Nuguanꞌ rán aꞌmin rayiꞌî sí nun gi̱nikaj sun hueꞌê riñan si-yi̱ruꞌhue
16
Ni̱ huê danj na̱nj gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
—ꞌNgo̱ sí dânj ni̱ sí yi̱ruꞌhue huin sôꞌ ni̱ hua̱ ꞌngo̱ sí ni̱ka̱j ñuꞌunj dukuâ sôꞌ,
ni̱ garânj ruhuâ nej guiì rayiꞌî sí dugumîn dukuâ sí yi̱ruꞌhue dânj guendâ garânj sun yìkòj ruhuâ nï̀nꞌ sôꞌ siꞌhiaj yiruꞌhue dânj.
2 Hiôꞌ ni̱ gakḯn sí yi̱ruꞌhue dânj sí ginikaj su̱n riñan siꞌhiaj sôꞌ,
ni̱ gataj sôꞌ gu̱nïn sí nânj:
“Nùnj huin saj ni̱ gunḯn dànanj rayiꞌîꞌ ràꞌaj.
Na̱ri̱ki̱ sòꞌ guenda dàj dugumînꞌ nej siꞌhiâ aj nḯnj,
dadinꞌ si̱ ga̱ꞌhue gi̱nikaj su̱nꞌ riñânj nej siꞌhiâ gàꞌ mánj.”
3 Hiôꞌ ni̱ gataj sí dânj gu̱nïn ma̱ꞌan sôꞌ:
“Nùnj huin si gi̱ꞌhia hia̱j ràꞌaj.
Dadinꞌ ga̱ꞌne̱ si-yi̱ruꞌhuej suun raꞌá,
ni̱ si̱ gaꞌhue ga̱n hiuꞌuj u,
dadinꞌ nitaj guesâj,
ni̱ si gachîn karida,
dadinꞌ ûta sinàꞌàj huin riñanj na̱nj ánj.
4 Gàꞌ niꞌín nùnj huin si gi̱ꞌhia nga gi̱yi̱ꞌne̱ suun raꞌá,
ôꞌ ni̱ ga̱na̱huin ra̱ꞌa nej guiì ñùnj ni̱ gané dukuâ ninj.”
5 Ni̱ ganakḯn sí dânj daꞌ goꞌngo̱ nej sí daꞌhui riñan si-yi̱ruꞌhue sôꞌ,
ni̱ gataj sôꞌ gu̱nïn sí si̱nï̱n dânj:
“Andaj daꞌhuîꞌ riñan si-yi̱ruꞌhuej ràꞌaj.”
6 Ni̱ gataj sí dânj:
“ꞌNgo̱ sientu barril gasîti daꞌhuí.”
Ni̱ gataj sí ni̱ka̱j ñuꞌunj dânj:
“Hio ga̱ꞌa̱nj ga̱ne sòꞌ ni̱ ga̱chru̱nꞌ riñan ñanj giꞌhiaj yìtï̀nj dadinꞌ na̱ruꞌhueꞌ man huìj xia chi̱ꞌ barril.”
7 Neꞌ rùkù ni̱ gataj sí ni̱ka̱j ñuꞌunj dânj gu̱nïn aꞌngô musu:
“Andaj daꞌhuîꞌ riñan si-yi̱ruꞌhuej ràꞌaj.”
Ni̱ gataj sí dânj:
ꞌNgo̱ siêntu nnanj hiaꞌ trigu daꞌhuí.
Ni̱ gataj sí ni̱ka̱j ñuꞌunj dânj:
“Hio ga̱ꞌa̱nj ga̱ne sòꞌ ni̱ ga̱chru̱nꞌ riñan ñanj giꞌhiaj yìtï̀nj dadinꞌ ga̱na̱ruꞌhueꞌ man ga̱ꞌa̱nj xia nnanj hiaꞌa na̱nj ánj.”
8 Ni̱ gaꞌmin hueꞌê si-yi̱ruꞌhue sí musu aꞌnanꞌ nânj rayiꞌî sôꞌ guendâ ûta hueꞌê nadigiꞌñûn sôꞌ sa giꞌhiaj sôꞌ.
Dadinꞌ nej sí nun niꞌin si-nùguànꞌ Ma̱ꞌan Ñaꞌanj an,
ni̱ dànanj ûta sàꞌ nadigiꞌñûn nej sôꞌ dàj gi̱ꞌhiaj sun nej sôꞌ ni̱ dàj guruguñuꞌunj nej sôꞌ aꞌngô nej guiì,
gàꞌ daꞌ nej sí niꞌin si-nùguànꞌ Ma̱ꞌan Ñaꞌanj an.
