Riñan hioꞌó Gadara nne sí nu̱n nanè kï̱j huaa ruhuâ nimân
5
Ni̱ gaꞌnaꞌ nej sij ané duꞌhua nne ña̱ꞌa̱nj,
riñan doꞌó nej sí gùꞌnàj Gadarenos.
2 Ni̱ nga gahui Ma̱ꞌan Jesús ruhuâ barku,
ni̱ ñan gachinꞌ nej sij nîman gahui ꞌngo̱ sí dânj ni̱ nda nanè chre gaꞌnaꞌ sôꞌ ni̱ ganariꞌ duguiꞌ sôꞌ ngà Ma̱ꞌan,
ni̱ ruhuâ nimân sôꞌ nne nanè kï̱j huaa.
3 Ni̱ nne sôꞌ ruhuâ hueꞌ lij ñan gachinꞌ nej sij nej nîman,
ni̱ gàꞌ si ꞌngo̱ nej síi naꞌhue gùnùkuaj gu̱mi̱n sí dânj,
ni̱ gàꞌ naꞌhue gùnùkuaj agaꞌ kadena ga̱nu̱min sôꞌ.
4 Dadinꞌ ûta gàꞌì gàꞌ gumînj nej sij sí dânj ni̱ nu̱n agaꞌ seꞌej e yihiâ dakó sôꞌ ni̱ a̱nu̱min sôꞌ ngà agaꞌ kadena,
sani̱ giyiꞌneꞌ gè agaꞌ kadena dânj giꞌhiaj sôꞌ,
ni̱ giyitïnꞌ nej agaꞌ seꞌej nu̱n yihiâ dakó sôꞌ;
ni̱ gàꞌ si ꞌngo̱ síi naꞌhue gùnùkuaj gi̱daꞌa sôꞌ.
5 Nikòꞌ huaj ni̱ neꞌ gui ngà neꞌ ña̱ꞌa̱n gaguâj hia sí dânj,
ni̱ aché nun sôꞌ riki kïj ï ngà ñan gachinꞌ nej sij nîman,
ni̱ guduranꞌ yiꞌì sôꞌ ma̱ꞌan sôꞌ ngà hiëj.
6 Ni̱ nda ga̱nꞌ giniꞌin sí dânj Ma̱ꞌan Jesús,
ni̱ gunânj sôꞌ gaꞌnaꞌ sôꞌ riñan Ma̱ꞌan,
ni̱ ganikïnꞌ rúdàkòj sôꞌ riñanj.
7 Ni̱ ûta nùkuaj gaguâj sôꞌ ni̱ gataj sôꞌ:
—Nùnj huin saj ni̱ garanꞌ ñuꞌunj Ma̱ꞌân rèꞌ ñùnj ràꞌaj Jesús,
dadinꞌ huê Ma̱ꞌân rèꞌ huin Daꞌní Ma̱ꞌan Ña̱ꞌa̱nj nne yàtàꞌa.
Achín ni̱ꞌhia riñan Ma̱ꞌân rèꞌ ni̱ ngà riñan Ma̱ꞌan Ñaꞌanj an ni̱ si̱ giꞌhiaj Ma̱ꞌân rèꞌ si gi̱ranꞌ sàñùnj mánj.
8 Dadinꞌ gàꞌ si̱nï̱n gataj Ma̱ꞌan Jesús:
—Ga̱hui̱ nanè kï̱j hua sòꞌ,
ruhuâ nimân sí dânj ni̱ ga̱ꞌa̱nj ráj.
9 Ni̱ gachín naꞌanj Ma̱ꞌan Jesús ni̱ gata:
—Nùnj huin si gùꞌnàjꞌ ràꞌaj.
Nanikàj nanè kï̱j hua dânj ni̱ gata:
—Legión gùꞌnà;
dadinꞌ ûta gàꞌì ranꞌ nej ñûnj huin na̱nj ánj.
10 Ni̱ ûta gachín nìꞌhiaj nanè kï̱j hua dânj ni̱ gata sisi̱ si̱ giri Ma̱ꞌan Jesús ga̱ꞌan riñan hioꞌó dânj.
11 Ni̱ nìchrùnꞌ yiꞌî kïj dânj mân ꞌngo̱ yiꞌnïnꞌ nìko xi nej yakáa ni̱ màn nej yôꞌ yâ nej yôꞌ.
12 Ni̱ ûta gachín nìꞌhiaj daranꞌ nej sa kï̱j dânj riñan Ma̱ꞌan Jesús ni̱ gataj ninj:
—Gàꞌnï̀nj Ma̱ꞌân rèꞌ ga̱ꞌa̱nj nej ñûnj ñan màn nej yaká màn dangaꞌ mánj,
ni̱ ga̱tu̱ nej ñûnj ruhuâ nimân nej xuj ga̱ne nej ñûnj.
