Gidigân Ma̱ꞌan Jesús rayiꞌî nej sa sàꞌ daꞌhuîꞌ gi̱ꞌhiôꞌ
6
’Ga̱ gu̱dadû nej suj ni̱ si̱ gananï̂n nej suj sa sàꞌ giꞌhiaj nej suj gunïn nej guiì; ni̱ si̱ gu̱nïn ninj nej sa sàꞌ giꞌhiaj nej suj, dadinꞌ si gananï̂n nej suj sa sàꞌ giꞌhiaj nej suj ni̱ si̱ ganahuin ra̱ꞌa nej suj nanìꞌhiaj nej suj gi̱ꞌhiaj Ma̱ꞌan Ñaꞌanj nne yàtàꞌa mánj.
2 Nga gàꞌhuìꞌ nej suj rasu̱un riñan nej guiì ranꞌ àko, ni̱ si̱ duyingaꞌ nej suj si gaꞌhuiꞌ nej suj rasu̱un riñan nej guiì, dàj rûnꞌ giꞌhiaj nej sí gidigañuꞌunj nga nikïnꞌ nej sôꞌ ruhuâ hueꞌ huin nûhui nej si nga huaj nej sôꞌ ñan ganachranꞌ chrej gàchràꞌa, guendâ ruhuâ nej sôꞌ si ga̱ꞌmi̱n hueꞌê nej guiì rayiꞌî nej sôꞌ; dadinꞌ yàngàꞌ ni̱ gàꞌ gaꞌmin hueꞌê nej guiì rayiꞌî nej sa giꞌhiaj sôꞌ.
3 Sani̱ nga gurugûñuꞌunjꞌ riñan nej guiì ranꞌ àko, ni̱ si̱ gananï̂nꞌ rayiꞌî nej sa giꞌhiâꞌ dan riñan nej guiì ni̱ka̱j duguiꞌ ngàꞌ mánj.
4 Daꞌnga ni̱ ga̱ huì sa gaꞌhuîꞌ riñan nej guiì ranꞌ àko; sani̱ Ma̱ꞌan Rêt Ñaꞌanj an ni̱ gàꞌ niꞌin si gaꞌhuiꞌ huìꞌ rasu̱un ni̱ na̱ri̱kij nani̱ꞌhiáꞌ ni̱ gi̱ni̱ꞌin nej guiì yùmànꞌan na̱nj ánj.
Gidigân Ma̱ꞌan Jesús dàj gaꞌminꞌ ngà Ma̱ꞌan Ñaꞌanj an
5 ’Ni̱ nga gaꞌminꞌ ngà Ma̱ꞌan Ñaꞌanj an, ni̱ si̱ giꞌhiâꞌ dàj rûnꞌ giꞌhiaj nej sí gidigañuꞌunj un; dadinꞌ giꞌhiaj nej sôꞌ si ûta gaꞌmin nej sôꞌ ngà Ma̱ꞌan Ñaꞌanj an ni̱ ni̱kï̱nꞌ ga̱hia nej sôꞌ ruhuâ hueꞌ huin nûhui ni̱ huê danj na̱nj ni̱kï̱nꞌ nej sôꞌ ñan ganachranꞌ sikûj chrej gàchràꞌ hua̱j riki yumanꞌan, guendâ ruhuâ nej sôꞌ gi̱ni̱ꞌin nej guiì sa giꞌhiaj nej sôꞌ; yàngàꞌ tâ ni̱ gàꞌ gaꞌmin hueꞌê nej guiì rayiꞌî nej sôꞌ guendâ giꞌhiaj nej sôꞌ dànanj.
6 Sani̱ sòꞌ ni̱ nga aꞌminꞌ ngà Ma̱ꞌan Ñaꞌanj an ni̱ ga̱tu̱ꞌ ruhuâ dukuât, ni̱ ga̱na̱ránꞌ riñan rahueꞌe ni̱ ga̱ꞌmi̱nꞌ ngà Ma̱ꞌan Rét Ñaꞌanj an ñan hua̱ huìi ni̱ nàrìkìj nìko doj raꞌâꞌ ni̱ gi̱ni̱ꞌin nej guiì yùmànꞌan na̱nj ánj.
