Nuguanꞌ rán aꞌmin rayiꞌî matsïj gaꞌanj ni̱ꞌhia̱a
15
Ni̱ gaꞌnaꞌ nichì daranꞌ nej sí gaꞌnêj sanꞌanj an ngà nej sí gakï̱nꞌïn riñan Ma̱ꞌan Jesús guendâ ruhuâ nej sôꞌ gu̱nïn nej sôꞌ nuguanꞌ ga̱ꞌmi̱n.
2 Ni̱ gaꞌmin nej sí fariseo ngà nej sí chru̱n ley rayiꞌî Ma̱ꞌan Jesús,
ni̱ gataj nej sôꞌ:
—Ganahuin ra̱ꞌa sí nânj nej sí gakï̱nꞌïn,
ni̱ yâ sôꞌ ngà nej sí dânj.
3 Hiôꞌ ni̱ gaꞌmin Ma̱ꞌan Jesús ꞌngo̱ nuguanꞌ ráan,
ni̱ gata:
4 —Ahuin goꞌngo̱ nej suj,
ni̱ si ni̱ka̱j nej suj ꞌngo̱ sientu matsïj ï,
ni̱ si gaꞌanj ni̱ꞌhia ꞌngo̱ yôꞌ,
ni̱ si̱ gudunâj nej suj ga̱ꞌânj xia yi̱nu̱nꞌ ga̱ꞌânj nej matsïj dânj riñan hioꞌó hua̱ niꞌnï̀nj ïn,
ni̱ ga̱ꞌanj nanaꞌhuiꞌ nej suj yuku gaꞌanj ni̱ꞌhia dânj,
ni̱ sê nda gànàrìꞌ nej suj yuku dânj ni̱ gahuin hia ruhuâ nej suj ràꞌ saj ûnꞌ.
5 Ni̱ nga ganariꞌ sôꞌ matsïj gaꞌanj ni̱ꞌhia dânj,
ni̱ gutaꞌ sôꞌ dakan yikó sôꞌ ni̱ ûta ganahuin nìhiàꞌ ruhuâ sôꞌ.
6 Ni̱ nga gunukuiꞌ sôꞌ dukuâ sôꞌ,
ni̱ nagiꞌhiaj chre̱ꞌ sôꞌ nej sí ni̱ka̱j duguiꞌ ngà sôꞌ ni̱ nej sí nne nìchrùnꞌ ña̱n nne sôꞌ,
ni̱ gataj sôꞌ gu̱nïn nej sí dânj:
“Ga̱na̱huin nìhiàꞌ ruhuâ nej suj ngàj,
dadinꞌ ganariꞌí dán matsïj gaꞌanj ni̱ꞌhia.”
7 Huê danj tâ ni̱ dànanj ûta ganahuin nìhiàꞌ ruhuâ nej sôꞌ màn yàtàꞌa nga nanikàj ruhuâ ꞌngo̱ síi rayiꞌî si-ga̱kïnꞌ sôꞌ,
gàꞌ daꞌ ga̱ꞌânj xia yi̱nu̱nꞌ ga̱ꞌânj nej sí giꞌhiaj sa sàꞌaj dadinꞌ nitaj si ꞌhiaj nej sôꞌ nànìkàj ruhuâ nej sôꞌ dadinꞌ nitaj gakï̱nꞌïn ata nej sôꞌ.
Nuguanꞌ rán aꞌmin rayiꞌî sanꞌanj gaꞌanj ni̱ꞌhia̱a
8 ’Gi̱ꞌhioꞌ guenda si ꞌngo̱ siyànà dânj nikaj chi̱ꞌ sanꞌanj huin plata,
ni̱ gaꞌanj ni̱ꞌhia ꞌngo̱ rïn saꞌanj dânj,
ni̱ sê ga̱na̱chru̱nj ñaꞌan gudugùun,
ni̱ gànàkaj ruhuâ hueꞌe,
ni̱ nànàꞌhuìj nda gu̱dadû chre nda gànàrìꞌìj saꞌanj dânj ràꞌ saj ûnꞌ.
9 Ni̱ nga ganariꞌij saꞌanj dânj,
ni̱ na̱gi̱ꞌhia̱j chrej nej siyànà ni̱ka̱j duguiꞌ nngaj ni̱ nej siyànà nne nìchrùnꞌ ña̱n nne,
ni̱ gata gu̱nïn nej siyànà dânj:
“Ga̱na̱huin nìhiàꞌ ruhuâ nej suj ngàj,
dadinꞌ ganariꞌí saꞌanj gaꞌanj ni̱ꞌhia̱a.”
10 Huê danj tâ ni̱ ga̱na̱huin nìhiàꞌ ruhuâ nej ángel màn ña̱n nne Ma̱ꞌan Ñaꞌanj an nga gananikàj ruhuâ ꞌngo̱ síi rayiꞌî si-ga̱kïnꞌ sôꞌ.
