Sí ganakò raꞌa
3
Ni̱ gatûj ñûn Ma̱ꞌan Jesús ruhuâ hueꞌ nûhui;
ni̱ nne ꞌngo̱ sí ganakò ꞌngo̱ raꞌa ruhuâ hueꞌ dânj.
2 Ni̱ ûta hueꞌê gayakaj guendâ nej sij dadinꞌ ruhuâ nej sij gi̱ni̱ꞌin nej sij,
si gui ganarânj ruhuâ ni̱ giꞌhiaj Ma̱ꞌan Jesús ga̱na̱huin sí ganakò raꞌa nânj,
daꞌnga ni̱ gaꞌhue ga̱ra̱n ruhuâ nej sij rayiꞌî Ma̱ꞌan Jersús.
3 Hiôꞌ ni̱ gataj Ma̱ꞌan Jesús gu̱nïn sí ganakò raꞌa dânj:
—Gànàyùmàn sòꞌ ni̱ ga̱nikïnꞌ da̱nï̱n hiuj nânj.
4 Ni̱ gata:
—Dùgùnàj huaj si gui ganarânj rûhua ni̱ gi̱ꞌhioꞌ sa sàꞌa nîꞌ,
si dùgùnàj huaj si gi̱ꞌhioꞌ sa aꞌnanꞌan sàꞌ,
dùgùnàj huaj si gi̱ꞌhioꞌ si ga̱na̱ni̱n ꞌngo̱ guiì nîꞌ,
si dùgùnàj huaj si da̱gahuiꞌ ꞌngo̱ guiì sàꞌ.
Sani̱ dḯn gane duꞌhua nej sij.
5 Hiôꞌ ni̱ giniꞌhiaj Ma̱ꞌan Jesús,
ni̱ gaꞌman ruhuâj ni̱ gananï̂n ruhuaj ni̱ giniꞌhia nï̀nꞌ gàchràꞌ neꞌ rùkuj,
dadinꞌ ûta ꞌtsì hua ruhuâ nimân nej sij,
ni̱ gata gu̱nïn sí ganakò raꞌa dânj:
—Du̱nukuâ sòꞌ raꞌât.
Ni̱ dunukuâ sí dânj raꞌa sôꞌ,
ni̱ ganahuin nìꞌnàꞌ raꞌa sôꞌ.
6 Ni̱ nga gahui nej sí fariseo gaꞌanj nej sôꞌ,
ni̱ dagaꞌmin duguiꞌ nej sôꞌ ngà nej yiꞌnïnꞌ nej sí herodianos rayiꞌî Ma̱ꞌan Jesús,
dadinꞌ huin ruhuâ nej sôꞌ da̱gahuiꞌ nej sôꞌ Ma̱ꞌan.
Màn nej guiì rìgìi duꞌhua nne ña̱ꞌa̱nj
7 Sani̱ gahuin anêj Ma̱ꞌan Jesús ngà nej sí gaꞌnaꞌ gahuin chru̱n riñanj ni̱ gaꞌan ñan nu̱n nne ña̱ꞌa̱nj,
ni̱ huê danj na̱nj ginikòꞌ ûta gàꞌì nej guiì màn Galilea.
Ni̱ huê danj na̱nj gaꞌnaꞌ nej guiì màn Judea.
8 Ni̱ huê danj na̱nj gaꞌnaꞌ nej guiì màn Jerusalén,
ni̱ nej guiì màn Idumea,
ni̱ nej guiì màn ané duꞌhua kïn Jordán,
ni̱ nej guiì màn ganikàj rukû Tiro ni̱ nej guiì màn Sidón,
ni̱ gunïn ninj sa nìko staꞌu giꞌhiaj Ma̱ꞌan Jesús;
ni̱ ûta gàꞌì nej guiì gaꞌnaꞌ riñan Ma̱ꞌan.
9 Ni̱ gata gu̱nïn nej sí ꞌna̱ꞌ ga̱huin chru̱n riñanj si gàꞌ ga̱ yu̱gui ꞌngo̱ barku,
rayiꞌî guendâ ûta man nej guiì,
daꞌnga ni̱ si ganï̂n duguiꞌ ninj ngà Ma̱ꞌan.
