Giꞌhiaj Ma̱ꞌan Jesús ganahuin ꞌngo̱ sí ꞌnïnj yiꞌì guꞌmaan
14
Gahuin ꞌngo̱ gui ganarânj rûhua, ni̱ gatûj Ma̱ꞌan Jesús guendâ yaj dukuâ ꞌngo̱ sí ni̱ka̱j suun, ni̱ huin sôꞌ yiꞌnïnꞌ nej sí fariseo, ni̱ nne aꞌngô da̱ꞌa̱j nej sí fariseo guendâ ga̱ya̱ka̱j guendâ nej sôꞌ sa giꞌhiaj Ma̱ꞌan Jesús.
2 Ni̱ ni̱kï̱nꞌ ꞌngo̱ sí ꞌnï̀nj yiꞌì guꞌmaan riñan Ma̱ꞌan Jesús.
3 Hiôꞌ ni̱ gaꞌmin Ma̱ꞌan Jesús riñan nej sí gidigân si-nùguànꞌ Ma̱ꞌan Ñaꞌanj an ngà riñan nej sí fariseo, ni̱ gata:
—Dùgùnàj hua̱j gi̱ꞌhioꞌ ga̱na̱huin nej guiì aꞌnanꞌan gui ganarânj rûhua ruhuâ nej suj nîꞌ.
4 Sani̱ dḯn ga duꞌhua nej sôꞌ. Ni̱ gidaꞌa Ma̱ꞌan Jesús sí aꞌnanꞌ dânj, ni̱ giꞌhia ganahuin sôꞌ ni̱ ganaꞌnïn nanꞌ sôꞌ dukuâ sôꞌ.
5 Ni̱ ga̱ꞌmi̱n Ma̱ꞌan Jesús riñan nej sí dânj, ni̱ gata:
—Ahuin goꞌngo̱ nej suj ni̱ si dân nej suj urruj u nej si dân nej suj rô gininj ruhuâ ꞌngo̱ hiuꞌuj u, ni̱ si̱ ganari nej suj nda nanè chre yuku dânj, nùnj huin si̱ gui guetànꞌan huin ràꞌ saj ûnꞌ.
6 Ni̱ nun gìrìꞌ nej sij gàꞌ si̱ ꞌngo̱ nuguanꞌan du̱nanikàj nej sij riñan Ma̱ꞌan Jesús mánj.
Nej sí gunïn su̱n ga̱ꞌna̱ꞌ giꞌñanj ñan ga̱ra̱n ràꞌa
7 Ni̱ giniꞌhiaj Ma̱ꞌan Jesús si ganagui nej sí dânj mesa ni̱kï̱nꞌ dukuán neꞌ ña̱an guendâ ga̱ne nej sôꞌ ni̱ gaꞌmin nuguanꞌ ráan ni̱ gata:
8 —Nga gakḯn ꞌngo̱ guiì ga̱ꞌa̱njꞌ ꞌngo̱ giꞌñanj ña̱n ga̱ra̱n ra̱ꞌa ngo̱ síi nga gayakaj sôꞌ nika sôꞌ, ni̱ si̱ gaꞌanj ga̱neꞌ yiꞌnḯn mesa ni̱kï̱nꞌ neꞌ ña̱an mánj, dadinꞌ si nuhuij ni̱ hua̱ aꞌngô sí huin ña̱n doj gàꞌ daꞌ daꞌhui ga̱ne yiꞌnḯn mesa dânj.
9 Ni̱ ga̱ꞌna̱ꞌ sí gakḯn sòꞌ giꞌñanj dânj ni̱ ga̱ta̱j sôꞌ gu̱nïnꞌ: “Gàꞌhuìꞌ sòꞌ yiꞌnḯn mesa dânj ga̱ne sí nânj.” Hiôꞌ ni̱ gìrìꞌ sinàꞌàj a dadinꞌ ga̱na̱chi̱nꞌ nda neꞌ rùkùu ga̱ꞌa̱nj ga̱neꞌ.
10 Sani̱ nga gàkï̀nj ꞌngo̱ guiì ga̱ꞌa̱njꞌ ꞌngo̱ giꞌñanj an, ni̱ ga̱ꞌa̱nj ga̱neꞌ rukû mesa ni̱kï̱nꞌ nda dukuán neꞌ rùkùu, hiôꞌ ni̱ nga gùyùmàn sí gakḯn gaꞌnaꞌ giꞌñanj dânj, ni̱ gataj sôꞌ gu̱nïnꞌ: “Di̱nï̂nj, gu̱hua̱ꞌ ga̱neꞌ neꞌ ña̱an na̱nj ánj.” Hiôꞌ ni̱ ga̱ꞌmi̱n hueꞌê nej guiì nne rukû mesa yiꞌîꞌ.
