Nuguanꞌ rán aꞌmin rayiꞌî sí unuun
4
Huê danj ni̱ nne Ma̱ꞌan Jesús nìchrùnꞌ duꞌhua nne ña̱ꞌa̱nj ni̱ gayi̱ꞌij gidiganj riñan nej guiì;
ni̱ ganaraꞌhuiꞌ ûta gàꞌì nej guiì riñan Ma̱ꞌan Jesús,
hiôꞌ ni̱ gatu ruhuâ barku,
ni̱ gaꞌanj ga̱ne ruhuâ barkû;
ni̱ màn nej guiì nìchrùnꞌ duꞌhua nne ña̱ꞌa̱nj.
2 Huê danj ni̱ gayi̱ꞌij gidiganj nuguanꞌ ráan rayiꞌî gàꞌì nej rasu̱un,
ni̱ gata nga gidiganj nej yìꞌnï̀nꞌ si-nùguànꞌ Ma̱ꞌan Ñaꞌanj an:
3 —Gu̱nïn nej suj:
ꞌNgo̱ sí dânj ni̱ sí unuun huin sôꞌ ni̱ gahui sôꞌ gaꞌanj gùnùn sôꞌ;
4 Ni̱ nga unun sôꞌ huaj sôꞌ,
ni̱ da̱ꞌa̱j nej ka̱n dânj gininj duꞌhua chrej e ni̱ gaꞌnaꞌ nej yataj aché yàtàꞌa ni̱ yâ nej yôꞌ nej ka̱n dânj.
5 Ni̱ aꞌngô da̱ꞌa̱j nej ka̱n dânj gininj riñan hioꞌó hiëj,
ñan nitaj si hua̱ nìko hioꞌóo;
ni̱ raꞌñanj giyiꞌchraj,
dadinꞌ nitaj si hua̱ hioꞌóo ga̱ꞌa̱nj gu̱nu̱n hiaꞌaj.
6 Sani̱ nga gisîj gui,
ni̱ gochroj man giꞌhiaj nân;
dadinꞌ nun ga̱ꞌa̱nj gu̱nu̱n hiaꞌaj riki hioꞌóo huê danj ni̱ ganakoj.
7 Ni̱ aꞌngô da̱ꞌa̱j nej ka̱n dânj gininj siganï̂nj nej tanj an;
ni̱ gachij nej tanj dânj ni̱ nun gàꞌnï̀n ninj ga̱chi̱j nej koj sàꞌ dânj,
huê danj ni̱ nun ga̱hiu chruj raa̱ nej koj sàꞌ dânj mánj.
8 Ni̱ aꞌngô da̱ꞌa̱j nej ka̱n dânj gininj riñan hioꞌó sàꞌaj,
ni̱ gahiu chruj raa̱ nej koj dânj,
dadinꞌ giyichraꞌ hueꞌej ni̱ gachi,
ni̱ gahiu ko̱ chi̱ꞌ chruj raj,
huàꞌnï̀nj xia chruj raj,
ꞌngo̱ sientu chruj raa̱ daꞌ goꞌngo̱ nej ka̱n dânj.
9 Hiôꞌ ni̱ gata:
—Guiì tàj hiuꞌuj rakïj guendâ gu̱nïn,
ni̱ gu̱nïn ninj.
Nùnj huin saj ni̱ garânj sun Ma̱ꞌan Jesús nuguanꞌ ráan
10 Nga ganahuin ꞌngo̱ rïn Ma̱ꞌan Jesús,
ngà nej sí gaché ngà Ma̱ꞌan ni̱ nej yùhuìj nej sí ꞌna̱ꞌ ga̱huin chru̱n riñanj,
ni̱ gachín naꞌanj nej sôꞌ rayiꞌî nuguanꞌ rán nânj.
11 Ni̱ gata gu̱nïn nej sôꞌ:
—Hua̱ ni̱ña̱n si ga̱ꞌhue ga̱ra̱n daꞌngaꞌ ruhuâ nej suj nej nuguanꞌ hua̱ huì giꞌhiaj Ma̱ꞌan Ñaꞌanj an;
sani̱ nej sí màn neꞌ ye̱ꞌe,
ni̱ hua̱ ni̱ña̱n si gu̱nïn nej sôꞌ nuguanꞌ ráan.
