Nej siyànà gunânj gi̱tsi riñan Maꞌan Jesús
8
Gahuin neꞌ rùkù dânj,
ni̱ gaꞌanj Ma̱ꞌan Jesús daranꞌ nej yumanꞌ snàꞌànj màn hiuj dânj ni̱ aꞌngô nej yumanꞌan,
ni̱ ganataj ni̱ gaꞌmin nuguanꞌ giꞌhiaj ga̱na̱ni̱n nej guiì,
ni̱ huê danj huaj nej yùhuìj nej sí ꞌna̱ꞌ ga̱huin chru̱un ngà Ma̱ꞌan,
2 Ni̱ hua̱j da̱ꞌa̱j nej siyànà ganahuin riñan yiꞌìi ni̱ nej siyànà garaꞌhue̱ꞌ nej nanè kï̱j huaa:
Ni̱ hua̱j María ni̱ huej huin sa gùꞌnàj Magdalena,
ni̱ ruhuâ nimanj gahui chi̱j nanè kï̱j huaa,
3 ni̱ hua̱j Juana siyànà huin nika sôꞌ gùꞌnàj Chuza,
sí nânj huin sí dugumîn nej rasu̱n huin siꞌhiaj síchìj Herodes,
ni̱ hua̱j siyànà gùꞌnàj Susana,
ni̱ hua̱j ûta gàꞌì nej siyànà hua̱ siꞌhiaj ni̱ gaꞌhuiꞌ ninj riñan Ma̱ꞌan Jesús.
Nuguanꞌ rán aꞌmin rayiꞌî sí unuun
4 Ganahuin chre̱ꞌ ûta gàꞌì nej guiì,
ꞌna̱ꞌ daꞌ goꞌngo̱ nej yumanꞌ snàꞌànj an riñan Ma̱ꞌan Jesús,
ni̱ gaꞌmin nuguanꞌ ráan riñan ninj ni̱ gata.
5 —Ni̱ gahui sí gunuun gaꞌanj gùnùn sôꞌ nej kaan;
ni̱ nga dagamanꞌ sôꞌ nej kaan huaj sôꞌ,
ni̱ da̱ꞌa̱j nej ka̱n dânj gininj ruhuâ chrej e ni̱ gurûn nej guiì nej ka̱n dânj,
ni̱ gaꞌnaꞌ nej yataj aché neꞌ yàtàꞌa ni̱ yâ nej xuj nej ka̱n dânj.
6 Aꞌngô da̱ꞌa̱j nej ka̱n dânj gininj riñan hioꞌó hua̱ hiëj;
ni̱ nga gisîj koj o nej ka̱n dânj,
ni̱ ganakò nej koj dânj dadinꞌ nitaj si hua̱ nìko hioꞌóo riñan nej hiëj ga̱ꞌa̱nj gùnùn hiaꞌa nej koj dânj.
7 Aꞌngô da̱ꞌa̱j nej ka̱n dânj gininj siganï̂nj nej koj tanj an,
ni̱ gu̱ña̱n chre giyichraꞌ nej ka̱n dânj ngà nej koj tanj an,
sani̱ gahuin yi̱ꞌij ni̱ gahuij giꞌhiaj nej koj tanj an.
8 Ni̱ aꞌngô da̱ꞌa̱j nej ka̱n dânj gininj riñan hioꞌó hua̱ sàꞌa,
ni̱ giyichraj ni̱ gachi ni̱ gahiu ꞌngo̱ siêntu chruj raa̱ ꞌngo̱ rïn ka̱an.
Ni̱ gaꞌmin nùkuaj Ma̱ꞌan ni̱ gata:
—Guiì tàj hiuꞌuj u rakïj guendâ gu̱nïn ni̱ gu̱nïn ninj.
Nùnj huin saj ni̱ garânj sun Ma̱ꞌan Jesús nuguanꞌ rán nânj
9 Ni̱ gachín naꞌan nej sí ꞌna̱ꞌ gahuin chru̱n riñan Ma̱ꞌan Jesús ni̱ gataj nej sôꞌ:
Nùnj huin si ga̱ta̱j nuguanꞌ rán nânj ruhuâꞌ ràꞌaj.