10 Dadinꞌ ûta gàꞌì nej guiì aꞌnanꞌan ganahuin giꞌhiaj Ma̱ꞌan Jesús;
ni̱ man si gaganꞌ raꞌa ninj ni̱ ganatûj da̱ꞌa̱j ninj ñan nikïnj.
11 Ni̱ nga giniꞌin nej nanè kï̱j huaa Ma̱ꞌan Jesús ni̱ ganikïnꞌ rúdàkòj ninj riñanj,
ni̱ gaguâj nùkuaj ninj ni̱ gataj ninj:
—Sòꞌ huin Daꞌní Ma̱ꞌan Ñaꞌanj an.
12 Sani̱ ûta dugunïn gàꞌì Ma̱ꞌan Jesús nej nanè kï̱j hua si dḯn ga̱ne duꞌhua ninj,
ni̱ si̱ gananï̂n ninj ahuin sa huin Ma̱ꞌan.
Ganagui Ma̱ꞌan Jesús nej yùhuìj apóstol
13 Neꞌ rùkù ni̱ gahui Ma̱ꞌan Jesús gaꞌan raa̱ ꞌngo̱ kïj ï ni̱ gakï̱n nej sí garanꞌ ruhuaj;
ni̱ gaꞌnaꞌ nej sôꞌ riñanj.
14 Ni̱ ganaguij yùhuìj nej sí gaꞌnaꞌ ga̱huin chru̱n riñanj,
guendâ gi̱nikaj duguiꞌ nej sôꞌ ga̱che̱ nej sôꞌ ngà Ma̱ꞌan,
ni̱ huê nej sôꞌ huin sa ga̱ꞌnïn ga̱ꞌa̱nj gànàtàꞌ si-nùguànꞌ Ma̱ꞌan Ñaꞌanj an riñan aꞌngô nej guiì.
15 Ni̱ gaꞌhuij si gi̱nikaj su̱n nej sôꞌ ni̱ gi̱ri̱ nej sôꞌ sa kï̱j ï ruhuâ nimân nej guiì.
16 Ni̱ ganaguij Simón,
ni̱ dugûꞌna Pedro gahuin siyu̱gui sôꞌ.
17 Ni̱ Jacobo huin daꞌní Zebedeo,
ni̱ Juan huin dinḯn Jacobo,
ni̱ nguèj sí nânj gutaj Boanerges raa̱ siyu̱gui nguèj sôꞌ,
ni̱ nânj ruhuaj ga̱ta sí huin daꞌní duꞌhui;
18 ni̱ ganaguij Andrés,
Felipe,
Bartolomé,
Mateo,
Tomás,
Jacobo huin daꞌní Alfeo,
Tadeo,
Simón sí ꞌna̱ꞌ riñan hioꞌó Kanaán.
19 Ni̱ Judas Iscariote,
sí nânj huin sí nagaꞌhuiꞌ Ma̱ꞌan Jesús.
Gaꞌmin kï̱j nej sij rayiꞌî Ma̱ꞌan Espíritu Santo
Neꞌ rùkù ni̱ gatûj Ma̱ꞌan Jesús ruhuâ hueꞌe ngà nej sí nìkòꞌ rukuj
20 Ni̱ nda nanè chre ganaraꞌhuiꞌ ûta gàꞌì nej guiì,
ni̱ gàꞌ nitaj si giyiꞌnï̂nj riñan nej sij ya̱ nej sij.
21 Ni̱ nga gunïn nej duguiꞌ Ma̱ꞌan Jesús,
ni̱ gaꞌnaꞌ nej sôꞌ guendâ ga̱na̱ka̱j nej sôꞌ Ma̱ꞌan;
dadinꞌ gataj nej sôꞌ:
Si sinún Ma̱ꞌan.
22 Sani̱ guyumân nej maestrû chru̱n ley màn Jerusalén ni̱ gataj nej sôꞌ:
—Si nu̱n Beelzebú ruhuâ nimân Ma̱ꞌan Jesús,
ni̱ ôꞌ huin sa gaꞌnïnꞌ riñan nej sa kï̱j ï ni̱ rayiꞌî dan ni̱ gaꞌhue girij nej sa kï̱j ï ruhuâ nimân nej guiì.
