Giꞌhiaj Ma̱ꞌan Jesús si orâ chre ni̱ ganahuin sí naꞌhue gìsìkìꞌ nneè kú
9
Hiôꞌ ni̱ gatûj Ma̱ꞌan Jesús ruhuâ barku, ni̱ gachinj ané duꞌhua nne ña̱ꞌa̱nj gaꞌan ni̱ gunukuij yumanꞌ snàꞌànj huin yiñan.
2 Hiôꞌ ni̱ ni̱ka̱j nej sí dânj ꞌngo̱ sí naꞌhue gìsìkìꞌ nneè kú, gaꞌnaꞌ nej sôꞌ riñanj ni̱ nngaj sí naꞌhue gìsìkìꞌ nneè kú dânj riñan ꞌngo̱ na; ni̱ nga giniꞌin Ma̱ꞌan Jesús si guyumân yìtï̀nj ruhuâ nej sí ni̱ka̱j gaꞌnaꞌ sí dânj, ni̱ gata gu̱nïn sí naꞌhue gìsìkìꞌ nneè kú dânj:
—Ga̱na̱huin nìhiàꞌ ruhuâ sòꞌ, na̱nj daꞌninj; dadinꞌ gàꞌ ginikâ nimân nìko rayiꞌî nej si-ga̱kï̂nt.
3 Hiôꞌ ni̱ gaꞌmin da̱ꞌa̱j nej sí maestrû chru̱n ley yiꞌî Ma̱ꞌan Jesús siganï̂nj nej ma̱ꞌan nej sôꞌ ni̱ taj nej sôꞌ: “Gaꞌmin kï̱j sí nan riñan Ma̱ꞌan Ñaꞌanj an.”
4 Ni̱ niꞌin Ma̱ꞌan Jesús dàj ganï̂n ruhuâ nej sij ni̱ gata gu̱nïn nej sij:
—Nùnj huin saj ni̱ ganï̂n aꞌnanꞌ ruhuâ nej suj ngà ruhuâ nimân nej suj ràꞌaj.
5 Dadinꞌ ahuin goꞌngo̱ nguèj nuguanꞌ nânj huin sa hua̱ chìꞌ, ga̱ꞌhue gàtà ràꞌaj: “Ga̱ꞌhue gi̱nika nimân nìko rayiꞌî nej si-ga̱kï̂nt”, nej si gàtà: “Ga̱na̱chî sòꞌ ni̱ ga̱che̱ꞌ na̱nj ánj.”
6 Sani̱ guendâ gi̱ni̱ꞌin nej suj si ñùnj ni̱ ni̱ka̱j sùnj riñan hioꞌóo ni̱ ga̱ꞌhue gi̱nika nimân nìko rayiꞌî nej gakï̱nꞌïn.
Hiôꞌ ni̱ gata gu̱nïn sí naꞌhue gìsìkìꞌ nneè kú dânj:
—Ga̱na̱chî sòꞌ, ni̱ ga̱na̱ka̱jꞌ si-nât, ni̱ na̱nꞌ dukuât.
7 Hiôꞌ ni̱ ganayumàn sí naꞌhue gìsìkìꞌ nneè kú ni̱ nanꞌ sôꞌ dukuâ sôꞌ.
8 Ni̱ nga giniꞌin nej guiì sa gahuin, ni̱ ûta gahuin ña̱ꞌanj ruhuâ ninj niꞌin ninj Ma̱ꞌan Ñaꞌanj an ni̱ gaꞌmin hueꞌê ninj rayiꞌî Ma̱ꞌan Ñaꞌanj an, guendâ gaꞌhuij sun nùkuaj ginikaj nej síi.
Gakḯn Ma̱ꞌan Jesús gaꞌnaꞌ Mateo
9 Ni̱ gaꞌanj Ma̱ꞌan Jesús hiuj dânj ni̱ giniꞌin ꞌngo̱ sí dânj ni̱ gùꞌnàj sôꞌ Mateo, ni̱ nne sô yiꞌnḯn mesa guendâ gaꞌnêj sôꞌ sanꞌanj ga̱huin sí ni̱ka̱j su̱un ni̱ gata gu̱nïn sôꞌ:
—Gu̱hua̱ꞌ sòꞌ ni̱ gi̱nikôꞌ rukú.
Hiôꞌ ni̱ ganayumàn Mateo ni̱ ginikòꞌ sôꞌ rukû Ma̱ꞌan Jesús.
