞌ.
8 Nga gaꞌanj nej suj ni̱ ahuin sa giniꞌin nej suj ràꞌaj. Giniꞌin nej suj ꞌngo̱ sí nu̱n atsîj sàꞌ xi nîꞌ. Ni̱ gàꞌ niꞌin nej suj si nej sí nu̱n atsîj sàꞌ xi, ni̱ nne nej sôꞌ dukuâ nej sí huin rey.
9 Sani̱ nga gaꞌanj nej suj. Ni̱ ahuin sa giniꞌin nej suj ràꞌaj. Giniꞌin nej suj ꞌngo̱ sí gataj dàj ga̱huin nîꞌ. Yàngàꞌ hia, ni̱ gàtà, si giniꞌin nej suj ꞌngo̱ sí dànanj huin doj gàꞌ daꞌ sí gataj dàj ga̱huin.
10 Dadinꞌ huê rayiꞌî Juan huin gaꞌmin riñan ñanj:
Hia̱j ni̱ gàꞌnï̀n ga̱ꞌa̱nj si̱nï̱n ꞌngo̱ sí dânj neꞌ ña̱an riñanꞌ,
ni̱ sôꞌ gi̱ꞌhiaj yu̱gui si-chrejt.
11 Yàngàꞌ hia ni̱ gàtà: Si siganï̂nj nej sí gaꞌnga riki siyànàa ni̱ Juan huin sí ginikaj sun nìko doj gàꞌ daꞌ aꞌngô nej síi; sani̱ Ma̱ꞌan sa hua̱ lij doj ñan ni̱ka̱j su̱n Ma̱ꞌan Ñaꞌanj an, ni̱ dànanj huin sa nìko doj gàꞌ daꞌ Juan.
12 ’Àsìj nej gui gane Juan Bautista ni̱ nda gui hia̱j, ni̱ giranꞌ sa̱ñu̱n nej guiì nìkòꞌ rukû Ma̱ꞌan sa ni̱ka̱j sun yàtàꞌa, ni̱ nej guiì gunùkuaj ganikïnꞌ ran ngà si-nùguànꞌ Ma̱ꞌan Ñaꞌanj an ni̱ nej guiì dânj huin sa gùnùkuaj ga̱tu̱ ñan nne Ma̱ꞌan sa ni̱ka̱j su̱n neꞌ Yàtàꞌa.
13 Dadinꞌ daranꞌ sa gaꞌmin nej sôꞌ gataj dàj ga̱huin ngà si-ley Ma̱ꞌan Ñaꞌanj an, ni̱ gaꞌmin nej sôꞌ dàj ga̱huin nda gui gane Juan.
14 Ni̱ si ga̱ra̱nꞌ ruhuâ nej suj ga̱na̱huin ra̱ꞌa nej suj, ni̱ huê sôꞌ huin Elias sí ga̱ꞌna̱ꞌ.
15 Guiì tàj hiuꞌuj rakïj guendâ gu̱nïn, ni̱ gu̱nïn ninj.
16 ’Sani̱ ngà ahuin si na̱gi̱ꞌhiaj gùñànj yiꞌnïnꞌ màn diû nânj ràꞌaj. Ni̱ huin ninj dàj rûnꞌ huin nej silíj nne ñan hua̱ raꞌhuee, ni̱ gaꞌmin nùkuaj nej sôꞌ riñan aꞌngô nej guiì ni̱ka̱j duguiꞌ ngà nej sôꞌ.
17 “Ni̱ gataj nej sôꞌ: Gachrá nej ñûnj chraꞌa ngà rihiaa, sani̱ nun gi̱ra̱nꞌa̱nj nej suj; ni̱ gachrá nej ñûnj chraꞌ rùguìꞌi, sani̱ nun gu̱du̱gue̱ꞌe ni̱ nun ga̱gua̱j hia nej suj.”
18 Dadinꞌ gaꞌnaꞌ Juan, ni̱ nitaj si yâ sôꞌ ni̱ nitaj si goꞌo sôꞌ, ni̱ gataj nej suj: Sa kï̱j ï nun ruhuâ nimân sí dânj.
19 Gaꞌná, ni̱ yâj ni̱ goꞌôj, ni̱ gataj nej suj: Sí nânj ûta gachîn gàꞌ yâ ni̱ gachîn gàꞌ goꞌo sôꞌ nne bino ni̱ gidaꞌa duguiꞌ sôꞌ ngà nej sí gaꞌnej sanꞌanj an ni̱ gidaꞌa duguiꞌ sôꞌ ngà nej sí giꞌhiaj gakï̱nꞌïn. Sani̱ ganadigân sôꞌ sa chru̱n nï̀nꞌ ruhuâ Ma̱ꞌan Ñaꞌanj an ngà nej sa hueꞌê giꞌhiaj sôꞌ.