7 ’Ni̱ nga gachín nìꞌhiaj nej suj riñan Ma̱ꞌan Ñaꞌanj an ni̱ si̱ giꞌhiaj nej suj, dàj rûnꞌ giꞌhiaj nej sí nàsìnùnj un; dadinꞌ ganï̂n ruhuâ nej sôꞌ si guendâ ganakaj gunuchruj nej sôꞌ huê gè nej nuguanꞌ aꞌmin nej sôꞌ riñan Ma̱ꞌan Ñaꞌanj an ni̱ ûta hio gu̱nïn nej nuguanꞌ gaꞌmin nej sô ganï̂n ruhuâ nej sôꞌ.
8 Ni̱ si̱ giꞌhiaj nej suj, dàj rûnꞌ giꞌhiaj nej sôꞌ; dadinꞌ gàꞌ niꞌin Rej nej suj Ma̱ꞌan Ñaꞌanj an, ahuin sa gàchin riñan nej suj, nga nï̀nꞌ gàchin gàchìnj nej suj riñanj.
9 Huê dànanj ga̱ta̱j nej suj, nga gàchìnj nìꞌhiaj nej suj:
Rej nej ñûnj huin Ma̱ꞌân rèꞌ ni̱ nne Maꞌân rèꞌ yàtàꞌa,
ni̱ sa gè nï̀nꞌïn huin siyu̱gui Maꞌân rèꞌ.
10 Ni̱ ga̱ꞌna̱ꞌ gi̱nikaj su̱n Ma̱ꞌân rèꞌ riñan nej ñûnj.
Ni̱ gi̱ꞌhiaj Ma̱ꞌân rèꞌ dàj garanꞌ ruhuâ Ma̱ꞌân rèꞌ riñan hioꞌó nânj, dàj rûnꞌ nikaj su̱n Ma̱ꞌân rèꞌ yàtàꞌa.
11 Ni̱ rachrún ya nej ñûnj daranꞌ nej guiì, ni̱ ri̱ki̱ Ma̱ꞌân rèꞌ ya̱ nej ñûnj hia̱j.
12 Ni̱ gi̱nikaj Ma̱ꞌân rèꞌ nimân nìko rayiꞌî nej gakï̱nꞌ giꞌhiaj nej ñûnj riñan Ma̱ꞌân rèꞌ, dàj rûnꞌ ginikaj nej ñûnj nimân nìko rayiꞌî nej sí giꞌhiaj gakï̱nꞌïn riñan nej ñûnj.
13 Ni̱ si̱ gaꞌnḯn raꞌa Ma̱ꞌân rèꞌ si gi̱ni̱nj nej ñûnj riñan gakï̱nꞌïn nga duguaneꞌ sichre riñan nej ñûnj, ni̱ gi̱ꞌhiaj Ma̱ꞌân rèꞌ si ga̱na̱ni̱n nej ñûnj riñan nej sa aꞌnanꞌan.
Dadinꞌ huê Ma̱ꞌân rèꞌ huin sa ni̱ka̱j su̱n ni̱ Ma̱ꞌân rèꞌ huin sa nùkuaj, ni̱ sa nìko ni̱ huê Ma̱ꞌan rèꞌ huin daranꞌ diû. Ni̱ huê dan huin rûꞌhuaj.
14 ’Dadinꞌ si gi̱nikaj nej suj nimân nìko ngà nej guiì gachîn nuguanꞌan riñan nej suj, ni̱ gi̱nikaj Ma̱ꞌan Ñaꞌanj an nimân nìko rayiꞌî nej si-ga̱kïnꞌ nej suj;
15 sani̱ sisi̱ si̱ gi̱nikaj nej suj nimân nìko rayiꞌî nej guiì gachîn nuguanꞌan riñan nej suj, ni̱ si̱ ginikaj Ma̱ꞌan Ñaꞌanj an nimân nìko rayiꞌî nej si-ga̱kïnꞌ nej suj mánj.
Gidigân Ma̱ꞌan Jesús dàj giꞌhiôꞌ nga ruhuôꞌ ga̱ gi̱ni̱ne̱ꞌ
16 ’Nga ga gi̱ni̱ne̱j nej suj ni̱ si̱ nagiꞌhiaj àko chre nej suj riñan nej suj, dàj rûnꞌ giꞌhiaj nej sí gidigañuꞌunj un; dadinꞌ nda rùguìꞌi chre giꞌhiaj nej sôꞌ riñan nej sôꞌ guendâ gidigân nej sôꞌ riñan nej guiì si hua̱ gi̱ni̱ne̱j nùgui nej sôꞌ, yàngàꞌ tâ ni̱ gàꞌ gaꞌmin hueꞌê nej guiì rayiꞌî sa giꞌhiaj nej sôꞌ.
