9
Ni̱ huê danj gata:
—Yàngàꞌ hia nï̀nꞌ tâ si hua̱ da̱ꞌa̱j nej suj màn hiuj nânj,
ni̱ si̱ gahuiꞌ nej suj dadinꞌ gi̱ni̱ꞌin nej suj ga̱ꞌna̱ꞌ gi̱nikaj su̱n nùkuaj staꞌu Ma̱ꞌan Ña̱ꞌa̱nj nne yàtàꞌa riñan hioꞌó nânj na̱nj ánj.
Nadunâ Jesús Ma̱ꞌan
2 Neꞌ rùkù nga gachîn huàtànꞌ gui ni̱ ginikaj Ma̱ꞌan Jesús Pedro,
ngà Jacobo ni̱ Juan,
ni̱ gaꞌanj ni̱nï̱n nej sij raa̱ ꞌngo̱ kïj hua̱ yàkàan;
ni̱ nadunâ Jesús Ma̱ꞌan riñan nej sij.
3 Ni̱ nda ran chre ganahuin siganꞌanj ni̱ nda gàtsì chre ganahuin siganꞌanj,
ni̱ hua̱ gàtsì atsìj i dàj rûnꞌ hua ꞌhueꞌe,
ni̱ gàꞌ si ꞌngo̱ nej sí nán atsìj i ni̱ si̱ gaꞌhue ga̱na̱huin gàtsij gi̱ꞌhiaj nej sôꞌ dàj rûnꞌ ganahuin gàtsì atsîj nânj.
4 Ni̱ orâ chre ni̱ guyumân Elias ngà Moisés,
ni̱ gaꞌmin nguèj sôꞌ ngà Ma̱ꞌan Jesús.
5 Hiôꞌ ni̱ gataj Pedro gu̱nïn Ma̱ꞌan Jesús:
—Maestrûj,
dùgùnàj huaj si ga̱ne nêꞌ hiuj nânj;
ni̱ giꞌhiaj nêꞌ huàꞌnï̀nj hueꞌ rekoj o,
ꞌngoj ga̱ne Ma̱ꞌân rèꞌ,
ni̱ aꞌngoj ga̱ne Moisés ni̱ aꞌngoj ga̱ne Elías na̱nj ánj.
6 Sani̱ nun niꞌin Pedro sa gaꞌmin sôꞌ,
dadinꞌ do̱ꞌ si̱ ûta guyuꞌhuiꞌ sôꞌ.
7 Hiôꞌ ni̱ gaꞌnaꞌ ꞌngo̱ nnga ni̱ garan gayu̱nꞌun riñan nej sij,
ni̱ nda riñan nnga dânj gaꞌmin Ma̱ꞌan Ñaꞌanj an ni̱ gata:
—Huê Ma̱ꞌan nan huin Daꞌnî ni̱ ûta ꞌì ruhuâj niꞌín Ma̱ꞌan;
ni̱ gu̱nïn nej suj sa ga̱ꞌmi̱n.
8 Ni̱ orâ chre ni̱ nga giniꞌhiaj nej sij,
ni̱ nitaj gàꞌ si goꞌngo̱ nguèj sôꞌ nikïnꞌ ngà Ma̱ꞌan Jesús,
dadinꞌ man ꞌngo̱ rïn nikïnꞌ hiuj dânj.
9 Ni̱ gananinj nej sij raa̱ kïj dânj,
ni̱ gaꞌnïnꞌ sunj riñan nej sij sisi̱ si̱ gananï̂n nej sij riñan gàꞌ si ꞌngo̱ nej guiì sa giniꞌin nej sij hiuj dânj,
ni̱ nda gànàꞌnï̀nj Ma̱ꞌan siganï̂nj nej nîman hiôꞌ ni̱ gaꞌhue ga̱na̱nï̱n nej sij rayiꞌij.
10 Ni̱ ganaꞌnḯn sàꞌ nej sij nej nuguanꞌ nânj ni̱ nadigiꞌñûn nej sij siganï̂nj nej ma̱ꞌan nej sij,
ni̱ ganarïsnaꞌanj nej sij ni̱ taj nej sij dàj ga̱huin nga gànàꞌnï̀nj nej nîman.
11 Ni̱ gachín naꞌanj nej sij ni̱ gataj nej sij:
—Nùnj huin saj ni̱ gataj nej sí chru̱n ley si ña̱ꞌa̱n huaj si ga̱ꞌna̱ꞌ si̱nï̱n Elías ràꞌaj.