9 ’Ñùnj taj:
Ni̱ gu̱ru̱gûñuꞌunj nej suj sa ga̱chin riñan nej guiì ni̱ ginikaj duguiꞌ ninj ngà nej suj,
ni̱ gi̱nikaj duguiꞌ nìgànj ninj ngà nej suj ñan gi̱nikaj su̱n Ma̱ꞌan Ñaꞌanj an na̱nj ánj.
10 ’Ni̱ guiì ganahuin ra̱ꞌa do̱j ni̱ ûta hueꞌê dugumîn ninj sa ga̱na̱huin ra̱ꞌa ninj,
ni̱ si ga̱na̱huin ra̱ꞌa ninj nìko doj ni̱ huê danj na̱nj ûta hueꞌê gu̱du̱gumîn ninj sa ga̱na̱huin ra̱ꞌa ninj;
ni̱ guiì ganahuin ra̱ꞌa do̱j sani̱ nun ga̱ꞌhue gu̱du̱gumîn ninj,
ni̱ si̱ ganahuin ra̱ꞌa ninj nìko doj ni̱ gàꞌ danj ni̱ si̱ ga̱ꞌhue gu̱du̱gumîn ninj mánj.
11 Hiôꞌ ni̱ si ganahuin ra̱ꞌa nej suj ûta gàꞌì nej rasu̱un ni̱ hua̱ yi̱ruꞌhue nej suj sani̱ nun ga̱ꞌhue ga̱huin chru̱n nej suj dàj gudugumîn hueꞌê nej suj nej rasu̱n dânj.
Ni̱ ahuin sí gùyùmàn ruhuâ niꞌin nej suj ni̱ du̱guta su̱n sôꞌ rasu̱n yàngàꞌa riñan nej suj ràꞌaj.
12 Ni̱ si nun ga̱ꞌhue du̱gumîn hueꞌê nej suj nej rasu̱n ânèj e,
ni̱ ga̱ꞌhue ri̱ki̱ Ma̱ꞌan Ñaꞌanj an nej rasu̱n ga̱huin si̱ꞌhiaj nej suj na̱nj nîꞌ.
13 ’Gàꞌ si ꞌngo̱ mûsu si̱ ga̱ꞌhue gi̱ꞌhiaj su̱n riñan huìj yiruꞌhuee mánj:
Dadinꞌ gi̱ni̱nj ꞌì ꞌngo̱ yiruꞌhue riñan sôꞌ ni̱ ga̱ ꞌì doj ruhuâ sôꞌ niꞌin sôꞌ aꞌngô yiruꞌhuee,
nej si ûta gi̱ni̱nj hueꞌê ꞌngo̱ yiruꞌhue riñan sôꞌ,
nej sij ûta aꞌnanꞌ gi̱ni̱nj aꞌngô yiruꞌhue dânj riñan sôꞌ.
Huê danj ni̱ ga̱na̱gui̱ nej suj ahuin goꞌngo̱ sa ri̱ña̱n da̱gahuin nej suj,
si riñan Ma̱ꞌan Ñaꞌanj an nîꞌ,
si riñan nej rasu̱n gi̱ꞌhiaj ga̱huin yi̱ruꞌhue nej suj na̱nj ánj.
14 Ni̱ gunïn nej sí fariseo,
gàꞌ ûta huaj riñan,
ni̱ ûta ga̱ꞌmi̱n duku nej sôꞌ riñan Ma̱ꞌan Jesús.
15 Hiôꞌ ni̱ gataj Ma̱ꞌan Jesús:
—Ûta giꞌhiaj nej suj si huin nej suj sí giꞌhiaj sa ni̱ka̱a riñan nej guiì;
sani̱ Ma̱ꞌan Ñaꞌanj an huin sa niꞌin sàꞌ dàj hua ruhuâ nimân nej suj,
dadinꞌ nej sa ganï̂n ruhuâ nej guiì si huin sa ña̱ꞌa̱n doj riñan ninj,
ni̱ riñan Ma̱ꞌan Ñaꞌanj an ni̱ huin sa kï̱j huaa.