10 Ni̱ gataj Ma̱ꞌan Jesús:
—Nej suj ni̱ ga̱ꞌhue ga̱ra̱n daꞌnga ruhuâ nej suj nej nuguanꞌ hua̱ huìi ñan ni̱ka̱j su̱n Ma̱ꞌan Ñaꞌanj an;
sani̱ ga̱ꞌmi̱n nuguanꞌ ráan riñan aꞌngô nej guiì,
daꞌnga ni̱ gi̱ni̱ꞌhiaj ninj sani̱ si̱ gaꞌhue gi̱ni̱ꞌin ninj,
ni̱ gu̱nïn ninj sani̱ si̱ gaꞌhue ga̱ra̱n daꞌngaꞌ ruhuâ ninj.
Ganataꞌ Ma̱ꞌan Jesús nùnj huin si ga̱ta̱j nuguanꞌ rán garânj sunj
11 ’Nânj huin sa ga̱ta̱j nuguanꞌ ráan ruhuaj:
Kaan huin si-nùguànꞌ Ma̱ꞌan Ñaꞌanj an.
12 Ni̱ ka̱n gininj ruhuâ chrej e huin nej guiì gunïn si-nùguànꞌ Ma̱ꞌan Ñaꞌanj an,
ni̱ orâ chre ni̱ gaꞌnaꞌ sa nàsàꞌa ni̱ gaꞌne si-nùguànꞌ Ma̱ꞌan Ñaꞌanj an ruhuâ nimân nej guiì dânj,
guendâ si̱ guyumân yìtï̀nj ruhuâ ninj ni̱ si̱ gananin ninj mánj.
13 Nej ka̱n gininj riñan hioꞌó hiëj huin nej guiì gunïn si-nùguànꞌ Ma̱ꞌan Ñaꞌanj an,
ni̱ ûta nìhiàꞌ hua ruhuâ ninj nga ganahuin ra̱ꞌa ninj si-nùguànꞌ Ma̱ꞌan Ñaꞌanj an;
sani̱ ñan nu̱n gi̱ni̱nj si-nùguànꞌ Ma̱ꞌan Ñaꞌanj an nda gùnùn ruhuâ nimân ninj;
man do̱j nï̀nꞌ diû guyumân ruhuâ ninj,
ni̱ nga guyumân sañuun riñan ninj ni̱ nu̱n ga̱ꞌhue gùnùkuaj ninj ni̱ huê danj ni̱ gudunâj ninj si-nùguànꞌ Ma̱ꞌan Ñaꞌanj an na̱nj ánj.
14 Nej ka̱n gininj siganï̂nj tanj an,
huin nej guiì gunïn si-nùguànꞌ Ma̱ꞌan Ñaꞌanj an,
sani̱ ñan ûta huin ruhuâ ninj ga̱huin yi̱ruꞌhue ninj ni̱ ûta huin ruhuâ ninj ga̱na̱huin nìhiàꞌ ruhuâ ninj ngà nnè kú ninj,
huê dan ni̱ gininaj ruhuâ ninj ni̱ nitaj si guruguiꞌ gàꞌ si ꞌngo̱ nej sa sàꞌa gi̱ꞌhiaj ninj mánj.
15 Sani̱ nej ka̱n gininj riñan hioꞌó sàꞌa,
huin nej guiì hua̱ sàꞌ ruhuâ nimân ni̱ huin ninj nej guiì giꞌhiaj sa ni̱ka̱a dadinꞌ dugumîn ninj nej nuguanꞌ gunïn ninj,
ni̱ dagahuin ninj nej nuguanꞌ gunïn ninj ni̱ ûta guyumân ruhuâ nej guiì niꞌin ninj si-nùguànꞌ Ma̱ꞌan Ñaꞌanj an giꞌhiaj ninj,
ni̱ ganikïnꞌ ran ninj ngà si-nùguànꞌ Ma̱ꞌan Ñaꞌanj an.
Gàꞌ si ꞌngo̱ sa giꞌhiôꞌ nitaj si huaj gìyìꞌìj huì
16 ’Gàꞌ si ꞌngo̱ nej guiì ni̱ nga gachrûn ninj ñaꞌaan ni̱ nitaj si gaꞌnḯn huì ninj ginunj ruhuâ ꞌngo̱ sigùu mánj,
ni̱ gàꞌ nitaj si gachrîj ninj giꞌnïn riki nna tàj ninj mánj,
dadinꞌ gutaꞌ ninj gita ñan yàkàan daꞌnga ni̱ gaꞌhue gùdùgunj ga̱che̱ nej guiì hua̱j ruhuâ rahueꞌe.
