Duguaneꞌ sichre gakï̱nꞌïn riñan Ma̱ꞌan Jesús
4
Ni̱ nda nìchra chre ruhuâ nimân Ma̱ꞌan Jesús,
nne Ma̱ꞌan Espíritu Santo,
ni̱ gahuin anêj Ma̱ꞌan Jesús duꞌhua kïn Jordán,
huê danj ni̱ ginikaj Ma̱ꞌan Espíritu Santo gaꞌan Ma̱ꞌan Jesús riñan hioꞌó nàkòo.
2 Ni̱ gane Ma̱ꞌan Jesús huìj xia gui riñan hioꞌó nàkòo,
ni̱ gayakaj sa nàsàꞌa daꞌngaꞌa ngà Ma̱ꞌan,
ni̱ nga gisîj huìj xia gui gane hiuj dânj,
ni̱ gayi̱ꞌij ni̱ ganachinj yiꞌnaa riki.
3 Hiôꞌ ni̱ gataj sa nàsàꞌa gu̱nïn Ma̱ꞌan:
—Si yàngàꞌ huînꞌ daꞌní Ma̱ꞌan Ñaꞌanj an,
ni̱ ga̱ta̱j sòꞌ gu̱nïn hiëj nânj ni̱ ga̱na̱huin rachrúun ni̱ ya̱ꞌ.
4 Nanikàj Ma̱ꞌan Jesús ni̱ gata:
—Huê gàꞌ danj nnunj riñan ñanj:
“Sê man ngà rachrúun ga̱ꞌhue ga̱ nìꞌnàꞌ síi mánj,
dadinꞌ ga̱ꞌhue ga̱ nìꞌnàꞌ sij ngà si-nùguànꞌ Ma̱ꞌan Ñaꞌanj an.”
5 Ni̱ ni̱ka̱j sa nàsàꞌa gaꞌan raa̱ ꞌngo̱ kï̱j yàkàan Ma̱ꞌan Jesús,
ni̱ orâ chre gidiganj riñan Ma̱ꞌan Jesús daranꞌ nej yumanꞌ màn nï̀nꞌ gàchràꞌ ruhuâ yumiguìi.
6 Ni̱ gataj sa nàsàꞌa gu̱nïn Ma̱ꞌan Jesús:
—Riñanꞌ nàrìkìj daranꞌ nej país màn nânj,
ngà daranꞌ nej sa nìko hua̱ riñan ninj;
dadinꞌ gàꞌ ganahuin raꞌá daranꞌanj ni̱ ga̱ꞌhue gàꞌhuìj riñan nej guiì garanꞌ ruhuâj.
7 Si ga̱nikïnꞌ rúdàkòjꞌ ni̱ ginùn ña̱ꞌa̱nj riñânj,
ni̱ nàrìkìj daranꞌ nej nânj ga̱na̱huin siꞌhiát.
8 Nanikàj Ma̱ꞌan Jesús ni̱ gata:
—Gu̱xu̱n sichre sòꞌ ma̱ꞌânꞌ riñânj,
dadinꞌ gàꞌ danj nnunj riñan ñanj:
“Ni̱ riñan Ma̱ꞌan Señor huin Daꞌânjꞌ ginùn ña̱ꞌa̱nj,
ni̱ riñan ꞌngo̱ rïn Ma̱ꞌan gu̱na̱nj gi̱tsîꞌ.”
9 Ni̱ ni̱ka̱j sichre gaꞌan Ma̱ꞌan Jesús ña̱n nngaj yumanꞌ snàꞌànj Jerusalén,
ni̱ ganïnj ganikïnꞌ Ma̱ꞌan Jesús raa̱ sìhià hueꞌ huin nûhui nìko ni̱ gata:
—Si huînꞌ Daꞌní Ma̱ꞌan Ñaꞌanj an,
ni̱ gue̱j hiuj nânj ni̱ gi̱ni̱nj ga̱ꞌa̱nj nda nìkàꞌ mánj.