10 Ni̱ gahuin nga nne Ma̱ꞌan Jesús yiꞌnḯn mesa ruhuâ dukuâ Mateo, hiôꞌ ni̱ gaꞌnaꞌ ûta gàꞌì nej sí gaꞌnêj sanꞌanj an ngà nej sí gakï̱nꞌïn, ni̱ gaꞌanj ga̱ne nej sôꞌ yiꞌnḯn mesa ngà Ma̱ꞌan Jesús ni̱ huê danj na̱nj nne nej sí ꞌna̱ꞌ ga̱huin chru̱un nngaj.
11 Ni̱ nga giniꞌin nej sí fariseo nej nânj, ni̱ gataj nej sôꞌ gu̱nïn nej sí ꞌna̱ꞌ ga̱huin chru̱n riñanj:
—Nùnj huin saj ni̱ yâ si-Maestrû nej suj ngà nej sí giꞌhiaj gakï̱nꞌïn ràꞌaj.
12 Ni̱ nga gunïn Ma̱ꞌan Jesús nej nuguanꞌ nânj, ni̱ gata:
—Nej sí hua̱ sàꞌa ni̱ nitaj si nanaꞌhuiꞌ nej sôꞌ sí gònòꞌòo mánj, sani̱ nej sí aꞌnanꞌan ni̱ nanaꞌhuiꞌ nej sôꞌ sí gònòꞌòo.
13 Ga̱ꞌa̱nj nej suj ni̱ ga̱huin chru̱n nej suj nùnj huin si ga̱ta̱j: “Sa garanꞌ ruhuâj huin si gu̱ru̱gûñuꞌunj nej suj nej guiì, ni̱ nun ga̱ranꞌ ruhuâj si da̱gahuiꞌ nej suj yuku ganaminj in riñânj mánj.” Dadinꞌ nun gàꞌnàj guendâ gàkï̀n nej sí giꞌhiaj sa ni̱ka̱a mánj, gaꞌná guendâ nej sí giꞌhiaj gakï̱nꞌïn guendâ nànìkàj ruhuâ nej sôꞌ rayiꞌî si-ga̱kïnꞌ nej sôꞌ.
Gachín naꞌanj nej sij Ma̱ꞌan Jesús rayiꞌî guendâ ga gi̱ni̱ne̱j nej sij
14 Hiôꞌ ni̱ gaꞌnaꞌ nej sí gahuin chru̱n riñan Juan ni̱ gataj nej sôꞌ:
—Nùnj huin saj ni̱ nej ñûnj ni̱ nej sí chru̱n ley ni̱ ûta gàꞌì ni̱ ga gi̱ni̱ne̱j nùgui nej ñûnj, sani̱ nej sí ꞌna̱ꞌ ga̱huin chru̱n riñan Ma̱ꞌân rèꞌ ni̱ nitaj àmàn ga gi̱ni̱ne̱j nùgui nej sôꞌ ràꞌaj.
15 Hiôꞌ ni̱ gataj Ma̱ꞌan Jesús:
—Ga̱ꞌhue ga̱na̱nï̱n ruhuâ nej guiì màn giꞌñanj ñan ga̱ra̱n ràꞌa nga nï̀nꞌ nne sí ga̱ya̱ka̱j nika siganï̂nj ninj na̱nj nîꞌ. Sani̱ gùyùmàn gui nga ga̱ꞌne̱ nej sij sí dânj, hiôꞌ ni̱ ga̱na̱nï̱n ruhuâ ninj ni̱ gàyìꞌì ninj ni̱ ga̱ gi̱ni̱ne̱j nùgui ninj na̱nj ánj.
16 ’Gàꞌ si ꞌngo̱ nej guiì nitaj si ganaꞌnḯn atsîj nàkàa riñan ꞌngo̱ atsîj reꞌè gàꞌ guyutù mánj; dadinꞌ atsîj nàkà ganaꞌnḯn ninj ñan guyutù dânj nagiꞌhiaj nìko ñan gàꞌ giyiꞌneꞌ atsîj reꞌè dânj, hiôꞌ ni̱ dànanj ga̱na̱huin nìko doj ñan gàꞌ guyutù dânj gi̱ꞌhia.
17 Gàꞌ si ꞌngo̱ nej guiì nitaj si gachra nne bino nàkàa ruhuâ nnïnj reꞌèe; dadinꞌ gùyùtù nnïnj reꞌè dânj gi̱ꞌhiaj nne bino nàkàa, ni̱ ga̱ña̱nj nï̀nꞌ nne bino dânj ni̱ girëꞌ nnïnj reꞌè dânj gi̱ꞌhia; sani̱ ga̱chra nej sij nne bino nàkàa ruhuâ nnïnj nàkàa, daꞌnga ni̱ gu̱ña̱n chre gùnùkuaj ngue.
