Nadunâ Jesús Ma̱ꞌan riñan nej sí ꞌnaꞌ ga̱huin chru̱n riñanj
17
Gachîn huàtànꞌ gui, ni̱ ni̱ka̱j Ma̱ꞌan Jesús Pedro, Jacobo ni̱ Juan huin dinḯn Jacobo, ni̱ gaꞌanj anêj nej sij ñan ni̱kï̱nꞌ ꞌngo̱ kïj yàkàan;
2 ni̱ màn nej sij hiuj dânj ni̱ ganadunâ Jesús Ma̱ꞌan riñan nej sij, ni̱ nda ran chre ganahuin riñanj ni̱ huaj dàj rûnꞌ hua riñan gui, ni̱ ganahuin gàtsì riñan siganꞌanj ni̱ nda giyigï̀n chre nï̀nꞌ gàchràꞌ giꞌhia.
3 Ni̱ giniꞌin nej sij nikïnꞌ Moisés ngà Elías ni̱ ganarïsnaꞌanj nguèj sôꞌ ngà Ma̱ꞌan.
4 Hiôꞌ ni̱ gataj Pedro gu̱nïn Ma̱ꞌan Jesús:
—Señor, dùgùnàj huaj si ga̱ne neꞌ hiuj nânj; ni̱ si ruhuâ Ma̱ꞌân rèꞌ, ni̱ gi̱ꞌhiaj nej ñûnj huàꞌnï̀nj hueꞌ rekoj o hiuj nânj: ꞌNgo̱j ga̱ne Maꞌân rèꞌ, ni̱ aꞌngoj ga̱ne Moisés ni̱ aꞌngoj ga̱ne Elías.
5 Nga nï̀nꞌ aꞌmin Pedro nikïnꞌ sôꞌ, ni̱ guyumân ꞌngo̱ nnga yigï̀ïn ni̱ garan riñan nej sij; ni̱ riñan nga dânj gaꞌmin Ma̱ꞌan Ñaꞌanj an, ni̱ gata:
—Huê nan huin Daꞌnîn ni̱ ûta garanꞌ ruhuâj niꞌín Ma̱ꞌan; ni̱ gu̱nïn nej suj sa ga̱ꞌmi̱n Ma̱ꞌan.
6 Ni̱ nga gunïn nej sí ꞌna̱ꞌ ga̱huin chru̱n riñan Ma̱ꞌan Jesús nej nuguanꞌ nânj, ni̱ ganikïnꞌ rúdàkòj nej sôꞌ ni̱ guduguaꞌ nej sôꞌ ahui nej sôꞌ riñan hioꞌóo, ni̱ ûta guyuꞌhuiꞌ nej sôꞌ.
7 Hiôꞌ ni̱ gaꞌnaꞌ nichì Ma̱ꞌan Jesús riñan nej sij ni̱ dusikij nej sij, ni̱ gata:
—Gànàyùmàn nej suj ni̱ si̱ guyuꞌhuiꞌ nej suj mánj.
8 Ni̱ ganachi nikaj ñan nej sij ni̱ giniꞌhiaj nej sij sani̱ nitaj gàꞌ si ꞌngo̱ nguèj sôꞌ nikïnꞌ ngà Ma̱ꞌan Jesús gàꞌ mánj.
9 Ni̱ nga gananinj nej sij raa̱ kïj dânj, ni̱ gaꞌnïnꞌ Ma̱ꞌan Jesús suun riñan nej sij ni̱ gata:
—Si̱ ganataꞌ nej suj sa giniꞌin nej suj riñan gàꞌ si ꞌngo̱ nej guiì mánj, nda ga̱na̱huin nìꞌnàj siganï̂nj nej nîman hiôꞌ ni̱ ga̱ꞌhue ga̱na̱nï̱n nej suj.
10 Hiôꞌ ni̱ gachín naꞌanj nej sí ꞌna̱ꞌ gahuin chru̱n riñan Ma̱ꞌan Jesús, ni̱ gataj nej sôꞌ:
—Nùnj huin saj ni̱ gataj nej maestrû chru̱n ley si ña̱ꞌa̱n huaj si ga̱ꞌna̱ꞌ si̱nï̱n Elias ràꞌaj.
11 Nanikàj Ma̱ꞌan Jesús ni̱ gata:
—Yàngàꞌ ni̱ gàꞌ si̱nï̱n ga̱ꞌna̱ꞌ Elías ni̱ na̱gi̱ꞌhiaj ni̱ka̱ sôꞌ daranꞌ nej chrej aꞌnanꞌ giꞌhiaj nej guiì.