17 Dadinꞌ gàꞌ si̱ ꞌngo̱ nej sa giꞌhiaj nej guiì ni̱ si̱ gaꞌhue gìyìꞌìj huì man mánj,
dadinꞌ dàñùn gùrùguìꞌij gi̱ni̱ꞌin nej guiì;
ni̱ nùnj huin si hua̱ huì man sani̱ dàñùn daꞌhui gùrùguìꞌij ni̱ gi̱ni̱ꞌin nej guiì.
18 ’Gi̱ni̱ꞌhiaj nej suj dàj hua sa gunïn nej suj;
dadinꞌ nej guiì garânj daꞌngaꞌ ruhuâ si-nùguànꞌ Ma̱ꞌan Ñaꞌanj an ni̱ ga̱ꞌhuij doj ga̱ra̱n daꞌngaꞌ ruhuâ ninj;
ni̱ daranꞌ nej guiì garânj daꞌngaꞌ ruhuâ do̱j si-nùguànꞌ Ma̱ꞌan Ñaꞌanj an,
sani̱ si nitaj si dagahuin ninj sa niꞌin ninj ni̱ ga̱ꞌne̱ Ma̱ꞌan Ñaꞌanj an do̱j sa niꞌin ninj dânj na̱nj ánj.
Nni Ma̱ꞌan Jesús ngà nej dinïn
19 Hiôꞌ ni̱ gaꞌnaꞌ nni Ma̱ꞌan Jesús ngà nej dinïn;
sani̱ nitaj si hua̱ niꞌnï̱nj gùchìꞌ nej sij nda ñan ni̱kï̱nꞌ Ma̱ꞌan Jesús dadinꞌ ûta nìchra man nej guiì hiuj dânj.
20 Ni̱ gataj naꞌanj aꞌngô nej sôꞌ riñan Ma̱ꞌan Jesús.
Ni̱ gataj nej sôꞌ:
—Nni Ma̱ꞌân rèꞌ ngà nej dinḯn Ma̱ꞌân rèꞌ nikïnꞌ neꞌ ye̱ꞌe ni̱ ruhuâ nej sij ga̱ꞌmi̱n nej sij ngà Ma̱ꞌân rèꞌ.
21 Hiôꞌ ni̱ nanikàj Ma̱ꞌan Jesús ni̱ gata:
—Nnî ni̱ nej dinï̂n huin nej guiì gunïn si-nùguànꞌ Ma̱ꞌan Ñaꞌanj an,
ni̱ dagahuin ninj.
Giꞌhiaj Ma̱ꞌan Jesús giyichinꞌ si gaꞌhuij nanè du̱ꞌhui ruhuâ nne ña̱ꞌa̱nj
22 Gahuin nej gui dânj ni̱ gatûj Ma̱ꞌan Jesús ruhuâ barku ngà nej sí gaꞌnaꞌ ga̱huin chru̱n riñanj ni̱ gata:
—Ga̱chi̱n nêꞌ nda ané duꞌhua dahue̱ man ga̱ꞌa̱nj nêꞌ.
Huê danj ni̱ gachîn nej sij gaꞌanj nej sij riñan nnee.
23 Sani̱ nga nï̀nꞌ huaj nej sij ga̱chi̱n nej sij riñan dahue̱ dânj,
ni̱ atoj Ma̱ꞌan Jesús nga.
Ni̱ gayi̱ꞌij ni̱ ûta nùkuaj ga̱ꞌhuij nanèe riñan dahue̱ dânj;
ni̱ dagamanꞌ nnee ni̱ gachra nï̀nꞌ nnee ruhuâ barku ni̱ giꞌhia si̱ ganagaꞌ barku dânj ruhuâ nnee.
