Ganataꞌ Juan Bautista si-nùguànꞌ Ma̱ꞌan Ñaꞌanj an riñan nej guiì ñan hua̱ hioꞌó nakòo
3
Gisîj hioꞌ yi̱nu̱nꞌun nikaj su̱n Tiberio César,
nga gahuin Poncio Pilato gobernador riñan hioꞌó Judea,
ni̱ Herodes gahuin gobernador riñan hioꞌó Galilea,
ni̱ dinḯn sôꞌ Felipe gahuin gobernador riñan hioꞌó Iturea ni̱ huê sôꞌ nikaj su̱n riñan hioꞌó gùꞌnàj Traconites,
ni̱ Lisanias gahuin gobernador riñan hioꞌó Abilinia.
2 Ni̱ Anás ngà Kaifás gahuin rej huin ña̱n nï̀nꞌïn,
ni̱ gaꞌnaꞌ si-nùguànꞌ Ma̱ꞌan Ñaꞌanj an riñan Juan Bautista,
gahuin daꞌní sachij Zacarías,
nga nne sôꞌ riñan hioꞌó nàkòo.
3 Ni̱ gaꞌanj Juan Bautista riñan aꞌngô nej hioꞌó màn ganikàj rukû kïn Jordán,
ni̱ ganataꞌ sôꞌ si-nùguànꞌ Ma̱ꞌan Ñaꞌanj an ni̱ gataj sôꞌ si daꞌhui nej guiì ni̱ nànìkàj ruhuâ ninj rayiꞌî si-ga̱kïnꞌ ninj ni̱ gàtàꞌ nne ninj,
daꞌnga ni̱ gaꞌhue gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ ninj.
4 Dàj rûnꞌ nnunj riñan ñanj librû ꞌna̱ꞌ nuguanꞌ gaꞌmin Isaias,
sôꞌ gataj dàj ga̱huin nga gataj sôꞌ:
Gaꞌmin ꞌngo̱ sí dânj riñan hioꞌó nàkòo ni̱ gataj sôꞌ:
“Gi̱ꞌhiaj yu̱gui nej suj nimân nej suj ga̱tu̱ Ma̱ꞌan Señor;
Na̱gi̱ꞌhiaj ni̱ka̱ nej suj ma̱ꞌan nej suj dàj rûnꞌ garanꞌ ruhuâ Ma̱ꞌan.
5 Dàj rûnꞌ nagiꞌhiaj gu̱ña̱n nej sij ña̱n hua̱ yinée,
ni̱ dàj rûnꞌ ganagaꞌ daranꞌ nej kï̱j yàkàan ni̱ ganagaꞌ daranꞌ nej dakan ni̱ ganahuin ni̱ka̱ riñan hioꞌóo;
ni̱ dàj rûnꞌ ganahuin ni̱ka̱ daranꞌ nej chre̱j hua̱ guhiùu,
ni̱ ga̱na̱huin ni̱ka̱ ruhuâ nej chre̱j kï̱j hua̱a ni̱ huê danj na̱gi̱ꞌhiaj ni̱ka̱ nej suj nimân nej suj riñan Ma̱ꞌan Ñaꞌanj an;
6 Ni̱ gi̱ni̱ꞌin daranꞌ nej guiì si ga̱ꞌhue gi̱ꞌhiaj Ma̱ꞌan Ñaꞌanj an ga̱na̱ni̱n ninj.”
7 Ni̱ gataj Juan gu̱nïn nej guiì ꞌna̱ꞌ gàtàꞌ nne riñan sôꞌ:
—Dàj rûnꞌ giꞌhiaj nej yìꞌnï̀nꞌ nej yukuáa nga gunânj nej yôꞌ riñan sañuun huê danj giꞌhiaj nej suj ni̱ ahuin si gataj si gu̱na̱nj nej suj riñan sa̱ñu̱n ꞌna̱ꞌa ràꞌaj.