11 Dadinꞌ ahuin na̱nj sí ganï̂n ruhuâ si ûta huin sôꞌ sí sîj doj gàꞌ daꞌ aꞌngô nej duguiꞌ sôꞌ, ni̱ gi̱ꞌhiaj Ma̱ꞌan Ñaꞌanj an si ga̱huin sôꞌ ꞌngo̱ sí nitaj nùnj ga̱huin riñanj; ni̱ sí gahuin sí ninj chre ni̱ ga̱na̱huin sôꞌ ꞌngo̱ sí gi̱nikaj sun nìko riñan Ma̱ꞌan Ñaꞌanj an.
12 Ni̱ gataj Ma̱ꞌan Jesús gu̱nïn sí giꞌhiaj giꞌñanj dânj:
—Nga ganï̂n ruhuâꞌ gi̱ꞌhiáꞌ ngo̱ nihia nìko nej si ꞌngo̱ nihia ga̱huin stiꞌnï̀ïn, ni̱ si̱ gakḯnꞌ nej sí ni̱ka̱j duguiꞌ ngàꞌ ga̱ꞌna̱ꞌ nej sij, ni̱ si̱ gakḯnꞌ nej dinḯnt, ni̱ si̱ gakḯnꞌ nej duguît, ni̱ si̱ gakḯnꞌ nej sí yi̱ruꞌhue nne nìchrùnꞌ ña̱n neꞌ, dadinꞌ ga̱ꞌhue gi̱ꞌhiaj nej sij nihiaa ni̱ gàkï̀nj nej sij ga̱ꞌa̱nj yâꞌ si-ni̱hia̱ nej sij, ni̱ ga̱na̱huin ra̱ꞌa ñûnꞌ nihia ga̱ꞌhuiꞌ yâ nej sij.
13 Sani̱ nga ruhuâꞌ gi̱ꞌhiaꞌ nihia nìko, ni̱ dùgùnàj hua̱j si̱ gàkï̀nj nej guiì gànìki, nej guiì hua̱ ruꞌu nneè kú, nej guiì aché gòchròj, nej guiì hua̱ go̱ꞌoj rune ña̱n;
14 hiôꞌ ni̱ ga̱na̱huin nìhiàꞌ ruhuâꞌ; dadinꞌ si̱ ga̱ꞌhue gìrìꞌ ninj na̱ri̱ki̱ ninj raꞌâꞌ, sani̱ ga̱na̱huin raꞌâꞌ sa gaꞌhuiꞌ dânj gi̱ꞌhiaj Ma̱ꞌan Ñaꞌanj an nga gànàꞌnï̀nj nej nîman.
Nuguanꞌ rán aꞌmin rayiꞌî nihia stiꞌnï̀ïn
15 Ni̱ gunïn ꞌngo̱ sí nne rukû mesa ngà gaꞌmin Ma̱ꞌan Jesús nej nuguanꞌ nânj, ni̱ gataj sôꞌ gu̱nïn Ma̱ꞌan:
—Ga̱na̱huin nìhiàꞌ ruhuâ nej sí ya̱ rachrúun ña̱n gi̱nikaj su̱n Ma̱ꞌan Ñaꞌanj an.
16 Hiôꞌ ni̱ gataj Ma̱ꞌan Jesús gu̱nïn sí nânj:
—Ni̱ ꞌngo̱ sí dânj giꞌhiaj yu̱gui ꞌngo̱ nihia nìko, ni̱ gakḯn sôꞌ gaꞌnaꞌ ûta gàꞌì nej guiì.
17 Ni̱ nga gisîj orâ gahuin stiꞌnï̀ïn ni̱ gaꞌnḯn sí dânj nej si-musû sôꞌ ga̱ꞌanj gàkï̀nj nej sí daꞌhui ga̱ꞌna̱ꞌ ya̱ nihia stiꞌnï̀ïn ni̱ gataj nej sôꞌ: “Ga̱ꞌna̱ꞌ ya̱ nej suj nihiaa dadinꞌ gàꞌ hua̱ yu̱gui daranꞌanj.”
