Nda nanè chre giriꞌ nej sij ûta gàꞌì yukuaj a
5
Gahuin ꞌngo̱ gui dânj nga ni̱kï̱nꞌ Ma̱ꞌan Jesús nìchrùnꞌ duꞌhua nne ña̱ꞌa̱nj nu̱n Genesaret,
ni̱ ûta ganaraꞌhuiꞌ nej guiì riñan Ma̱ꞌan dadinꞌ ruhuâ ninj gu̱nïn ninj si-nùguànꞌ Ma̱ꞌan Ñaꞌanj an.
2 Ni̱ giniꞌin Ma̱ꞌan Jesús nikïnꞌ huìj barku nìchrùnꞌ duꞌhua dahue̱ nu̱n hiuj dânj;
ni̱ gananinj nej sí giri yukuaj a ruhuâ barkû dânj,
ni̱ ganaꞌnïnꞌ nej sôꞌ nnanj giri yukuaj a mân nej sôꞌ.
3 Ni̱ gatûj Ma̱ꞌan Jesús ruhuâ ꞌngo̱ barku,
huin siꞌhiaj Simón,
ni̱ gachín nìꞌhiaj Ma̱ꞌan Jesús riñan Simón si gi̱ꞌhiaj sôꞌ sunuj u ni̱ gi̱ꞌhiaj anêj sôꞌ doj si-barkû sôꞌ duꞌhua hioꞌó nàkòo;
ni̱ gaꞌanj ga̱ne Ma̱ꞌan Jesús ruhuâ barkû dânj,
ni̱ gayiꞌì Ma̱ꞌan Jesús ni̱ gidiganj si-nùguànꞌ Ma̱ꞌan Ñaꞌanj an riñan nej guiì màn hiuj dânj.
4 Ni̱ nga gisîj gaꞌmin ni̱ gata gu̱nïn Simón:
—Gi̱nikaj sòꞌ barkû dan ni̱ ga̱ꞌa̱nj nda ña̱n hua̱ gùnùn ruhuâ nne ña̱ꞌa̱nj,
ni̱ gàꞌnï̀nj nnanj giri yukuaj a ni̱ gìrìꞌ yukuaj a.
5 Nanikàj Simón,
ni̱ gataj sôꞌ:
—Maestrûj,
daꞌ hua̱ gè ña̱nꞌ nânj giꞌhiaj sun nej ñûnj,
sani̱ nitaj yukuaj a giriꞌ nej ñûnj;
sani̱ ngà si-nùguànꞌ Ma̱ꞌan rèꞌ ni̱ gàꞌnï̀n nnanj giri yukuaj a ruhuâ nne ña̱ꞌa̱nj.
6 Ni̱ nga gisîj gaꞌnḯn nej sij nnanj ruhuâ nne ña̱ꞌa̱nj,
ni̱ nda gachra chre nnanj giriꞌ nej sij yukuaj a,
ni̱ nda guyutù nnanj dânj giꞌhiaj nej yukuaj a.
7 Hiôꞌ ni̱ giꞌhiaj raꞌa nej sij riñan aꞌngô da̱ꞌa̱j nej sí ni̱ka̱j duguiꞌ ngà nej sij ni̱ gaꞌnaꞌ nej sôꞌ ngà aꞌngô barku,
guendâ gu̱ru̱gûñuꞌunj nej sôꞌ nej sij;
ni̱ gaꞌnaꞌ nej sôꞌ ni̱ gachra nda gu̱ña̱n nguèj barkû dânj giriꞌ nej sij yukuaj a,
ni̱ nda ganagaꞌ nguèj barkû dânj ruhuâ nnee.
8 Ni̱ nga giniꞌin Pedro nej nânj,
ni̱ ganikïnꞌ rúdàkòj sôꞌ riñan Ma̱ꞌan Jesús ni̱ gataj sôꞌ:
—Gu̱xu̱n rèꞌ Ma̱ꞌân rè riñânj,
na̱nj Señor,
dadinꞌ huín sí gakï̱nꞌïn.