Daꞌnin yànà Jairo, ni̱ siyànà gaganꞌ ra̱ꞌa atsîj ni̱ke̱ Ma̱ꞌan Jesús ë́ ë́
18 Nga nï̀nꞌ aꞌmin Ma̱ꞌan Jesús nej nuguanꞌ nânj; ni̱ gaꞌnaꞌ ꞌngo̱ sí aꞌnïnꞌïn ni̱ ganikïnꞌ rúdàkòj sôꞌ riñanj, ni̱ gataj sôꞌ:
—Hia̱j gisîj gahuiꞌ daꞌnin yànàj na̱nj ánj; ga̱ꞌna̱ꞌ Ma̱ꞌân rèꞌ ni̱ gùtàꞌ rèꞌ raꞌâ rèꞌ ahui ni̱ ga̱na̱huin nìꞌnàj ni̱ ga̱ne na̱nj ánj.
19 Ni̱ ganayumàn Ma̱ꞌan Jesús ni̱ gaꞌan, ni̱ huê danj na̱nj gaꞌanj nej sí ꞌna̱ꞌ ga̱huin chru̱n riñanj nngaj.
20 Gaꞌnaꞌ ꞌngo̱ siyànà dânj ni̱ gàꞌ gisîj yùhuìj hioꞌo gañanj tun, ni̱ gahuin nìchrunj rukû Ma̱ꞌan Jesús ni̱ gaganꞌ raꞌa atsîj ni̱ke̱ Ma̱ꞌan Jesús.
21 “Dadinꞌ gataj siyànà dânj gu̱nïn ma̱ꞌan: Hiôꞌ si man si gàgànꞌ raꞌá atsîj ni̱kej hiôꞌ ni̱ ga̱na̱huín na̱nj ánj.”
22 Sani̱ nanikàj Ma̱ꞌan Jesús ni̱ giniꞌhia riñan siyànà dânj ni̱ gata:
—Ga̱na̱huin nìhiàꞌ ruhuâꞌ na̱nj daꞌninꞌ, dadinꞌ guendâ guyumân ruhuâꞌ ni̱ ganahuînꞌ.
Ni̱ àsìj orâ dan ni̱ ganahuin siyànà dânj.
23 Nga gatûj Ma̱ꞌan Jesús ruhuâ dukuâ síchìj aꞌnïnꞌ dânj, ni̱ giniꞌin si màn nej sí achrá chraꞌa ngà rihiaa ni̱ màn nej guiì dugueꞌe ni̱ màn nej guiì aguâj hia.
24 Hiôꞌ ni̱ gataj Ma̱ꞌan Jesús:
—Ga̱hui̱ nej suj ni̱ ga̱ꞌa̱nj nej suj neꞌ ye̱ꞌe, dadinꞌ sê si̱ gahuiꞌ sinꞌ dan mánj, man si ato nga na̱nj ánj.
Hiôꞌ ni̱ gaꞌmin duku nej guiì màn hiuj dânj yiꞌî Ma̱ꞌan Jesús.
25 Sani̱ nga gahui nej guiì màn hiuj dânj gaꞌanj ninj neꞌ ye̱ꞌe, ni̱ gatûj Ma̱ꞌan Jesús nne rùhuà hueꞌ dânj, ni̱ gidaꞌa raꞌa sinꞌ yànà dânj hiôꞌ ni̱ ganayumàn sinꞌ yànà dânj giꞌhia.
26 Ni̱ gayaꞌnï̀n sa sàꞌ giꞌhiaj Ma̱ꞌan Jesús nï̀nꞌ gàchràꞌ riñan hioꞌó dânj.
Giꞌhiaj Ma̱ꞌan Jesús giyigï̀n giniꞌhiaj huìj sí du̱chri
27 Ni̱ gachîn Ma̱ꞌan Jesús hua hiuj dânj, ni̱ ginikòꞌ huìj sí du̱chri rukuj, ni̱ gaguâj nùkuaj nguèj sôꞌ ni̱ gataj nguèj sôꞌ gu̱nïn:
—Daꞌní David ga̱na̱nï̱n àko ruhuâ Ma̱ꞌân rèꞌ niꞌîn Ma̱ꞌân rèꞌ nguèj ñûnj na̱nj ánj.
28 Ni̱ nga gunukuij hueꞌe, ni̱ gaꞌnaꞌ nguèj sí du̱chri dânj riñanj; ni̱ gata gu̱nïn nguèj sôꞌ:
—Yumân ruhuâ nguèj suj si ga̱ꞌhue gi̱ꞌhiâ ga̱na̱huin nguèj suj nîꞌ.