8 Gi̱ꞌhiaj nej suj si hia nï̀nꞌ gùrùguìꞌ sa sàꞌa riñan nej suj,
si yàngàꞌ gàꞌ gananikàj ruhuâ nej suj ngà nej si-ga̱kïnꞌ nej suj ni̱ ga̱na̱huin ra̱ꞌa Ma̱ꞌan Ñaꞌanj an nej suj:
“Ni̱ si̱ gayiꞌì nej suj ga̱ta̱j nej suj siganï̂nj nej ma̱ꞌan nej suj,
rej nej ñûnj huin Abraham”;
dadinꞌ Ma̱ꞌan Ñaꞌanj an ni̱ ga̱ꞌhue gi̱ꞌhia si ga̱ꞌnga̱ daꞌní Abraham siganï̂nj nej hiëj nânj.
9 Ni̱ gàꞌ hua̱ yu̱gui agaꞌ aꞌneꞌ chrun nga guendâ ga̱ꞌnej hiaꞌa nej chrun;
ni̱ daranꞌ nej chrun nitaj si̱ gahiu chruj sàꞌa raa̱ ni̱ gìyìꞌnej ni̱ gàꞌnï̀nj nej sij riñan ñaꞌaan gi̱nunj.
10 Ni̱ gachín naꞌanj nej guiì rìgìi ni̱ gataj ninj:
—Hiôꞌ ni̱ nùnj huin si gi̱ꞌhiaj nej ñûnj ràꞌaj.
11 Ni̱ nanikàj Juan ni̱ gataj sôꞌ:
—Sí ni̱ka̱j huìj atsìj i ni̱ gàꞌhuìꞌ sôꞌ ꞌngo̱j raꞌa sí nitaj siganꞌ;
ni̱ sí hua̱ sa yâ ni̱ gàꞌhuìꞌ sôꞌ ya̱ guiì nitaj sa ya̱.
12 Ni̱ huê danj na̱nj gaꞌnaꞌ gàtàꞌ nne nej sí gaꞌnêj sanꞌanj an,
ni̱ gataj nej sôꞌ:
—Maestrûj.
Nùnj huin si gi̱ꞌhiaj nej ñûnj ni̱ ga̱ꞌhue ga̱na̱ni̱n nej ñûnj ràꞌaj.
13 Ni̱ gataj Juan:
—Si̱ gunutaꞌ nej suj doj yichrá sanꞌanj ga̱ꞌne̱ nej suj riñan nej guiì mánj.
14 Ni̱ huê danj gachín naꞌanj da̱ꞌa̱j nej sí stâdu ni̱ gataj nej sôꞌ:
—Nùnj huin si gi̱ꞌhiaj nej ñûnj ni̱ ga̱ꞌhue ga̱na̱ni̱n nej ñûnj ràꞌaj.
Nanikàj Juan ni̱ gataj sôꞌ:
—Si̱ gaꞌnêj nej suj doj sanꞌanj an riñan nej guiì mánj,
ni̱ si̱ gutaꞌ chre nej suj gakï̱nꞌïn yichrá nej guiì mánj;
ga nìhiàꞌ ruhuâ nej suj ngà saꞌanj gahuin duꞌhue nej suj.
15 Ni̱ ûta hueꞌê gayakaj guendâ nej guiì mân ninj sani̱ nitaj si hua̱ dïnꞌïnj ruhuâ ninj,
ni̱ ganarïj naꞌanj ninj ngà nimân ninj ni̱ gataj ninj si Juan huin Ma̱ꞌan Cristo.