12 Nanikàj Ma̱ꞌan Jesús ni̱ gata:
—Yàngàꞌ ni̱ ga̱ꞌna̱ꞌ si̱nï̱n Elías,
ni̱ na̱gi̱ꞌhiaj nàkà sôꞌ daranꞌ nej rasu̱un;
ni̱ dàj rûnꞌ taj riñan ñanj rayiꞌí,
ni̱ ûta gi̱ranꞌ sàñùnj,
ni̱ nitaj nùnj ga̱huín riñan nej guiì.
13 Sani̱ ñùnj taj si gàꞌ gaꞌnaꞌ Elías,
ni̱ giꞌhiaj nej sij dàj garanꞌ ruhuâ nej sij ngà sôꞌ,
dàj rûnꞌ taj riñan ñanj rayiꞌî sôꞌ.
Giꞌhiaj Ma̱ꞌan Jesús ganahuin ꞌngo̱ silíj nun nanè kï̱j huaa ruhuâ nimân
14 Ni̱ nga guchiꞌ Ma̱ꞌan Jesús ñan nï̱kï̱nꞌ nej sí ꞌna̱ꞌ ga̱huin chru̱n riñanj,
ni̱ giniꞌin si ûta gàꞌì nej guiì mân ganikàj neꞌ rùkù nej sôꞌ,
ni̱ unïnꞌ nej sí gaꞌnaꞌ ga̱huin chru̱n riñanj ngà nej sí chru̱n ley.
15 Ni̱ orâ chre ni̱ giniꞌin daranꞌ nej guiì Ma̱ꞌan Jesús,
ni̱ gahuin ña̱ꞌanj ruhuâ ninj,
ni̱ gunânj ninj gaꞌnaꞌ ninj riñan Ma̱ꞌan ni̱ gidaꞌa ninj raꞌa.
16 Ni̱ gachín naꞌanj Ma̱ꞌan Jesús ni̱ gata:
—Ahuin si ràyìꞌì gunïnꞌ nej suj ngà nej sí dânj ràꞌaj.
17 Ni̱ gaꞌmin ꞌngo̱ sí ni̱kï̱nꞌ siganï̂nj nej guiì rigìi ni̱ gataj sôꞌ:
—Maestrûj,
nika daꞌnî gaꞌná riñan Ma̱ꞌân rèꞌ dadinꞌ ruhuâ nimân sij nne ꞌngo̱ nanè ꞌmìnj in ni̱ naꞌhue ga̱ꞌmi̱n sij giꞌhia mánj,
18 ni̱ dànèꞌ gahuin nga gidaꞌa nanè kï̱j hua dân sij ni̱ dunatu sij;
ni̱ gahui ata̱nꞌan duꞌhua sij giꞌhia ni̱ yâ ru̱j ñanꞌ sij giꞌhia,
ni̱ ꞌna̱ꞌ gànàkò nï̀nꞌ sij giꞌhia ni̱ gatâ gu̱nïn nej sí ꞌna̱ꞌ ga̱huin chru̱n riñan Ma̱ꞌân rèꞌ si gi̱ri̱ nej sôꞌ ruhuâ nimân sij nanè kï̱j hua nânj sani̱ nun ga̱ꞌhue gi̱ri̱ nej sôꞌ.
19 Ni̱ nanikàj Ma̱ꞌan Jesús ni̱ gata:
—Aya̱ꞌ nej yiꞌnïnꞌ naꞌhue gùyùmàn ruhuâ suj gàꞌ manꞌ.
Nda àmàn daꞌhuí ga̱né ngà nej suj gàꞌ únj.
Nda andaj daꞌhuí ga̱ nùkuaj ruhuâj niꞌín nej suj gàꞌ únj.
Gi̱nikaj nej suj silíj dânj ga̱ꞌna̱ꞌ nej suj neꞌ dànanj.
20 Ni̱ ni̱ka̱j nej sij gaꞌnaꞌ nej sij silíj nânj riñan Ma̱ꞌan Jesús,
ni̱ nga giniꞌin nanè kï̱j hua dânj Ma̱ꞌan Jesús,
ni̱ ûta nùkuaj nagunanj silíj dânj,
ni̱ ganatûj sôꞌ riñan hioꞌóo giꞌhia ni̱ ûta gahuin nìta sôꞌ,
ni̱ ûta nikòꞌ ata̱nꞌan duꞌhua sôꞌ.
21 Ni̱ gachín naꞌanj Ma̱ꞌan Jesús rej silíj dânj ni̱ gata:
—Andaj diû gàꞌ gisîj giꞌhia dànanj giranꞌ sôꞌ ràꞌaj.