10 Dadinꞌ huê danj nnunj riñan ñanj:
Ni̱ gàꞌnï̀nj Ma̱ꞌan Ñaꞌanj an nej si-ángel ga̱ꞌna̱ꞌ du̱gumîn ninj sòꞌ.
11 Ni̱ gàràꞌhuèꞌ ninj sòꞌ,
huê dânj ni̱ si̱ geꞌë̂j dakót ngà nej hiëj mánj.
12 Nanikàj Ma̱ꞌan Jesús ni̱ gata:
—Ni̱ huê danj taj riñan ñanj si-nùguànꞌ Ma̱ꞌan Ñaꞌanj an:
“Ni̱ si̱ ga̱ꞌhue ga̱ya̱ka̱jꞌ daꞌngaꞌa ngà Ma̱ꞌan Señor huin Danꞌanjꞌ mánj.”
13 Ni̱ nga gisîj gayakaj daꞌngaꞌ sa nàsàꞌa ngà Ma̱ꞌan Jesús,
ni̱ gahuin ane riñan Ma̱ꞌan Jesús ꞌngo̱ diû.
Gayiꞌì Ma̱ꞌan Jesús ganataj si-nùguànꞌ Ma̱ꞌan Ñaꞌanj an riñan nej guiì màn riñan hioꞌó Galilea
14 Huê danj ni̱ gaꞌanj Ma̱ꞌan Jesús nda Galilea ngà sun gaꞌhuiꞌ Ma̱ꞌan Espíritu Santo riñanj,
ni̱ ûta gaꞌmin hueꞌê nej guiì niꞌin ninj Ma̱ꞌan daꞌ hua̱ nï̀nꞌ gàchràꞌ riñan hioꞌó màn ganikàj rukû yumanꞌ dânj.
15 Ni̱ gidigân Ma̱ꞌan Jesús ruhuâ huêꞌ huin si-nùhuì nej sij,
ni̱ ûta gaꞌmin hueꞌê nej sij rayiꞌî Ma̱ꞌan.
Nne Ma̱ꞌan Jesús ruhuâ yumanꞌ Nazaret
16 Ni̱ gaꞌnaꞌ Maꞌan Jesús yumanꞌ Nazaret,
yumanꞌ ñan gane nga gachi;
ni̱ gui ganarânj rûhua huin gui dânj ni̱ gatu ruhuâ hueꞌ huin si-nùhuì nej sij,
dàj rûnꞌ hua chrej ni̱ka,
ni̱ ganayumanj ni̱ gahia riñan ñanj si-nùguànꞌ Ma̱ꞌan Ñaꞌanj an.
17 Ni̱ gaꞌhuiꞌ nej sij raꞌa librû gachrûn Isaias sôꞌ gataj dàj ga̱huin,
ni̱ nga naguchraj riñan ñanj dânj,
ni̱ ganariꞌij ñan gachrûnꞌ sôꞌ dànanj:
18 Nne Si-Espíritu Ma̱ꞌan Señor ngàj,
dadinꞌ ganaguij ñùnj guendâ gànàtàj si-nùguànꞌ Ma̱ꞌan Ñaꞌanj an riñan nej guiì hua̱ ninaj ngà nanè nimân;
ni̱ gaꞌnïn gàꞌàn guendâ gi̱ꞌhia ga̱na̱huin nimân nej guiì giranꞌ sa̱ñu̱n ngà nimân,
ni̱ giꞌhia si ga̱hui̱ nej guiì nne ni̱nï̱nꞌ dukuâ gaꞌa
ni̱ giꞌhia si ga̱na̱huin rune ñan nej guiì du̱chri;
ni̱ ga̱huin dïnꞌïnj ruhuâ nej guiì giranꞌ sañuun.
19 Ni̱ gànàtàj si hioꞌ nânj huin hioꞌ ûta ganahuin ꞌì ruhuâ Ma̱ꞌan Ñaꞌanj an niꞌin nej guiì.
20 Ni̱ durumin ñanj si-nùguànꞌ Ma̱ꞌan Ñaꞌanj an,
ni̱ nagaꞌhuij raꞌa sí ni̱kï̱nꞌ gidigân hiuj dânj,
ni̱ gaꞌanj ga̱ne ni̱ ûta hueꞌê gaꞌnḯn ña̱n nej guiì màn ruhuâ hueꞌ dânj riñanj.