23 Ni̱ gakḯn Ma̱ꞌan Jesús gaꞌnaꞌ nej sij,
ni̱ gaꞌmin ꞌngo̱ nuguanꞌ ráan riñan nej sij ni̱ gata:
—Dàj ga̱ꞌhue gi̱ꞌhiaj sichre ni̱ gi̱rij neꞌ ye̱ꞌe ma̱ꞌan ruhuâ nimân ꞌngo̱ guiì ràꞌaj.
24 Ni̱ si gìyìchràꞌ da̱ꞌa̱j nej guiì ni̱ka̱j ñuꞌunj ꞌngo̱ rey,
ni̱ si̱ gaꞌhue gi̱ngaj nâ doj yumanꞌ ni̱ka̱j ñuꞌunj sôꞌ ga̱ꞌ mánj.
25 Ni̱ si gìyìchràꞌ da̱ꞌa̱j nej guiì màn ruhuâ ꞌngo̱ hueꞌe,
ni̱ si̱ gaꞌhue ga̱ nùguànꞌan ruhuâ ninj gàꞌ mánj.
26 Ni̱ si gu̱nï̱nꞌ sichre ngà ma̱ꞌan,
ni̱ gìyìchràꞌ da̱ꞌa,
ni̱ si̱ gaꞌhue ga̱ne naj doj gàꞌ mánj.
Dadinꞌ gàꞌ ganahuij diû ga̱ne na̱nj ánj.
27 ’Gàꞌ si ꞌngo̱ síi si̱ gaꞌhue ga̱tu̱ ruhuâ dukuâ ꞌngo̱ sí hua̱ yiruꞌhuee guendâ gi̱ꞌhiaj tu̱ sôꞌ nej rasu̱n huin siꞌhiaj sí dânj,
dadinꞌ gàꞌ si̱nï̱n daꞌhui sôꞌ gu̱mi̱n sôꞌ sí yi̱ruꞌhue dânj,
daꞌnga ni̱ gaꞌhue ga̱tu̱ sôꞌ ni̱ gi̱ꞌhiaj tu̱ sôꞌ sa màn ruhuâ dukuâ sí dânj.
28 ’Yàngàꞌ hia nï̀nꞌ gàtà:
Ni̱ daranꞌ nej gakï̱nꞌ giꞌhiaj nej síi ngà daranꞌ nej nuguanꞌ kï̱j gaꞌmin nej sij dàj na̱nj hua ma̱ꞌan,
ni̱ ga̱ꞌhue gi̱ni̱kaj Ma̱ꞌan Ñaꞌanj an nimân nìko rayiꞌî daranꞌanj.
29 Sani̱ ahuin na̱nj sí gaꞌmin nuguanꞌ kï̱j huaa riñan Ma̱ꞌan Espíritu Santo,
ni̱ nitaj àmàn huaj gi̱nika nimân nìko rayiꞌî sí dânj,
dadinꞌ gi̱ranꞌ sañun sôꞌ ni̱ gi̱nun nìgànj sôꞌ ruhuâ rúnâko.
30 Dadinꞌ gataj nej sí dânj:
Si̱ nu̱n nanè kï̱j huaa ruhuâ nimanj na̱nj ánj.
Nni Ma̱ꞌan Jesús ni̱ nej dinïn
31 Ni̱ nda neꞌ rùkù doj ꞌna̱ꞌ nej dinḯn Ma̱ꞌan Jesús ngà nni,
ni̱ gunâj nej sôꞌ neꞌ ye̱ꞌ hueꞌ dânj,
ni̱ gaꞌnḯn nej sôꞌ ꞌngo̱ síi gaꞌanj gàkï̀nj Ma̱ꞌan.
32 Ni̱ gataj nej guiì màn ganikàj neꞌ rùkù Ma̱ꞌan Jesús:
—Nni Maꞌân rèꞌ ngà nej dinḯn rèꞌ ni̱ nej yuguej rèꞌ nikïnꞌ neꞌ ye̱ꞌe,
ni̱ nanaꞌhuiꞌ nej sij Maꞌân rèꞌ na̱nj ánj.
33 Ni̱ gataj Ma̱ꞌan Jesús:
—Ahuin si huin nnî ngà nej dinï̂n ràꞌaj.
34 Ni̱ niꞌhiaj Ma̱ꞌan riñan nej guiì màn ganikàj neꞌ rùkùj ni̱ gata: