Gaꞌnḯn Ma̱ꞌan Jesús gaꞌanj huàꞌnï̀nj xia yùhuìj nej sôꞌ gànàtàꞌ si-nùguànꞌ Ma̱ꞌan Ñaꞌanj an
10
Neꞌ rùkù nga gahuin nej nânj,
ni̱ ganagui Ma̱ꞌan Señor aꞌngô huaꞌnï̂nj xia chi̱ꞌ nej sí gaꞌnaꞌ ga̱huin chru̱n riñanj,
ni̱ gaꞌnïn gaꞌanj daꞌ huìj daꞌ huìj ranꞌ nej sij neꞌ ña̱n ñan nngaj nej yumanꞌ snàꞌànj ñan ga̱ꞌa̱nj Ma̱ꞌan.
2 Ni̱ gata gu̱nïn nej sij:
—Yàngàꞌ ni̱ ûta nìko suun hua,
sani̱ do̱j nï̀nꞌ nej sí gi̱ꞌhiaj sun hua;
rayiꞌî dan ni̱ gàchìnj nìꞌhiaj nej suj riñan Ma̱ꞌan Ñaꞌanj an si ga̱ꞌnïn ga̱ꞌna̱ꞌ nej sí gi̱ꞌhiaj sun riki si-sùnj.
3 Ni̱ gàꞌnï̀n ga̱ꞌa̱nj nej suj;
ni̱ dàj rûnꞌ huin matsïj ï huin nej suj siganï̂nj nej yuku stuj u.
4 Ni̱ si̱ ginikaj nej suj nnanj,
ni̱ sichrànꞌan,
ni̱ si̱ ginikaj nej suj kanj ga̱ꞌa̱nj nej suj;
ni̱ si̱ gaꞌmin nej suj ngà si ꞌngo̱ nej guiì nga gànàrìꞌ nej suj ruhuâ chrej e mánj.
5 Ahuin na̱nj hueꞌ ña̱n ga̱tu̱ nej suj ni̱ nga gùchìꞌ nej suj ni̱ ga̱ta̱j nej suj:
“Ga̱ dïnꞌïnj ruhuâ nej suj màn ruhuâ hueꞌ nânj.”
6 Ni̱ si nej guiì hua̱ dïnꞌïnj ruhuâ huin nej guiì màn ruhuâ hueꞌ ñan gùchìꞌ nej suj,
ni̱ sa dïnꞌïnj gaꞌmin nej suj dânj gi̱ꞌhiaj ga̱na̱huin dïnꞌïnj ruhuâ ninj;
ni̱ si nej guiì hue huin nej guiì dânj,
ni̱ nànìkàj sa dïnꞌïnj gaꞌmin nej suj riñan nej suj.
7 Ni̱ si ganahuin ra̱ꞌa nej guiì dânj nej suj ni̱ gùnàj nej suj ruhuâ hueꞌ ñan guchiꞌ nej suj,
ni̱ ya̱ nej suj ni̱ go̱ꞌo̱ nej suj sa ri̱ki̱ nej guiì dùkuà hueꞌ ñan guchiꞌ nej suj;
dadinꞌ sí giꞌhiaj suun ni̱ hua̱ ni̱ña̱n si̱ ga̱ duꞌhue sôꞌ.
Ni̱ si̱ gaché nej suj daꞌ hueꞌe daꞌ hueꞌe mánj.
8 Ahuin na̱nj yumanꞌ snàꞌànj ñan gùchìꞌ nej suj,
ni̱ si ganahuin ra̱ꞌa nej guiì màn hiuj dânj nej suj;
ni̱ ya̱ nej suj sa ri̱ki̱ ninj;
9 Ni̱ si màn guiì aꞌnanꞌan hiuj dânj,
ni̱ ga̱ta̱j nej suj gu̱nïn nej guiì dânj:
“Ni̱ gàꞌ gahuin nìchrùnꞌ Ma̱ꞌan Ñaꞌanj an guendâ gi̱nikaj sunj riñan nej suj.”