Nuguanꞌ rán aꞌmin rayiꞌî sí dugu̱ꞌna gutïnꞌ si-sanꞌanj
11 Huê danj na̱nj gataj Ma̱ꞌan Jesús:
—ꞌNgo̱ sí dânj ni̱ hua̱ huìj daꞌnin naꞌu sôꞌ;
12 Ni̱ gataj sí hua̱ lij doj dânj gu̱nïn rej sôꞌ:
“Tâj,
na̱ri̱ki̱ sòꞌ nej rasu̱n daꞌhuí ga̱na̱huin raꞌá.”
Huê danj ni̱ gunuchraꞌ da̱ꞌa̱j síchìj dânj nej rasu̱un ni̱ gaꞌhuiꞌ sôꞌ raꞌa daꞌní sôꞌ.
13 Ni̱ nun ga̱chi̱n gàꞌì gui,
ni̱ ganaranꞌ sí hua̱ lij dânj daranꞌ nej rasu̱n huin siꞌhiaj sôꞌ;
huê danj ni̱ gaꞌanj ga̱nꞌ sôꞌ aꞌngô yumanꞌan;
ni̱ hiuj dânj dunahuij nï̀nꞌ sôꞌ daranꞌ nej sa ganahuin ra̱ꞌa sôꞌ,
ni̱ giꞌhiaj sôꞌ dàj garanꞌ ruhuâ sôꞌ ni̱ gudurëꞌ nï̀nꞌ sôꞌ ma̱ꞌan sôꞌ riñan nej gakï̱nꞌïn.
14 Ni̱ nga ganahuij nï̀nꞌ daranꞌ si-sa̱nꞌa̱nj sôꞌ giꞌhiaj sôꞌ,
hiôꞌ ni̱ guyumân ꞌngo̱ diû yi̱ꞌna̱a riñan yumanꞌ ñan ga̱ꞌanj sôꞌ,
huê danj ni̱ gayi̱ꞌij ni̱ gachin sa ya̱ sôꞌ.
15 Ni̱ gaꞌanj nànàꞌhuìꞌ sô suun riñan ꞌngo̱ sí nne ruhuâ yumanꞌ dânj,
ni̱ gaꞌnḯn sí dânj gaꞌanj sôꞌ si-ranchû sí dânj,
guendâ du̱gumîn sôꞌ nej yaká huin dân sí yi̱ruꞌhue dânj.
16 Ni̱ ûta huin ruhuâ sôꞌ ya̱ sôꞌ sa yâ nej yakáa guendâ ruhuâ sôꞌ ga̱huin ran riki sôꞌ,
sani̱ nitaj gàꞌ si̱ ꞌngo̱ sí gàꞌhuìꞌ sa ya̱ sôꞌ.
17 Huê danj ni̱ gananun ruhuâ sôꞌ niꞌin sôꞌ rej sôꞌ ni̱ gataj sôꞌ gu̱nïn ma̱ꞌan sôꞌ:
“Ûta gàꞌì nej sí giꞌhiaj suun mân dukuâ rê ni̱ nitaj sa gàchin ya̱ nej sôꞌ,
ni̱ ñùnj nne hiuj nânj ni̱ ûta ganachinj yiꞌnaa rikí rûꞌhuaj na̱nj ánj.
18 Gànàyùmànj ni̱ nàꞌànj ña̱n nne rê ni̱ gàtà gu̱nïn sôꞌ:
Tâj,
giꞌhia gakï̱nꞌïn riñan Ma̱ꞌan Ña̱ꞌa̱nj nne yàtàꞌa,
ni̱ huê danj na̱nj giꞌhia gakï̱nꞌïn riñan ma̱ꞌân rèꞌ.
19 Nitaj guèndàj si ga̱ta̱j rèꞌ si huín daꞌní rèꞌ gàꞌ mánj;
gi̱ꞌhia rèꞌ si ga̱huin dàj rûn huin goꞌngo̱ nej musû ꞌnï̀nj giꞌhiaj sun riñan rèꞌ.”
20 Ni̱ ganayumàn sí dânj,
ni̱ nanꞌ sôꞌ ña̱n nne rej sôꞌ.
’Ni̱ nga nï̀nꞌ nikïnꞌ sôꞌ nda ga̱nꞌ,
ni̱ giniꞌin rej sôꞌ si ni̱kï̱nꞌ sôꞌ hiuj dânj,
ni̱ gananï̂n àko ruhuâ sôꞌ niꞌin sôꞌ sí dânj,
ni̱ gunânj sôꞌ gaꞌanj sôꞌ ñan ni̱kï̱nꞌ sí dânj,
ni̱ ganana̱n sôꞌ yihiâ sí dânj,
ni̱ gaꞌhuiꞌ sôꞌ ruꞌu yiꞌnḯn riñan sí nânj.
21 Ni̱ gataj sí dânj gu̱nïn rej sôꞌ:
“Taj,
giꞌhia gakï̱nꞌïn riñan Ma̱ꞌan Ña̱ꞌa̱nj nne yàtàꞌa ni̱ huê danj na̱nj giꞌhia gakï̱nꞌïn riñan rèꞌ,
ni̱ nitaj guèndàj si̱ ga̱ta̱j rèꞌ si huín daꞌní rèꞌ gàꞌ mánj.”