21 Ni̱ gayiꞌij ni̱ gata gu̱nïn nej guiì màn hiuj dânj:
—Gu̱nïn daranꞌ nej suj si gui hia̱j ni̱ gisîj nuguanꞌ nânj.
22 Ni̱ ûta hueꞌê giꞌhiaj Ma̱ꞌan Jesús gataj daranꞌ nej guiì,
ni̱ ûta gahuin ña̱ꞌanj ruhuâ ninj nga gu̱nïn ninj nej nuguanꞌ hua̱ hueꞌê gaꞌmin Ma̱ꞌan Jesús,
ni̱ gataj ninj:
—Sê daꞌní José huin sí nânj ràꞌ sa ûnꞌ.
23 Ni̱ gataj Ma̱ꞌan Jesús gu̱nïn ninj:
—Yìtï̀nj chre ni̱ ga̱ta̱j nej suj ꞌngo̱ guentû nânj riñânj:
“Ma̱ꞌân rèꞌ huin sí gònòꞌòo,
ni̱ gi̱ꞌhiaj gònòꞌò rèꞌ Ma̱ꞌân rèꞌ”;
ni̱ ga̱ꞌhue gataj nej suj:
“Nej sa gunïn nej ñûnj giꞌhiaj Ma̱ꞌân rèꞌ ruhuâ yumanꞌ Kapernaúm,
ni̱ huê danj gi̱ꞌhiaj Ma̱ꞌân rèꞌ si ga̱na̱huin nej guiì yiñán Ma̱ꞌân rèꞌ.”
24 Ni̱ gataj Ma̱ꞌan Jesús:
—Yàngàꞌ hia nï̀nꞌ gàtà,
ni̱ gàꞌ si̱ ꞌngo̱ nej sí gataj dàj gahuin nun gi̱ni̱nj hueꞌê riñan nej guiì màn ruhuâ yiñán nej sôꞌ.
25 Ni̱ yàngàꞌ hia nï̀nꞌ gàtà ni̱ nga diû gane Elías ni̱ ûta gimân nej siyànà minj in ruhuâ yumanꞌ Israel,
sani̱ nga ganarán yàtàꞌa ni̱ nun gàmànꞌ huàꞌnï̀nj hioꞌó tá huàtànꞌ ahuii,
ni̱ ûta gahuin yiꞌnaa nï̀nꞌ gàchràꞌ riñan hioꞌóo;
26 sani̱ nun gàꞌnï̀nj Ma̱ꞌan Ñaꞌanj an ga̱ꞌa̱nj sôꞌ riñan gàꞌ si̱ ꞌngo̱ nej siyànà dânj,
dadinꞌ dànanj gaꞌnḯn Ma̱ꞌan Ñaꞌanj an gaꞌanj sôꞌ riñan ꞌngo̱ siyànà minj nne yumanꞌ Sarepta riñan hioꞌó Sidón.
27 Ni̱ ûta gimân gàꞌì nej sí nnùn yiꞌì lepra ruhuâ yumanꞌ Israel diû nga gane Eliseo sôꞌ gataj dàj gahuin;
sani̱ gàꞌ si ꞌngo̱ nej sôꞌ nun ga̱na̱huin sàꞌ nneè kú,
màn ꞌngo̱ rïn Namán sí nne yumanꞌ Siria ganahuin giꞌhiaj Eliseo.
