Nuguanꞌ rán gananï̂n rayiꞌî sí unuun
13
Gui dânj ni̱ gahui Ma̱ꞌan Jesús ruhuâ hueꞌe ni̱ gaꞌanj ga̱ne nìchrùnꞌ duꞌhua nne ña̱ꞌa̱nj.
2 Ni̱ ûta ganaraꞌhuiꞌ nej guiì riñanj; ni̱ gatu ruhuâ barku, ni̱ gaꞌanj ga̱ne ruhuâ barkû dânj, ni̱ màn daranꞌ nej guiì nìchrùnꞌ duꞌhua nne ña̱ꞌa̱nj.
3 Hiôꞌ ni̱ gayiꞌij ni̱ gaꞌmin rayiꞌî ûta gàꞌì nej rasu̱un ni̱ garânj sunj nuguanꞌ ráan ni̱ gata:
—Gahui ꞌngo̱ sí dânj ni̱ gaꞌanj ga̱da̱gamanꞌ sôꞌ ka̱an.
4 Ni̱ nga nï̀nꞌ gadagamanꞌ sôꞌ ka̱an huaj sôꞌ, ni̱ da̱ꞌa̱j ka̱n dânj gininj duꞌhua chrej e; ni̱ gaꞌnaꞌ nej yataj a ni̱ yâ nej yôꞌ nej ka̱n dânj.
5 Ni̱ aꞌngô da̱ꞌa̱j nej ka̱n dânj gininj riñan hioꞌó hiëj, ni̱ ñan nitaj si hua̱ nìko hioꞌóo; ni̱ ûta hio giyichraꞌ nej ka̱n dânj, dadinꞌ nitaj si hua̱ gùnùn ga̱ꞌa̱nj hiaꞌaj riki hioꞌóo;
6 Sani̱ nga gisîj gui ni̱ gochroj chrinꞌ trigu ni̱ ginitïnj; dadinꞌ nun ga̱ꞌa̱nj gùnùn hiaꞌaj riki hioꞌóo, huê danj ni̱ ganakoj.
7 Ni̱ aꞌngô da̱ꞌa̱j nej ka̱n dânj gininj siganï̂nj nej koj tanj an; ni̱ gachij nej koj tanj dânj ni̱ gahuij giꞌhiaj nej koj tanj an.
8 Sani̱ aꞌngô da̱ꞌa̱j nej ka̱n trigu gininj riñan hioꞌó sàꞌa ni̱ gahiu ka̱n trigu raj, ni̱ da̱ꞌa̱j nej ka̱n trigu dânj gahiu ꞌngo̱ sientu ka̱n trigu raa̱, ni̱ aꞌngô da̱ꞌa̱j nej ka̱n dânj gahiu huàꞌnï̀nj xia chi̱ꞌ ka̱n trigu raa̱ ni̱ aꞌngô da̱ꞌa̱j ka̱an gahiu ko̱ chi̱ꞌ trigu raa̱.
9 Sí tàj hiuꞌuj u rakïj guendâ gu̱nïn, ni̱ gu̱nïn sôꞌ.
Sa gidigân nej nuguanꞌ ráan
10 Hiôꞌ ni̱ gahuin nichrunꞌ nej sí ꞌna̱ꞌ ga̱huin chru̱n riñan Ma̱ꞌan Jesús, ni̱ gataj nej sôꞌ:
—Nùnj huin saj ni̱ gaꞌmin Ma̱ꞌân rèꞌ nuguanꞌ ráan riñan nej guiì ràꞌaj maestrûj.
11 Nanikàj Ma̱ꞌan Jesús ni̱ gata:
—Dadinꞌ nej suj ni̱ rikî Ma̱ꞌan Ñaꞌanj an si ga̱ꞌhue ga̱ra̱n daꞌngaꞌ ruhuâ nej suj nej nuguanꞌ hua̱ huì rayiꞌî Ma̱ꞌan sa ni̱ka̱j su̱n yàtàꞌa, sani̱ nun gìrìꞌ nìꞌhiaj nej guiì nânj guendâ ga̱ꞌhue ga̱ra̱n daꞌngaꞌ ruhuâ ninj mánj.