9 Dadinꞌ rayiꞌî guendâ ûta giriꞌ nej sij nej yukuaj a,
ni̱ ûta guyuꞌhuiꞌ Pedro,
ni̱ huê danj na̱nj ûta guyuꞌhuiꞌ nej sí ni̱ka̱j duguiꞌ ngà sôꞌ.
10 Ni̱ huê dânj na̱nj guyuꞌhuiꞌ Jacobo ngà Juan,
huin daꞌní síchìj Zebedeo,
dadinꞌ nej sôꞌ giꞌhiaj sun nùguànꞌàn ngà Simón.
Ni̱ gataj Ma̱ꞌan Jesús gu̱nïn Simón:
—Si̱ guyuꞌhuîꞌ mánj;
dadinꞌ àsìj gui hia̱j ni̱ gahuînꞌ sí gìrìꞌ nej síi gi̱nikòꞌ rukú.
11 Ni̱ neꞌ rùkù nga guruꞌman raꞌa nej sij si-barkû nej sij gaꞌan riñan hioꞌó hua̱ nàkòo,
ni̱ gudunâj nej sij daranꞌ nej sa hua̱ riñan nej sij,
ni̱ ginikòꞌ nej sij rukû Ma̱ꞌan Jesús ni̱ gaꞌanj nej sij nngaj.
Giꞌhiaj Ma̱ꞌan Jesús ganahuin ꞌngo̱ sí nnùn yiꞌì lepra
12 Ni̱ gahuin nga nne Ma̱ꞌan Jesús ruhuâ ꞌngo̱ nej yumanꞌ snàꞌànj dânj,
ni̱ nne ꞌngo̱ sí nnùn yiꞌì lepra hiuj dânj,
ni̱ nga giniꞌin sôꞌ Ma̱ꞌan Jesús,
ni̱ ganikïnꞌ rúdàkòj sôꞌ ni̱ guduguaꞌ sôꞌ nda riñan hioꞌóo hio sôꞌ ni̱ gachín nìꞌhiaj sôꞌ ni̱ gataj sôꞌ:
—Señor,
si ruhuâ Ma̱ꞌân rèꞌ ni̱ ga̱ꞌhue gi̱ꞌhiá rèꞌ ga̱na̱huín na̱nj ánj.
13 Hiôꞌ ni̱ dunukuâ Ma̱ꞌan Jesús raꞌa,
ni̱ gaganꞌ raꞌa sí dânj ni̱ gata:
—Ruhuâj si ga̱na̱huin sàꞌ nneè kút.
Ni̱ orâ chre ni̱ giyiꞌnèj yiꞌì lepra riñan nneè kú sôꞌ.
14 Ni̱ gaꞌnïnꞌ Ma̱ꞌan Jesús suun riñan sí dânj sisi̱ si̱ ganataꞌ sôꞌ gu̱nïn gàꞌ si̱ ꞌngo̱ nej guiì;
sani̱ gataj Ma̱ꞌan Jesús:
—Gàꞌànjꞌ ni̱ gi̱digânꞌ ma̱ꞌânꞌ riñan rej ni̱ gàꞌhuìꞌ ꞌngo̱ yuku guendâ ganahuin sàꞌ nneè kút,
dàj rûnꞌ giyiꞌnïnꞌ suun giꞌhiaj Moisés.
Guendâ gi̱ni̱ꞌin nej sij sa sàꞌ giꞌhiaj Ma̱ꞌan Ñaꞌanj an ngàꞌ ráj.
15 Sani̱ ûta gaꞌmin hueꞌê nej guiì rayiꞌî Ma̱ꞌan Jesús ni̱ daꞌ gui ni̱ dànanj ûta gàꞌì nej guiì huin sa gunïn rayiꞌî sa sàꞌ giꞌhiaj Ma̱ꞌan Jesús;
ni̱ ûta naraꞌhuiꞌ nej guiì dadinꞌ ruhuâ ninj gu̱nïn ninj sa gaꞌmin Ma̱ꞌan Jesús,
ni̱ ruhuâ ninj si gi̱ꞌhiaj Ma̱ꞌan Jesús si ga̱na̱huin ninj riñan nej yiꞌì garaꞌhue̱ꞌ ninj.