17 Sani̱ sòꞌ ni̱ nga hua gi̱ni̱ne̱jꞌ, ni̱ gu̱ta̱ nnee ahuît ni̱ gànànꞌ raj.
18 Daꞌnga ni̱ si̱ giniꞌin nej guiì si hua̱ gi̱ni̱ne̱j, dadinꞌ gàꞌ niꞌin Ma̱ꞌan Rêt nne ñan hua̱ huìi si hua̱ gi̱ni̱ne̱j; ni̱ Ma̱ꞌan niꞌin sa hua̱ huì giꞌhiâꞌ ni̱ gi̱ri̱kij sa gachínꞌ gi̱ni̱ꞌin nej guiì rìgì na̱nj ánj.
Sa du̱ꞌhue̱ ga̱ riñunꞌ yàtàꞌa
19 ’Ni̱ si̱ giꞌhiaj nej suj si ga̱ gàꞌì nej rasu̱n du̱ꞌhue̱e riñan nej suj riñan hioꞌó nânj, dadinꞌ màn nej yahuì lij ni̱ ya̱ nej xuj ni̱ gànùn dakïn hio nej agaꞌ dânj ni̱ gi̱rë̱ꞌëj, dadinꞌ màn nej sí tu̱u ni̱ ga̱na̱hui gi̱ꞌhiaj tu̱ nej sôꞌ;
20 ni̱ gi̱ꞌhiaj nej suj si neꞌ yàtàꞌa ni̱ ga̱huin nìko nej rasu̱un, ñan nitaj si màn nej yahuì lij ni̱ nitaj si huaj ya̱ dakïn hio ni̱ gu̱du̱rëꞌëj nej rasu̱n dânj, ni̱ nitaj si huaj ga̱na̱hui gi̱ꞌhiaj tu̱ nej sí tu̱u.
21 Dadinꞌ ñan gimàn nej rasu̱n huin siꞌhiaj nej suj, ni̱ ûta nìhiàꞌ ga̱ ruhuâ nej suj niꞌin nej suj nej rasu̱n dânj.
Rune ñunꞌ huin sa dugu̱n riñan nneè kút
22 ’Sa gudugùn riñan nneè kuꞌ huin rune ñunꞌ; huê danj ni̱ si rune ñunꞌ huin sa sàꞌa, hiôꞌ ni̱ nï̀nꞌ gàchràꞌ nneè kúꞌ hua giyigï̀n;
23 sani̱ si rune ñanꞌ huin sa kï̱j huaa, hiôꞌ ni̱ nï̀nꞌ gàꞌchràꞌ nneè kút hua gakï̱nꞌïn. Huê danj ni̱, si rune ñanꞌ huin sa ru̱mi̱nꞌin huê danj ni̱ hua̱ ru̱mi̱nꞌ nneè kút, ni̱ yàngàꞌ ni̱ ûta hua gakï̱nꞌïn ruhuâ nimânt.
Gàꞌ si ꞌngo̱ síi si̱ gaꞌhue giꞌnïnj gi̱ꞌhiaj sun riñan huìj síi mánj
24 ’Gàꞌ si ꞌngo̱ síi si̱ gaꞌhue gu̱na̱nj gi̱tsi riñan huìj yiruꞌhuee; dadinꞌ gi̱ni̱nj ꞌì ꞌngo̱ sôꞌ riñan sij ni̱ ga̱ ꞌì ruhuâ sij niꞌin sij aꞌngô sôꞌ, ni̱ gi̱ni̱nj hueꞌê ꞌngo̱ sôꞌ riñan sij ni̱ aꞌngô sôꞌ gi̱ni̱nj aꞌnanꞌ riñan sij. Huê danj ni̱ si̱ gaꞌhue gu̱na̱nj gitsî nej suj riñan Ma̱ꞌan Ñaꞌanj an si ûta ganahuij ruhuâ nej suj guendâ ga̱ yi̱ruꞌhue nej suj mánj.
Ûta huin ruhuâ ga̱ doj rasu̱un riñan
25 ’Huê danj ni̱ gatâ gu̱nïn nej suj: Ni̱ si̱ ganahuij staꞌu ruhuâ nej suj rayiꞌî sa ga̱ riñan nej suj, sa ya̱ nej suj ni̱ sa go̱ꞌo̱ nej suj; ni̱ si̱ ganahuij ruhuâ nej suj rayiꞌî nej atsîj garán nej suj nneè kú nej suj, ni̱ sê dànanj du̱ꞌhue̱ doj sa ga̱ nìꞌnàꞌ nej suj gàꞌ daꞌ sa ya̱ nej suj ni̱ sê dànanj du̱ꞌhue̱ doj nneè kú nej suj gàꞌ daꞌ siganꞌ nej suj ràꞌ saj ûnꞌ.