12 Dadinꞌ ahuin na̱nj nej guiì garânj daꞌngaꞌ ruhuâ niꞌin si-nùguànꞌ Ma̱ꞌan Ñaꞌanj an ni̱ gàꞌhuij doj si-nùguànꞌànj riñan ninj, ni̱ ga̱ꞌhue ga̱ra̱n daꞌngaꞌ ruhuâ ninj doj; sani̱ nej guiì do̱j garânj daꞌngaꞌ ruhuâ, ni̱ do̱j nuguanꞌ garânj daꞌnga ruhuâ ninj ni̱ ga̱ꞌne̱ Ma̱ꞌan Ñaꞌanj an riñan ninj.
13 Rayiꞌî dan ni̱ gaꞌmînj nuguanꞌ ráan riñan ninj: Dadinꞌ gi̱ni̱ꞌhiaj ninj sani̱ si̱ gi̱niꞌin ninj ngà rune ñan ninj, ni̱ ga̱na̱nï̱n rakï̂j ninj sani̱ si̱ gaꞌhue gu̱nïn ninj, ni̱ gàꞌ nitaj si garânj daꞌngaꞌ ruhuâ ninj.
14 Hiôꞌ ni̱ gisîj nuguanꞌ gaꞌmin Isaias sôꞌ gataj dàj ga̱huin rayiꞌî ninj, nga gaꞌmin sôꞌ:
Nùnj huin si ûta gu̱nïn ninj, ni̱ gàꞌ danj ni̱ si̱ gaꞌhue ga̱ra̱n daꞌngaꞌ ruhuâ ninj;
ni̱ gi̱ni̱ꞌhiaj ninj sani̱ si gaꞌhue gi̱ni̱ꞌin ninj mánj.
15 Dadinꞌ ganaminj nimân nej guiì màn ruhuâ yumanꞌ nânj ngà nej gakï̱nꞌïn,
ni̱ ganarán hiuꞌuj tàj ruhuâ rakïj ninj,
ni̱ gadï̱n ninj;
guendâ naꞌhuej ruhuâ ninj gi̱ni̱ꞌin ninj,
ni̱ naꞌhuej ruhuâ ninj gu̱nïn ninj,
ni̱ naꞌhuej ruhuâ ninj ga̱ra̱n daꞌngaꞌ ruhuâ ninj ni̱ ga̱ꞌna̱ꞌ ninj riñânj,
dadinꞌ naꞌhuej ruhuâ ninj ga̱na̱huin ninj gi̱ꞌhiâ.
16 ’Sani̱ ga̱na̱huin nìhiàꞌ ruhuâ nej suj, dadinꞌ giniꞌin nej suj, ni̱ ga̱na̱huin nìhiàꞌ ruhuâ ꞌnín rakïj nej suj dadinꞌ gu̱nïn nej suj.
17 Dadinꞌ yàngàꞌ hia nï̀nꞌ gàtà ni̱ ûta gàꞌì nej sí gataj dàj ga̱huin ngà nej sí giꞌhiaj sa ni̱ka̱a gahuin ruhuâ gi̱ni̱ꞌin sa niꞌin nej suj, sani̱ nun gi̱ni̱ꞌin nej sôꞌ; ni̱ gahuin ruhuâ nej sôꞌ gu̱nïn nej sôꞌ sa gunïn nej suj sani̱ nun gu̱nïn nej sôꞌ.
Ganataꞌ Ma̱ꞌan Jesús rayiꞌî nuguanꞌ ráan
18 ’Gu̱nïn nej suj, nùnj huin si ga̱ta̱j, nuguanꞌ rán gaꞌmin rayiꞌî sí gunuun.
19 Nga gunïn da̱ꞌa̱j nej guiì nuguanꞌ gi̱ꞌhiaj ga̱na̱ni̱n ninj ni̱ naꞌhue ga̱ra̱n daꞌngaꞌ ruhuâ ninj, ni̱ gaꞌnaꞌ sichre ni̱ gaꞌne si-nùguànꞌ Ma̱ꞌan Ñaꞌanj an ruhuâ nimân ninj, ni̱ huin ninj dàj rûnꞌ huin nej ka̱n gininj duꞌhua chrej e.