22 Sani̱ gataj rej sí dânj gu̱nïn nej si-musû sôꞌ:
“Gi̱ri̱ nej suj atsîj hua̱ sàꞌ doj,
ni̱ gàꞌhuìꞌ nej suj gi̱nun sij;
ni̱ gàꞌnï̀nj nej suj ꞌngo̱ seꞌej e dë̂j raꞌa sij,
ni̱ gàꞌhuìꞌ nej suj ganïnj ga̱na̱chri̱ sij dakó sij.
23 Ni̱ gi̱nikaj nej suj rô ganaminj in ga̱ꞌna̱ꞌ nej suj ni̱ da̱gahuiꞌ nej suj rô dânj,
ni̱ yâ nêꞌ ni̱ gahuin giꞌñanj an gimàn nêꞌ;
24 Dadinꞌ daꞌnin naꞌûj ni̱ gahuin sôꞌ dàj rûnꞌ gahuin ꞌngo̱ sí gàꞌ gahuiꞌi,
sani̱ ganahuin nìꞌnàꞌ sôꞌ ni̱ gaꞌanj ni̱ꞌhia sôꞌ,
sani̱ ganariꞌí sôꞌ.”
Huê danj ni̱ gayiꞌì nej sij ni̱ ûta ganahuin nìhiàꞌ ruhuâ nej sij.
25 ’Ni̱ kïj ï ga̱ꞌanj daꞌní síchìj nânj sí achij i;
ni̱ nga gunumân sôꞌ,
ni̱ ꞌna̱ꞌ nìchrùnꞌ sôꞌ ña̱n nne hueꞌe,
ni̱ gunïn sôꞌ si ûta huin chraꞌa ni̱ ûta giranꞌânj nej guiì mân ninj;
26 ni̱ gakḯn sôꞌ ꞌngo̱ nej si-musû sôꞌ ni̱ gachín naꞌanj sôꞌ ni̱ gataj sôꞌ nùnj huin saj ni̱ huin dànanj ràꞌaj.
27 Ni̱ gataj si-musû sôꞌ gu̱nïn sôꞌ:
“Dinï̂nt gunumân;
ni̱ gaꞌnïnꞌ rét suun si da̱gahuiꞌ nej ñûnj rô ganaminj in,
dadinꞌ hua̱ sàꞌ sij ni̱ hua̱ ran sij gunumân sij ganahuin raꞌa rêꞌ.”
28 Hiôꞌ ni̱ ginaꞌan ruhuâ sí dânj,
ni̱ nun ga̱ꞌhue̱j sôꞌ ga̱tu̱ sôꞌ ruhuâ hueꞌe.
Huê danj ni̱ gahui rej sôꞌ neꞌ ye̱ꞌ hueꞌe,
ni̱ gachín nìꞌhiaj síchìj dânj si̱ ga̱tu̱ sôꞌ ruhuâ hueꞌe.
29 Sani̱ nanikàj sí dânj ni̱ gataj sôꞌ gu̱nïn rej sôꞌ:
“Niꞌhiaj sòꞌ dadinꞌ gàꞌ sîj ûta gàꞌì hioꞌo giꞌhiaj sûnj riñanꞌ,
ni̱ nitaj àmàn guduna si ga̱da̱gahuín riñanꞌ,
sani̱ nitaj àmàn girikîꞌ ꞌngo̱ stane lij ni̱ da̱gahuí guendâ gi̱ꞌhia giꞌñanj an ni̱ ga̱na̱huin nìhiàꞌ ruhuâj ngà nej sí ni̱ka̱j duguiꞌ ngàj hua̱j nï̂nj.
30 Sani̱ gunumân daꞌnít,
ni̱ ganahuij nï̀nꞌ si-sa̱nꞌa̱njt gutïnꞌ sij ngà nej siyànà guduꞌhuêj ma̱ꞌan,
ni̱ gaꞌnï̂nꞌ suun si̱ da̱gahuiꞌ nej musu rô ganaminj in ya̱ sij huaj nï̂nj.”
31 Hiôꞌ ni̱ gataj síchìj dânj:
“Da̱ꞌninj,
daranꞌ diû nneꞌ ngàj,
ni̱ daranꞌ nej rasu̱n hua̱ riñânj huin siꞌhiât.
32 Dadinꞌ ña̱ꞌa̱n huaj si giꞌhia ꞌngo̱ giꞌñanj an ni̱ ga̱na̱huin nìhiàꞌ ruhuâ nêꞌ,
dadinꞌ gahuin dinḯnt ꞌngo̱ sí gàꞌ gahuiꞌi,
sani̱ ganaꞌnï̂nj sij;
gaꞌânj ni̱ꞌhia̱ sij,
sani̱ ganariꞌ sij.”