Dàj rûnꞌ huin chru dunuꞌmanꞌan huin nej sa gidigân nej sí fariseo
12
Huê danj ni̱ ganaraꞌhuiꞌ ûta gàꞌì mîn nej guiì rigìi,
ni̱ nda ganatûj nej duguiꞌ ninj giꞌhiaj ninj,
ni̱ gayiꞌì Ma̱ꞌan Jesús ni̱ gata gu̱nïn nej sí gaꞌnaꞌ ga̱huin chru̱n riñanj:
—Sa gi̱ꞌhiaj nej suj huin si ga̱ gu̱dadû nej suj ngà chru dunuꞌman rachrúun,
nânj huin nej sa giꞌhiaj nej sí fariseo,
dadinꞌ huin nej sôꞌ sí gidigañuꞌunj un.
2 Dadinꞌ gàꞌ si ꞌngo̱ nuguanꞌan nitaj si huaj ga̱huin huì,
sisi̱ si̱ gaꞌhue gi̱ni̱ꞌin nej guiì mánj;
ni̱ nùnj huin si giꞌnïnj huìj,
sani̱ dàñùn daꞌhui giniꞌin nej guiì na̱nj ánj.
3 Hiôꞌ ni̱ daranꞌ sa gaꞌmin nej suj ñan hua̱ ru̱mi̱nꞌin,
ni̱ dàñùn gu̱nïn nej guiì;
ni̱ sa gaꞌmin nej suj nga hua rán riñan ꞌngo̱ rahueꞌe,
ni̱ nda yichrá hueꞌe ga̱ꞌmi̱n nùkuaj nej sôꞌ guendâ gu̱nïn aꞌngô nej guiì.
Ahuin si ri̱ña̱n gi̱nun yuꞌhuiꞌ ruhuôꞌ ràꞌaj
4 ’Sani̱ ñùnj taj,
gu̱nïn nej suj:
Ni̱ si̱ guyuꞌhuiꞌ nej suj niꞌin nej suj sí dagahuiꞌ nneè kú nej suj mánj,
dadinꞌ neꞌ rùkù ni̱ nitaj aꞌngô sa ga̱ꞌhue gi̱ꞌhiaj nej sôꞌ gàꞌ mánj.
5 Sani̱ gi̱digán ahuin sa ngà gi̱nun yuꞌhuiꞌ ruhuâ nej suj:
Gu̱yuꞌhuiꞌ nej suj niꞌin nej suj Ma̱ꞌan Ñaꞌanj an dadinꞌ nùnj huin si gàꞌ gahuiꞌ nej suj,
ni̱ ni̱ka̱j sunj ni̱ ga̱ꞌhue ga̱ꞌnïn ga̱ꞌa̱nj nej suj ruhuâ rúnâko:
Yàngàꞌ huin sa gatâ,
ni̱ gu̱yuꞌhuiꞌ nej suj niꞌin nej suj Ma̱ꞌan Ñaꞌanj an.
6 ’Sê huìj sanꞌanj an du̱ꞌhue̱ ùnꞌùnꞌ yilio ràꞌ saj ûnꞌ.
Ngà daranꞌ nej nânj,
ni̱ nun gi̱ni̱ꞌñu̱n Maꞌan Ñaꞌanj an niꞌin gàꞌ si ꞌngo̱ nej xuj mánj.
7 Ni̱ ni̱ka̱j Ma̱ꞌan Ñaꞌanj an guenda andaj huê mân ahui nej suj,
dadinꞌ dànanj ûta du̱ꞌhue̱ nej suj gàꞌ daꞌ ûta gàꞌì nej yilio na̱nj ánj.
Sí gananï̂n si niꞌin sij ñùnj riñan aꞌngô nej guiì
8 ’Ñùnj taj ni̱ daranꞌ nej sí ganataꞌ riñan aꞌngô nej guiì si niꞌin nej sij ñùnj,
ni̱ huê danj na̱nj gànàtàj riñan nej ángel si niꞌín nej sij na̱nj ánj.
9 Sani̱ nej sí gataj si nun niꞌin nej sôꞌ ñùnj riñan aꞌngô nej guiì,
ni̱ gàtà si nun niꞌín nej sôꞌ riñan nej si-ángel Ma̱ꞌan Ñaꞌanj an.