16 Nanikàj Juan ni̱ gataj sôꞌ gu̱nïn daranꞌ nej guiì:
—Ñùnj ni̱ yàngàꞌ duguataꞌ nnêj ngà nnee nej suj;
sani̱ neꞌ rùkùj ꞌna̱ꞌ ꞌngo̱ sí dânj ni̱ ûta nikaj su̱n sôꞌ gàꞌ daꞌ ñùnj,
ni̱ nitaj guèndàj ga̱na̱chí nnïnj ꞌnï̱nj kanj ꞌnï̱nj dakó sôꞌ mánj;
ni̱ Ma̱ꞌan sôꞌ huin sa du̱guataꞌ nne ngà Ma̱ꞌan Espíritu Santo ni̱ ngà ñaꞌaan nej suj.
17 Ni̱ ꞌnï̱nj ꞌngo̱ hué ña̱ꞌa̱an raꞌa Ma̱ꞌan,
guendâ na̱gi̱ꞌhiaj sàꞌaj si-trigûj ni̱ guxunj nej chrinꞌin siganï̂nj nej trigu ni̱ ganaranꞌanj nej trigû hua̱ sàꞌaj ni̱ ga̱na̱chra sàꞌaj ruhuâ si-gùchrùj nej trigû dânj,
sani̱ ga̱chri̱ ñaꞌan nej chrinꞌ trigu riñan ñaꞌan nitaj àmàn gìnàꞌàj.
18 Huê dànanj gaꞌmin Juan,
ni̱ dugunïn gàꞌì sôꞌ nej guiì si daꞌhui ninj gi̱ꞌhiaj ninj sa sàꞌa ni̱ ganataꞌ sôꞌ nej nuguanꞌ nàkàa riñan nej guiì yùmànꞌan.
19 Hiôꞌ ni̱ dugunïn gàꞌì Juan síchìj Herodes,
guendâ ganakaj sôꞌ nika dinḯn sôꞌ Felipe,
ni̱ huê danj na̱nj dugunïn gàꞌì sôꞌ rayiꞌî daranꞌ nej gakï̱nꞌ giꞌhiaj síchìj dânj.
20 Sani̱ nu̱n ga̱ꞌhue̱j sôꞌ ga̱na̱ka̱j guendâ sôꞌ nej nuguanꞌ gataj Juan,
ni̱ dànanj giꞌhiaj sôꞌ aꞌngô gakï̱nꞌïn:
Dadinꞌ gachrîj sôꞌ Juan dukuâ gaꞌa.
Gataꞌ nne Ma̱ꞌan Jesús
21 Ni̱ gahuin nga gaꞌnaꞌ gàtàꞌ nne daranꞌ nej guiì yùmànꞌan,
huê danj ni̱ gaꞌanj gàtàꞌ nne Ma̱ꞌan Jesús;
ni̱ aꞌmin ngà Ma̱ꞌan Ñaꞌanj an,
ni̱ ganayîꞌnï̀nj neꞌ yàtàꞌa,
22 Ni̱ gininj Ma̱ꞌan Espíritu Santo gaꞌnaj ahui Ma̱ꞌan Jesús ni̱ huaj,
dàj rûnꞌ hua yaꞌàan,
ni̱ gaꞌmin Ma̱ꞌan Ñaꞌanj an nda neꞌ yàtàꞌa ni̱ gata:
—Sòꞌ huin daꞌnî ni̱ ûta ꞌì ruhuâj niꞌín sòꞌ;
ni̱ ûta gahuin nìhiàꞌ ruhuâj niꞌín sòꞌ.