24 Ni̱ gaꞌnaꞌ nichì nej sí ꞌna̱ꞌ ga̱huin chru̱n riñan Ma̱ꞌan Jesús,
ni̱ gataj nej sôꞌ:
—Maestrûj,
Maestrûj giꞌhiá rèꞌ si̱ ga̱na̱ni̱n nêꞌ dadinꞌ ga̱na̱huij nêꞌ gàhuìꞌ na̱nj ánj.
Ni̱ ganaꞌnï̂nj ña̱n Ma̱ꞌan Jesús,
ni̱ dugunïn gàꞌij nanèe ngà nne ña̱ꞌa̱nj;
ni̱ gàꞌ nanèe ngà nne ña̱ꞌa̱nj ganayumàn dânj ni̱ nda dïnꞌïnj chre gahuin.
25 Ni̱ gataj Ma̱ꞌan Jesús:
—Dànèꞌ gaꞌanj sa guyumân ruhuâ nej suj ràꞌaj.
Ni̱ guyuꞌhuiꞌ nej sij ni̱ gahuin ña̱ꞌanj ruhuâ nej sij,
ni̱ gataj nej sij riñan ꞌngo̱ ni̱ aꞌngô nej sij:
—Ahuin sí huin sôꞌ,
dadinꞌ gaꞌnïnꞌ su̱n sôꞌ riñan nej nanèe ngà nne ña̱ꞌa̱nj,
ni̱ gadagahuin nguèj eꞌ sa gaꞌmin sôꞌ ràꞌaj.
Riñan hioꞌó Gadara nne nej sí nu̱n sa kï̱j ï ruhuâ nimân
26 Ni̱ guchiꞌ nej sij riñan hioꞌó Geraseno,
dadinꞌ hioꞌó nânj nngaj ané nne ña̱ꞌa̱nj Galilea.
27 Ni̱ nga guchiꞌ nej sij riñan hioꞌó dânj,
ni̱ gaꞌnaꞌ ꞌngo̱ sí màn yumanꞌ snàꞌànj dânj riñan Ma̱ꞌan Jesús,
ni̱ gàꞌ ûta nâ nne nanè kï̱j hua̱a ruhuâ nimân sôꞌ;
ni̱ nitaj siganꞌ sôꞌ nun sôꞌ,
ni̱ gàꞌ nitaj si nne sôꞌ dukuâ sôꞌ,
dadinꞌ ñan gachinꞌ nej sij nîman nne sí dânj.
28 Ni̱ nga giniꞌin sí dânj Ma̱ꞌan Jesús,
ni̱ gayiꞌì sôꞌ ni̱ ûta nùkuaj gaguâj sôꞌ,
ni̱ ganikïnꞌ rúdàkòj sôꞌ yiꞌî Ma̱ꞌan Jesús ni̱ gayiꞌì sôꞌ ni̱ ûta nùkuaj gaꞌmin sôꞌ ni̱ gataj sôꞌ:
—Nùnj huin si huin ruhuâ Ma̱ꞌân rèꞌ niꞌîn rèꞌ ñùnj,
ràꞌaj Jesús dadinꞌ huê Ma̱ꞌân rèꞌ huin Daꞌní Ma̱ꞌan Ña̱ꞌa̱nj ni̱ka̱j su̱n nï̀nꞌ gàchràꞌ rûhua yumiguìi.
Ni̱ gachín ni̱ꞌhiâ riñan Ma̱ꞌân rèꞌ ni̱ si̱ giꞌhiaj Ma̱ꞌân rèꞌ si gi̱ranꞌ sàñùnj mánj.
29 Dadinꞌ gaꞌnïnꞌ su̱n Ma̱ꞌan Jesús si ga̱hui̱ nanè kï̱j huaa ruhuâ nimân sí dânj,
dadinꞌ ûta gàꞌì ni̱ giranꞌ sa̱ñu̱n sí dânj giꞌhiaj nanè kï̱j huaa;
ni̱ ànùmin sôꞌ ngà agaꞌ kadena ni̱ nun agaꞌ seꞌej e yihiâ dakó sôꞌ,
huê danj na̱nj dugumîn nej policia sôꞌ sani̱ gaꞌneꞌ gè sôꞌ agaꞌ kadena,
ni̱ giꞌhiaj nanè kï̱j huaa si ga̱ꞌa̱nj sôꞌ riñan hioꞌó nàkòo.