10 ’Daranꞌ nej guiì gaꞌmin kï̱j riñânj,
ni̱ ga̱ꞌhue gi̱nikaj Ma̱ꞌan Ñaꞌanj an nimân nìko rayiꞌî ninj;
sani̱ guiì gaꞌmin kï̱j rayiꞌî Ma̱ꞌan Espíritu Santo,
ni̱ nitaj àmàn huaj gi̱nikaj Ma̱ꞌan Ñaꞌanj an nîman nìko rayiꞌî nuguanꞌ kï̱j gaꞌmin ninj mánj.
11 ’Nga ginikaj nej síi gaꞌanj nej sôꞌ nej suj ruhuâ hueꞌ huin nûhui,
ni̱ nga ginikaj nej sôꞌ ga̱ꞌa̱nj nej sôꞌ nej suj riñan guesì,
ni̱ nga ginikaj nej sôꞌ ga̱ꞌa̱nj nej sôꞌ nej suj riñan nej sí ni̱ka̱j suun,
ni̱ si̱ giriñun ruhuâ nej suj dàj du̱nanikàj nej suj nuguanꞌan riñan nej sôꞌ,
ni̱ si̱ giriñun ruhuâ nej suj dàj ga̱ta̱j nej suj gu̱nïn nej sôꞌ mánj,
12 nga gaꞌmin nej suj,
ni̱ Ma̱ꞌan Espíritu Santo huin sa gi̱di̱gân dàj ga̱ꞌmi̱n nej suj orâ dânj.
Sí yiruꞌhue naꞌhue ga̱ya̱ka̱j guendâ
13 Ni̱ gataj ꞌngo̱ nej sí rìgì màn hiuj dânj:
—Maestrûj,
ga̱ta̱j rèꞌ gu̱nïn dinï̂n ni̱ ga̱ra̱n yina sij ni̱ gùnùchràꞌ da̱ꞌa̱j nguèj ñûnj nej rasu̱un ga̱na̱huin ra̱ꞌa nguèj ñûnj.
14 Ni̱ gataj Ma̱ꞌan Jesús:
—Ahuin sí rikî suun raꞌá ni̱ ga̱huín guesì ni̱ gùnùchràꞌ dàꞌà rasu̱un ni̱ nàrìkìj raꞌa nguèj suj ràꞌaj.
15 Ni̱ gataj Ma̱ꞌan Jesús:
—Gi̱ni̱ꞌhiaj nej suj,
ni̱ ga̱ gu̱dadû nej suj ni̱ si gàꞌ huaj do̱j riñan nej suj ni̱ si̱ ganï̂n ruhuâ nej suj gaj doj riñan nej suj mánj:
Dadinꞌ sê nej rasu̱n hua̱ riñan nej síi huin sa ga̱ꞌhue gi̱ꞌhiaj ga̱ nìꞌnàꞌ nìgànj nej sôꞌ mánj.
16 Ni̱ huê danj na̱nj gaꞌmin Ma̱ꞌan Jesús ꞌngo̱ nuguanꞌ ráan ni̱ gata:
—Ni̱ gunun ꞌngo̱ sí dânj riñan doꞌó sôꞌ ni̱ gahui ûta nìko sa ya riñan hioꞌó dânj ganaranꞌ sôꞌ.
17 Ni̱ gaꞌmin sôꞌ ngà ma̱ꞌan sôꞌ ni̱ gataj sô:
“Nùnj huin si gi̱ꞌhia,
dadinꞌ nitaj dànèꞌ hua ga̱na̱chra sàꞌàj nej siꞌhia ràꞌaj.”
18 Ni̱ gataj sôꞌ gu̱nïn ma̱ꞌan sôꞌ:
“Dànanj gi̱ꞌhia:
Ni̱ du̱guanêj hueꞌ ña̱n ganachra sàꞌàj nej siꞌhia,
ni̱ gi̱ꞌhia aꞌngô hueꞌ nìko doj,
ni̱ hiuj dânj ga̱na̱chra sàꞌàj daranꞌ nej si-tán ngà daranꞌ nej sa hua̱ riñânj;
19 Ni̱ gàtà gu̱nïn ma̱ꞌan nimânj;
ûta gàꞌì nej rasu̱un mân sàꞌ giꞌhiôꞌ ni̱ gùnùkua gàꞌì hioꞌo ga̱ra̱n sunꞌ;
ga̱na̱ra̱n ruhuôꞌ,
ni̱ yôꞌ,
ni̱ go̱ꞌo̱ꞌ,
ni̱ ga̱na̱huin nìhiàꞌ ruhuôꞌ.”