10 Sani̱ ahuin na̱nj yumanꞌ snàꞌànj gatûj nej suj,
ni̱ naꞌhuej nej guiì ga̱na̱huin ra̱ꞌa ninj nej suj,
ni̱ ga̱hui̱ nej suj ruhuâ yumanꞌ dânj ni̱ nga gaché nej suj huaj nej suj,
ni̱ ga̱ta̱j nej suj:
11 “Nda hioꞌó hiaj màn ruhuâ yumanꞌ snàꞌànj nânj,
sa guta riki dakó nej ñûnj na̱gunanꞌ nej ñûnj,
guendâ nun gùyùmàn ruhuâ nej suj sa gataj nej ñûnj,
ni̱ ruhuâ nej ñûnj si̱ gi̱ni̱ꞌin nej suj,
si̱ gàꞌ gahuin nìchrùnꞌ Maꞌan Ñaꞌanj an guendâ gi̱ni̱kaj sunj riñan nej suj.”
12 Ni̱ gàtà gu̱nïn nej suj si nga gùyùmàn gui nagiꞌhiaj Ma̱ꞌan Ñaꞌanj an guenda riñan nej suj ni̱ dànanj do̱j gi̱ranꞌ sa̱ñu̱n nej guiì gimân yumanꞌ Sodoma gàꞌ daꞌ nej guiì gimân yumanꞌ snàꞌànj nânj.
Ûta gi̱ranꞌ sa̱ñu̱n nej guiì màn yumanꞌ snàꞌànj naꞌhue da̱gahuin
13 ’Ûta gi̱ranꞌ sa̱ñu̱n nej suj guiì màn ruhuâ yumanꞌ Corazín.
Ni̱ ûta gi̱ranꞌ sa̱ñu̱n nej suj guiì màn ruhuâ yumanꞌ Betsaida.
Ni̱ si̱ riñan nej guiì gimân ruhuâ yumanꞌ Tiro ngà nej guiì gimân ruhuâ yumanꞌ Sidón ni̱ giꞌhiaj Ma̱ꞌan Ñaꞌanj an si ga̱na̱huin nej guiì aꞌnanꞌan dàj rûnꞌ giꞌhia ngà nej suj,
ni̱ àsìj gui dânj ni̱ gananun ninj atsîj hua ni̱ñanj xi ni̱ dagamanꞌ ninj hiaj yichrá ninj,
ni̱ gàꞌ gananikàj ruhuâ ninj ngà rayiꞌî nej si-ga̱kïnꞌ ninj.
14 Sani̱ nga gùyùmàn diû na̱gi̱ꞌhiaj Ma̱ꞌan Ñaꞌanj an guenda ngà nej suj ni̱ dànanj ûta gi̱ranꞌ sa̱ñu̱n nej suj,
gàꞌ daꞌ nej guiì gimân yumanꞌ Tiro ngà nej guiì gimân yumanꞌ Sidón.
15 Ni̱ sòꞌ huînꞌ yumanꞌ Kapernaúm,
ni̱ ganachi nikajꞌ ma̱ꞌânꞌ nda yàtàꞌa,
sani̱ na̱du̱ninj Ma̱ꞌan Ñaꞌanj an sòꞌ ni̱ gi̱ranꞌ sa̱ñu̱nꞌ riñan rúnâko.
16 ’Nej guiì gunïn sa ga̱ꞌmi̱n nej suj gaꞌnaꞌ ga̱huin chru̱n riñânj,
ni̱ gunïn ninj sa ga̱ꞌmînj;
ni̱ nej guiì naꞌhuej ga̱na̱huin ra̱ꞌa nej nuguanꞌ gaꞌmin nej suj,
ni̱ naꞌhuej ninj ga̱na̱huin ra̱ꞌa ninj si-nùguànꞌànj,
ni̱ nej guiì naꞌhuej ga̱na̱huin ra̱ꞌa ñùnj,
ni̱ naꞌhuej ninj ga̱na̱huin ra̱ꞌa ninj Ma̱ꞌan sa ga̱ꞌnḯn gaꞌná.
Gananikàj nej huàꞌnï̀nj xia yùhuìj nej sôꞌ gaꞌanj gànàtàꞌ si-nùguànꞌ Ma̱ꞌan Ñaꞌanj an
17 Ni̱ nga gunumân nej huàꞌnï̀nj xia yùhuìj nej sí gaꞌnḯn Ma̱ꞌan Jesús gaꞌanj gànàtàꞌ si-nùguànꞌ Ma̱ꞌan Ñaꞌanj an,
ni̱ ûta ganahuin nìhiàꞌ ruhuâ nej sôꞌ ni̱ gataj nej sôꞌ:
—Señor,
nda nej nanè kï̱j huaa dagahuin riñan nej ñûnj ngà siyu̱gui Ma̱ꞌân rèꞌ.