16 Sani̱ gahuin anêj Ma̱ꞌan Jesús riñan nej guiì dânj ni̱ gaꞌan riñan hioꞌó hua̱ niꞌnï̀nj ïn,
ni̱ gaꞌmin ngà Ma̱ꞌan Ñaꞌanj an.
Giꞌhiaj Ma̱ꞌan Jesús ganahuin ꞌngo̱ sí naꞌhue gìsìkìꞌ nneè kú
17 Gahuin ꞌngo̱ gui dânj nga nikïnꞌ Ma̱ꞌan Jesús gidiganj,
ni̱ nne nej sí fariseo ngà nej sí maestrû chru̱n ley,
ni̱ nej sí nânj gaꞌnaꞌ nej yumanꞌ màn Galilea,
ngà Judea ni̱ Jerusalén;
ni̱ nne Ma̱ꞌan Ñaꞌanj an ngà Jesús rayiꞌî dânj gaꞌhue ganahuin nej guiì giꞌhia.
18 Hiôꞌ ni̱ guyumân gàꞌì ranꞌ nej sí dânj ni̱ ata nej sôꞌ ꞌngo̱ sí naꞌhue gìsìkìꞌ nneè kú ni̱ tàj sí dânj riñan nna nikaj nej sôꞌ ꞌna̱ꞌ nej sôꞌ,
ni̱ ruhuâ nej sôꞌ ga̱tu̱ nej sôꞌ nda ruhuâ hueꞌ ña̱n nne Ma̱ꞌan Jesús dadinꞌ ruhuâ nej sôꞌ si gùchìꞌ sí aꞌnanꞌ nânj nda neꞌ ri̱ña̱n Ma̱ꞌan Jesús.
19 Sani̱ nitaj dàj huaj ga̱ꞌhuê gùchìꞌ nej sôꞌ nda ña̱n ni̱kï̱nꞌ Ma̱ꞌan Jesús dadinꞌ ûta nìchra mân guiì ruhuâ hueꞌ dânj,
huê danj ni̱ gahui nej sôꞌ yichrá hueꞌe,
ni̱ gutaꞌ nej sôꞌ ꞌngo̱ hiuꞌuj u,
ni̱ tàj sí naꞌhue gìsìkìꞌ nânj riñan nna ni̱ guduninj nej sij sôꞌ ñan ni̱kï̱nꞌ Ma̱ꞌan Jesús.
20 Ni̱ nga giniꞌin Ma̱ꞌan Jesús si ûta nìko guyumân ruhuâ nej sij,
ni̱ gata gu̱nïn sí naꞌhue gìsìkìꞌ nneè kú:
—Gàꞌ ginikâ nimân nìko rayiꞌî nej si-ga̱kï̂nt.
21 Hiôꞌ ni̱ gayiꞌì nej sí chru̱n ley ngà nej sí fariseo ni̱ ganï̂n aꞌnanꞌ ruhuâ nej sôꞌ ngà nda ruhuâ nimân nej sôꞌ ni̱ gataj nej sôꞌ:
“Ahuin sí nânj ni̱ gaꞌmin kï̱j sôꞌ riñan Ma̱ꞌan Ñaꞌanj an ràꞌaj.
Ahuin sí ga̱ꞌhue gi̱ꞌhiaj gànàrë̀ꞌ si-ga̱kïnꞌ ꞌngo̱ guiì ni̱ si̱ ꞌngo̱ rïn Ma̱ꞌan Ñaꞌanj an huin sa ga̱ꞌhue gi̱ꞌhiaj gànàrë̀ꞌ si-ga̱kïnꞌ ninj ràꞌaj.”
22 Hiôꞌ ni̱ niꞌin Ma̱ꞌan Jesús,
dàj ganï̂n ruhuâ nej sij ni̱ nanika ni̱ gata gu̱nïn nej sij:
—Nùnj huin si aꞌmin nej suj ngà nda ruhuâ nimân nej suj ràꞌaj.