20 Sani̱ gataj Ma̱ꞌan Ñaꞌanj an gu̱nïn sí nânj:
ꞌNgo̱ sí naꞌhue ga̱ya̱ka̱j guendâ huînꞌ,
dadinꞌ si ñanꞌ hia̱j ni̱ ga̱ꞌna̱ꞌ ga̱na̱ka̱j nej sij ma̱ꞌan nimânt;
ni̱ ahuin sa ga̱na̱huin ra̱ꞌa nej sa ganachra sàꞌ dânj ràꞌaj.”
21 Huê dànanj gi̱ranꞌ sí gahuin yi̱ruꞌhue,
dadinꞌ sê sí yi̱ruꞌhuee huin sôꞌ riñan Ma̱ꞌan Ñaꞌanj an mánj.
Ûta ganahuij ruhuâ ni̱ ûta huin ruhuâ
22 Neꞌ rùkù ni̱ gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
Huê danj gatâ gu̱nïn nej suj:
—Ni̱ si̱ giriñun ruhuâ nej suj dàj gi̱ꞌhiaj nej suj ga̱ꞌhue ga̱ nìꞌnàꞌ nej suj,
ni̱ dàj gi̱ꞌhiaj nej suj ga̱ꞌhue gìrìꞌ nej suj sa yâ nej suj;
ni̱ dàj gi̱ꞌhiaj nej suj gìrìꞌ nej suj âtsij i gi̱nun nej suj.
23 Dadinꞌ sê man rayiꞌî sa yo̱ꞌ ngà sa ga̱ nìꞌnòꞌ huin sa ña̱ꞌa̱n doj,
ni̱ sê man rayiꞌî atsîj ga̱rrûnꞌ nneè kûꞌ huin sa ña̱ꞌan doj mánj.
24 Gi̱ni̱ꞌhiaj nej suj dàj giꞌhiaj nej yakaa dadinꞌ nitaj si gunun nej xuj ꞌnḯïn,
ni̱ nitaj si giri nej xuj nnaà;
ni̱ nitaj si ganahuin ra̱ꞌa nej xuj sa yâ nej xuj giꞌhiaj nej guiì,
ni̱ nitaj guchrùu hua̱ giꞌhiaj nej xuj,
sani̱ Maꞌan Ñaꞌanj an huin sa gaꞌhuiꞌ ya nej xuj.
Ni̱ nitaj si du̱ꞌhue̱ nej suj doj gàꞌ daꞌ nej yataj a ràꞌ saj ûnꞌ.
25 Ahuin goꞌngo̱ nej suj ni̱ nùnj huin si ûta ga̱huin ruhuâ nej suj ni̱ ga̱ꞌhue gùnùkuaj nej suj ga̱na̱huin yàkàn nej suj aꞌngô dane na̱nj nînj.
26 Sani̱ si naꞌhue gùnùkuaj nej suj ga̱chi̱j nej suj doj.
Ni̱ nùnj huin saj ni̱ ûta huin ruhuâ nej suj ga̱ doj sa ya̱ nej suj ni̱ ga̱ gàꞌì atsìj i garán nej suj nneè kú nej suj ràꞌaj.
27 ’Gi̱ni̱ꞌhiaj nej suj dàj giꞌhiaj hia̱j lirio,
ni̱ dàj giꞌhia nga gahuin yàkanj;
ni̱ nitaj si giꞌhiaj sunj,
ni̱ nitaj si ganan siganꞌanj;
sani̱ ñùnj taj,
ni̱ gàꞌ Salomón ni̱ ngà daranꞌ nej sa ga riñan sôꞌ ni̱ nun ga̱ sàꞌ doj siganꞌ sôꞌ dàj rûnꞌ nìhiàꞌ hua̱ nej hia̱j nânj mánj.