20 Ni̱ ka̱n gadagamanꞌ sôꞌ siganï̂nj nej hiëj, huin nej guiì gunïn si-nùguànꞌ Ma̱ꞌan Ñaꞌanj an, ni̱ ûta nìhiàꞌ hua ruhuâ ninj ngà gunïn ninj si-nùguànꞌ Ma̱ꞌan Ñaꞌanj an;
21 Sani̱ ñan nitaj si guyumân nìko ruhuâ ninj, hiôꞌ ni̱ do̱j nï̀nꞌ diû gunùkuaj ninj dadinꞌ nga gaꞌnaꞌ sañuun ni̱ gata rùhuà nej guiì ninj rayiꞌî si-nùguànꞌ Ma̱ꞌan Ñaꞌanj an ni̱ ganatûj ninj.
22 Ni̱ ka̱n gadagamanꞌ sôꞌ siganï̂nj nej koj tanj an, huin nej guiì gunïn si-nùguànꞌ Ma̱ꞌan Ñaꞌanj an, sani̱ ñan ûta huin ruhuâ ninj ga̱ nej rasu̱n màn ruhuâ yumiguìi nânj riñan ninj ni̱ gidigañuꞌunj nej rasu̱n dânj ninj ni̱ ûta huin ruhuâ ninj ga̱huin yi̱ruꞌhue ninj huê danj ni̱ giꞌhia si giniꞌñûn ninj si-nùguànꞌ Ma̱ꞌan Ñaꞌanj an ni̱ rayiꞌî dan nitaj si guruguiꞌ si huin ninj daꞌní Ma̱ꞌan Ñaꞌanj an mánj.
23 Sani̱ ka̱n gadagamanꞌ sôꞌ riñan hioꞌó sàꞌa huin nej guiì gunïn si-nùguànꞌ Ma̱ꞌan Ñaꞌanj an ni̱ garânj daꞌngaꞌ ruhuâ ninj, ni̱ gùrùguìꞌ sa hueꞌê giꞌhiaj ninj; ni̱ da̱ꞌa̱j ninj giꞌhiaj guyumân ruhuâ ꞌngo̱ sientu guiì, aꞌngô da̱ꞌa̱j ninj giꞌhiaj guyumân ruhuâ huàꞌnï̀nj xia guiì, ni̱ aꞌngô da̱ꞌa̱j ninj giꞌhiaj guyumân ruhuâ ko̱ chi̱ꞌ guiì niꞌin ninj Ma̱ꞌan Ñaꞌanj an.
Nuguanꞌ rán aꞌmin rayiꞌî trigu ngà koj aꞌnanꞌan
24 Ni̱ gaꞌmin Ma̱ꞌan Jesús aꞌngô nuguanꞌ ráan, ni̱ gata:
—Ma̱ꞌan sa ni̱ka̱j su̱n yàtàꞌa huin dàj rûnꞌ huin ꞌngo̱ sí gunun trigû sàꞌa riñan doꞌó;
25 Sani̱ nga nï̀nꞌ nngaj daranꞌ nej sôꞌ atoj nej sôꞌ, ni̱ gaꞌnaꞌ ꞌngo̱ sí gunïnꞌ ngà nej sôꞌ ni̱ gunun sí dânj trigû kï̱j ï siganï̂nj nej trigû sàꞌa, ni̱ gaꞌanj sí dânj.
26 Ni̱ nga gachij trigû sàꞌa ni̱ gachra trigu raj, huê danj na̱nj gachij trigû kï̱j ï ni̱ gachra trigû kï̱j ï raj.
27 Hiôꞌ ni̱ gaꞌanj gataj nej sí huin musu riñan sí huin si-yi̱ruꞌhue nej sôꞌ ni̱ gataj nej sôꞌ: “Señor, sê trigû sàꞌa huin sa gunun rèꞌ riñan doꞌó rèꞌ ûnꞌ. Nùnj huin saj, ni̱ giyichraꞌ trigû kïj ï riñan doꞌó rèꞌ ràꞌaj.”
28 Ni̱ gataj sí yi̱ruꞌhue dânj: “ꞌNgo̱ sí gunïnꞌ ngàj giꞌhiaj.” Ni̱ gataj nej sí huin musu: “Ruhuâ rèꞌ; si ga̱ꞌa̱nj gi̱ri̱hia̱ nej ñûnj nej trigû kï̱j dan nîꞌ.”
