Nuguanꞌ gè gi̱ꞌhiaj ga̱na̱ni̱nꞌ nânj huin gachrûn
SAN MARCOS
Ganataꞌ Juan Bautista si-nùguànꞌ Ma̱ꞌan Ñaꞌanj an riñan nej guiì ñan hua̱ hioꞌó nàkòo
1
Gayiꞌì si̱nï̱n nuguanꞌ gi̱ꞌhiaj ga̱na̱ni̱n nej guiì ni̱ gaꞌmin rayiꞌî Ma̱ꞌan Jesucristo huin Daꞌní Ma̱ꞌan Ñaꞌanj an.
2 Dàj rûnꞌ nnunj riñan danj Isaias sôꞌ huin ꞌngo̱ sí gataj dàj ga̱huin:
Hia̱j rûꞌhuaj ni̱ gàꞌnï̀n ꞌngo̱ sí dânj ni̱ ga̱ꞌa̱nj si̱nï̱n sôꞌ neꞌ ña̱an riñanꞌ,
ni̱ sí nânj gi̱ꞌhiaj yu̱gui nej guiì nga gùchìꞌ.
3 Ni̱ gaꞌmin nùkuaj sôꞌ nga gane sôꞌ riñan hioꞌó hua̱ nàkòo ni̱ gataj sôꞌ:
“Gi̱ꞌhiaj yu̱gui nej suj si-chrej Ma̱ꞌan Señor;
ni̱ na̱gi̱ꞌhiaj ni̱ka̱ nej suj ma̱ꞌan nej suj riñanj.”
4 Ni̱ nga nne Juan riñan hioꞌó nàkòo,
ni̱ duguataꞌ nne sôꞌ nej guiì ni̱ gataj sôꞌ si gànànìkàj ruhuâ nej guiì rayiꞌî si-ga̱kïnꞌ ninj,
daꞌnga ni̱ gaꞌhue ginikaj Ma̱ꞌan Ñaꞌanj an nimân nìko rayiꞌî ninj.
5 Ni̱ gaꞌnaꞌ daranꞌ nej guiì màn nej yumanꞌ nìkòꞌ Judea riñan Juan,
ni̱ huê danj na̱nj gaꞌnaꞌ daranꞌ nej guiì màn Jerusalén;
ni̱ duguataꞌ nne sôꞌ ninj ruhuâ kïn Jordán,
ni̱ ganataꞌ ninj si-ga̱kïnꞌ ninj riñan sôꞌ.
6 Ni̱ nu̱n Juan ꞌngo̱ atsîj huin duhuê yuku kameyu,
ni̱ ꞌnï̱nj nnïnj ganikàj gatï̀n sôꞌ ni̱ yâ sôꞌ yirikí staꞌnaj a ngà gatsiꞌ màn riki kïj ï.
7 Ganataꞌ sôꞌ si-nùguànꞌ Ma̱ꞌan Ñaꞌanj an riñan nej guiì ni̱ gataj sôꞌ:
—ꞌNa̱ꞌ ꞌngo̱ sí dânj neꞌ rùkùj ni̱ ni̱ka̱j sôꞌ su̱n yàkàan gàꞌ daꞌ ñùnj,
ni̱ giriꞌí sinàꞌàj a du̱nachí nnïnj a̱nu̱min kanj ꞌnï̱nj dakó sôꞌ.
8 Ñùnj ni̱ yàngàꞌ ni̱ duguataꞌ nnêj ngà nnee nej suj;
sani̱ Ma̱ꞌan ni̱ duguataꞌ nnej ngà Espíritu Santo nej suj.
Gataꞌ nne Ma̱ꞌan Jesús
9 Ni̱ gahuin nej gui dânj,
ni̱ gaꞌnaꞌ Maꞌan Jesús neꞌ yumanꞌ Nazaret huin doꞌó Galilea,
ni̱ gaꞌanj gàtàꞌ nnej riñan Juan ruhuâ kïn Jordán.