23 Ahuin sa nitaj si hua̱ chìꞌ ga̱ꞌhue gàtà ruhuâ nej suj ràꞌaj:
“Gàꞌ ginikâ nimân nìko rayiꞌî nej si-ga̱kï̂nt”,
nej si gàtà:
“Ga̱na̱chi sòꞌ ni̱ ga̱che̱ ráj.”
24 Sani̱ guendâ gi̱ni̱ꞌi̱n nej suj si ñùnj ni̱ ni̱ka̱j sùnj riñan hioꞌóo guendâ ga̱ꞌhue na̱du̱rëꞌë́ si-ga̱kïnꞌ nej guiì.
Ni̱ gata gu̱nïn sí naꞌhue gìsìkìꞌ nneè kú dânj:
—Riñan sòꞌ tâ:
Ni̱ ga̱na̱chî sòꞌ ni̱ ga̱na̱ka̱j nna tàjꞌ,
ni̱ na̱nꞌ dukuâꞌ ráj.
25 Ni̱ orâ chre ni̱ ganachi sí dânj ni̱ giniꞌin daranꞌ nej guiì màn hiuj dânj,
ni̱ ganakaj sôꞌ nna tàj sôꞌ ni̱ nanꞌ sôꞌ dukuâ sôꞌ,
ni̱ gaꞌmin hueꞌê sôꞌ yiꞌî Ma̱ꞌan Ñaꞌanj an.
26 Ni̱ ûta gahuin ña̱ꞌanj ruhuâ daranꞌ nej guiì màn hiuj dânj,
ni̱ ûta gaꞌmin hueꞌê ninj yiꞌî Ma̱ꞌan Ñaꞌanj an;
ni̱ ûta guyuꞌhuiꞌ ninj,
ni̱ gataj ninj:
—Hia̱j ni̱ giniꞌin nêꞌ sa sàꞌ nìko xi giꞌhiaj Ma̱ꞌan Ñaꞌanj an na̱nj ánj.
Gakḯn Ma̱ꞌan Jesús gaꞌna leví riñanj
27 Neꞌ rùkù nga gisîj gahuin nej nânj ni̱ gahui Ma̱ꞌan Jesús ni̱ gaꞌan,
ni̱ giniꞌin nne Leví hueꞌ ñan naruꞌhue nej guiì sanꞌanj huin kuestu dadinꞌ huin sôꞌ sí gaꞌnêj sanꞌanj an guendâ gobierno ni̱ gata gu̱nïn sôꞌ:
—Gi̱nikôꞌ sòꞌ rukú.
28 Ni̱ gudunâj sí nânj daranꞌ sa màn riñan sôꞌ,
ni̱ ganayumàn sôꞌ ni̱ gaꞌanj sôꞌ ngà Jesús.
29 Ni̱ giꞌhiaj Leví ꞌngo̱ nihia nìko dukuâ sôꞌ;
ni̱ nne ûta gàꞌì nej sí gaꞌnêj sanꞌanj guendâ gobierno ngà aꞌngô nej guiì yiꞌnḯn mesa ngà sôꞌ.
30 Ni̱ gaꞌmin nej sí chru̱n ley ngà nej sí fariseo yiꞌî nej sí gaꞌnaꞌ ga̱huin chru̱n riñan Ma̱ꞌan Jesús ni̱ gataj nej sôꞌ:
—Nùnj huin saj ni̱ ya nej suj ni̱ goꞌo nej suj ngà nej sí gaꞌnêj sanꞌanj an guendâ sí gobierno ni̱ ngà nej sí gakï̱nꞌïn ràꞌaj.
31 Nanikàj Ma̱ꞌan Jesús ni̱ gata:
—Nej sí sàꞌa ni̱ nitaj si̱ nanaꞌhuiꞌ nej sôꞌ sí gònòꞌòo mánj,
nej sí aꞌnanꞌ ngà nneè kú huin sí nanaꞌhuiꞌ sí gònòꞌòo na̱nj ánj.