Ûta gi̱ra̱nꞌ sa̱ñu̱n yumanꞌ snàꞌànj giꞌhiaj gakï̱nꞌïn
20 Hiôꞌ ni̱ gayiꞌì Ma̱ꞌan Jesús ni̱ ranꞌanj nej yumanꞌ ñan giꞌhia ûta ganahuin nej guiì, dadinꞌ nun gànànìkàj ruhuâ ninj rayiꞌî si-ga̱kïnꞌ ninj ni̱ gata:
21 —Ûta gi̱ranꞌ sa̱ñu̱n nej suj guiì màn ruhuâ yumanꞌ Corazín. Ûta gi̱ranꞌ sa̱ñu̱n nej suj guiì màn ruhuâ yumanꞌ Betsaida. Dadinꞌ si nu̱n giꞌhiaj Ma̱ꞌan Ñaꞌanj an ga̱na̱huin nej guiì gimân ruhuâ yumanꞌ Tiro ngà ruhuâ yumanꞌ Sidón, dàj rûnꞌ giꞌhia ganahuin nej guiì màn siganï̂nj nej suj ni̱ gàꞌ nâ gananikàj ruhuâ ninj ni̱ gàꞌ gananun ninj atsîj riñan ni̱ñanj xi ni̱ gaꞌanj ga̱ne ninj riñan hiaj.
22 Rayiꞌî dan ni̱ gatâ gu̱nïn nej suj ni̱ nga gùyùmàn gui ga̱na̱nikïnꞌ nej suj riñan Ma̱ꞌan Ñaꞌanj an, ni̱ dànanj ûta gi̱ranꞌ sa̱ñu̱n nej suj gàꞌ daꞌ nej guiì gimân yumanꞌ Tiro ngà yumanꞌ Sidón.
23 Ni̱ nej suj màn ruhuâ yumanꞌ Kapernaúm, ni̱ ganayumàn nej suj nda yàtàꞌa, sani̱ gu̱du̱nin ga̱ꞌa̱nj gi̱nun nej suj nda nìkàꞌ ñan ru̱mi̱nꞌ xi; dadin si nu̱n giꞌhiâ ga̱na̱huin nej guiì gimân yumanꞌ Sodoma dàj rûnꞌ giꞌhiâ ganahuin nej guiì gimân siganï̂nj nej suj ni̱ hua̱ na̱nj màn nej guiì yumanꞌ dânj nda gui hia̱j.
24 Sani̱ gàtà gu̱nïn nej suj ni̱ nga gùyùmàn gui ga̱na̱nikïnꞌ nej suj riñan Ma̱ꞌan Ñaꞌanj an, ni̱ dànanj do̱j gi̱ranꞌ sa̱ñu̱n nej guiì gimân yumanꞌ Sodoma, gàꞌ daꞌ nej suj.
Ga̱ꞌna̱ꞌ nej suj riñânj ni̱ ga̱na̱ra̱n ruhuâ nej suj
25 Diû dânj ni̱ nanikàj Ma̱ꞌan Jesús ni̱ gata:
—Gaꞌmin hueꞌê rayiꞌî Ma̱ꞌân rèꞌ na̱nj Tâꞌ dadinꞌ huê Ma̱ꞌân rèꞌ nikaj su̱n yàtàꞌa ngà riñan hioꞌóo, dadinꞌ gachrîj huì Ma̱ꞌân rèꞌ nej nuguan nânj riñan nej sí chru̱un ngà riñan nej sí garânj daꞌngaꞌ ruhuâ, ni̱ ganadigân Ma̱ꞌân rèꞌ nej nuguanꞌ nânj riñan nej sí nìn ꞌhiaj.
26 Huê danj huin yàngàꞌ, rûꞌhuaj na̱nj Tâꞌ, dadinꞌ huê dànanj garanꞌ ruhuâ Ma̱ꞌân rèꞌ.
27 ’Daranꞌ nej rasu̱un ganarikî Ma̱ꞌan Rê riñânj; sani̱ gàꞌ si ꞌngo̱ nej guiì nun niꞌin ñùnj mánj, man ꞌngo̱ rïn Ma̱ꞌan Rê huin sa niꞌin ñùnj ni̱ gàꞌ si ꞌngo̱ nej guiì nun niꞌin Ma̱ꞌan Rê, man ꞌngo̱ rḯn huin sa niꞌin Ma̱ꞌan Rê ni̱ man ñùnj huin sa ga̱ꞌhue ga̱na̱di̱gân rayiꞌî Ma̱ꞌan Rê riñan aꞌngô nej guiì ga̱ra̱nꞌ ruhuâj.
28 Ga̱ꞌna̱ꞌ daranꞌ nej suj gininaj ruhuâ rayiꞌî guendâ gi̱ꞌhiaj sun nej suj ni̱ rayiꞌî guendâ àꞌì ata nej suj, ni̱ ñùnj gi̱ꞌhiaj ni̱ ga̱na̱ra̱n ruhuâ nej suj.
29 Ga̱ta nej suj si-igûj ni̱ ga̱huin chru̱n nej suj sa ꞌhiâ, dadinꞌ huín ꞌngo̱ sí nìn hua ma̱ꞌan nimân ni̱ gànàrìꞌ nej suj ñan ga̱na̱ra̱n ruhuâ ma̱ꞌan nimân nej suj.
30 Dadinꞌ nitaj si chìꞌ hua si-igûj, ni̱ nitaj si chìꞌ hua sa ruhuâj ga̱da̱gahuin nej suj mánj.