29 Si̱ gaꞌhue mánj gataj sôꞌ: “Dadinꞌ ga̱ꞌhue si nga huaj nej suj gi̱ri̱hia̱ nej suj trigû kï̱j ï, ni̱ ga̱ꞌhue ni̱ gi̱ri̱hia̱ nej suj nej trigû sàꞌaj
30 Gu̱du̱nâj nej suj si ga̱chi̱j gu̱ña̱n ngue nda gùyùmàn gui gàꞌnèj; ni̱ gàꞌnï̀n ga̱na̱ranꞌ si̱nï̱n nej sí ꞌhiaj suun trigû kï̱j ï, ni̱ gu̱mi̱n nej sôꞌ daꞌ yihiâ guendâ ga̱ka̱ man; ni̱ neꞌ rùkù ni̱ ga̱na̱ra̱nꞌ nej sôꞌ si-trigûj ni̱ ga̱na̱chra sàꞌ nej sôꞌ ruhuâ si-gùchrùj.”
Nuguanꞌ rán gaꞌmin rayiꞌî ka̱n kuej taj
31 Ganataꞌ Ma̱ꞌan Jesús aꞌngô nuguanꞌ ráan, ni̱ gata:
—Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin ka̱n kuej staj, dadinꞌ gidaꞌa ꞌngo̱ sí dânj ka̱n nânj ni̱ gunun sôꞌ riñan doꞌó sôꞌ;
32 Yàngàꞌ hia nï̀nꞌ ni̱ ka̱n nânj huin sa hua̱ lij doj gàꞌ daꞌ daranꞌ nej ka̱an sani̱ nga gachi ni̱ huej huin sa yàkàn doj, ni̱ huej huin sa nìko doj riñan aꞌngô nej kuej e ni̱ gahuin ꞌngo̱ chrun, hiôꞌ ni̱ gaꞌnaꞌ nej yataj aché yàtàꞌa ni̱ giꞌhiaj nej xuj sigàkàꞌ nej xuj raꞌa chrun dânj.
Nuguanꞌ rán aꞌmin rayiꞌî chru dunuꞌmanꞌan
33 Ni̱ gataj Ma̱ꞌan Jesús aꞌngô nuguanꞌ ráan:
—Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin chru dunuꞌmanꞌ gidaꞌa ꞌngo̱ siyànàa, ni̱ gachri siganï̂nj kïnj hua̱ sàꞌaj huìj ni̱ huàꞌnï̀nj daꞌngaꞌ giriñunꞌ chru arina, hiôꞌ ni̱ ganahuij daranꞌ kïnj arina hua̱ sàꞌa gunuꞌmanꞌ giꞌhiaj chru dunuꞌmanꞌanj.
Nùnj huin saj garânj sun Ma̱ꞌan Jesús nuguanꞌ ráan
34 Ni̱ ni̱na̱nj nuguanꞌ ráan garânj sun Ma̱ꞌan Jesús nga gaꞌmin riñan nej guiì, ni̱ si nitaj nuguanꞌ ráan nika nga ga̱ꞌmi̱n ni̱ nitaj si gaꞌmin mánj;
35 Huê dànanj gaꞌmin daꞌnga gisîj nej nuguanꞌ gaꞌmin sôꞌ gataj dàj gahuin àsìj ri̱ki, nga gataj sôꞌ:
Gàꞌmìn nuguanꞌ ráan ngà duꞌhuá;
gànàtàj nej nuguanꞌ ꞌnï̱nj huì àsìj nga gayiꞌij gaꞌanj gi̱ngaj yumiguìi.
Ganataꞌ Ma̱ꞌan Jesús nuguanꞌ rán gaꞌmin rayiꞌî koj aꞌnanꞌan
36 Hiôꞌ ni̱ ganaꞌnḯn Ma̱ꞌan Jesús nanꞌ nej guiì, ni̱ gatu ruhuâ hueꞌe; ni̱ gaꞌnaꞌ nichì nej sí ꞌna̱ꞌ ga̱huin chru̱n riñanj ni̱ gataj nej sôꞌ gu̱nïn:
—Ruhuâ nej ñûnj si gànàtàꞌ Ma̱ꞌân rèꞌ gu̱nïn nej ñûnj nùnj huin si ga̱ta̱j nuguanꞌ rán gaꞌmin rayiꞌî nej trigû kï̱j ï màn siganï̂nj nej trigu sàꞌaj.
37 Nanikàj Ma̱ꞌan Jesús, ni̱ gata:
—Ñùnj huin sa gunun trigû sàꞌa.