28 Ni̱ si dànanj nìhiàꞌ hua̱ nej koj màn riñan hioꞌóo giꞌhiaj Ma̱ꞌan Ñaꞌanj an hia̱j,
ni̱ aꞌhioj ni̱ ga̱chri̱ ñaꞌan nej sôꞌ ruhuâ guchrúun.
Ni̱ si̱ ga̱ꞌhue rìkìj siganꞌ nej suj ûnꞌ,
do̱j nï̀nꞌ guyumân ruhuâ nej suj niꞌin nej suj Ma̱ꞌan Ñaꞌanj an na̱nj ánj.
29 Ni̱ si̱ giriñun ruhuâ nej suj dànèꞌ gìrìꞌ nej suj sa ya̱ nej suj,
ni̱ dànèꞌ gìrìꞌ nej suj sa go̱ꞌo̱ nej suj,
ni̱ si̱ ûta ga̱huin ruhuâ nej suj rayiꞌî nej nânj.
30 Dadinꞌ nej guiì nun niꞌin Ma̱ꞌan Ñaꞌanj an ni̱ ûta huin ruhuâ ninj rayiꞌî nej rasu̱n ga̱chin riñan ninj;
sani̱ Ma̱ꞌan Rê nne yàtàꞌa ni̱ gàꞌ niꞌin si ga̱chin nej rasu̱n nânj riñan ninj.
31 Sani̱ gàꞌ si̱nï̱n nànàꞌhuìꞌ nej suj ahuin sa garanꞌ ruhuâ Ma̱ꞌan Ñaꞌanj an da̱gahuin nej suj,
ni̱ daranꞌ nej rasu̱n ga̱chin riñan nej suj ni̱ ri̱ki̱ Ma̱ꞌan na̱nj ánj.
Sa du̱ꞌhue̱ ga̱ riñunꞌ yàtàꞌa
32 ’Si̱ guyuꞌhuiꞌ nej suj dadinꞌ nùnj huin si huin nej suj ꞌngo̱ yiꞌnïnꞌ lij nej guiì nìkòꞌ rukú,
ni̱ ganï̂n hueꞌê ruhuâ Ma̱ꞌan Rej nej suj Ñaꞌanj an ni̱ giꞌhia si gi̱nikaj su̱n nej suj riñan nej guiì.
33 Gu̱du̱ꞌhue̱ nej suj sa hua̱ riñan nej suj,
ni̱ gàꞌhuìꞌ nej suj sanꞌanj dânj riñan nej guiì gànìki;
gi̱ꞌhiaj yu̱gui nej suj nnanj si̱ gaꞌhue ga̱na̱huij,
ni̱ ga̱na̱chra sàꞌ nej suj siꞌhiaj nej suj yàtàꞌa ñan nitaj si huaj ga̱na̱hui,
ña̱n nitaj si huaj gùchìꞌ sí tu̱u,
ni̱ ña̱n nitaj si màn yahuì lij guendâ gu̱du̱rëꞌ nej xuj.
34 Dadin ña̱n gimàn nej rasu̱n huin siꞌhiaj nej suj,
ni̱ hiuj dânj ga̱ne nej suj ni̱ ûta ga̱na̱huij ruhuâ nej suj gu̱na̱nj gi̱tsi nej suj riñan Ma̱ꞌan.
Musû ni̱kï̱nꞌ dugumîn hueꞌê
35 ’Ni̱ dàj rûnꞌ anu̱min ran riki ꞌngo̱ síi,
huê danj ga̱nikïnꞌ ran nej suj ngà si-nùguàn Ma̱ꞌan Ñaꞌanj an ni̱ dàj rûnꞌ gudugùn hueꞌê ñaꞌaan huê danj gùrùguìꞌ hueꞌê sa sàꞌ gi̱ꞌhiaj nej suj.