28 Nga gunïn daranꞌ nej sí màn ruhuâ hueꞌ huin nûhui,
ni̱ ûta ginaꞌan ruhuâ nej sôꞌ nga gunïn nej sôꞌ nej nuguanꞌ gataj Ma̱ꞌan Jesús gu̱nïn nej sôꞌ;
29 Huê danj ni̱ ganayumàn nej sí màn hiuj dânj,
ni̱ giri nej sôꞌ neꞌ ye̱ꞌ yumanꞌ snàꞌànj dânj gaꞌanj Ma̱ꞌan Jesús,
ni̱ ni̱ka̱j nej sôꞌ gaꞌanj nej sôꞌ raa̱ kï̱j ña̱n tàj yumanꞌ snàꞌànj huin yiñán nej sôꞌ,
dadinꞌ ruhuâ nej sôꞌ gu̱du̱guêj nej sôꞌ Ma̱ꞌan Jesús riñan ganee.
30 Sani̱ gachîn Ma̱ꞌan Jesús siganï̂nj nej sôꞌ ni̱ gaꞌan aꞌngô hiuj u.
ꞌNgo̱ sí nu̱n nanè kï̱j huaa ruhuâ nimân
31 Ni̱ gaꞌanj Ma̱ꞌan Jesús yumanꞌ Kapernaúm huin doꞌó yumanꞌ Galilea,
ni̱ gidiganj riñan nej guiì màn hiuj dânj nej gui ganarânj rûhua.
32 Ni̱ ûta gahuin ña̱ꞌanj ruhuâ nej guiì rayiꞌî nej yìꞌnï̀nꞌ nej nuguanꞌ gaꞌmin Ma̱ꞌan,
dadinꞌ gaꞌmin dàj rûnꞌ gaꞌmin nej sí ni̱ka̱j suun.
33 Ni̱ ruhuâ hueꞌ huin nuhuî dânj nne ꞌngo̱ sí dânj ni̱ ruhuâ nimân sôꞌ nun ꞌngo̱ nanè kï̱j hua̱a,
ni̱ ûta nùkuaj gaguâj nanè kï̱j hua dânj:
34 —Ni̱ gataj nanè kï̱j hua̱ dânj:
Nùnj huin si huin ruhuâ Ma̱ꞌân rèꞌ niꞌîn rèꞌ nej ñûnj ràꞌaj,
Jesús Nazareno.
Gaꞌnaꞌ Ma̱ꞌân rèꞌ guendâ du̱nahuij Ma̱ꞌân rèꞌ nej ñûnj nîꞌ.
Ni̱ niꞌín si huin Ma̱ꞌân rèꞌ ꞌngo̱ sa gè huin Daꞌní Ma̱ꞌan Ñaꞌanj an.
35 Ni̱ dugunïn gàꞌì Ma̱ꞌan Jesús sa kï̱j dânj ni̱ gata:
—Dḯn ga̱ne duꞌhuáꞌ ráj,
ni̱ ga̱hui̱ ruhuâ nimân sí dânj ni̱ ga̱ꞌa̱nj ráj.
Hiôꞌ ni̱ dunatûj sa kï̱j dânj sí nânj siganï̂nj nej guiì màn hiuj dânj;
ni̱ gahui ruhuâ nimân sôꞌ ni̱ gaꞌan,
ni̱ nun gi̱ranꞌ sa̱ñu̱n sôꞌ gi̱ꞌhia gàꞌ mánj.
36 Ni̱ ûta gahuin ña̱ꞌanj ruhuâ daranꞌ nej guiì,
ni̱ ganarïsnaꞌanj ninj siganï̂nj nej ma̱ꞌan ninj ni̱ gataj ninj:
—Ahuin nuguanꞌ huin na̱nj ràꞌaj,
dadinꞌ aꞌmin dàj rûnꞌ gaꞌmin ꞌngo̱ sí ni̱ka̱j suun ni̱ gaꞌnïnꞌ sunj riñan nej nanè kï̱j hua̱a,
ni̱ gahui ninj ruhuâ nimân nej guiì ni̱ gaꞌanj ninj ràꞌaj.
37 Ni̱ gayaꞌnï̀n nuguanꞌ sàꞌ giꞌhiaj Ma̱ꞌan Jesús nï̀nꞌ gàchràꞌ riñan daranꞌ nej yumanꞌ màn ganikàj hiuj dânj.
Giꞌhiaj Jesús ganahuin nni yi̱che̱j Simón Pedro
38 Hiôꞌ ni̱ ganayumàn Ma̱ꞌan Jesús ni̱ gahui ruhuâ si-nùhuì nej sij,
ni̱ gaꞌan ña̱n nne dukuâ nni yìchèj Simón.