38 Hioꞌó ñan gunûnj huin ruhuâ nimân nej guiì màn ruhuâ yumiguìi; nej trigû sàꞌa huin nej guiì huin daꞌní Ma̱ꞌan sa ni̱ka̱j su̱n yàtàꞌa, nej trigû kï̱j ï huin nej guiì huin daꞌní sichre.
39 Ni̱ sa gunun trigû kï̱j dânj huin sa nàsàꞌa. Ni̱ nga na̱gi̱ꞌhiaj chrej nej trigu huin nga ga̱na̱huij yumiguìi; ni̱ nej sa na̱gi̱ꞌhiaj chre̱ꞌ nej trigu huin nej ángel.
40 Dàj rûnꞌ giꞌhiaj nej síi nga girihiâj nej sôꞌ nej trigû kï̱j ï, ni̱ gaꞌnḯn nej sôꞌ riñan ñaꞌaan, ni̱ huê danj ga̱huin nga ga̱na̱huij yumiguìi.
41 Ni̱ gàꞌnï̀n nej ángel gunânj gi̱tsi riñânj ni̱ ga̱na̱ranꞌ ninj ñan ni̱ka̱j sùnj daranꞌ nej guiì gidigân gi̱ꞌhiaj aꞌngô nej guiì gakï̱nꞌïn, ngà nej guiì giꞌhiaj gakï̱nꞌïn,
42 ni̱ gàꞌnï̀nj nej ángel nej guiì ruhuâ guchrún ñan aka ñaꞌaan; ni̱ hiuj dânj gi̱nun ninj ni̱ du̱gueꞌe ninj ni̱ ûta gi̱ranꞌ sa̱ñu̱n ninj ni̱ nda ya̱ rùj ñanꞌ ninj.
43 Hiôꞌ ni̱ nej sí giꞌhiaj sa ni̱ka̱a ni̱ nda giràn chre ga̱na̱huin nej sôꞌ ni̱ ga̱ nej sôꞌ dàj rûnꞌ giràn riñan gui nga ga̱ne nej sôꞌ ñan gi̱nikaj su̱n Ma̱ꞌan Ñaꞌanj huin Rej nej sôꞌ. Guiì tàj hiuꞌuj ruhuâ rakïj ni̱ gu̱nïn ninj.
Sanꞌanj ꞌnïnj huì riki hioꞌóo
44 ’Huê danj ni̱ Ma̱ꞌan sa ni̱ka̱j su̱n neꞌ yàtàꞌa ni̱ huin dàj rûnꞌ huin ꞌngo̱ sanꞌanj ꞌnï̱nj huì riki hioꞌóo, ni̱ ganariꞌ ꞌngo̱ síi ni̱ gachrîj huì ñûn sôꞌ riki hioꞌóo; ni̱ ûta gahuin nìhiàꞌ ruhuâ sôꞌ huê danj ni̱ gaꞌanj sôꞌ ni̱ naduꞌhuêj sôꞌ daranꞌ nej rasu̱n huin siꞌhiaj sôꞌ, ni̱ ganarânj sôꞌ hioꞌó ñan ꞌnï̱nj huì sanꞌanj dânj.
Hiëj perla sàꞌ xi ûta du̱ꞌhue̱e
45 ’Huê danj ni̱, Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin ꞌngo̱ sí ganarânj ni̱ naduꞌhuej nej rasu̱un ni̱ nanaꞌhuiꞌ sôꞌ nej hiëj sàꞌ gùꞌnàj perla.
46 Ni̱ nga ganariꞌ sôꞌ ꞌngo̱ hiëj perla ûta nìhiàꞌ hua, huê danj ni̱ gaꞌanj sôꞌ ni̱ guduꞌhuêj sôꞌ daranꞌ nej rasu̱n hua̱ riñan sôꞌ, ni̱ girânj sôꞌ hiëj sàꞌ dânj.