Ley ganahuin ra̱ꞌa Moisés rayiꞌî nej sa gaꞌhuiꞌ nej israelita riñan Ma̱ꞌan Ñaꞌanj an ngà nuguanꞌ gi̱ꞌhiaj ga̱na̱ni̱n nej guiì
16 ’Ley ganahuin ra̱ꞌa Moisés rayiꞌî nej sa gaꞌhuiꞌ nej guiì riñan Ma̱ꞌan Ñaꞌanj an ngà nej nuguanꞌ gaꞌmin nej sôꞌ gataj dàj ga̱huin guyumân nda diû gane Juan Bautista;
àsìj diû dânj gayiꞌì nej sij gaꞌmin nej sij nuguanꞌ gi̱ꞌhiaj ga̱na̱ni̱n nej guiì ni̱ duyingaꞌ nej sij nï̀nꞌ gàchràꞌ ruhuâ yumiguìi si-nùguànꞌ Ma̱ꞌan Ñaꞌanj an,
ni̱ daranꞌ nej guiì giꞌhiaj guesâ ga̱tu̱ ninj ñan gi̱nikaj su̱n Ma̱ꞌan Ñaꞌanj an.
17 ’Sani̱ dànanj nitaj si chìꞌ hua̱j si ga̱na̱huij yàtàꞌa ngà hioꞌóo,
gàꞌ daꞌ si ga̱chi̱n ꞌngo̱ letra hua̱ lij ꞌna̱ꞌ riñan si-nùguànꞌ Ma̱ꞌan Ñaꞌanj an na̱nj ánj.
Gidigân Ma̱ꞌan Jesús rayiꞌî ñanj ganachi nikaj nga gudunâj nej guiì nika ninj
18 ’Daranꞌ sí gudunâj ni̱ka̱,
ni̱ ganachi nikaj ñanj acta guendâ gu̱dunâj duguiꞌ nguèj nika sôꞌ ni̱ garan ra̱ꞌa ñûn sôꞌ ngà aꞌngô siyànàa,
ni̱ gininj sôꞌ riñan gakï̱nꞌ ni̱ka̱j ni̱ka̱ duguiꞌ;
ni̱ sí ganakaj siyànà gunâj dânj ni̱ gininj sôꞌ riñan gakï̱nꞌ ni̱ka̱j ni̱ka̱ duguiꞌ guendâ ga̱ra̱n ra̱ꞌa sôꞌ ngà siyànà gàꞌ garan ra̱ꞌa.
Sí yi̱ruꞌhuee ni̱ Lázaro
19 ’Ga ꞌngo̱ sí yi̱ruꞌhuee,
ni̱ ginun sôꞌ ꞌngo̱ aꞌtsîj sàꞌ xi ni̱ ûta nìhiàꞌ hua aꞌtsîj dânj,
ni̱ daꞌ goꞌngo̱ gui ni̱ giꞌhiaj sôꞌ ꞌngo̱ nihia sàꞌ xi yâ sôꞌ.
20 Huê danj na̱nj ga ꞌngo̱ síchìj gùꞌnàj Lázaro ni̱ sí ran àko huin sôꞌ,
ni̱ nngaj sôꞌ riñan dukuâ sí yi̱ruꞌhue dânj,
ni̱ ûta mân siki nï̀nꞌ gàchràꞌ nnïnj sôꞌ.
21 Ni̱ ûta huin ruhuâ sôꞌ ya̱ sôꞌ ni̱ gùnùmàn riki sôꞌ gi̱ꞌhiaj nej dasû lij nej rachrún gininj riki si-mesa sí yi̱ruꞌhue dânj;
sani̱ gaꞌnaꞌ nej yuhue ni̱ ganahuî hia nej yôꞌ riñan siki màn nnïnj síchìj dânj.
22 ꞌNgo̱ gui dânj ni̱ gahuiꞌ sí gànìki nânj,
ni̱ gaꞌnaꞌ ga̱na̱ka̱j nej ángel ni̱ ginikaj ninj gaꞌanj ninj ñan nne sachij Abraham síchìj nânj;
ni̱ huê danj na̱nj gahuiꞌ síchìj yi̱ruꞌhue nânj,
ni̱ gaꞌanj gàchìnꞌ nej sij sôꞌ.