Ni̱ giniꞌin si̱ ûta nun gachiꞌi nni yìchèj sôꞌ;
ni̱ gachín nìꞌhiaj nej sôꞌ riñan Ma̱ꞌan si gi̱ꞌhia ga̱na̱huin sachij dânj.
39 Ni̱ guduguaꞌ Jesús Ma̱ꞌan riñan sachij dânj,
ni̱ dugunïn gàꞌij yiꞌì gàchìꞌi;
huê danj ni̱ giyichinꞌ si̱ ginun gachiꞌi sachij dânj,
ni̱ orâ chre ni̱ ganayumàn sachij dânj,
ni̱ gunânj gi̱tsi sachij dânj riñan nej sij.
Nga gàꞌ gataꞌ gui raa̱ kïj ï ni̱ ganahuin ûta gàꞌì nej guiì giꞌhiaj Ma̱ꞌan Jesús
40 Ni̱ nga gataꞌ gui raa̱ kï̱j ï,
ni̱ ni̱ka̱j daranꞌ nej guiì màn hiuj dânj nej guiì aꞌnanꞌan ngà ahuin na̱nj yiꞌì garaꞌhue̱ꞌ ninj gaꞌnaꞌ ninj riñan Ma̱ꞌan Jesús;
ni̱ gutaꞌ Ma̱ꞌan raꞌa ahui daꞌ goꞌngo̱ nej guiì dânj,
ni̱ ganahuin ninj giꞌhiaj Ma̱ꞌan.
41 Ni̱ gahui nej sa nàsàꞌa ruhuâ nimân ûta gàꞌì nej guiì,
ni̱ gaꞌmin nùkuaj nej sa nàsàꞌ dânj ni̱ gataj ninj:
—Sòꞌ huin Daꞌní Ma̱ꞌan Ñaꞌanj an.
Sani̱ dugunïn gàꞌì Ma̱ꞌan Jesús ni̱ nu̱n ga̱ꞌnïn ga̱ꞌmi̱n ninj,
dadinꞌ niꞌin ninj si huê Ma̱ꞌan Jesús huin Cristo.
Ganataꞌ Ma̱ꞌan Jesús si-nùguànꞌ Ma̱ꞌan Ñaꞌanj an riñan nej guiì màn riñan hioꞌó Galilea
42 Ni̱ nga gàꞌ giyigï̀n aꞌngô gui dânj,
ni̱ gahui Ma̱ꞌan Jesús ni̱ gaꞌan riñan hioꞌó nàkòo;
ni̱ nanaꞌhuiꞌ nej guiì rigìi Ma̱ꞌan,
ni̱ guchiꞌ ninj ña̱n nne Ma̱ꞌan,
ni̱ gidaꞌa ninj garaꞌhue̱ꞌ ninj Ma̱ꞌan dadinꞌ naꞌhuêj ruhuâ ninj si ga̱huin ane riñan ninj.
43 Sani̱ gataj Ma̱ꞌan Jesús:
—Hua̱ ni̱ña̱n nï̀nꞌ si gàꞌàn aꞌngô nej yumanꞌ snàꞌànj màn aꞌngô hiuj u,
dadinꞌ daꞌhuí ga̱ꞌa̱nj gànàtàj si-nùguànꞌ Ma̱ꞌan Ñaꞌanj an riñan nej guiì;
dadinꞌ huê rayiꞌî sun dânj gaꞌnḯn Ma̱ꞌan Ñaꞌanj an gaꞌná.
44 Ni̱ ganataꞌ Ma̱ꞌan Jesús si-nùguànꞌ Ma̱ꞌan Ñaꞌanj an riñan nej guiì ruhuâ nej huêꞌ huin nuhuî màn riñan hioꞌó Galilea.