Sa ga̱huin chru̱nꞌ rayiꞌî nnanj giri yukuaj a
47 ’Huê danj na̱nj Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin ꞌngo̱ nnanj màn yukuaj a, dadinꞌ nga gaꞌnḯn nej síi ruhuâ nne ña̱ꞌa̱nj, ni̱ ganaraꞌanj daranꞌ yìꞌnï̀nꞌ nej yukuaj a;
48 ni̱ nga gachra ruhuâ nnanj màn yukuaj a ni̱ giri nej sij nnanj dânj duꞌhua nne ña̱ꞌa̱nj; ni̱ gaꞌanj ga̱ne nej sij ni̱ ganagui nej sij yukuaj hua̱ sàꞌaj ni̱ ganachra nej sij ruhuâ ꞌngo̱ yugûti, sani̱ nej yukuaj nitaj si hua̱ sàꞌ ni̱ gi̱rë̱ꞌëj nej sij.
49 Huê danj ga̱huin nga ga̱na̱huij yumiguìi: Ni̱ ga̱hui̱ nej ángel, ni̱ giꞌhiaj anêj ninj nej sí kï̱j huaa siganï̂nj nej sí sàꞌa,
50 ni̱ gàꞌnï̀nj nej ángel nej guiì kï̱j huaa ni̱ gi̱nun ninj ruhuâ rúnâko; ni̱ gu̱du̱gue̱ꞌe ninj ni̱ ûta ga̱huin ruhuâ ninj ni̱ nda ya̱ rùj ñanꞌ ninj.
Rasu̱n nàkàa ni̱ rasu̱n reꞌèe
51 Ni̱ gachín naꞌanj Ma̱ꞌan Jesús nej sij ni̱ gata:
—Garânj daꞌngaꞌ ruhuâ nej suj daranꞌ nej nuguanꞌ nânj nîꞌ.
Ni̱ gataj nej sij:
—Garânj daꞌngaꞌ ruhuâ nej ñûnj Señor.
52 Hiôꞌ ni̱ gataj Ma̱ꞌan Jesús:
—Huê danj ni̱ daranꞌ nej maestrû chru̱n ley, ni̱ huin nej sôꞌ dàj rûnꞌ huin ꞌngo̱ sí dugumîn nej daꞌní, dadinꞌ niꞌin sôꞌ àmàn ga̱ra̱n su̱n sôꞌ rasu̱n nàkàa ni̱ niꞌin sôꞌ àmàn ga̱ra̱n su̱n sôꞌ rasu̱n hua̱ reꞌèe.
Nne Ma̱ꞌan Jesús yumanꞌ Nazaret
53 Gahuin nga gisîj gaꞌmin Ma̱ꞌan Jesús nej nuguanꞌ rán nânj, ni̱ gaꞌan aꞌngô hiuj u.
54 Huê danj ni̱ gunukuiꞌ Ma̱ꞌan Jesús yiñan, ni̱ gidiganj ruhuâ hueꞌ huin nûhui nne hiuj dânj, ni̱ ûta gahuin ña̱ꞌanj ruhuâ nej guiì màn yiñan, ni̱ gataj ninj:
—Dànèꞌ gahuin chru̱n sí nânj nej nuguanꞌ nânj ni̱ dànèꞌ gahuin chru̱n sôꞌ guendâ gi̱ꞌhiaj sôꞌ ga̱na̱huin nej guiì orâ chre ràꞌaj.
55 Sê daꞌní sí akôj chrun huin sí nânj ràꞌ saj ûnꞌ. Ni̱ sê nni sij gùꞌnàj María ni̱ nej dinḯn sij huin Jacobo, José, Simón, ni̱ Judas ràꞌ saj ûnꞌ.
56 Ni̱ sê nne daranꞌ nej yuguej sij siganï̂nj nêꞌ nânj ràꞌ saj ûnꞌ. Dànèꞌ gahuin chru̱n sij, daranꞌ nej nuguanꞌ nânj ràꞌaj.
57 Ni̱ ginaꞌan ruhuâ nej sij niꞌin nej sij Ma̱ꞌan Jesús, ni̱ gataj Ma̱ꞌan gu̱nïn nej sij:
—Aꞌngô hiuj u ni̱ ni̱ka̱j chre̱j nej síi riñan ꞌngo̱ sí gataj dàj gahuin, sani̱ nitaj si ni̱ka̱j chrej nej guiì màn yiñán sôꞌ ngà nej duguiꞌ ma̱ꞌan sôꞌ riñan sôꞌ mánj.
58 Ni̱ ñan nitaj si guyumân ruhuâ nej guiì màn yiñan niꞌin ninj Ma̱ꞌan, huê danj ni̱ do̱j nej guiì aꞌnanꞌan ganahuin giꞌhia hiuj dânj.