Nej yi Ma̱ꞌan Señor Jesucristo
23 Ni̱ daꞌngaꞌ ꞌngo̱ si hioꞌ ko̱ chi̱ꞌi huaj Ma̱ꞌan Jesús nga gayiꞌij ganataj si-nùguànꞌ Ma̱ꞌan Ñaꞌanj an,
ni̱ gataj nej sij ni̱ si gu̱ruhuaj ni̱ gahuin daꞌní José,
ni̱ José huin daꞌní sachij Elí,
24 ni̱ Elí huin daꞌní Matat,
ni̱ Matat huin daꞌní Leví,
ni̱ Leví huin daꞌní Melqui,
ni̱ Melqui huin daꞌní Jana,
ni̱ Jana huin daꞌní José,
25 ni̱ José huin daꞌní Matatías,
ni̱ Matatías huin daꞌní Amós,
ni̱ Amós huin daꞌní Nahum,
ni̱ Nahum huin daꞌní Esli,
ni̱ Esli huin daꞌní Nagai,
26 ni̱ Nagai huin daꞌní Maat,
ni̱ Maat huin daꞌní Matatías,
ni̱ Matatías huin daꞌní Semei,
ni̱ Semei huin daꞌní José,
ni̱ José huin daꞌní Judá,
27 ni̱ Judá huin daꞌní Joana,
ni̱ Joana huin daꞌní Resa,
ni̱ Resa huin daꞌní Zorobabel,
ni̱ Zorobabel huin daꞌní Salatiel,
ni̱ Salatiel huin daꞌní Neri,
28 ni̱ Neri huin daꞌní Melqui,
ni̱ Melqui huin daꞌní Adi,
ni̱ Adi huin daꞌní Cosam,
ni̱ Cosam huin daꞌní Elmodan,
ni̱ Elmodan huin daꞌní Er,
29 ni̱ Er huin daꞌní Josué,
ni̱ Josué huin daꞌní Eliezer,
ni̱ Eliezer huin daꞌní Jorim,
ni̱ Jorim huin daꞌní Matat,
30 ni̱ Matat huin daꞌní Leví,
ni̱ Leví huin daꞌní Simeón,
ni̱ Simeón huin daꞌní Judá,
ni̱ Judá huin daꞌní José,
ni̱ José huin daꞌní Jonán,
ni̱ Jonán huin daꞌní Eliaquim,
31 ni̱ Eliaquim huin daꞌní Melea,
ni̱ Melea huin daꞌní Mainán,
ni̱ Mainán huin daꞌní Matata,
ni̱ Matata huin daꞌní Natán,
32 ni̱ Natán huin daꞌní David,
ni̱ David huin daꞌní Isaí,
ni̱ Isaí huin daꞌní Obed,
ni̱ Obed huin daꞌní Booz,
ni̱ Booz huin daꞌní Salmón,
ni̱ Salmón huin daꞌní Naasón,
33 ni̱ Naasón huin daꞌní Aminadad,
ni̱ aminadad huin daꞌní Aram,
ni̱ Aram huin daꞌní Esrom,
ni̱ Esrom huin daꞌní Fares,
ni̱ Fares huin daꞌní Judá,
34 ni̱ Judá huin daꞌní Jacob,
ni̱ Jacob huin daꞌní Isaac,
ni̱ Isaac huin daꞌní Abraham,
ni̱ Abraham huin daꞌní Taré,
ni̱ Taré huin daꞌní Nacor,
35 ni̱ Nacor huin daꞌní Serug,
ni̱ Serug huin daꞌní Ragau,
ni̱ Ragau huin daꞌní Peleg,
ni̱ Peleg huin daꞌní Heber,
ni̱ Heber huin daꞌní Sala,
36 ni̱ Sala huin daꞌní Kainán,
ni̱ Kainán huin daꞌní Arfaxad,
ni̱ Arfaxad huin daꞌní Sem,
ni̱ Sem huin daꞌní Noé,
ni̱ Noé huin daꞌní Lamec,
37 ni̱ Lamec huin daꞌní Matusalén,
ni̱ Matusalén huin daꞌní Enoc,
ni̱ Enoc huin daꞌní Jared,
ni̱ Jared huin daꞌní Mahalaleel,
ni̱ Mahalaleel huin daꞌní Kainán,
38 ni̱ Kainán huin daꞌní Enos,
ni̱ Enos huin daꞌní Set,
ni̱ Set huin daꞌní Adán,
ni̱ Adán huin daꞌní Ma̱ꞌan Ñaꞌanj an.