Gaꞌnaꞌ gi̱ni̱ꞌhiaj nej sí digiꞌñûn nej atïꞌï ñan nngaj Ma̱ꞌan Jesús nga gaꞌnga
2
Nej gui nga ginikaj su̱n rey Herodes, gaꞌnga Ma̱ꞌan Jesús yumanꞌ Belén huin doꞌó Estado Judea, ni̱ neꞌ gisîj gui gaꞌnaꞌ nej sí digiꞌñûn nej atïꞌï ni̱ guyumân nej sôꞌ yumanꞌ snàꞌànj Jerusalén.
2 Ni̱ gataj nej sôꞌ:
—Dànèꞌ nne Ma̱ꞌan Rey gi̱nikaj su̱n riñan nej judío, dadinꞌ gàꞌ gaꞌnga sôꞌ ràꞌaj. Dadinꞌ giniꞌin nej ñûnj si-atïꞌ sij nda neꞌ gisîj gui, ni̱ gaꞌnaꞌ ginùn ña̱ꞌa̱nj nej ñûnj sij.
3 Ni̱ nga gunïn rey Herodes nuguanꞌ nânj, ni̱ nun ga̱ dïnꞌïnj ruhuâ sôꞌ, ni̱ huê danj na̱nj nitaj si hua̱ dïnꞌïnj ruhuâ daranꞌ nej guiì màn yumanꞌ snàꞌànj Jerusalén.
4 Ni̱ nagiꞌhiaj chre̱ꞌ sôꞌ daranꞌ nej rej aꞌnïnꞌ doj màn ruhuâ yumanꞌan, ngà nej maestrû chru̱n ley, ni̱ ganachinꞌ naꞌanj sôꞌ dànèꞌ ga̱ꞌnga̱ Ma̱ꞌan Cristo.
5 Ni̱ gataj nej sôꞌ:
—Huê Belén huin hioꞌó Judea ga̱ꞌnga̱ sij, dadinꞌ huê dânj nnunj riñan ñanj gachrûn sôꞌ gataj dàj ga̱huin:
6 Ni̱ sòꞌ huin yumanꞌ Belén, doꞌó Judá,
ni̱ sê si̱ huînꞌ yumanꞌ lij siganï̂nj nej sí ni̱ka̱j su̱n riñan hioꞌó Judá;
dadinꞌ riñanꞌ ga̱hui̱ ꞌngo̱ sí gi̱nikaj su̱un,
ni̱ du̱gumîn sôꞌ yiñân Israel.
7 Hiôꞌ ni̱ gakḯn huì Herodes, nej síchìj digiꞌñun nej atïꞌï, ni̱ ûta gu̱dadû ga̱na̱chi̱nꞌ naꞌanj sôꞌ nej síchìj dânj àmàn àsìj giniꞌin nej sôꞌ atïꞌ yigï̀ïn.
8 Ni̱ gaꞌnḯn sôꞌ gaꞌanj nej síchìj dânj yumanꞌ Belén, ni̱ gataj sôꞌ:
—Ga̱ꞌa̱nj nej suj hiuj dânj ni̱ ûta hueꞌê gànàchìnꞌ naꞌanj nej suj rayiꞌî neꞌej dânj; ni̱ nga ganariꞌ nej suj sôꞌ ni̱ gànàtàꞌ naꞌanj nej suj riñânj, daꞌnga ni̱ ga̱ꞌa̱n ni̱ ginùn ña̱ꞌa̱n sij.
9 Ni̱ nga gunïn nej síchìj dânj, sa gataj rey, ni̱ gaꞌanj nej sôꞌ, hiôꞌ ni̱ atïꞌ giniꞌin nej sôꞌ neꞌ gisîj gui ni̱ hua neꞌ ña̱an riñan nej sôꞌ, nda guchij ñan nngaj neꞌej dânj, ni̱ ganikïnj.
10 Ni̱ nga giniꞌin nej sôꞌ atïꞌ dânj, ni̱ ûta ganahuin nìhiàꞌ ruhuâ nej sôꞌ.
11 Ni̱ nga gatûj nej sôꞌ ruhuâ hueꞌe, ni̱ giniꞌin nej sôꞌ neꞌej dânj ngà nni María, ni̱ ganikïnꞌ rúdàkòj nej sôꞌ, ni̱ ginûn ña̱ꞌa̱nj nej sôꞌ neꞌej dânj; ni̱ ganaꞌnï̂nj nej sôꞌ chrún ni̱ka̱j nej sôꞌ huaj nej sôꞌ, ni̱ gaꞌhuiꞌ nej sôꞌ agaꞌ oro, ngà sikíi ni̱ ngà gonoꞌô gùꞌnàj mirra.
12 Sani̱ gaꞌnïnꞌ nej sôꞌ ñanꞌ dânj, ni̱ gataj Ma̱ꞌan Ñaꞌanj an gu̱nïn nej sôꞌ sisi̱ si̱ gananikàj nej sôꞌ na̱nꞌ nej sôꞌ riñan Herodes, ni̱ gidaꞌa nej sôꞌ aꞌngô chrej e ni̱ nanꞌ nej sôꞌ yiñán nej sôꞌ.