26 Gi̱ni̱ꞌhiaj nej suj dàj giꞌhiaj nej yataj aché yàtàꞌa, dadinꞌ nitaj si gunun nej xuj, ni̱ nitaj si ganaranꞌ nej xuj, ni̱ nitaj si ganachra sàꞌ nej xuj ruhuâ guchrùu sa ya̱ nej xuj; sani̱ Ma̱ꞌan Rej nej suj Ma̱ꞌan Ñaꞌanj nne yàtàꞌa gaꞌhuiꞌ yâ nej xuj. Ni̱ sê dànanj du̱ꞌhue̱ nej suj doj gàꞌ daꞌ nej xuj ràꞌ saj ûnꞌ.
27 Ni̱ ahuin goꞌngo̱ nej suj ga̱ꞌhue gi̱ꞌhiaj, ni̱ nùnj huin si ûta ga̱huin ruhuâ nej suj, ni̱ ga̱ꞌhue gùnùtàꞌ nej suj ni̱ ga̱chi̱j nej suj aꞌngô dane na̱nj nîꞌ.
28 ’Ni̱ nùnj huin saj ni̱ ûta huin ruhuâ nej suj rayiꞌî siganꞌ nej suj ràꞌaj. Na̱di̱giꞌñun nej suj dàj giꞌhiaj hiaj lirio màn riñan hioꞌóo, nga gachi: Ni̱ nitaj si giꞌhiaj sunj ni̱ nitaj si ganan atsìj i mánj;
29 Sani̱ ñùnj taj, ni̱ gàꞌ Salomón ngà daranꞌ nej sa du̱ꞌhue̱ xi ga riñan sôꞌ ni̱ nun gànàsìj sôꞌ gi̱nun sôꞌ ꞌngo̱ atsîj sàꞌ doj gàꞌ daꞌ nej hiaj nânj mánj.
30 Ni̱ si dànanj nìhiàꞌ hua nej hiaj màn raa̱ nej koj màn riñan hioꞌó ni̱ si hia̱j hua nìꞌnaj ni̱ aꞌhioj gàꞌnï̀nj nej sôꞌ ruhuâ guchrúun, ni̱ Ma̱ꞌan Ñaꞌanj an huin sa gi̱ꞌhiaj ni̱ gìrìꞌ nej suj atsîj i gi̱nun nej suj, sani̱ nùnj huin saj ni̱ do̱j nï̀nꞌ guyumân ruhuâ nej suj ràꞌaj.
31 Ni̱ si̱ gahuin staꞌu ruhuâ nej suj, ni̱ ga̱ta̱j nej suj: “Nùnj huin sa yo̱ꞌ ni̱ nùnj huin sa go̱ꞌo̱ꞌ, ni̱ dànèꞌ gìrìꞌ atsîj i gi̱nunꞌ ràꞌaj.”
32 Dadinꞌ nej sí nàsìnùnj un ni̱ ûta ganahuij ruhuâ nej sôꞌ si ga̱ daranꞌ nej rasu̱un riñan nej sôꞌ; sani̱ nej suj ni̱ hua̱ Rej nej suj Ma̱ꞌan Ñaꞌanj an nne yàtàꞌa ni̱ gàꞌ niꞌin sa ga̱chin riñan nej suj na̱nj ánj.
33 Sani̱ nànàꞌhuìꞌ si̱nï̱n nej suj Ma̱ꞌan Ñaꞌanj an ni̱ gi̱ꞌhiaj nej suj sa ni̱ka̱a, ni̱ riki Ma̱ꞌan Ñaꞌanj an daranꞌ nej rasu̱n ga̱chin riñan nej suj.
34 Huê danj ni̱ si̱ giriñun ruhuâ nej suj nùnj huin sa ga̱chin riñan nej suj gui aꞌhioj, dadinꞌ gui aꞌhioj ni̱ ûta ga̱ sa ga̱nï̱n ruhuâ nej suj. Ni̱ daꞌ goꞌngo̱ gui ni̱ ga̱ꞌna̱ꞌ sa aꞌnanꞌan nej sij ga̱ꞌna̱ꞌ sa sàꞌa riñan nej suj na̱nj ánj.