23 Ni̱ ruhuâ rúnâko nne sôꞌ ni̱ ûta giranꞌ sa̱ñu̱n sôꞌ huê danj ni̱ ganachinikaj ñan sôꞌ,
ni̱ giniꞌin sôꞌ si nda ga̱nꞌ nne sachij Abraham,
ni̱ hiuj danj nne Lázaro.
24 Hiôꞌ ni̱ gaꞌmin síchìj yi̱ruꞌhue dânj,
ni̱ gaguâj nùkuaj sôꞌ ni̱ gataj sôꞌ:
“Tâj Abraham,
ga̱na̱nï̱n àko ruhuâ rèꞌ rayiꞌî,
ni̱ giꞌhiá rèꞌ si̱ du̱nuchre Lázaro ra dë̂j raꞌa sij ruhuâ nnee ni̱ ga̱ꞌna̱ꞌ du̱nuchre sij hiâj;
dadinꞌ ûta akâj nné riñan ñaꞌaan nânj.”
25 Sani̱ gataj sachij Abraham:
“Daꞌninj,
ga̱na̱nun ruhuâ sòꞌ dadinꞌ nga ganêꞌ riñan hioꞌóo ni̱ ûta ga nej rasu̱un riñanꞌ ni̱ ûta hueꞌê ga ganêꞌ,
sani̱ Lázaro ni̱ ûta giranꞌ sa̱ñu̱n sôꞌ nga gane sôꞌ riñan hioꞌóo;
sani̱ hia̱j ni̱ ûta hua nìhiàꞌ ruhuâ sôꞌ nne sôꞌ hiuj nânj,
sani̱ sòꞌ ni̱ ûta akaꞌ nnêꞌ hiuj dânj.
26 Sani̱ aꞌngô sa huaj huin si nu̱n ꞌngo̱ yiné gùnùn xi siganï̂nj nêꞌ,
ni̱ si hua̱ ꞌngo̱ sí màn neꞌ dànanj ga̱nïn ruhuâ gùchìꞌ neꞌ danj ni̱ nitaj dàj gaj ga̱ꞌhue gùchìꞌ sôꞌ mánj,
ni̱ huê danj na̱nj si hua̱ ꞌngo̱ nej sí màn neꞌ danj ga̱nï̱n ruhuâ ga̱ꞌna̱ꞌ neꞌ dànanj ni̱ si̱ gaꞌhue ga̱chi̱n sôꞌ ga̱ꞌna̱ꞌ sôꞌ mánj.”
27 Hiôꞌ ni̱ gataj sí yi̱ruꞌhue dânj:
“Gachín ni̱ꞌhia riñanꞌ na̱nj tâꞌ,
ni̱ gàꞌnï̀nj rèꞌ ga̱ꞌa̱nj Lázaro dukuâ rê,
28 dadinꞌ hua̱ ùnꞌùn dinï̂n ni̱ ruhuâj si gànàtàꞌ sôꞌ riñan nej sij,
daꞌnga ni̱ si̱ gaꞌnaꞌ nej sij hiuj nânj dadinꞌ ûta sa̱ñu̱n hua hiuj nânj.”
29 Ni̱ gataj sachij Abraham:
“Gàꞌ ni̱ka̱j nej sij si-nùguànꞌ Moisés ngà si-nùguànꞌ nej sôꞌ gataj dàj ga̱huin,
ni̱ gu̱nïn nej sij si-nùguànꞌ nej sôꞌ.”
30 Hiôꞌ ni̱ gataj sí yi̱ruꞌhue dânj:
“Sê danj huin man tâꞌ Abrahamꞌ;
dadinꞌ si gànàꞌnï̀nj goꞌngo̱ nej sí gàꞌ gahuiꞌi ni̱ ga̱ꞌa̱nj nej sôꞌ ña̱n màn nej sij,
ni̱ gànànìkàj ruhuâ nej sij rayiꞌî si-ga̱kïnꞌ nej sij na̱nj ánj.”
31 Sani̱ gataj sachij Abraham:
“Sani̱ si nun gu̱nïn nej sij nej nuguanꞌ gaꞌmin Moisés ngà nej sôꞌ gataj dàj ga̱huin,
ni̱ gàꞌ dânj ni̱ si̱ guyumân ruhuâ nej sij nùnj huin si ga̱ꞌa̱nj ꞌngo̱ sí ganaꞌnï̂nj siganï̂nj nej nîman ñan màn nej sij mánj.”