36 Ni̱ gi̱ꞌhiaj nej suj dàj rûnꞌ giꞌhiaj nej musû ni̱kï̱nꞌ dugumîn ni̱ ànàꞌhuìj nej sôꞌ nga gùnùmàn si-yi̱ruꞌhue nej sôꞌ,
dadinꞌ gaꞌanj si-yi̱ruꞌhue nej sôꞌ ñan garan ra̱ꞌa ꞌngo̱ síi,
ni̱ nga gunumân sí dânj ni̱ nga ga̱ꞌmi̱n sôꞌ,
ni̱ orâ chre ni̱ ga̱na̱ꞌnï̱n nej sôꞌ riñan rahueꞌe ga̱tu̱ sí dânj dadinꞌ gàꞌ ni̱kï̱nꞌ chru̱n nej sôꞌ guendâ ga̱na̱ꞌnï̱n nej sôꞌ riñan rahueꞌe.
37 Ga̱ nìhiàꞌ ruhuâ nej sí musû nne nìꞌnàꞌ,
dadinꞌ nga gùnùmàn si-yi̱ruꞌhue nej sôꞌ;
ni̱ yàngàꞌ hia nï̀nꞌ gàtà ni̱ gi̱ꞌhiaj yu̱gui síchìj dânj ma̱ꞌan sôꞌ,
ni̱ ga̱ta̱j sôꞌ si ga̱ꞌa̱nj ga̱ne nej sij yiꞌnḯn mesa ni̱ ga̱ꞌna̱ꞌ sôꞌ ni̱ gàꞌhuìꞌ sôꞌ sa ya̱ nej sij.
38 Ni̱ nùnj si ga̱ꞌna̱ꞌ sí yi̱ruꞌhue dânj ruhuâ ꞌngo̱ si agaꞌ yùhuìj i neꞌ ñànꞌ mánj,
nej si ga̱ꞌna̱ꞌ sôꞌ ruhuâ ꞌngo̱ agaꞌ huàꞌnï̀nj ïn neꞌ ruhuâ si̱ꞌnï̱nꞌ mánj,
ni̱ si hua̱ nìꞌnàꞌ sí dânj nne sôꞌ gànàrìꞌ sí yi̱ruꞌhue dânj,
ni̱ ûta ga̱huin nìhiàꞌ ruhuâ sôꞌ niꞌin sôꞌ nej si-musû sôꞌ.
39 Ni̱ gu̱nïn nej suj nuguanꞌ nânj,
ni̱ si gàꞌ niꞌin ꞌngo̱ sí huin rej nej sílìj i dàj orâ ga̱ꞌna̱ꞌ sí tu̱u,
ni̱ ga̱ne nìꞌnàꞌ sôꞌ ni̱ du̱gumîn sôꞌ dukuâ sôꞌ,
ni̱ si̱ gaꞌnï̂nj sôꞌ gi̱ꞌhiaj tu̱ sí tu̱u sa màn ruhuâ dukuâ sôꞌ.
40 Ni̱ huê danj na̱nj ga̱ne nìꞌnàꞌ nej suj,
ni̱ ga̱ yu̱gui nej suj dadinꞌ ga̱ꞌnaj ꞌngo̱ orâ nga nitaj si̱ ànàꞌhuìj nej suj na̱nj ánj.
Musû nitaj si dagahuin hueꞌê
41 Hiôꞌ ni̱ gataj Pedro:
Señor.
Gaꞌmin Ma̱ꞌân rèꞌ nuguanꞌ rán nânj riñan nej ñûnj nîꞌ,
si gaꞌmin Ma̱ꞌân rèꞌ riñan daranꞌ nej guiì sàꞌ.
42 Ni̱ gataj Ma̱ꞌan Señor:
—Ahuin sí musû huin sí ûta hueꞌê dagahuin ni̱ ûta hueꞌê garânj daꞌngaꞌ ruhuâ,
dadinꞌ huê sí musû giꞌhiaj dànanj ga̱na̱huin ra̱ꞌa suun gi̱ꞌhiaj si-yiruꞌhue sôꞌ,
dadinꞌ àsìj nngaj gui giꞌhiaj yu̱gui sôꞌ ni̱ gaꞌhuiꞌ sôꞌ sa ya̱ nej guiì màn dukuâ si-yi̱ruꞌhue sôꞌ.
43 Ga̱ nìhiàꞌ ruhuâ sí musû dânj,
si huê dànanj giꞌhiaj sôꞌ nne sôꞌ,
nga ga̱ꞌna̱ꞌ si-yi̱ruꞌhue sôꞌ.