13 Ni̱ garânj yina Ma̱ꞌan Jesús.
Ni̱ gahui nej nanè kï̱j hua dânj ruhuâ nimân sí dânj,
ni̱ gaꞌanj ninj ruhuâ nimân nej yakáa ni̱ nda huìj mîn nej yôꞌ huin ni̱ ganahuin ña̱ꞌanj nej yôꞌ ni̱ guduninj nej yôꞌ ma̱ꞌan nej yôꞌ riñan ganee,
ni̱ gininj nej yôꞌ ruhuâ nne ña̱ꞌa̱nj ni̱ ganûn yichrá nej yôꞌ huê danj ni̱ gahuiꞌ nej yôꞌ.
14 Ni̱ gunânj nej sí màn dugumîn nej yakáa.
Ni̱ gaꞌanj gànàtàꞌ nej sôꞌ gu̱nïn nej sí màn ruhuâ yumanꞌ snàꞌànj dânj ni̱ huê danj na̱nj ganataꞌ nej sôꞌ gu̱nïn nej sí màn giꞌhiaj sun riñan hioꞌó dânj,
ni̱ gahui nej guiì màn hiuj dânj ni̱ gaꞌanj ni̱ꞌhiaj ninj nùnj huin si gahuin hiuj dânj.
15 Ni̱ gaꞌnaꞌ nej guiì dânj riñan Ma̱ꞌan Jesús ni̱ giniꞌhiaj ninj ri̱ña̱n sí giranꞌ sa̱ñu̱n giꞌhiaj nej nanè kï̱j hua,
dadinꞌ ginun nda ꞌngo̱ legión nej nanè kï̱j huaa ruhuâ nimân sí dânj ni̱ dḯn nne sôꞌ,
ni̱ gàꞌ nu̱n sôꞌ atsìj i ni̱ gàꞌ ganahuin sìkàꞌ sôꞌ;
ni̱ guyuꞌhuiꞌ nej guiì màn hiuj dânj giniꞌin ninj sí dânj.
16 Ni̱ ganataꞌ nej sí giniꞌin daranꞌ nej sa gahuin hiuj dânj,
ni̱ dàj giranꞌ sí ginun nanè kï̱j huaa ruhuâ nimân,
ni̱ dàj giranꞌ nej yakáa.
17 Ni̱ gayiꞌì nej sí guchiꞌ hiuj dânj ni̱ gachín nìꞌhiaj nej sôꞌ riñan Ma̱ꞌan Jesús ni̱ gataj nej sôꞌ si ga̱hui̱ ni̱ gaꞌan neꞌ ye̱ꞌ duꞌhua doꞌó nej sôꞌ.
18 Ni̱ nga gatûj Ma̱ꞌan Jesús ruhuâ barkû,
ni̱ gachín nìꞌhiaj sí rùhuà nimân ginun nej nanè kï̱j huaa ni̱ gataj sôꞌ,
si ga̱ra̱n yina Ma̱ꞌan Jesús ni̱ ga̱ꞌa̱nj sôꞌ ngà Ma̱ꞌan.
19 Sani̱ nun ga̱ra̱n yina Ma̱ꞌan Jesús si ga̱ꞌa̱nj sí dânj nngaj,
ni̱ gata gu̱nïn sí dânj:
—Gui̱j na̱nꞌ dukuât ñan nne nej duguiꞌ,
ni̱ ga̱na̱nï̱nꞌ dàj nìko hua sa giꞌhiaj Ma̱ꞌan Señor ngàꞌ,
ni̱ dàj gananï̂n àko ruhuaj niꞌin sòꞌ.
20 Ni̱ gaꞌanj sí dânj ni̱ gayiꞌì sôꞌ ni̱ ganataꞌ sôꞌ riñan nej guiì màn Decápolis sa nìko staꞌu giꞌhiaj Ma̱ꞌan Jesús ngà sôꞌ;
ni̱ ûta gahuin ña̱ꞌanj ruhuâ nej guiì nga gunïn ninj sa gahuin.