12 Ni̱ gi̱ni̱ꞌhiaj nej sôꞌ;
sani̱ si gaꞌhue gi̱ni̱ꞌin nej sôꞌ,
gu̱nïn nej sôꞌ sani̱ si̱ gaꞌhue ga̱ra̱n daꞌngaꞌ ruhuâ nej sôꞌ;
huê danj ni̱ naꞌhuej nej sôꞌ ga̱na̱du̱na̱ nej sôꞌ ma̱ꞌan nej sôꞌ ni̱ nitaj si gananikàj ruhuâ nej sôꞌ rayiꞌî si-ga̱kïnꞌ nej sôꞌ,
hiôꞌ ni̱ si̱ ginikâ nimân nìko rayiꞌî si-ga̱kïnꞌ nej sôꞌ mánj.
Ganataꞌ Ma̱ꞌan Jesús rayiꞌî nuguanꞌ ráan
13 Ni̱ gataj Ma̱ꞌan Jesús gu̱nïn nej sij:
—Nun niꞌin nej suj nùnj huin si ga̱ta̱j daranꞌ nej nuguanꞌ rán nânj ruhuaj ûnꞌ.
Dàj gi̱ꞌhiaj nej suj,
ga̱ꞌhue ga̱ra̱n daꞌngaꞌ ruhuâ nej suj aꞌngô da̱ꞌa̱j nej nuguanꞌ rán dânj ràꞌaj.
14 Sí unuun huin sí gaꞌmin si-nùguànꞌ Ma̱ꞌan Ñaꞌanj an.
15 Nej ka̱n gunun nej sôꞌ duꞌhua chrej e:
Huin nej guiì gunïn si-nùguànꞌ Ma̱ꞌan Ñaꞌanj an,
sani̱ neꞌ rùkù nga gisîj gunïn ninj,
ni̱ orâ chre ni̱ gaꞌnaꞌ sichre,
ni̱ gaꞌne nuguanꞌ gunun nej sôꞌ ruhuâ nimân ninj.
16 Nej ka̱n gunun nej sôꞌ siganï̂nj nej hiëj:
Huin nej guiì gunïn si-nùguànꞌ Ma̱ꞌan Ñaꞌanj an,
ni̱ nda nìhiàꞌ chre hua ruhuâ ninj nga ganahuin raꞌa ninj si-nùguànꞌ Ma̱ꞌan Ñaꞌanj an.
17 Sani̱ ñan nun gùyùmàn nìko ruhuâ ninj niꞌin ninj si-nùguànꞌ Ma̱ꞌan Ñaꞌanj an,
ni̱ nun ga̱nikïnꞌ ran ninj,
dadinꞌ nga gaꞌnaꞌ sañuun ni̱ gata rùhuà nej síi niꞌin nej sôꞌ ninj rayiꞌî si-nùguànꞌ Ma̱ꞌan Ñaꞌanj an,
ni̱ gininaj ruhuâ ninj ni̱ ganatûj ninj.
18 Nej ka̱n gunun nej sôꞌ siganï̂nj nej koj tanj an:
Huin nej guiì gunïn si-nùguànꞌ Ma̱ꞌan Ñaꞌanj an,
19 sani̱ gidigañuꞌunj nej sun màn ruhuâ yumiguìi nânj,
ngà nej sa giꞌhiaj ga̱huin yi̱ruꞌhue ninj,
ni̱ ûta huin ruhuâ ninj ga̱ aꞌngô nej rasu̱un riñan ninj,
ni̱ nej rasu̱n nânj huin sa giꞌhiaj ni̱ gininaj ruhuâ ninj ngà si-nùguànꞌ Ma̱ꞌan Ñaꞌanj an,
huê danj ni̱ nitaj si giniꞌñanj ninj ngà si-nùguànꞌ Ma̱ꞌan Ñaꞌanj an gàꞌ mánj.
20 Nej ka̱n gunun nej sôꞌ riñan hioꞌó sàꞌa:
Huin nej guiì gunïn si-nùguànꞌ Ma̱ꞌan Ñaꞌanj an ni̱ ganahuin ra̱ꞌa ninj si-nùguànꞌ Ma̱ꞌan Ñaꞌanj an,
ni̱ giꞌhiaj ninj dàj rûnꞌ giꞌhiaj ꞌngo̱ ka̱n gaꞌhuiꞌ ko̱ chi̱ꞌ chruj tsìꞌi,
huàꞌnï̀nj xia chruj tsìꞌi,
ꞌngo̱ sientu chruj tsìꞌi,
huê danj guyumân ruhuâ aꞌngô nej guiì si-nùguànꞌ Ma̱ꞌan Ñaꞌanj an giꞌhiaj ninj.