18 Ni̱ gataj Ma̱ꞌan Jesús:
—Ni̱ giniꞌin yàngàj si gininj sichre neꞌ yàtàꞌa ni̱ huaj dàj rûnꞌ hua sinàn duꞌhui.
19 Gi̱ni̱ꞌhiaj nej suj dadinꞌ gàꞌ rikîj sun nùkuaj riñan nej suj ni̱ dàj rûnꞌ giꞌhiôꞌ nga guduyâ yiꞌîꞌ nej yukuáa ni̱ guduyâ yiꞌîꞌ nej yikïïn,
ni̱ huê danj gi̱ꞌhiaj ga̱nan nej suj riñan daranꞌ nej sa yìꞌì ganï̂n ruhuâ sa gunïnꞌ ngà nej suj,
ni̱ nitaj gàꞌ si ꞌngo̱ sa yìꞌìi gi̱ꞌhiaj ga̱nan riñan nej suj mánj.
20 Sani̱ si̱ gahuin nìhiàꞌ staꞌu ruhuâ nej suj si dagahuin nej nanè kï̱j hua̱a sa gaꞌmin nej suj mánj,
ga̱na̱huin nìhiàꞌ ruhuâ nej suj si gàꞌ ganataꞌ siyu̱gui nej suj riñan ñanj librû tàj neꞌ yàtàꞌa.
Ûta ganahuin nìhiàꞌ ruhuâ Ma̱ꞌan Jesús
21 Ni̱ huê orâ dânj ni̱ giꞌhiaj Ma̱ꞌan Espíritu Santo si ûta ganahuin nìhiàꞌ ruhuâ Ma̱ꞌan Jesús ni̱ gayiꞌij ni̱ gata:
—Gaꞌmin hueꞌé riñan Ma̱ꞌân rèꞌ na̱nj Tâꞌ,
dadinꞌ huê Ma̱ꞌân rèꞌ huin Rê,
Ma̱ꞌan Señor ni̱ka̱j su̱n neꞌ yàtàꞌa ngà riñan hioꞌóo,
dadinꞌ gachrîj huì Ma̱ꞌân rèꞌ nej nuguanꞌ nânj riñan nej sí chru̱n nï̀nꞌ ruhuâ ngà riñan nej sí sàꞌ garânj daꞌngaꞌ ruhuâ,
ni̱ ganadigân Ma̱ꞌân rèꞌ riñan nej sílìj i.
Ni̱ huê danj giꞌhiá rèꞌ,
na̱nj Tâꞌ,
dadinꞌ huê dànanj garanꞌ ruhuâ Ma̱ꞌân rèꞌ.
22 ’Daranꞌ nej suun ganahuin raꞌá giꞌhiaj Ma̱ꞌan Rê;
ni̱ gàꞌ si ꞌngo̱ nej guiì nun niꞌin si huín Daꞌní Ma̱ꞌân rèꞌ,
ni̱ man ꞌngo̱ rïn Ma̱ꞌan huin sa niꞌin ñùnj;
ni̱ gàꞌ si̱ ꞌngo̱ nej guiì nitaj si niꞌin ahuin sa huin Ma̱ꞌan mánj,
man ꞌngo̱ rḯn huin sa niꞌin Ma̱ꞌan,
ni̱ ñùnj gi̱ꞌhiaj ga̱ra̱n daꞌngaꞌ ruhuâ nej guiì ri̱ña̱n garanꞌ ruhuaj ga̱na̱di̱gán.
23 Ni̱ nga nikïnꞌ ngo̱ rïn Ma̱ꞌan Jesús ngà nej sôꞌ ꞌna̱ꞌ ga̱huin chru̱n riñanj ni̱ giniꞌhia riñan nej sôꞌ,
ni̱ gata gu̱nïn nej sôꞌ:
—Ga̱na̱huin nìhiàꞌ ruhuâ nej guiì giniꞌin ngà rune ñan ninj ni̱ dàj rûnꞌ hua sa giniꞌin nej suj.