Daꞌnin yànà Jairo ngà siyànà gaganꞌ raꞌa atsîj ni̱ke̱ Ma̱ꞌan Jesús
21 Ni̱ gatûj ñûn Ma̱ꞌan Jesús ruhuâ barku ni̱ gachinj gaꞌan ané duꞌhua nne ña̱ꞌa̱nj,
ni̱ ganaraꞌhuiꞌ ûta gàꞌì nej guiì riñanj;
ni̱ nne nìchrùnj duꞌhua nne ña̱ꞌa̱nj.
22 Ni̱ gaꞌnaꞌ ꞌngo̱ sí huin ña̱n riñan hueꞌ nûhui nne hiuj dânj,
ni̱ gùꞌnàj sôꞌ Jairo,
ni̱ orâ chre nga giniꞌin sôꞌ Ma̱ꞌan Jesús;
ni̱ ganikïnꞌ rúdàkòj sôꞌ riñanj,
23 ni̱ ûta àko gachín nìꞌhiaj sôꞌ riñanj ni̱ gataj sôꞌ:
—Gàhuìꞌ daꞌnin yànàj ruhuaj na̱nj ánj;
ga̱ꞌna̱ꞌ Ma̱ꞌân rèꞌ ni̱ gùtàꞌ Ma̱ꞌân rèꞌ raꞌâ rèꞌ riñânj hiôꞌ ni̱ ga̱na̱huin.
24 Hiôꞌ ni̱ gaꞌanj Ma̱ꞌan Jesús ngà sí dânj;
ni̱ gaꞌanj ûta gàꞌì nej guiì nngaj ni̱ ganï̂n nï̀nꞌ nej guiì Ma̱ꞌan.
25 Ni̱ ꞌngo̱ siyànà dânj ni̱ gàꞌ gisîj yùhuìj hioꞌo ni̱ daranꞌ nej gui gañanj tun.
26 Ni̱ ûta giranꞌ sa̱ñunj giꞌhiaj gàꞌì nej sí gònòꞌòo ni̱ ganahuij nï̀nꞌ si-sa̱nꞌan,
giyitïnꞌ rayiꞌî yiꞌì dânj sani̱ nun ga̱ꞌhue ga̱na̱huin,
dadinꞌ dànanj gahuin nùkuaj doj yiꞌì dânj giranꞌanj.
27 Ni̱ nga gunïn siyànà dânj gaꞌmin nej guiì rayiꞌî Ma̱ꞌan Jesús,
ni̱ giniko̱j gaꞌnaj neꞌ rùkù yiꞌnïnꞌ dânj,
ni̱ gaganꞌ raꞌa atsîj ni̱ke̱ Ma̱ꞌan Jesús.
28 Dadinꞌ gata:
“Hiôꞌ si man si gàgànꞌ raꞌá atsîj ni̱ke̱ Ma̱ꞌan,
hiôꞌ ni̱ ga̱na̱huín.”
29 Ni̱ orâ dânj ni̱ giyichinꞌ si gañanj tu;
ni̱ giniꞌin si gàꞌ ganahuin nneè kú riñan yiꞌì garaꞌhue̱ꞌ man.
30 Ni̱ orâ chre ni̱ giniꞌin Ma̱ꞌan Jesús,
dadinꞌ giniꞌin si gahui sa nùkuaj dânj ruhuâ nneè ku,
ni̱ ganani̱ka ni̱ giniꞌhia riñan nej yiꞌnïnꞌ nej guiì hua̱j hiuj dânj,
ni̱ gata:
—Ahuin si gaganꞌ raꞌa atsîj tàj yichrâ ràꞌaj.
31 Ni̱ gataj nej sí ꞌna̱ꞌ ga̱huin chru̱n riñanj:
—Gàꞌ ni̱ꞌi̱n Ma̱ꞌân rèꞌ si ûta gàꞌì nej guiì ꞌnaꞌ ni̱ ûta chruj ꞌna̱ꞌ nêꞌ ni̱ gataj Ma̱ꞌân rèꞌ:
“Ahuin si gaganꞌ raꞌa ñùnj ràꞌaj.”