30 Ni̱ gachín naꞌanj Ma̱ꞌan Jesús sí dânj,
ni̱ gata:
—Dàj gùꞌnàjꞌ ràꞌaj.
Ni̱ gataj sí dânj:
—Legión gùꞌnà.
—Dadinꞌ ûta gàꞌì ranꞌ nej nanè kï̱j huaa nne ruhuâ nimân sí dânj.
31 Ni̱ gachín nìꞌhiaj nej nanè kï̱j hua dânj riñan Ma̱ꞌan Jesús sisi̱ si̱ gaꞌnïn ga̱ꞌa̱nj ninj ruhuâ hiuꞌuj hua̱ ru̱mi̱nꞌ xi nu̱n riki hioꞌóo.
32 Ni̱ màn ûta gàꞌì nej yakáa ya nej yôꞌ ña̱n ni̱kï̱nꞌ kï̱j dânj,
ni̱ gachín nìꞌhiaj nej nanè kï̱j hua̱ dânj si̱ ga̱ꞌnï̱n Ma̱ꞌan Jesús ni̱ ga̱tu̱ ninj ruhuâ nimân nej yakáa ga̱ne ninj;
ni̱ gaꞌnï̂nj Ma̱ꞌan Jesús gatûj ninj ruhuâ nimân nej yakáa.
33 Huê danj ni̱ gahui nej nanè kï̱j hua dânj ruhuâ nimân sí dânj,
ni̱ gatûj ninj ruhuâ nimân nej yakáa;
ni̱ ganahuin ña̱ꞌanj nej yôꞌ ni̱ gunânj nej yôꞌ gaꞌanj nej yôꞌ ña̱n ni̱kï̱nꞌ ꞌngo̱ huej yàkàn xi ni̱ guduninj nej yôꞌ ma̱ꞌan nej yôꞌ ruhuâ dahue̱e,
ni̱ ganûn yichrá nej yôꞌ ni̱ gahuiꞌ nej yôꞌ.
34 Ni̱ nga giniꞌin nej sí dugumîn nej yakáa dàj gahuin,
ni̱ gunânj nej sôꞌ ni̱ gaꞌanj gànàtàꞌ nej sôꞌ gu̱nïn nej sí màn ruhuâ yumanꞌ snàꞌànj dânj ngà riñan nej guiì màn daꞌ hua̱ nï̀nꞌ gàchràꞌ riñan hioꞌó dânj.
35 Ni̱ gahui nej guiì màn yumanꞌ dânj dadinꞌ ruhuâ ninj gi̱ni̱ꞌin ninj sa gahuin hiuj dânj;
ni̱ gaꞌnaꞌ ninj riñan Ma̱ꞌan Jesús,
ni̱ ganariꞌ ninj sí giranꞌ sa̱ñu̱n giꞌhiaj nanè kï̱j huaa ni̱ nne sôꞌ yiꞌî Ma̱ꞌan Jesús,
ni̱ gàꞌ gananun sôꞌ atsìj i ni̱ gàꞌ ganakaj sôꞌ aꞌngô raa̱ sôꞌ;
ni̱ guyuꞌhuiꞌ nej guiì dânj nga giniꞌin ninj Ma̱ꞌan Jesús.
36 Ni̱ gananï̂n nej sí giniꞌin dàj gahuin,
ni̱ ganataꞌ nej sôꞌ dàj giꞌhiaj Ma̱ꞌan Jesús gaꞌhue ganahuin ni̱ gananin sí giranꞌ sa̱ñu̱n giꞌhiaj nej nanè kï̱j hua dânj.
37 Hiôꞌ ni̱ gachín nìꞌhiaj daranꞌ nej guiì rìgì màn ganikàj nï̀nꞌ gàchràꞌ rukû doꞌó nej sí geraseno,
si gi̱ꞌhiaj Ma̱ꞌan Jesús sunuj u ni̱ ga̱hui ga̱ꞌan riñan doꞌó nej sôꞌ,
dadinꞌ ûta guyuꞌhuiꞌ nej sôꞌ niꞌin nej sôꞌ Ma̱ꞌan.
Ni̱ gatûj Ma̱ꞌan ruhuâ barku gaché riñan nnee,
huê danj ni̱ nani̱ka ni̱ gaꞌan ñan gaꞌnaj.