44 Yàngàꞌ hia nï̀nꞌ gàtà si ga̱chru̱n su̱n yi̱ruꞌhue dânj guendâ gi̱nikaj ñuꞌunj sôꞌ riñan daranꞌ nej rasu̱n màn ruhuâ dukuâ yi̱ruꞌhue dânj.
45 Sani̱ si ga̱ta̱j sí musû dânj gu̱nïn nimân sôꞌ:
Gahuin ràn si-yi̱ruꞌhuej ga̱ꞌna̱ꞌ sôꞌ;
huê danj ni̱ gàyìꞌì sôꞌ ni̱ gàꞌhuìꞌ sôꞌ niꞌhiaj nej musû naꞌuu ngà nej musû yànà ri̱ña̱n ni̱ka̱j ñuꞌunj sôꞌ,
ni̱ sê man si yâ sôꞌ ni̱ goꞌo sôꞌ dadinꞌ nagunï̂n sôꞌ,
46 Huê dânj ni̱ ga̱ꞌna̱ꞌ si-yi̱ruꞌhue sôꞌ ꞌngo̱ gui nga nitaj si̱ ànàꞌhuìj sôꞌ,
ni̱ ꞌngo̱ orâ nga nitaj si niꞌin sôꞌ,
ni̱ ûta gi̱ranꞌ sa̱ñu̱n sôꞌ gi̱ꞌhiaj si-yi̱ruꞌhue sôꞌ,
ni̱ ga̱ꞌne̱ si-yi̱ruꞌhue sôꞌ sun ganahuin ra̱ꞌa sôꞌ ni̱ gu̱ne̱ꞌ sôꞌ ga̱ne sí dânj ña̱n nne nej sí nitaj si dagahuin.
47 ’Ni̱ sí musû niꞌin sàꞌ ahuin sa garanꞌ ruhuâ si-yi̱ruꞌhue sôꞌ da̱gahuin sôꞌ,
ni̱ nun gi̱ꞌhiaj yu̱gui sôꞌ ma̱ꞌan sôꞌ,
ni̱ nun da̱gahuin sôꞌ sa garanꞌ ruhuâ si-yi̱ruꞌhue sô,
ni̱ ûta nìko kastîgu ga̱na̱huin ra̱ꞌa sôꞌ.
48 Sani̱ guiì nun niꞌin si gakï̱nꞌïn huin sa giꞌhiaj ninj,
ni̱ ninaj doj gi̱ranꞌ sa̱ñu̱n ninj;
dadinꞌ daranꞌ nej guiì ganahuin ra̱ꞌa nìko si-nùguànꞌ Ma̱ꞌan Ñaꞌanj an,
ni̱ ûta nìko gànàchìnꞌ Ma̱ꞌan Ñaꞌanj an guenda riñan ninj.
Giyichraꞌ da̱ꞌa̱j nej guiì giꞌhiaj Ma̱ꞌan Jesús
49 ’Gaꞌná ni̱ gachrûnj ñaꞌaan riñan hioꞌóo,
ni̱ ûta huin ruhuâj si ûta hio ga̱nu̱n man ga̱ꞌan nï̀nꞌ gàchràꞌ.
50 Ni̱ daꞌhuí gàtàꞌ nnej ni̱ hua̱ ni̱ña̱n si gàchìnj riñan ꞌngo̱ sañuun ûta chìꞌ hua ni̱ hua̱ ni̱ña̱n si giranꞌ sàñùnj;
ni̱ ûta gananï̂n ruhuâj nda gui gùyùmàn sañun dânj.
51 Ganï̂n ruhuâ nej suj si gaꞌná guendâ gi̱ꞌhia ga̱ dïnꞌïnj riñan hioꞌó nîꞌ.
Sê danj huin mánj:
Sa tâ huin si gaꞌná guendâ gìyìchràꞌ da̱ꞌa̱j nej dùguìꞌ nej guiì.