32 Sani̱ giniꞌhiaj Ma̱ꞌan Jesús nï̀nꞌ gàchràꞌ neꞌ rùkuj dadinꞌ ruhuaj gi̱ni̱ꞌin ahuin guiì gaganꞌ raꞌa Ma̱ꞌan.
33 Hiôꞌ ni̱ ûta guyuꞌhuiꞌ siyànà dânj,
ni̱ nda nagunanj nneè ku,
dadinꞌ gàꞌ niꞌin si ganahuin nneè kú giꞌhiaj Ma̱ꞌan Jesús,
gaꞌan ni̱ ganikïnꞌ rúdako riñan Ma̱ꞌan Jesús,
ni̱ ganataj gu̱nïn Ma̱ꞌan Jesús si yàngàꞌ huej huin sa gaganꞌ raꞌa atsîj ni̱ke̱ Ma̱ꞌan Jesús.
34 Ni̱ gataj Ma̱ꞌan Jesús gu̱nïn:
—Da̱ꞌninj,
guendâ guyumân ruhuâꞌ ni̱ ôꞌ huin sa giꞌhiaj ni̱ ganahuînꞌ na̱nj ánj;
na̱nꞌ dukuât ni̱ ga̱ dïnꞌïnj ruhuâꞌ,
dadinꞌ gàꞌ gananinꞌ riñan sañuun na̱nj ánj.
35 Nga nï̀nꞌ gaꞌmin Ma̱ꞌan Jesús nikïnj,
ni̱ gaꞌnaꞌ nej sí ꞌna̱ꞌ ñan nne dukuâ sí huin ña̱n riñan hueꞌ nûhui ni̱ gataj nej sôꞌ:
—Nùnj huin si giꞌhiâꞌ gakḯn chreꞌ Ma̱ꞌan Maestrû gàꞌnaj ni̱ gàꞌ gahuiꞌ daꞌnin yànàꞌ gàꞌ únj.
36 Sani̱ nga gunïn Ma̱ꞌan Jesús dàj gataj nej sí dânj,
ni̱ gata gu̱nïn sí huin ña̱n riñan hueꞌ nûhui:
—Si̱ guyuꞌhuîꞌ mánj,
man si gùyùmàn yìtï̀nj ruhuâꞌ na̱nj ánj.
37 Ni̱ nun ga̱ꞌhue si gi̱nikòꞌ nej guiì ga̱ꞌa̱nj ninj rukuj man ꞌngo̱ rïn Pedro,
ngà Jacobo ni̱ Juan sôꞌ huin dinḯn Jacobo gaꞌanj ngà Ma̱ꞌan.
38 Ni̱ gaꞌan ñan nne dukuâ sí huin ña̱n riñan hueꞌ nûhui,
ni̱ giniꞌin si màn nej guiì ni̱ dugueꞌe ninj ni̱ gaguâj hia ninj mân ninj,
ni̱ ûta huin duꞌhua ninj mân ninj.
39 Ni̱ nga gatu ruhuâ hueꞌ dânj ni̱ gata:
—Nùnj huin saj ni̱ ûta aguâj hia nej suj ni̱ dugueꞌe nej suj ràꞌaj.
Sê si̱ gahuiꞌ sinꞌ yànà dan mánj,
man si ato nga na̱nj ánj.
40 Ni̱ gayiꞌì nej guiì màn hiuj dânj ni̱ gaꞌmin duku ninj riñan Ma̱ꞌan Jesús.
Sani̱ girij neꞌ ye̱ꞌe daranꞌ ninj,
ni̱ ni̱ka rej sinꞌ yànà dânj ngà nni sinꞌ yànà dânj ngà nej sôꞌ hua̱j nngaj,
ni̱ gatu ñan nngaj sinꞌ yànà dânj.
41 Ni̱ gidaꞌa raꞌa sinꞌ yànà dânj ni̱ gata:
—Talita kumi,
—ni̱ nânj ruhuaj ga̱ta sinꞌi̱nj gu̱nïn sòꞌ sa gàtà ni̱ ga̱na̱chi̱ sòꞌ ánj.
42 Ni̱ orâ chre ni̱ ganachi sinꞌ yànà dânj ni̱ gaché sinꞌ dânj,
dadinꞌ gàꞌ hua hioꞌ yùhuìj i.
Ni̱ ûta gahuin ña̱ꞌanj ruhuâ nej guiì màn hiuj dânj.
43 Sani̱ ûta gaꞌnïnꞌ su̱n Ma̱ꞌan Jesús riñan nej guiì màn hiuj dânj sisi̱ si̱ gananï̂n ninj riñan aꞌngô nej guiì sa gahuin hiuj dânj,
ni̱ gata si gàꞌhuìꞌ ninj sa ya̱ sinꞌ yànà dânj.