10 Ni̱ orâ chre nga gahui Ma̱ꞌan riki nnee,
ni̱ ganayîꞌnï̀nj neꞌ yàtàꞌa,
ni̱ giniꞌin gininj Ma̱ꞌan Espíritu Santo gaꞌnaj ni̱ huaj dàj rûnꞌ hua ꞌngo̱ yaꞌàan ni̱ gataj ahui Ma̱ꞌan Jesús.
11 Ni̱ gunïn Ma̱ꞌan Jesús gaꞌmin Ma̱ꞌan Ñaꞌanj an nda neꞌ yàtàꞌa ni̱ gata:
—Sòꞌ huin Daꞌnî ni̱ ûta ꞌì ruhuâj niꞌín sòꞌ;
ni̱ ûta huin nìhiàꞌ ruhuâj niꞌín sòꞌ.
Duguaneꞌ sichre gakï̱nꞌïn riñan Ma̱ꞌan Jesús
12 Ni̱ neꞌ rùkù ni̱ ginikaj Ma̱ꞌan Espíritu Santo gaꞌan Ma̱ꞌan Jesús riñan hioꞌó hua̱ nàkòo.
13 Ni̱ gane riñan hioꞌó nàkòo huìj xia gui,
ni̱ duguaneꞌ Sichre gakï̱nꞌïn riñanj,
ni̱ nne ngà nej yuku màn riki kïj ï;
ni̱ gunânj gi̱tsi nej ángel riñan Ma̱ꞌan.
Gayiꞌì Ma̱ꞌan Jesús gananï̂n si-nùguànꞌ Ma̱ꞌan Ñaꞌanj an riñan hioꞌó Galilea
14 Neꞌ rùkù nga gatûj Juan dukuâ gaꞌa,
ni̱ gaꞌnaꞌ Ma̱ꞌan Jesús neꞌ Galilea ni̱ gidiganj nuguanꞌ gi̱ꞌhiaj ga̱na̱ni̱n nej guiì ni̱ dàj gi̱nikaj su̱n Ma̱ꞌan Ñaꞌanj an riñan ninj.
15 Ni̱ gata:
—Gàꞌ gisîj diû ni̱ gàꞌ gahuin nichrunꞌ Ma̱ꞌan Ña̱ꞌa̱nj ne yàtàꞌa guendâ gi̱nikaj sunj;
ni̱ nànìkàj ruhuâ nej suj rayiꞌî si-ga̱kïnꞌ nej suj,
ni̱ gùyùmàn ruhuâ nej suj niꞌin nej suj nuguanꞌ gi̱ꞌhiaj ga̱na̱ni̱n nej suj.
Gakḯn Ma̱ꞌan Jesús gi̱nikòꞌ sí ꞌnïnj sun giri yukuaj a rukuj
16 Ni̱ gachîn Ma̱ꞌan Jesús nìchrùnꞌ duꞌhua nne ña̱ꞌa̱nj gùꞌnàj Galilea,
ni̱ giniꞌin Simón ngà dinḯn sôꞌ Andrés,
ni̱ nu̱n nguèj dìnï̀nj sôꞌ gaꞌnḯn nguèj sôꞌ nnanj giri yukuaj a ruhuâ nne ña̱ꞌa̱nj;
dadinꞌ huin nguèj sôꞌ sí giri yukuaj aj.
17 Ni̱ gataj Ma̱ꞌan Jesús gu̱nïn nguèj sôꞌ:
—Ga̱ꞌna̱ꞌ nguèj suj ni̱ gi̱nikòꞌ nguèj suj rukû Maꞌán,
ni̱ gi̱ꞌhiâ si ga̱huin nguèj suj sí gìrìꞌ nej guiì gi̱nikòꞌ rukû Maꞌán.
18 Ni̱ orâ chre ni̱ gudunâj nguèj sôꞌ nnanj giri yukuaj a,
ni̱ gi̱nikòꞌ nguèj sôꞌ rukû Ma̱ꞌan Jesús gaꞌanj nguèj sôꞌ.
19 Gachîn Ma̱ꞌan Jesús gaꞌan neꞌ ña̱n doj;
ni̱ giniꞌin Jacobo daꞌní Zebedeo ngà dinḯn sôꞌ Juan,
ni̱ nu̱n nguèj sôꞌ ganachrâj nguèj sôꞌ nnanj giri yukuaj a ruhuâ barku.
20 Ni̱ gakḯn Ma̱ꞌan Jesús nguèj sôꞌ;
ni̱ orâ chre ni̱ gudunâj nguèj sôꞌ rej nguèj sôꞌ Zebedeo ruhuâ barku ngà nej sí huin musu,
ni̱ gi̱nikòꞌ nguèj sôꞌ rukû Ma̱ꞌan Jesús gaꞌanj nguèj sôꞌ.
ꞌNgo̱ sí nu̱n nanè kï̱j ï huaa ruhuâ nimân
21 Ni̱ gatûj nej sij ruhuâ yumanꞌ Kapernaúm;
ni̱ gui ganarânj rûhua huin nga gatûj Ma̱ꞌan Jesús ruhuâ hueꞌ nûhui,
ni̱ gidiganj si-nùguànꞌ Ma̱ꞌan Ñaꞌanj an riñan nej guiì.
22 Ni̱ gahuin ña̱ꞌanj ruhuâ nej guiì niꞌin ninj nej yìꞌnï̀nꞌ nuguanꞌ gidiganj:
Dadinꞌ gidiganj dàj rûnꞌ gidigân ꞌngo̱ sí ni̱ka̱j suun,
ni̱ nitaj si gidiganj dàj rûnꞌ gidigân nej maestrû niꞌin ley.
23 Sani̱ ruhuâ hueꞌ si-nùhuì nej sij nne ꞌngo̱ sí dânj ni̱ ruhuâ nimân sôꞌ nun nanè kï̱j huaa,
ni̱ gaꞌmin nùkuaj nanè kïj hua dânj.
24 —Nùnj huin si huin ruhuâ Ma̱ꞌân rèꞌ niꞌîn rèꞌ nej ñûnj ràꞌaj Jesús Nazareno.
Gaꞌnaꞌ Ma̱ꞌân rèꞌ guendâ du̱nahuí rèꞌ nej ñûnj nîꞌ.
Niꞌín ahuin Ma̱ꞌân rèꞌ,
huê Maꞌân rèꞌ huin sa gèe riñan Ma̱ꞌan Ñaꞌanj an.
25 Sani̱ nanikàj Ma̱ꞌan Jesús ni̱ dugunïn gàꞌij nanè kï̱j hua dânj ni̱ gata:
—Dḯn ga̱ne duꞌhuâꞌ ráj ni̱ ga̱hui̱ ruhuâ nimân sí dan ni̱ ga̱ꞌa̱nj ráj.
26 Ni̱ gayiꞌì nanè kï̱j hua dan ni̱ duguaꞌì staꞌuj sí dânj,
ni̱ gaguâj nùkuaj staꞌuj ni̱ gahui ruhuâ nimân sí dânj ni̱ gaꞌan.
27 Ni̱ ûta gahuin ña̱ꞌanj ruhuâ daranꞌ nej guiì màn hiuj dânj,
ni̱ ganarïsnaꞌanj nej ma̱ꞌan ninj siganï̂nj ninj ni̱ gataj ninj:
—Ahuin sí huin sí nânj ràꞌaj.
Ahuin aꞌngô yiꞌnïnꞌ nuguanꞌ nàkà huin sa gaꞌmin sôꞌ,
dadinꞌ gaꞌnïnꞌ su̱n sôꞌ riñan nej nanè kï̱j huaa ni̱ dagahuin ninj riñanj sôꞌ ràꞌaj.