38 Ni̱ gachín nìꞌhiaj sí rùhuà nimân giri Ma̱ꞌan Jesús nej nanè kï̱j huaa,
si ga̱ra̱n yina Ma̱ꞌan Jesús si ga̱ꞌa̱nj sôꞌ ngà Ma̱ꞌan;
sani̱ ganaꞌnḯn Ma̱ꞌan Jesús na̱nꞌ sôꞌ dukuâ sôꞌ ni̱ gata gu̱nïn sôꞌ:
39 —Nanikàj na̱nꞌ dukuât,
ni̱ gànàtàꞌ gu̱nïn nej duguît si ûta nìko hua sa giꞌhiaj Ma̱ꞌan Ñaꞌanj an ngà raj.
Huê dânj ni̱ nanꞌ sí dânj dukuâ sôꞌ ni̱ duyaꞌnï̀n sôꞌ daꞌ hua̱ nï̀nꞌ gàchràꞌ ruhuâ yumanꞌ snàꞌànj dânj dàj hua̱ sa giꞌhiaj Ma̱ꞌan Jesús ngà sôꞌ.
Daꞌnin yànà Jairo ngà siyànà gaganꞌ raꞌa atsîj ni̱ke̱ Ma̱ꞌan Jesús
40 Nga nanikàj Ma̱ꞌan Jesús neꞌ ané duꞌhua dahue̱ dânj,
ni̱ ganahuin ra̱ꞌa nej guiì rigìi Ma̱ꞌan ni̱ ûta gahuin nìhiàꞌ ruhuâ ninj;
dadinꞌ màn daranꞌ ninj anaꞌhuìj ninj Ma̱ꞌan.
41 Hiôꞌ ni̱ gaꞌnaꞌ síchìj gùꞌnàj Jairo,
dadinꞌ huin sôꞌ ꞌngo̱ sí huin ña̱n riñan hueꞌ nuhuî nne hiuj dânj,
ni̱ ganikïnꞌ rúdàkòj sôꞌ yiꞌî Ma̱ꞌan Jesús,
ni̱ gachín nìꞌhiaj sôꞌ si ga̱ra̱n yina Ma̱ꞌan Jesús ga̱tu ruhuâ dukuâ sôꞌ.
42 dadinꞌ hua̱ ꞌngo̱ rïn daꞌnin yànà sôꞌ ni̱ hua̱j sinꞌ yànà dânj ꞌngo̱ si hiôꞌ yùhuìj i,
ni̱ gàꞌ ruhuâ gàhuìꞌ sinꞌ yànà dânj.
Ni̱ nga nï̀nꞌ aché Ma̱ꞌan Jesús hua,
ni̱ ganï̂n nï̀nꞌ nej guiì rigìi Ma̱ꞌan.
43 Sani̱ ꞌngo̱ siyànà dânj ni̱ gàꞌ gisîj hioꞌ yùhuìj i gañanj tun man,
ni̱ ganahuij nï̀nꞌ si-sa̱nꞌan ganaruꞌhue riñan nej sí gònòꞌòo,
sani̱ nun ga̱na̱huin gi̱ꞌhiaj gàꞌ si̱ ꞌngo̱ nej sí dânj,
44 Ni̱ gaꞌnaꞌ nichì siyànà dânj rukû Ma̱ꞌan Jesús ni̱ gaganꞌ raꞌa ꞌhuej nìkòꞌ duꞌhua atsîj ni̱ke̱ Ma̱ꞌan Jesús;
ni̱ orâ chre ni̱ giyichinꞌ si gañanj tun siyànà dânj.
45 Hiôꞌ ni̱ gataj Ma̱ꞌan Jesús:
—Ahuin si gaganꞌ raꞌa ñùnj ràꞌaj.
Ni̱ nun ga̱ꞌhue̱j nej sí hua̱j ngà Ma̱ꞌan Jesús si gaganꞌ raꞌa nej sôꞌ Ma̱ꞌan Jesús,
hiôꞌ ni̱ gataj Pedro ni̱ huê danj na̱nj gataj aꞌngô nej sôꞌ hua̱j ngà sôꞌ:
—Maestrûj,
ganï̂n nï̀nꞌ nej guiì rigìi sòꞌ ni̱ rânj raꞌa ninj sòꞌ ni̱ gataj Ma̱ꞌân rèꞌ:
“Ahuin si gaganꞌ raꞌa ñùnj ûnj.”