52 Ni̱ àsìj hia̱j ni̱ gayakaj gaꞌanj neꞌ ña̱an,
ni̱ si màn ùnꞌùnꞌ nej dùguìꞌ nej guiì ruhuâ ꞌngo̱ hueꞌe ni̱ gìyìchràꞌ da̱ꞌa̱j ninj dadinꞌ hua̱ da̱ꞌa̱j ninj gùyùmàn ruhuâ niꞌin si-nùguànꞌ Ma̱ꞌan Ñaꞌanj an ni̱ aꞌngô da̱ꞌa̱j ninj si̱ guyumân ruhuâ,
huàꞌnï̀nj ranꞌ ninj ga̱na̱ka̱j duguiꞌ ni̱ gùnï̀nꞌ ninj ngà huìj ran ninj,
ni̱ gùnï̀nꞌ huìj ranꞌ ninj ngà huàꞌnï̀nj ranꞌ ninj.
53 Ni̱ gìyìchràꞌ da̱ꞌa̱j ninj ni̱ gùnï̀nꞌ síchìj achij dânj ngà daꞌnin naꞌu sôꞌ,
ni̱ gùnï̀nꞌ sí hua̱ lij dânj ngà rej sôꞌ;
ni̱ gùnï̀nꞌ yugûnꞌ achij dânj ngà daꞌnin yànà ñûnꞌ,
ni̱ gu̱nï̱nꞌ siyànà dânj ngà nni,
ni̱ gùnï̀nꞌ yugûn achij dânj ngà daꞌnin yàkòꞌ ñûnꞌ,
ni̱ gùnï̀nꞌ siyànà yàkòꞌ dânj ngà nni yi̱che.
Nùnj huin saj ni̱ naꞌhue ga̱ra̱n daꞌngaꞌ ruhuâ nej suj dàj hua diû nânj ràꞌaj
54 Ni̱ huê danj na̱nj gataj Ma̱ꞌan Jesús gu̱nïn nej guiì rìgì màn hiuj dânj:
—Ni̱ nga giniꞌin nej suj mân nnga neꞌ gatûj gui ni̱ gataj nej suj:
Ûta gàmànꞌ rûꞌhuaj na̱nj ánj;
ni̱ huê danj gahuin yàngàꞌ.
55 Ni̱ nga gahui nanèe neꞌ ri̱ki ni̱ gataj nej suj:
Ga̱huin ña̱ꞌan rûꞌhuaj;
ni̱ huê danj gahuin yàngàꞌ.
56 Sí gidigañuꞌunj suj gàꞌ manꞌ.
Chru̱n nej suj ga̱ya̱ka̱j guendâ nej suj dàj hua yàtàꞌa ni̱ dàj hua riñan hioꞌó.
Sani̱ nùnj huin saj ni̱ nitaj si gayakaj guendâ nej suj dàj hua diû nânj ràꞌaj.
Ga̱na̱ꞌmi̱n ngà sí unïn ngàꞌ râj
57 ’Nùnj huin saj ni̱ nitaj si duguꞌnïnꞌ nej suj,
gi̱ꞌhiaj nej suj sa ni̱ka̱a siganï̂nj nej ma̱ꞌan nej suj ràꞌaj.
58 Nga nï̀nꞌ hua nìꞌnàꞌ nej suj ruhuâ yumiguìi nânj,
ni̱ du̱guꞌnïnꞌ nej suj ni̱ gàchìnj nej suj nimân nìko riñan sí ri̱ña̱n giꞌhiaj nej suj gakï̱nꞌïn,
dadinꞌ sisi̱ si̱ ganachinꞌ nej suj nimân nìko rayiꞌî si-ga̱kïnꞌ nej suj,
ni̱ hua na̱nj tàj gè gakï̱nꞌ dânj riñan guesì,
ni̱ rayiꞌî gakï̱nꞌ dânj ni̱ ga̱huin kastîgu nej suj gi̱ꞌhiaj guesì,
ni̱ gu̱ne̱ꞌ ni̱nï̱nꞌ sôꞌ nej suj ni̱ ga̱ꞌa̱nj nej suj dukuâ ga̱ꞌa na̱nj ánj.
59 Gàtà sisi̱ si̱ gaꞌhue ga̱tu̱ nej suj ñan ni̱ka̱j su̱n Ma̱ꞌan Ñaꞌanj an,
sisi̱ si̱ gananikàj ruhuâ nej suj rayiꞌî si-ga̱kïnꞌ nej suj mánj.