28 Ni̱ do̱j nï̀nꞌ diû ni̱ gayaꞌnï̀n nuguanꞌan rayiꞌî sa sàꞌ giꞌhiaj Ma̱ꞌan Jesús nï̀nꞌ gàchràꞌ riñan hioꞌó ginikaj ñuꞌunj Estado Galilea.
Ganahuin nni yi̱che̱j Pedro giꞌhiaj Ma̱ꞌan Jesús
29 Nga gahui nej sij ruhuâ hueꞌ nûhui,
ni̱ gaꞌnaꞌ nej sij dukuâ Simón ngà Andrés,
ni̱ huê danj na̱nj gaꞌnaꞌ Jacobo ngà Juan ngà nej sij.
30 Ni̱ nngaj nni yìchèj Simón aꞌnanꞌ sachij i ni̱ nu̱n gachiꞌi ñûnꞌ;
ni̱ orâ dânj ni̱ ganataꞌ nej sij gu̱nïn Ma̱ꞌan Jesús si aꞌnanꞌ sachij dânj.
31 Hiôꞌ ni̱ gaꞌanj nichì Ma̱ꞌan Jesús ñan nngaj sachij dânj,
ni̱ gidaꞌa raꞌa ñûnꞌ ni̱ ganachi nika,
ni̱ orâ chre ni̱ giyîꞌnej gachiꞌi ñûnꞌ,
ni̱ gayiꞌì ñûnꞌ ni̱ gunânj gi̱tsi ñûnꞌ riñan nej sij.
Nga ginìn gui dânj ni̱ ûta ganahuin nej guiì giꞌhiaj Ma̱ꞌan Jesús
32 Nga ginìn ni̱ nga gàꞌ gataꞌ gui raa̱ kïj ï,
ni̱ ginikaj nej sij gaꞌnaꞌ nej sij riñan Ma̱ꞌan Jesús,
daranꞌ nej guiì aꞌnanꞌan,
ni̱ nej guiì nun ruhuâ nimân sa kï̱j ï.
33 Ni̱ ganaraꞌhuiꞌ daranꞌ nej guiì màn yumanꞌ snàꞌànj dânj,
riñan rahueꞌe.
34 Ni̱ ganahuin daranꞌ nej guiì aꞌnanꞌan ngà ahuin na̱nj yiꞌì garaꞌhue̱ꞌ ninj giꞌhiaj Ma̱ꞌan Jesús,
ni̱ girij ruhuâ nimân nej guiì ûta gàꞌì nej sa kï̱j ï,
ni̱ nun ga̱ꞌnïn ga̱ꞌmi̱n nej sa kï̱j dânj dadinꞌ niꞌin ninj ahuin sa huin Ma̱ꞌan.
Ganataꞌ Ma̱ꞌan Jesús si-nùguànꞌ Ma̱ꞌan Ñaꞌanj an riñan nej guiì màn riñan hioꞌóo Galilea
35 Ni̱ ganachi Ma̱ꞌan Jesús nga nï̀nꞌ hua ni̱ganꞌ staꞌu ni̱ nga nï̀nꞌ hua ru̱mi̱nꞌ,
ni̱ gahui gaꞌan riñan hioꞌóo nàkòo ni̱ ñan hua̱ nîꞌnïnj ïn,
ni̱ hiuj dânj gaꞌmin ngà Ma̱ꞌan Ñaꞌanj an.
36 Ni̱ ûta nanaꞌhuiꞌ Simón Ma̱ꞌan Jesús,
ni̱ huê danj na̱nj nanaꞌhuiꞌ nej guiì màn ngà Simón Ma̱ꞌan Jesús.
37 Ganariꞌ nej sij Ma̱ꞌan Jesús ni̱ gataj nej sij gu̱nïn:
—Nanaꞌhuiꞌ daranꞌ nej guiì Ma̱ꞌân rèꞌ.