Ni̱ gataj rej silíj dânj:
—Àsìj hua lij sij ni̱ huê dànanj giꞌhia ranꞌ sij.
22 Ni̱ ûta gàꞌì ni̱ gaꞌnïn sij riñan ñaꞌaan nga ruhuâ nnee,
guendâ ruhuaj da̱gahuij sij;
ni̱ si ga̱ꞌhue gi̱ꞌhiaj Ma̱ꞌân rèꞌ ga̱na̱huin sij,
ni̱ ga̱na̱nï̱n àko ruhuâ Ma̱ꞌân rèꞌ niꞌîn rèꞌ nej ñûnj ni̱ gu̱ru̱gûñuꞌunj Ma̱ꞌân rèꞌ nej ñûnj.
23 Ni̱ gataj Ma̱ꞌan Jesús:
—Si ga̱ꞌhue gùyùmàn ruhuâꞌ,
dadinꞌ sí guyumân ruhuâ ni̱ daranꞌanj huin sa ga̱ꞌhue gi̱ꞌhiaj sôꞌ.
24 Ni̱ orâ chre ni̱ gaꞌmin nùkuaj rej silíj dânj ni̱ gataj sôꞌ:
—Guyumân ruhuâj;
ni̱ gu̱ru̱gûñuꞌunj Maꞌân rèꞌ si gùyùmàn yìtï̀nj doj ruhuâj.
25 Ni̱ nga giniꞌin Ma̱ꞌan Jesús si ûta gunânj nej guiì ꞌnaꞌ ninj riñanj,
ni̱ dugunïn gàꞌìj nanè kï̱j hua nânj ni̱ gata:
—Nanè laꞌñanꞌ sòꞌ ni̱ sôꞌo sòꞌ,
gaꞌnï̂nꞌ su̱nj riñanꞌ ni̱ ga̱hui̱ꞌ ruhuâ nimân silíj dan ga̱ꞌa̱nj,
ni̱ si̱ nanikàj ga̱tu̱ ñûnꞌ ruhuâ nimân sij gàꞌ mánj.
26 Hiôꞌ ni̱ gaguâj nùkuaj ñûn nanè kï̱j hua dânj,
ni̱ gayiꞌij ni̱ ûta nùkuaj nagunanj silíj dânj,
ni̱ gahui ruhuâ nimân sôꞌ;
ni̱ dàj rûnꞌ hua sí gàꞌ gahuiꞌi hua sílìj dânj giꞌhia,
ni̱ gataj ûta gàꞌì nej guiì:
Gàꞌ gahuiꞌ silíj dan na̱nj ánj.
27 Sani̱ gidaꞌa Ma̱ꞌan Jesús raꞌa silíj dânj,
ni̱ gununeꞌ ni̱kaj sôꞌ;
ni̱ ganayumàn sôꞌ giꞌhia.
28 Nga gunukuiꞌ Ma̱ꞌan Jesús ruhuâ hueꞌ ñan nne,
ni̱ gachín naꞌanj nej sí ꞌna̱ꞌ ga̱huin chru̱n riñanj ni̱ gataj nej sôꞌ:
—Nùnj huin saj ni̱ nun ga̱ꞌhue gi̱ri̱ nej ñûnj neꞌ ye̱ꞌe nanè kï̱j hua dânj ràꞌaj.
29 Ni̱ gataj Ma̱ꞌan Jesús:
—Nej yìꞌnï̀nꞌ nanè kï̱j hua nânj ni̱ ûta ꞌì ga̱hui̱ ninj,
ni̱ daꞌhuiꞌ ga̱ꞌmi̱nꞌ ngà Ma̱ꞌan Ñaꞌanj an ni̱ ga̱ gi̱ni̱ne̱ꞌ daꞌnga ni̱ gaꞌhue ga̱hui̱ ninj na̱nj ánj.
Gataj ñûn Ma̱ꞌan Jesús si ga̱huij
30 Ni̱ nga gahui nej sij hiuj dânj ni̱ gaꞌanj nej sij neꞌ Galilea;
sani̱ nun ga̱ranꞌ ruhuâ Ma̱ꞌan Jesús si gi̱ni̱ꞌin nej guiì dànèꞌ gàꞌàn.
31 Dadinꞌ gidiganj riñan nej sí ꞌna̱ꞌ ga̱huin chru̱n riñanj ni̱ gata:
Ni̱ nàgàꞌhuìꞌ nej sij ñùnj raꞌa nej síi ni̱ da̱gahuiꞌ nej sôꞌ ñùnj,
sani̱ neꞌ rùkù nga gahuí,
ni̱ gachin huàꞌnï̀nj gui ni̱ gànàꞌnï̀nj siganï̂nj nej nîman.