Gàꞌ si ꞌngoj nitaj si huaj gìyìꞌìj huì
21 Ni̱ huê danj gataj Ma̱ꞌan Jesús:
—Nìkoꞌ sa yigï̀ïn gaꞌnôꞌ guendâ giꞌnïnj hu̱ij riki chrún riñunꞌ na̱nj nîꞌ,
nej si giꞌnïnj hu̱ij riki nna sàꞌ.
Sê ña̱ꞌa̱n huaj si gùtòꞌ gita̱a ñan yàkàan guendâ gùdùgunj ràꞌ saj ûnꞌ.
22 Nitaj gàꞌ si ꞌngoj hua huì sisi̱ si̱ gaꞌhue gi̱ni̱ꞌin nej guiì mánj,
nùnj huin si giꞌnïnj huij sani̱ dàñùn gi̱ni̱ꞌin nej guiì na̱nj ánj.
23 Si hua̱ ꞌngo̱ nej suj tá hiuꞌuj u rakïj guendâ gu̱nïn,
ni̱ gu̱nïn nej suj.
24 Ni̱ huê danj na̱nj gataj Ma̱ꞌan Jesús:
—Hueꞌê ga̱na̱nï̱n rakïj nej suj ni̱ hueꞌê gu̱nïn nej suj,
dadinꞌ ngà daꞌnga giriñun nej suj,
ni̱ huê ngà daꞌnga dânj gi̱ri̱ñu̱n Ma̱ꞌan Ñaꞌanj an nej suj;
ni̱ si gadagahuin nej suj sa gunïn nej suj hiôꞌ ni̱ gi̱ri̱ki̱ Ma̱ꞌan Ñaꞌanj an doj nuguanꞌ sàꞌa gu̱nïn nej suj.
25 Dadinꞌ sí gadagahuin sa gunïn,
ni̱ gi̱ri̱ki̱ Ma̱ꞌan Ñaꞌanj an doj sa ga̱ra̱n daꞌngaꞌ ruhuâ sôꞌ;
ni̱ sí gunïn sani̱ nun ga̱da̱gahuin sôꞌ sa gunïn sôꞌ,
ni̱ ga̱ꞌne̱ Ma̱ꞌan Ñaꞌanj an si-nùguànꞌanj riñan sôꞌ.
Nuguanꞌ rán gaꞌmin rayiꞌî ka̱n gunun nej sij
26 Ni̱ gataj Ma̱ꞌan Jesús:
—Ni̱ huê dànanj giꞌhiaj sun Ma̱ꞌan Ñaꞌanj an,
dadinꞌ dàj rûnꞌ giꞌhiaj ꞌngo̱ sí dagamanꞌ ka̱an riki hioꞌóo huê danj giꞌhiaj Ma̱ꞌan.
27 Ni̱ gatoj sôꞌ neꞌ ñànꞌan ni̱ nga giyigï̀n neꞌ ni̱ganꞌ aꞌngô gui ni̱ ganachi sôꞌ,
ni̱ gàꞌ giyichraꞌ ka̱n dagamanꞌ sôꞌ ni̱ gachi sani̱ nun gi̱ni̱ꞌin sôꞌ dàj giꞌhia gachi mánj.
28 Huê gè hioꞌóo giꞌhiaj gachra ka̱an raa̱ ka dânj,
gàꞌ si̱nï̱n ni̱ gisîj chrinꞌ trigu ni̱ gachi,
ni̱ neꞌ rùkù ni̱ gachra kaa raj huê danj ni̱ gachra ka̱an raj;
29 Ni̱ nga gàꞌ gahuin sìkàꞌ ka̱n dânj ni̱ neꞌ rùkù ni̱ gaꞌneꞌ nej sij,
dadinꞌ gàꞌ guyumân diû si ga̱na̱ranꞌ nej sij ni̱ ga̱na̱huin chre̱ꞌ nej ka̱n dânj.
Nuguanꞌ rán aꞌmin rayiꞌî ka̱n kuej staj
30 Ni̱ gataj Ma̱ꞌan Jesús:
—Ahuin si ngà ga̱ꞌhue ga̱ya̱ko̱ꞌ daꞌngaꞌa ngà yiñán Ma̱ꞌan Ña̱ꞌa̱nj nne yàtàꞌa ràꞌaj,
ni̱ ngà ahuin nuguanꞌ rán ga̱ꞌhue gi̱ꞌhiaj gu̱ñu̱nꞌ nngaj ràꞌaj.