38 Ni̱ gataj Ma̱ꞌan Jesús:
—Ga̱ꞌa̱nj nêꞌ nej yumanꞌ màn nìchrùnꞌ nânj,
daꞌnga ni̱ ganatá si-nùguànꞌ Ma̱ꞌan Ñaꞌanj an riñan nej guiì màn hiuj dânj;
dadinꞌ huê rayiꞌî sun nânj huin gaꞌná.
39 Ni̱ gidigân Ma̱ꞌan Jesús si-nùguànꞌ Ma̱ꞌan Ñaꞌanj an ruhuâ nej hueꞌ nuhuî nne nï̀nꞌ gàchràꞌ riñan hioꞌó Galilea,
ni̱ girij ruhuâ nimân nej guiì nej sa kï̱j ï.
Giꞌhiaj Ma̱ꞌan Jesús ganahuin hueꞌê nneè kú si nnùn yiꞌì lepra
40 Ni̱ gaꞌnaꞌ ꞌngo̱ sí nnùn yiꞌì lepra riñan Ma̱ꞌan Jesús,
ni̱ ganikïnꞌ rúdàkòj sôꞌ riñanj ni̱ ûta àko gachín nìꞌhiaj sôꞌ riñanj;
ni̱ gataj sôꞌ:
—Si ruhuâ Ma̱ꞌân rèꞌ,
ni̱ ga̱ꞌhue gi̱ꞌhiaj Ma̱ꞌan rèꞌ si ga̱na̱huín.
41 Ni̱ gananï̂n àko ruhuâ Ma̱ꞌan Jesús niꞌin sí dânj,
ni̱ dunukuaj raꞌa ni̱ gaganꞌ raꞌa nneè kú sôꞌ ni̱ gata:
—Garanꞌ ruhuâj si ga̱na̱huin sàꞌ nneè kúꞌ na̱nj ánj.
42 Ni̱ nga gisîj gaꞌmin Ma̱ꞌan Jesús ni̱ orâ chre ni̱ giyîꞌnej yiꞌì lepra riñan nneè kú sí dânj,
ni̱ ganahuin sàꞌ nneè kú sôꞌ.
43 Hiôꞌ ni̱ ûta gaꞌnïnꞌ sunj riñan sôꞌ,
ni̱ gata sisi̱ si̱ gananï̂n sôꞌ riñan nej guiì sa giꞌhia ngà sôꞌ,
huê danj ni̱ ganaꞌnïn nan sôꞌ dukuâ sôꞌ.
44 —Ni̱ gata:
Ni̱ꞌhiaj ni̱ si̱ gatajꞌ gu̱nïn gàꞌ si ꞌngo̱ nej guiì sa giꞌhiâ ngàꞌ mánj,
sani̱ ga̱ꞌa̱njꞌ ni̱ gi̱di̱gânꞌ maꞌânꞌ riñan rej,
ni̱ gàꞌhuìꞌ ꞌngo̱ yuku guendâ ganahuin sàꞌ riñan Ma̱ꞌan Ñaꞌanj an dàj rûnꞌ gaꞌnïnꞌ su̱n Moisés guendâ gi̱ni̱ꞌin nej sij sa sàꞌ giꞌhiâ ngà râj.
45 Sani̱ nga gaꞌanj sí dânj ni̱ gayiꞌì sôꞌ ni̱ ûta duyiꞌnanj sôꞌ,
ni̱ duyaꞌnï̀n sôꞌ sa sàꞌ giꞌhiaj Ma̱ꞌan Jesús ngà sôꞌ,
ni̱ rayiꞌî dânj ni̱ naꞌhue ga̱tu̱ ràngàꞌ Ma̱ꞌan Jesús yumanꞌ snàꞌànj dânj,
hiôꞌ ni̱ gunâj Ma̱ꞌan Jesús neꞌ ye̱ꞌ yumanꞌ snàꞌànj dânj riñan hioꞌó nàkòo ni̱ gaꞌnaꞌ daranꞌ nej yumanꞌan riñan Ma̱ꞌan.