32 Sani̱ nun ga̱ꞌhue ga̱ra̱n daꞌngaꞌ ruhuâ nej sí ꞌna̱ꞌ ga̱huin chru̱n riñanj nej nuguanꞌ nânj,
ni̱ yuꞌhuiꞌ nej sôꞌ gàchìnj naꞌanj nej sôꞌ Ma̱ꞌan.
Ahuin sí huin sí aꞌnïnꞌ doj ràꞌaj
33 Ni̱ guyumân nej sij Kapernaúm;
ni̱ nga nne Ma̱ꞌan Jesús ruhuâ hueꞌe,
ni̱ gachín naꞌan nej sí ꞌna̱ꞌ ga̱huin chru̱n riñanj ni̱ gata:
—Ahuin ràyìꞌì ganarïsnaꞌanj nej suj nga ꞌnaꞌ nêꞌ ruhuâ chrej e ràꞌaj.
34 Sani̱ dḯn ga̱ duꞌhua nej sij;
dadinꞌ nga ꞌnaꞌ nej sij ruhuâ chrej e ni̱ ganarïsnaꞌanj nej sij,
ni̱ gataj nej sij ahuin goꞌngo̱ nêꞌ ga̱huin sí achij doj ràꞌaj.
35 Hiôꞌ ni̱ gaꞌanj ga̱ne Ma̱ꞌan Jesús ni̱ gakïn gaꞌnaꞌ nej yùhuìj sí ꞌna̱ꞌ ga̱huin chru̱n riñanj,
ni̱ gata gu̱nïn nej sôꞌ:
—Si hua̱ ꞌngo̱ nej suj ruhuâ ga̱huin sí si̱nï̱ïn,
ni̱ ga̱na̱huin nej suj sí ga̱ꞌna̱ꞌ neꞌ rùkùu ni̱ ga̱huin nej suj sí gu̱na̱nj gi̱tsi riñan daranꞌ nej guiì na̱nj ánj.
36 Ni̱ gidaꞌa ꞌngo̱ sílìj i,
ni̱ ganïnj da̱nï̱n nej sij,
ni̱ gidaꞌa ni̱ gani̱ꞌñanj silíj dânj ni̱ gata:
37 —Ni̱ sí ganahuin ra̱ꞌa ngà siyu̱guí ꞌngo̱ sílìj i dàj rûnꞌ hua silíj nânj,
ni̱ Maꞌán ganahuin ra̱ꞌa sôꞌ;
ni̱ sí ganahuin ra̱ꞌa Maꞌán,
ni̱ sê ñùnj ganahuin ra̱ꞌa sôꞌ,
dadinꞌ ganahuin ra̱ꞌa sôꞌ Ma̱ꞌan sa gaꞌnḯn gaꞌná.
Sí nitaj si unïnꞌ ꞌngà nêꞌ ni̱ huin sôꞌ ngà nêꞌ
38 Nanikàj Juan ni̱ gataj sôꞌ:
—Maestrûj,
giniꞌin nej ñûnj si ꞌngo̱ sí dânj ni̱ ngà siyu̱gui Ma̱ꞌân rèꞌ giri sôꞌ neꞌ ye̱ꞌe nej nanè kï̱j huaa,
ni̱ nagiꞌhiaj ha̱i̱ nej ñûnj dadinꞌ nitaj si ni̱ka̱j duguiꞌ sij ngà nêꞌ mánj.
39 Sani̱ gataj Ma̱ꞌan Jesús:
—Si̱ nagiꞌhiaj ha̱i̱ nej suj mánj;
dadinꞌ gàꞌ si ꞌngo̱ síi ni̱ nga garânj sun sij siyu̱guí ni̱ ganahuin nej guiì giꞌhiaj sij ni̱ neꞌ rùkù ni̱ si gaꞌmin yìꞌì sij rayiꞌí mánj.
40 Dadinꞌ sí nitaj si gata rùhuà niꞌin nêꞌ,
ni̱ huin si ngà nêꞌ.
41 Ni̱ ahuin na̱nj sí riki ꞌngo̱ basû nnee goꞌo nej suj ngà siyu̱guí,
guendâ nìkòꞌ nej suj rukú,
yàngàꞌ hia nï̀nꞌ tâ ni̱ si̱ gahuin chre sun giꞌhiaj sí dânj,
dadinꞌ nàgàꞌhuìꞌ Ma̱ꞌan Ñaꞌanj an nani̱ꞌhiaj sôꞌ.