24 Dadinꞌ ñùnj taj si ûta gàꞌì nej sôꞌ gataj dàj ga̱huin ngà nej rey gane diû ri̱ki ni̱ ûta gahuin ruhuâ nej sôꞌ gi̱ni̱ꞌin nej sôꞌ sa giniꞌin nej suj,
sani̱ nun gi̱ni̱ꞌin nej sôꞌ;
ni̱ ûta gahuin ruhuâ nej sôꞌ gu̱nïn nej sôꞌ sa gu̱nïn nej suj,
sani̱ nun gu̱nïn nej sôꞌ mánj.
Ûta hueꞌê giꞌhiaj sí ꞌnaꞌ yumanꞌ Samaria
25 Ni̱ nne ꞌngo̱ sí ûta sàꞌ chru̱n si-ley Ma̱ꞌan Ñaꞌanj an hiuj dânj ni̱ ganayumàn sôꞌ,
guendâ ruhuâ sôꞌ ga̱ya̱ka̱j sôꞌ daꞌngaꞌa ngà Ma̱ꞌan Jesús,
ni̱ gataj sôꞌ:
—Maestrûj,
nùnj huin si gi̱ꞌhia ni̱ ga̱ꞌhue ga̱ne nìgàn yàtàꞌa ràꞌaj.
26 Ni̱ gataj Ma̱ꞌan Jesús gu̱nïn sí dânj:
—Nga gahiaꞌ riñan si-ley Ma̱ꞌan Ñaꞌanj an.
Ni̱ dàj taj si-nùguànꞌ Ma̱ꞌan Ñaꞌanj an ràꞌaj.
27 Nanikàj sí dânj ni̱ gataj sôꞌ:
—“Ga̱ ꞌì ruhuâꞌ niꞌînꞌ Ma̱ꞌan Señor huin Daꞌanjt ngà daranꞌ nimânt,
ni̱ ngà daranꞌ ma̱ꞌan nimânt,
ni̱ ngà daranꞌ sa hua̱ nùkuaj hua̱ nneè kút,
ni̱ ngà daranꞌ daꞌngât;
ni̱ ga̱ ꞌì ruhuâꞌ niꞌînꞌ nej duguît dàj rûnꞌ ꞌì ruhuâꞌ niꞌînꞌ ma̱ꞌânꞌ.”
28 Ni̱ gataj Ma̱ꞌan Jesús gu̱nïn sí dânj:
—Ûta dùgùnàj hua sa dunanikàjꞌ riñânj;
ni̱ da̱gahuînꞌ nej nuguanꞌ nânj,
ni̱ ga̱ne nìgànjꞌ na̱nj ánj.
29 Sani̱ guendâ ruhuâ sí nânj,
du̱naꞌhuej sôꞌ rayiꞌî nuguanꞌ gachín naꞌanj sô,
ni̱ gataj sôꞌ gu̱nïn Ma̱ꞌan Jesús:
—Ahuin nej sí huin nej duguiꞌí ràꞌaj.
30 Rayiꞌî nuguanꞌ nânj ni̱ nanikàj Ma̱ꞌan Jesús ni̱ gata:
—ꞌNgo̱ sí dânj ni̱ gahui sôꞌ ruhuâ yumanꞌ snàꞌànj Jerusalén ni̱ gaꞌanj sôꞌ chrej hua̱j yumanꞌ Jerikó,
ni̱ gidaꞌa gè nej sí tu̱u,
ni̱ giꞌhiaj tu̱ nej sôꞌ daranꞌ siꞌhiaj sí dânj;
ni̱ guduranꞌ yiꞌì nej sôꞌ sí dânj,
ni̱ gudunâj nej sôꞌ nngaj sí nânj ni̱ gaꞌanj nej sôꞌ ni̱ do̱j hua̱j ni̱ gàhuìꞌ sí dânj.
31 Ni̱ nàsìnùnj chre ni̱ gachîn ꞌngo̱ rej huaj sôꞌ chrej ñan nngaj sí dânj,
ni̱ giniꞌin sôꞌ si giranꞌ yiꞌì sí dânj sani̱ gachîn anêj sôꞌ ni̱ gaꞌanj sôꞌ.