32 Nu̱n gàꞌnàj guendâ gàkï̀n nej sí ganï̂n ruhuâ si huin nej sôꞌ sí ni̱ka̱a mánj,
gaꞌná guendâ gi̱ꞌhia si nànìkàj ruhuâ nej sí giꞌhiaj gakï̱nꞌïn,
rayiꞌî si-ga̱kïnꞌ nej sôꞌ.
Gachín naꞌanj nej sij rayiꞌî guendâ ga̱ gi̱ni̱ne̱j nej sij
33 Hiôꞌ ni̱ gataj nej sí dânj:
—Nùnj huin saj ni̱ nej sí ꞌna̱ꞌ ga̱huin chru̱n riñan Juan ni̱ ûta gàꞌì gui ni̱ ga gi̱ni̱ne̱j nej sôꞌ nga gaꞌmin nej sôꞌ ngà Ma̱ꞌan Ñaꞌanj an,
ni̱ huê dânj na̱nj giꞌhiaj nej sí ꞌna̱ꞌ ga̱huin chru̱n riñan nej sí fariseo,
sani̱ nej sí ꞌna̱ꞌ ga̱huin chru̱n riñan Ma̱ꞌân rèꞌ ni̱ yâ nej sôꞌ ni̱ goꞌo nej sôꞌ ràꞌaj.
34 Ni̱ gataj Ma̱ꞌan Jesús:
—Ga̱ꞌhue ga̱ta̱j nej suj gu̱nïn nej sí nne giꞌñanj ñan ga̱ra̱n ra̱ꞌa ꞌngo̱ sí dânj,
si ga̱ gi̱ni̱ne̱j nej sôꞌ ngà nï̀nꞌ nne sí ga̱huin nika siyànà dânj na̱nj nîꞌ.
35 Sani̱ gùyùmàn gui ni̱ gàhuìꞌ sí huin nika siyànà dânj,
hiôꞌ ni̱ hua̱ da̱ꞌa̱j nej gui ni̱ ga̱ gi̱ni̱ne̱j nej sôꞌ.
36 Ni̱ gataj Ma̱ꞌan Jesús ꞌngo̱ nuguanꞌ ráan:
—Gàꞌ si̱ ꞌngo̱ síi si̱ gaꞌneꞌ ꞌngo̱ dasû atsîj nàkàa ni̱ gànàꞌnï̀nj sôꞌ atsîj dânj riñan ꞌngo̱ atsîj reꞌèe;
dadinꞌ si dànanj gi̱ꞌhiaj sôꞌ ni̱ sê màn ꞌngo̱ rïn atsîj nàkà dânj gùyùtù giꞌhiaj sôꞌ,
ni̱ gàꞌ danj ni̱ si̱ ganariꞌij gi̱nun riñan atsîj nàkà dânj ngà atsîj reꞌè dânj mánj.
37 Ni̱ nitaj gàꞌ si̱ ꞌngo̱ síi gaꞌnḯn nne bino nàkàa ruhuâ nnïnj reꞌèe,
dadinꞌ gùyùtù nnïnj reꞌè dânj gi̱ꞌhiaj nne bino nàkàa ni̱ gañanj nï̀nꞌ nne bino,
ni̱ gìrë̀ꞌ nnïnj reꞌè dânj gi̱ꞌhia.
38 Sani̱ nne bino nàkàa ni̱ ruhuâ nnïnj nàkàa daꞌhuîꞌ ga̱chroꞌ;
ni̱ gu̱ña̱n chre gùnùkuaj ngue.
39 Ni̱ sí gàꞌ guꞌñun goꞌo nne bino nun gàꞌ nâ ni̱ si̱ gaꞌhuej ruhuâ sôꞌ go̱ꞌo̱ sôꞌ nne bino nàkàa;
dadinꞌ gataj sôꞌ:
“Si nne bino nu̱n gàꞌ nâ dânj huin nne bino sàꞌ hua̱ doj gàꞌ daꞌ nne bino nàkà dânj.”