Ga̱huin ni̱ gi̱ni̱nj ꞌngo̱ síi riñan gakï̱nꞌïn
42 ’Ahuin na̱nj sí gàꞌ niꞌin si-nùguànꞌ Ma̱ꞌan Ñaꞌanj an gàꞌ nâ doj,
ni̱ giꞌhiaj sôꞌ gininj ꞌngo̱ nej sí hia̱j nàkà guyumân ruhuâ niꞌin ñùnj riñan gakï̱nꞌïn,
ni̱ dùgùnàj huaj si du̱nikôꞌ ꞌngo̱ hiëj to guduguâj urruj u yihiâ sôꞌ,
ni̱ gu̱du̱gueꞌ ga̱ꞌa̱nj sôꞌ ruhuâ nne ña̱ꞌa̱nj na̱nj ánj.
43 Si raꞌât giꞌhiaj si gi̱ꞌhiáꞌ gakï̱nꞌïn ni̱ gàꞌnèꞌ;
ni̱ dùgùnàj huaj si ga̱tu̱ꞌ ñan ni̱ka̱j su̱n Ma̱ꞌan Ñaꞌanj an nùnj huin si hua̱ ruꞌu raꞌât,
dadinꞌ nùnj huin si hua̱ sàꞌ nguèj raꞌât sani̱ ga̱ꞌa̱nj ni̱ gi̱nun nìgànj ruhuâ rúnâko ni̱ nitaj àmàn gìnàꞌàj ñaꞌan nu̱n hiuj dânj,
44 ni̱ nej yilú màn hiuj dânj ni̱ nitaj àmàn gàhuìꞌ nej yôꞌ,
ni̱ ñaꞌan nu̱n hiuj dânj ni̱ nitaj àmàn gìnàꞌa mánj.
45 Ni̱ si dakót giꞌhiaj gi̱ꞌhiáꞌ gakï̱nꞌïn,
ni̱ gàꞌnèꞌ na̱nj ánj;
dùgùnàj huaj si ga̱tu̱ꞌ ñan ni̱ka̱j su̱n Ma̱ꞌan Ñaꞌanj an nùnj huin si hua̱ ruꞌu dakót,
dadinꞌ nùnj huin si hua̱ sàꞌ nguèj dakót sani̱ ga̱ꞌa̱njꞌ ni̱ gi̱nun nìgànj chreꞌ riñan ñaꞌan nitaj àmàn gìnàꞌàj na̱nj ánj,
46 ñan màn nej yilú huin dân nej sij ni̱ nitaj àmàn gàhuìꞌ nej yôꞌ,
ni̱ ñaꞌan nu̱n hiuj dânj ni̱ nitaj àmàn huaj gìnàꞌa mánj.
47 Ni̱ si rune ñant huin sa giꞌhiaj gi̱ꞌhiaꞌ gakï̱nꞌïn,
hiôꞌ ni̱ gi̱ri̱ꞌ na̱nj ánj;
dùgùnàj huaj si ga̱tu̱ꞌ ñan ni̱ka̱j su̱n Ma̱ꞌan Ñaꞌanj an ngà ꞌngo̱ rïn rune ñant,
dadinꞌ nùnj huin si hua̱ nguèj rune ñant sani̱ ga̱ꞌa̱njꞌ riñan ñaꞌaan gi̱nun nìgànj na̱nj ánj,
48 ñan màn nej yilú huin dân nej sij ni̱ nitaj àmàn gàhuìꞌ nej yôꞌ;
ni̱ ñaꞌan nun hiuj dânj ni̱ nitaj àmàn gìnàꞌa mánj.
49 ’Dadinꞌ dàj rûnꞌ ꞌnïnj ñaan nneè nakòo ni̱ gunukuaj nâ man huê danj ga̱na̱huin sàꞌ nimân nej daꞌní Ma̱ꞌan Ñaꞌanj an gi̱ꞌhiaj Ma̱ꞌan Espíritu Santo nga ga̱chi̱n ninj riñan nej sañuun.
50 Sa sàꞌa huin ñaan;
sani̱ si gànàrë̀ꞌ ñaan,
ni̱ ahuin si ngà na̱giꞌhiaj nìꞌ nihiaa ràꞌaj.
Ni̱ dàj rûnꞌ ꞌnïnj ñaan nihiaa ni̱ ya da̱j man ni̱ huê danj du̱gumîn hueꞌê nej suj ma̱ꞌan nej suj riñan gakï̱nꞌïn;
ni̱ ga̱ dïnꞌïnj gimàn nej suj ngà ꞌngo̱ ni̱ aꞌngô nej duguiꞌ nej suj.