32 Ni̱ neꞌ rùkù ni̱ gachîn ꞌngo̱ levita,
huaj sôꞌ chrej ña̱n nngaj sí dânj,
ni̱ nga giniꞌin sôꞌ si̱ giranꞌ yiꞌì sí dânj,
ni̱ gachîn anêj sôꞌ ni̱ gaꞌanj sôꞌ.
33 Sani̱ gachîn ꞌngo̱ sí ꞌna̱ꞌ yumanꞌ Samaria chrej ñan nngaj sí nânj huaj sôꞌ ni̱ giniꞌin sôꞌ si giranꞌ yiꞌì nï̀nꞌ ruhuâ sí dânj,
ni̱ guruguñuꞌunj sôꞌ sí dânj;
34 Ni̱ gaꞌanj nichì sôꞌ ñan nngaj sí dânj,
ni̱ ganaꞌnïnꞌ sôꞌ gasîti ngà nne alkol ñan giranꞌ yiꞌì dânj ni̱ gudutâj sôꞌ atsìj i nneè kú sí dânj;
ni̱ ganachi nikaj sôꞌ ni̱ gutaꞌ sôꞌ yichrá dân sôꞌ urruj u,
ni̱ ginikaj sôꞌ gaꞌanj sôꞌ ñan hua̱ hueꞌ mesû,
ni̱ dugumîn sôꞌ sí giranꞌ yiꞌì dânj.
35 Ni̱ aꞌngô gui dânj nga huaj sôꞌ ga̱ꞌa̱nj sôꞌ,
ni̱ giri sôꞌ huìj sanꞌanj denario,
ni̱ gaꞌhuiꞌ sôꞌ raꞌa sí girïꞌïnj hueꞌ mesû,
ni̱ gataj sôꞌ gu̱nïn sí dânj:
“Du̱gumîn sòꞌ sí nânj;
ni̱ daranꞌ nej sa gùtï̀nꞌ ngà sij,
ni̱ na̱ruꞌhuej riñanꞌ nga nànìkàj ñún gàꞌnàj.”
36 Ahuin goꞌngo̱ nej huàꞌnï̀nj sí nânj ga ꞌì ruhuâ niꞌin sí giranꞌ yiꞌì giꞌhiaj nej sí tu̱u ràꞌaj.
37 Ni̱ gataj sí nânj:
—Sí gananï̂n àko ruhuâ niꞌin sí giranꞌ yiꞌì dânj huin sí ꞌì ruhuâ.
Hiôꞌ ni̱ gataj Ma̱ꞌan Jesús:
—Ga̱ꞌa̱njꞌ ni̱ huê dànanj gi̱ꞌhiáꞌ ngà nej duguît na̱nj ánj.
Gaꞌanj gi̱niꞌhiaj Ma̱ꞌan Jesús ñan nne Marta ngà María
38 Gahuin ꞌngo̱ gui dânj ni̱ nga gaché Ma̱ꞌan Jesús hua,
ni̱ gatu ruhuâ ꞌngo̱ yumanꞌan;
ni̱ gaꞌan dukuâ ꞌngo̱ siyànà gùꞌnàj Marta ni̱ ganahuin ra̱ꞌa siyànà dânj Ma̱ꞌan.
39 Ni̱ hua̱ ꞌngo̱ yuguij siyànà dânj ni̱ gùꞌna María,
ni̱ gaꞌnaꞌ María ni̱ gaꞌanj ga̱ne yiꞌî Ma̱ꞌan Jesús,
ni̱ gunïn nej nuguanꞌ ganataꞌ Ma̱ꞌan Jesús riñanj.
40 Sani̱ Marta ni̱ doꞌ si ûta ganahuij ruhuaj giꞌhiaj sunj,
ni̱ gaꞌan ni̱ gata gu̱nïn Ma̱ꞌan Jesús:
—Señor.
Nùnj huin saj ni̱ nitaj si̱ giriñun ruhuâ Ma̱ꞌân rèꞌ ni̱ ga̱ta̱j rèꞌ gu̱nïn yuguî si gu̱ru̱gûñuꞌun ñùnj dadinꞌ giꞌhiaj su̱n ꞌngo̱ rḯn ràꞌaj.
Ga̱ta̱j Ma̱ꞌân rèꞌ gu̱nïn ni̱ gu̱ru̱gûñuꞌun ñùnj.
41 Nanikàj Ma̱ꞌan Jesús,
ni̱ gata: