Nuguanꞌ gè gi̱ꞌhiaj ga̱na̱ni̱nꞌ nânj huin gachrûn
MATEO
Nej yi Ma̱ꞌan Señor Jesucristo
1
Librû nânj ꞌnaꞌ nej yìꞌnï̀nꞌ nej dùguìꞌ yi Ma̱ꞌan Jesucristo huin daꞌnin sìꞌnï̀n David, huin daꞌnin sìꞌnï̀n Abraham.
2 Daꞌní Abraham huin Isaac, ni̱ daꞌní Isaac huin Jacob, ni̱ daꞌní Jacob huin Judá ngà nej dinḯn sôꞌ.
3 Daꞌní Judá ngà nika sôꞌ Tamar huin Fares ngà Zara, ni̱ daꞌní Fares huin Esrom, ni̱ daꞌní Esrom huin Aram.
4 Daꞌní Aram huin Aminadad, ni̱ daꞌní Aminadad huin Naasón, ni̱ daꞌní Naasón huin Salmón.
5 Daꞌní Salmón ngà Rahab huin Booz, ni̱ daꞌní Booz ngà Rut huin Obed, ni̱ daꞌní Obed huin Isaí.
6 Daꞌní Isaí huin rey David, ni̱ rey David ganakaj nika Urias ni̱ daꞌní nguèj nika sôꞌ huin Salomón.
7 Ni̱ Daꞌní Salomón huin Roboam, ni̱ daꞌní Roboam huin Abías, ni̱ daꞌní Abías huin Asa.
8 Daꞌní Asa huin Josafat, ni̱ daꞌní Josafat huin Joram, ni̱ daꞌní Joram huin Uzias.
9 Daꞌní Uzias huin Jotam, ni̱ daꞌní Jotam huin Acaz, ni̱ daꞌní Acaz huin Ezequías.
10 Daꞌní Ezequías huin Manasés, ni̱ daꞌní Manasés huin Amón, ni̱ daꞌní Amón huin Josías.
11 Daꞌní Josías huin Jeconias ngà nej dinḯn sôꞌ, ni̱ diû nânj gaꞌnaꞌ ga̱ya̱ka̱j nej stâdu ni̱ gaꞌanj daranꞌ nej sij Babilonia.
12 Neꞌ rùkù nga gaꞌanj nej sij Babilonia, ni̱ daꞌní Jeconias huin Salatiel, ni̱ daꞌní Salatiel huin Zorobabel.
13 Daꞌní Zorobabel huin Abiud, ni̱ daꞌní Abiud huin Eleaquim, ni̱ daꞌní Eleaquim huin Azor.
14 Daꞌní Azor huin Sadoc, ni̱ daꞌní Sadoc huin Aquim, ni̱ daꞌní Aquim huin Eliud.
15 Daꞌní Eliud huin Eleazar, ni̱ daꞌní Eleazar huin Matán, ni̱ daꞌní Matán huin Jacob.
16 Daꞌní Jacob huin José, ni̱ nika José huin María, ni̱ daꞌní María, huin Ma̱ꞌan Señor Jesús gùꞌnàj Cristo.
17 Ni̱ daranꞌ nej yiꞌnïnꞌ nânj àsìj nga gayiꞌij ngà Abraham ni̱ nda guchij ngà David gachîn yìgànꞌânj yiꞌnïnꞌïn; àsìj David ni̱ nda gaꞌnaꞌ ga̱ya̱ka̱j nej stâdu gaꞌanj daranꞌ nej sij Babilonia, gachîn aꞌngô yìgànꞌânj yiꞌnïnꞌïn; ni̱ àsìj nga gaꞌanj daranꞌ nej sij Babilonia, ngà nda Ma̱ꞌan Cristo gachîn aꞌngô yìgànꞌânj yiꞌnïnꞌïn.
Gaꞌnga Ma̱ꞌan Jesucristo
18 Nga gaꞌnga Ma̱ꞌan Jesucristo ni̱ huê dànanj gahuin: Ni̱ gàꞌ hua̱ yu̱gui María nni Ma̱ꞌan Jesús guendâ ga̱ra̱n ràꞌa ngà José, ni̱ nga nï̀nꞌ gàchin ga̱ya̱ka̱j duguiꞌ nguèj sij, ni̱ gàꞌ nu̱n ri̱ki María giꞌhiaj Ma̱ꞌan Espíritu Santo.
19 Ni̱ José huin nika María, ni̱ huin sôꞌ ꞌngo̱ sí giꞌhiaj sa ni̱ka̱a, ni̱ nun ga̱ranꞌ ruhuâ sôꞌ nga giniꞌin sôꞌ nun ri̱ki María, ni̱ ganï̂n ruhuâ sôꞌ gu̱du̱nâj huì sôꞌ María.
20 Ni̱ nga ganï̂n ruhuâ sôꞌ dànanj, ni̱ nngaj sôꞌ atoj sôꞌ ni̱ ganikïnꞌ ꞌngo̱ si-ángel Ma̱ꞌan Señor riñan sôꞌ ni̱ gata gu̱nïn sôꞌ:
—José, huin daꞌní David, si̱ gahuin ña̱ꞌanj ruhuâ sòꞌ ga̱na̱huin ra̱ꞌâꞌ nikat María, dadinꞌ neꞌej nu̱n ri̱ki dânj, ni̱ Ma̱ꞌan Espíritu Santo huin sa gaꞌnḯn ruhuâ riki na̱nj ánj.
21 Ni̱ ga̱ꞌnga̱ ꞌngo̱ daꞌnin neꞌej naꞌuu, ni̱ du̱guꞌnàjꞌ siyu̱gui JESÚS dadinꞌ huê Ma̱ꞌan huin sa gi̱ꞌhiaj ga̱na̱ni̱n yiñan riñan nej gakï̱nꞌïn.
22 Daranꞌ nej nânj gahuin daꞌngaꞌa ni̱ gisîj nuguanꞌ gaꞌmin Ma̱ꞌan Señor, nga gata, gu̱nïn si-profetaj:
23 Hia̱j rûꞌhuaj, ni̱ gi̱nun ri̱ki ꞌngo̱ siyànà ña̱an sani̱ nun gi̱ni̱ꞌin síi sani̱ ga̱ꞌnga̱ daꞌnin neꞌej naꞌuu,
ni̱ dugûꞌnàjꞌ siyu̱gui neꞌej dânj Emanuel,
ni̱ Emanuel ruhuaj ga̱ta: Ma̱ꞌan Ñaꞌanj an huin ngà nêꞌ.