18 Ni̱ gayiꞌì daranꞌ nej sí dânj ni̱ gataj nej sôꞌ si nitaj diû hua̱ riñan nej sôꞌ. Ni̱ gataj sí si̱nï̱ïn gu̱nïn sí dânj: “Hia̱j girân ꞌngo̱ hioꞌóo ni̱ daꞌhuí ga̱ꞌa̱nj niꞌhia dàj hua̱ hioꞌó dânj; ni̱ gachín ni̱ꞌhia si gi̱nikaj sòꞌ nimân nìko rayiꞌí.”
19 Ni̱ gataj aꞌngô sí dânj: “Hia̱j girân ùnꞌùnꞌ inda rô ni̱ ga̱ꞌa̱nj gàyàkà daꞌngaꞌa dàj giꞌhiaj sun nej xuj; ni̱ gachín nìꞌhia si gi̱nikajꞌ sòꞌ nimân nìko rayiꞌí.”
20 Ni̱ gataj aꞌngô sí dânj: “Hia̱j garan ra̱ꞌá ngà ni̱ka̱j, ni̱ rayiꞌî dan ni̱ si̱ ga̱ꞌhue gàꞌàn mánj.”
21 Huê danj ni̱ nanikàj sí musû dânj, ni̱ gaꞌnaꞌ gànàtàꞌ sôꞌ daranꞌ sa gunïn sôꞌ riñan si-yi̱ruꞌhue sôꞌ, huê danj ni̱ nga gu̱nïn si-yi̱ruꞌhue sôꞌ nej nuguanꞌ nânj ni̱ ginaꞌan ruhuâ sôꞌ, ni̱ gataj sôꞌ gu̱nïn sí huin si-musû sôꞌ: “Ga̱ꞌa̱nj râꞌñanj sòꞌ ña̱n hua̱ raꞌhuee ni̱ ña̱n hua̱j nej chrej gàchràꞌ hua̱j riki yumanꞌan, ni̱ gàkï̀nj nej gànìki, nej guiì hua̱ ruꞌu nneè kú ni̱ nej guiì hua̱ go̱ꞌoj rune ña̱n ni̱ ga̱ꞌna̱ꞌ ninj si-gi̱ꞌña̱n.”
22 Ni̱ gataj sí musû dânj: “Dàj rûnꞌ gaꞌnïnꞌ su̱n Ma̱ꞌân rèꞌ ni̱ huê danj giꞌhia, sani̱ hua̱ na̱nj hua̱ nîꞌnï̀nj ña̱n ga̱ne nej guiì.”
23 Ni̱ gataj sí yiruꞌhue dânj gu̱nïn si-musû sôꞌ: “Ga̱ꞌa̱njꞌ ña̱n hua̱j nej chrej gaꞌàan ngà ña̱n hua̱j nej chrej gàtï̀ïn, ni̱ giꞌhiaj guesâꞌ ga̱tu̱ nej sij, daꞌnga ni̱ ga̱chra ruhuâ dukuá.
24 Dadinꞌ ñùnj taj ni̱ gàꞌ si̱ ꞌngo̱ nej sí ri̱ña̱n gaꞌnï̂n gaꞌanj gàkï̀nj nej sij ni̱ si̱ gaꞌnaꞌ ya̱ nej sôꞌ si-nìhiàj mánj.”
Ûta chìꞌ huaj gi̱nikôꞌ rukû Ma̱ꞌan Jesús
25 Ni̱ hua̱j ûta gàꞌì nej guiì ngà Ma̱ꞌan Jesús; ni̱ nanika ni̱ gata gu̱nïn ninj:
26 —Si̱ hua̱ ꞌngo̱ nej suj ꞌna̱ꞌ riñânj, ni̱ nitaj si̱ hua̱ ruhuâ nej suj gu̱dunâj nej suj rej nej suj, nni nej suj, ni̱ka̱ nej suj, ni̱ daꞌní nej suj, ni̱ dinḯn nej suj, ni̱ yuguej nej suj, ni̱ nitaj si hua̱ ruhuâ nej suj gàhuìꞌ nej suj rayiꞌí, ni̱ si̱ ga̱ꞌhue gi̱nikòꞌ nej suj rukû mánj.
27 Ni̱ guiì naꞌhuej ruhuâ ga̱ta si-rùgùtsì ni̱ naꞌhuej ruhuâ ninj gi̱nikòꞌ ninj rukú, ni̱ si̱ ga̱ꞌhue ga̱huin ninj guiì ga̱ꞌna̱ꞌ ga̱huin chru̱n riñanj mánj.
28 Ahuin goꞌngo̱ nej suj, ganï̂n ruhuâ gi̱ꞌhiaj ꞌngo̱ hueꞌ yàkàan, ni̱ sê gàꞌ si̱nï̱n naga̱ne nej suj, ni̱ gi̱ꞌhiaj nej suj guenda dàj nìko sanꞌanj an gìyìtï̀nꞌ yiꞌî hueꞌ dânj, hiôꞌ ni̱ si garânj daꞌngaꞌ ruhuâ nej suj si ni̱ka̱j nej suj sanꞌanj an gìsìj hueꞌ dânj hiôꞌ ni̱ gàyìꞌì nej suj ni̱ giꞌhiaj sun nej suj ràꞌ saj ûnꞌ.
29 Dadinꞌ si guneꞌ ꞌngo̱ sí dânj yiꞌî ꞌngo̱ hueꞌe, ni̱ naꞌhue gùnùkuaj sôꞌ gìsìj hueꞌ dânj gi̱ꞌhiaj sôꞌ, ni̱ nga giniꞌin daranꞌ nej guiì si naꞌhue gùnùkuaj sôꞌ gìsìj hueꞌ dânj ni̱ gàyìꞌì ninj ni̱ ga̱ꞌmi̱n duku ninj riñan sôꞌ.
30 Ni̱ ga̱ta̱j ninj: “Sí nânj gayiꞌì giꞌhiaj ꞌngo̱ hueꞌe, sani̱ nu̱n gùnùkuaj sôꞌ gìsìj hueꞌ dânj giꞌhiaj sôꞌ.”
31 Ahuin ꞌngo̱ rey, nga ruhuâ sôꞌ ga̱ꞌa̱nj gùtàꞌ sôꞌ ngà aꞌngô rey, ni̱ sê gàꞌ si̱nï̱n naga̱ne sôꞌ ni̱ nadigiꞌñun sôꞌ si gùnùkuaj chi̱ꞌ mîn nej stadû hua̱ riñan sôꞌ gùtàꞌ nej sôꞌ ngà ko̱ mîn nej stadû unïnꞌ ngà sôꞌ ràꞌ saj ûnꞌ.
32 Ni̱ si garânj daꞌngaꞌ ruhuâ sôꞌ sisi̱ si̱ gaꞌhue gùnùkuaj sôꞌ gùtàꞌ sôꞌ ngà sí unïnꞌ ngà sôꞌ, ni̱ gàꞌnï̀nj sôꞌ ga̱ꞌa̱nj ꞌngo̱ yiꞌnïnꞌ nej sí ginikaj si-nùguànꞌ sôꞌ, nga nï̀nꞌ ꞌna̱ꞌ ga̱nꞌ nej sí gunïnꞌ ngà sôꞌ guendâ gàchìnj nìꞌhiaj sôꞌ si ga̱ꞌhue ni̱ ga̱na̱ꞌmi̱n nguèj sôꞌ daꞌnga ni̱ ganahuin nìn gimàn nej sôꞌ.
33 Huê danj, ni̱ ahuin na̱nj goꞌngo̱ nej suj naꞌhuej ruhuâ gu̱du̱nâj daranꞌ nej rasu̱n hua̱ riñan nej suj, ni̱ si̱ gaꞌhue gi̱nikòꞌ nej suj rukú mánj.
Nga ganarëꞌ ñaan ni̱ nitaj si nnij
34 ’Sa sàꞌa huin ñaan; sani̱ si gànàrë̀ꞌ man, ni̱ ahuin si ngà na̱gi̱ꞌhiaj nìꞌ ràꞌaj.
35 Ni̱ gàꞌ si̱ gaꞌhue ga̱huin a̱ꞌnuj hioꞌóo gi̱ꞌhia ni̱ gàꞌ si̱ gaꞌhue dùnachej nej sij ngà mintû si-a̱ꞌnuj nej yuku mánj; man guendâ gi̱rë̱ꞌë̱j nej sij neꞌ ye̱ꞌe. Ni̱ ahuin na̱nj guiì tàj hiuꞌuj rakïj ni̱ gu̱nïn ninj.