Ni̱ gataj nguèj sí dânj:
—Guyumân ruhuâ nguèj ñûnj Señor.
29 Hiôꞌ ni̱ gaganꞌ raꞌa Ma̱ꞌan Jesús rune ñan nguèj sôꞌ, ni̱ gata:
—Guendâ guyumân ruhuâ nguèj suj hiôꞌ ni̱ ga̱na̱huin nguèj suj na̱nj ánj.
30 Ni̱ ganayigï̀n rune ñan nguèj sí dânj, ni̱ ûta gaꞌnïnꞌ su̱n Ma̱ꞌan Jesús riñan nguèj sô, ni̱ gata:
—Si̱ gananï̂n nguèj suj riñan gàꞌ si ꞌngo̱ nej guiì si ganahuin nguèj suj giꞌhiâ mánj.
31 Sani̱ nga gahui nguèj sôꞌ hiuj dânj, ni̱ gayiꞌì nguèj sôꞌ ni̱ guduyiꞌnanj nguèj sôꞌ sa sàꞌ giꞌhiaj Ma̱ꞌan Jesús ngà nguèj sôꞌ nï̀nꞌ gàchràꞌ riñan hioꞌó dânj.
Ganahuin ꞌngo̱ sí ꞌmi̱nj in giꞌhiaj Ma̱ꞌan Jesús
32 Nga nï̀nꞌ gahui nej sij huaj nej sij hiuj dânj, hiôꞌ ni̱ ginikaj nej sôꞌ ꞌngo̱ sí ꞌmìnj in gaꞌnaꞌ nej sôꞌ, ni̱ nu̱n nanè kï̱j huaa ruhuâ nimân sí dânj.
33 Ni̱ giri Ma̱ꞌan Jesús sa kï̱j hua nu̱n ruhuâ nimân sí dânj, hiôꞌ ni̱ gaꞌmin sí ꞌmìnj in giꞌhiaj Ma̱ꞌan Jesús: Ni̱ ûta gahuin ña̱ꞌanj ruhuâ nej guiì ni̱ gataj ninj:
—Nitaj àmàn giniꞌînꞌ si dànanj gahuin Israel.
34 Sani̱ gataj nej sí chru̱n ley:
—Sichre aꞌnïnꞌ riñan nej sa kï̱j ï gaꞌhuiꞌ suun raꞌa sí dânj rayiꞌî dan ni̱ gaꞌhue giri sôꞌ neꞌ ye̱ꞌe aꞌngô nej sa kï̱j ï na̱nj ánj.
Ûta mân nej guiì daꞌhui gu̱nïn si-nùguànꞌ Ma̱ꞌan Ñaꞌanj an
35 Aché nun Ma̱ꞌan Jesús daranꞌ nej yumanꞌ snàꞌànj an ngà daranꞌ nej yumanꞌan ni̱ gidiganj ruhuâ hueꞌ nuhuî nne ñan guchij, ni̱ ganataj nuguanꞌ gi̱ꞌhiaj ga̱na̱ni̱n nej guiì ni̱ giꞌhia si ganahuin daranꞌ nej guiì aꞌnanꞌan ngà nej yiꞌìi ni̱ ganahuin nej guiì aꞌngaj ngà nneè kú giꞌhia.
36 Ni̱ nga giniꞌin ûta gàꞌì nej guiì, ni̱ gananï̂n àko ruhuaj niꞌin ninj; dadinꞌ gininaj ruhuâ ninj ni̱ gayaꞌnï̀n ninj dàj rûnꞌ giranꞌ nej matsïj ï nga nitaj sí ni̱kï̱nꞌ dugumîn nej yôꞌ.
37 Hiôꞌ ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
—Yàngàꞌ hia nï̀nꞌ ni̱ ûta gàꞌì nej yumanꞌan gàchin gi̱ni̱ꞌin si-nùguànꞌ Ma̱ꞌan Ñaꞌanj an, sani̱ do̱j nï̀nꞌ nej síi hua yu̱gui gànàtàꞌ si-nùguànꞌ Ma̱ꞌan Ñaꞌanj an na̱nj ánj.
38 Ga̱ꞌmi̱n àko nej suj, ngà Ma̱ꞌan Señor, huin siꞌhiaj nej sa gunun nej sij ni̱ ga̱ꞌnïn ga̱ꞌna̱ꞌ nej sí hua̱ yu̱gui ga̱na̱ranꞌ nej sa gunun Ma̱ꞌan.