Gunânj nej sij gaꞌanj nej sij Egipto
13 Neꞌ rùkù nga gaꞌanj nej síchìj nânj, ni̱ nngaj José atoj sôꞌ hiôꞌ ni̱ ganikïnꞌ ꞌngo̱ ángel gaꞌnḯn Ma̱ꞌan Señor riñan sôꞌ ni̱ gata gu̱nïn sôꞌ:
—Ga̱na̱chi sòꞌ ni̱ ga̱na̱ka̱j neꞌej dan ngà nni, ni̱ gu̱na̱nj ga̱ꞌa̱njꞌ nda neꞌ Egipto, ni̱ ga̱neꞌ hiuj dan nda ga̱ta̱j naꞌân gu̱nïnꞌ; dadinꞌ gàyìꞌì Herodes ni̱ nànàꞌhuìꞌ sij neꞌej dan guendâ da̱gahuiꞌ sij sôꞌ.
14 Ni̱ nga ganaꞌnï̂nj ñan José ñanꞌ dânj, ni̱ ganakaj sôꞌ neꞌej dânj ngà María, ni̱ gaꞌanj nej sij nda Egipto.
15 Ni̱ gane nej sij hiuj dânj nda gahuiꞌ Herodes; ni̱ gisîj nuguanꞌ gataj Ma̱ꞌan Señor nga garânj sunj gaꞌmin nej sôꞌ gataj dàj ga̱huin, dadinꞌ gataj sôꞌ: “Neꞌ Egipto gàkï̀n gaꞌnaꞌ daꞌnî.”
Gaꞌnïnꞌ su̱n Herodes si da̱gahuiꞌ nej sij nej sílìj i
16 Hiôꞌ ni̱ nga giniꞌin Herodes si gidigañuꞌunj un nej sí digiꞌñûn nej atïꞌï sôꞌ, ni̱ ûta ginaꞌan ruhuâ sôꞌ, ni̱ gaꞌnïnꞌ sôꞌ suun si da̱gahuiꞌ nej stâdu daranꞌ nej silíj hua̱j gìsìj hioꞌ huìj i ruhuâ yumanꞌ Belén ni̱ nda ganikàj nï̀nꞌ gàchràꞌ rukû yumanꞌ dânj, dàj rûnꞌ hua nuguanꞌ ganari sôꞌ duꞌhua nej síchìj digiꞌñûn nej atïꞌï.
17 Hiôꞌ ni̱ gisîj nuguanꞌ gataj Jeremías sôꞌ gataj dàj ga̱huin, nga gaꞌmin sôꞌ:
18 Dugueꞌe nej guiì gunḯn nda Ramá,
ni̱ ûta gaguâj hia ninj, ni̱ ganarânj guchej ninj;
ni̱ dugueꞌe Raquel rayiꞌî guendâ gahuiꞌ nej daꞌnin,
ni̱ nun ga̱ꞌhue ga̱na̱huin nìhiàꞌ ruhuaj, dadinꞌ ganahuij nej daꞌnin gahuiꞌ.
19 Sani̱ neꞌ rùkù nga gahuiꞌ Herodes, ni̱ ganikïnꞌ si-ángel Señor riñan José nga nngaj sôꞌ atoj sôꞌ nda Egipto, Ni̱ gata gu̱nïn sôꞌ:
20 —Ga̱na̱chî sòꞌ, ni̱ ga̱na̱ka̱j silíj dan ngà nni sij, ni̱ nànìkàjꞌ na̱nꞌ riñan hioꞌó Israel, dadinꞌ gàꞌ gahuiꞌ nej sí gahuin ruhuâ da̱gahuiꞌ silíj dan.
21 Hiôꞌ ni̱ ganachi sôꞌ, ni̱ ganakaj sôꞌ silíj dânj ngà María, ni̱ ganaꞌnaꞌ sôꞌ riñan hioꞌó Israel.
22 Sani̱ gunïn sôꞌ si Arquelao nikaj su̱n riñan Estado Judea dadinꞌ ganakaj sôꞌ si-su̱n rej sôꞌ Herodes, ni̱ yuꞌhuiꞌ José na̱nꞌ sôꞌ yumanꞌ dânj; sani̱ gataj naꞌanj Ma̱ꞌan Ñaꞌanj an gu̱nïn sôꞌ nga nngaj sôꞌ atoj sôꞌ, si dànanj ga̱ꞌa̱nj sôꞌ riñan hioꞌó Galilea.
23 Ni̱ gaꞌnaꞌ sôꞌ ni̱ gane sôꞌ yumanꞌ nàꞌànj gùꞌnàj Nazaret, daꞌnga ni̱ gisîj nuguanꞌ gataj nej sí gataj dàj ga̱huin, si daꞌhui Ma̱ꞌan Jesús gùꞌna Nazareno.