31 Huin dàj rûnꞌ huin ka̱n kuej staj,
dadinꞌ nga dagamûnꞌ riñan hioꞌóo,
ni̱ huej huin ka̱n hua̱ lij doj gàꞌ daꞌ daranꞌ nej ka̱n màn riñan hioꞌóo;
32 sani̱ nga gisîj dagamûnꞌ,
ni̱ giyichraj ni̱ gachi,
ni̱ gahuin sa nìko doj gàꞌ daꞌ daranꞌ nej kuej gununꞌ riñan hioꞌóo;
ni̱ ga̱ꞌhue gi̱ꞌhiaj nej yataj aché neꞌ yàtàꞌa sigitï̱nj nej yôꞌ riki koj raꞌa ñan hua̱ gayu̱nꞌun.
Garânj sun Ma̱ꞌan Jesús nuguanꞌ ráan guendâ ga̱ra̱n daꞌngaꞌ hueꞌê ruhuâ nej guiì
33 Ni̱ huê dànanj gidigân Ma̱ꞌan Jesús si-nùguànꞌ Ma̱ꞌan Ñaꞌanj an,
ni̱ garânj sunj ûta gàꞌì nej nuguanꞌ rán hua,
dàj ga̱ꞌhue gunïn hueꞌê nej guiì.
34 Ni̱ nga nitaj nuguanꞌ ráan nikaj Ma̱ꞌan Jesús nga ga̱ꞌmi̱n hiôꞌ ni̱ nitaj si gaꞌmin mánj;
sani̱ nga nne ꞌngo̱ rïn Ma̱ꞌan Jesús ngà nej sí ꞌnaꞌ ga̱huin chru̱n riñanj ni̱ ganataj gu̱nïn nej sôꞌ nùnj huin si ga̱ta̱j nej nuguanꞌ rán nânj.
Giꞌhiaj Ma̱ꞌan Jesús si ganikïnꞌ si gaꞌhuij gumàn hue xi ni̱ gaꞌ si ganayumàn nne ña̱ꞌa̱nj
35 Ni̱ nga ginìn gui dânj ni̱ gataj Ma̱ꞌan Jesús:
—Ga̱chi̱n nêꞌ ga̱ꞌa̱nj neꞌ ané duꞌhua nne ña̱ꞌa̱nj.
36 Ni̱ ganaꞌnï̂n nej sij nanꞌ nej guiì rigìi dukuâ ninj,
ni̱ ginikaj nej sij Ma̱ꞌan Jesús gaꞌanj nej sij ruhuâ barkû gàꞌ hua̱ yu̱gui;
ni̱ huê danj na̱nj hua̱j aꞌngô nej barku ngà nej sij.
37 Sani̱ ûta ganachi nikaj nne ña̱ꞌa̱nj ma̱ꞌan ni̱ dagamanꞌ nnee ruhuâ barkû hua̱j Ma̱ꞌan Jesús,
hiôꞌ ni̱ gachra nnee ruhuâ barkû dânj.
38 Sani̱ nngaj Ma̱ꞌan Jesús gato ñan ni̱kï̱nꞌ chrun timón,
ni̱ ꞌnï̱nj sa guchunj lij dan ahui Ma̱ꞌan;
ni̱ dunaꞌnï̂nj ñan nej sij Ma̱ꞌan ni̱ gataj nej sij:
—Maestrûj.
Nitaj si ganahuij ruhuâ Ma̱ꞌân rèꞌ dadinꞌ do̱j nï̀nꞌ hua ni̱ ga̱na̱huij nêꞌ gàhuìꞌ mínj.
39 Ni̱ ganachi Ma̱ꞌan ni̱ dugunïn gàꞌij nanèe ni̱ gata gu̱nïn nne ña̱ꞌa̱nj:
—Dḯn ga̱ne duꞌhuâꞌ ni̱ dḯn gi̱nunꞌ raj.
Huê danj ni̱ gaꞌ nanèe,
ni̱ dḯn chre gahuin nï̀nꞌ gàchràꞌ.
40 Ni̱ gataj Ma̱ꞌan Jesús gu̱nïn nej sôꞌ huaj nngaj:
—Nùnj huin saj ni̱ ûta guyuꞌhuiꞌ nej suj ràꞌaj.
Ni̱ nitaj si guyumân nìko ruhuâ nej suj ràꞌaj.
41 Hiôꞌ ni̱ ûta guyuꞌhuiꞌ nej sij niꞌin nej sij Ma̱ꞌan Jesús,
ni̱ gaꞌmin huì nej sij ngà nej duguiꞌ nej sij ni̱ gataj nej sij:
—Ahuin sí huin sí nânj dadinꞌ nanèe ngà nne ña̱ꞌa̱nj ni̱ garânj yina ngue sa gaꞌmin sôꞌ ràꞌaj.