46 Sani̱ gataj Ma̱ꞌan Jesús:
—Hua̱ ꞌngo̱ sa gaganꞌ raꞌa ñùnj;
dadinꞌ giniꞌín si gahui sa nùkuaj dânj ruhuâ nimânj.
47 Hiôꞌ ni̱ nga giniꞌin siyànà dânj si nun ga̱huin huì sa giꞌhia,
ni̱ gaꞌnaj ni̱ nda nagunanꞌ chre nneè ku,
ni̱ ganikïnꞌ rúdàko yiꞌî Ma̱ꞌan Jesús,
ni̱ ganataj riñan daranꞌ nej guiì yùmànꞌan nùnj huin saj ni̱ gaganꞌ raꞌa Ma̱ꞌan Jesús,
ni̱ nda nanè chre ganahuin.
48 Ni̱ gataj Ma̱ꞌan Jesús:
—Da̱ꞌninj,
guendâ guyumân ruhuâꞌ ni̱ ganahuînꞌ,
ga̱ dïnꞌïnj ruhuâ ni̱ ga̱ꞌa̱njꞌ na̱nj ánj.
49 Ne̱ꞌ nikïnꞌ Ma̱ꞌan Jesús gaꞌmin hiuj dânj,
ni̱ gaꞌnaꞌ ꞌngo̱ sí nne dukuâ síchìj huin ña̱n riñan hueꞌ nûhui nne hiuj dânj ni̱ gataj sôꞌ:
—Gàꞌ gahuiꞌ daꞌnin yànàt;
ni̱ si̱ gakḯn chrêꞌ ga̱ꞌna̱ꞌ Ma̱ꞌan Maestrû gàꞌ mánj.
50 Nga gunïn Ma̱ꞌan Jesús sa gataj sí nânj ni̱ gata:
—Si̱ guyuꞌhuîꞌ mánj;
man si gùyùmàn ruhuâꞌ ni̱ ga̱na̱huin daꞌnít na̱nj ánj.
51 Ni̱ nga gatûj Ma̱ꞌan Jesús ruhuâ hueꞌ dânj,
ni̱ nun ga̱ꞌhue si̱ ga̱ꞌa̱nj gàꞌ si̱ ꞌngo̱ nej guiì nngaj,
man Pedro,
ngà Jacobo,
ngà Juan,
ngà rej sinꞌ yànà dânj ni̱ ngà nni sinꞌ dânj gatûj ruhuâ hueꞌe nngaj.
52 Ni̱ ûta gudugueꞌe nej guiì ni̱ gaguâj hia ninj yiꞌî sinꞌ yànà dânj.
Sani̱ gataj Ma̱ꞌan Jesús:
—Si̱ gudugueꞌe nej suj;
dadinꞌ sê si̱ gahuiꞌ sinꞌ yànà dan mánj,
man si ato nga na̱nj ánj.
53 Ni̱ gaꞌmin duku nej guiì màn hiuj dânj riñan Ma̱ꞌan Jesús,
dadinꞌ gàꞌ niꞌin ninj si gàꞌ gahuiꞌ sinꞌ yànà dânj.
54 Sani̱ gidaꞌa Ma̱ꞌan Jesús raꞌa sinꞌ yànà dânj,
ni̱ gaꞌmin nùkua ni̱ gata:
—Ga̱na̱chi áj.
55 Hiôꞌ ni̱ nanikàj ñûn nanè nimân sinꞌ yànà dânj;
ni̱ orâ chre ni̱ ganachi sinꞌ yànà dânj;
ni̱ gaꞌnïnꞌ su̱n Ma̱ꞌan Jesús si gàꞌhuìꞌ nej sij sa ya̱ sinꞌ yànà dânj.
56 Ni̱ gahuin ña̱ꞌanj ruhuâ nguèj ni̱ka̱ rej sinꞌ yànà dânj;
sani̱ gaꞌnïnꞌ su̱n Ma̱ꞌan Jesús sisi̱ si̱ gananï̂n nguèj ni̱ka̱ sij sa gahuin hiuj dânj.