12 Sani̱ ñùnj taj si gàꞌ gaꞌnaꞌ Elias sani̱ nun ga̱na̱ni̱ꞌin nej sij sôꞌ, ni̱ giꞌhiaj nej sij dàj garanꞌ ruhuâ nej sij ngà sôꞌ. Ni̱ huê danj na̱nj giranꞌ sàñùnj gi̱ꞌhiaj nej sij.
13 Hiôꞌ ni̱ garânj daꞌngaꞌ ruhuâ nej sí ꞌna̱ꞌ ga̱huin chru̱un si gaꞌmin Ma̱ꞌan Jesús rayiꞌî Juan Bautista.
Giꞌhiaj Ma̱ꞌan Jesús ga̱na̱huin silíj dagahuiꞌ ꞌhuij
14 Nga guchiꞌ nej sij ñan màn nej guiì rìgìi, ni̱ gaꞌnaꞌ nichì ꞌngo̱ sí dânj riñan Ma̱ꞌan Jesús ni̱ ganikïnꞌ rúdàkòj sôꞌ riñan Ma̱ꞌan ni̱ gataj sôꞌ:
15 —Señor, ga̱na̱nï̱n àko ruhuâ Ma̱ꞌân rèꞌ niꞌîn rèꞌ daꞌnî dadinꞌ ûta dagahuiꞌ ꞌhuij sij, ni̱ ûta giranꞌ sa̱ñu̱n sij giꞌhia; ni̱ ûta gàꞌì ni̱ ganatûj sij riñan ñaꞌaan giꞌhia, ni̱ ûta gàꞌì ganatûj sij ruhuâ nnee giꞌhia.
16 Ni̱ nìkà sij gaꞌná riñan nej sí ꞌna̱ꞌ ga̱huin chru̱n riñan Ma̱ꞌân rèꞌ, sani̱ nun ga̱ꞌhue ga̱na̱huin sij giꞌhiaj nej sôꞌ mánj.
17 Nanikàj Ma̱ꞌan Jesús ni̱ gata:
—Aya̱ꞌ nej suj ni̱ nitaj si guyumân ruhuâ nej suj ni̱ huin nej suj guiì ga̱kï̱nꞌ staꞌuu. Nda andaj diû daꞌhuí ga̱né ngà nej suj ràꞌaj. Ni̱ nda andaj daꞌhuí ga̱ nùkuaj ruhuâj niꞌín nej suj gàꞌ únj. Gi̱nikaj nej suj ga̱ꞌna̱ꞌ nej suj neꞌ dànanj.
18 Ni̱ dugunïn gàꞌì Ma̱ꞌan Jesús sa kï̱j dânj, ni̱ girij ruhuâ nimân silíj dânj ni̱ ganahuin sôꞌ orâ chre.
19 Hiôꞌ ni̱ neꞌ rùkù doj ni̱ gaꞌnaꞌ nej sí ꞌna̱ꞌ ga̱huin chru̱un riñan Ma̱ꞌan Jesús ni̱ gataj nej sôꞌ:
—Nùnj huin saj ni̱ nun ga̱ꞌhue gi̱ri̱ nej ñûnj neꞌ ye̱ꞌe nanè kï̱j hua dânj ràꞌaj.
20 Ni̱ gataj Ma̱ꞌan Jesús:
—Guendâ do̱j nï̀nꞌ guyumân ruhuâ nej suj ni̱ rayiꞌî dan ni̱ nun ga̱ꞌhue gi̱ri̱ nej suj mánj; dadinꞌ yàngàꞌ hia nï̀nꞌ tâ ni̱ si gùyùmàn yìtï̀nj ruhuâ nej suj ni̱ oꞌ si man dàj rûnꞌ hua ka̱n kuej staj huê dânj gùyùmàn ruhuâ nej suj, ni̱ ga̱ta̱j nej suj gu̱nïn kïj nânj: “Gu̱xu̱n Ma̱ꞌânꞌ ni̱ ga̱ꞌa̱njꞌ neꞌ dànanj”; ni̱ gu̱xu̱n kïj dânj ma̱ꞌan; ni̱ nitaj gàꞌ si ꞌngo̱ sa chìꞌi hua mánj.
21 Sani̱ nej yiꞌnïnꞌ nej nanè kï̱j hua nânj ni̱ si̱ gahui ninj si nitaj si gaꞌmin nej suj ngà Ma̱ꞌan Ñaꞌanj an ni̱ si nitaj si ga gi̱ni̱ne̱j nej suj mánj.
Gataj ñûn Ma̱ꞌan Jesús si ga̱huij
22 Nga nï̀nꞌ nne nej sij nda Galilea ni̱ gataj Ma̱ꞌan Jesús: Nàgàꞌhuìꞌ nej sij ñùnj raꞌa nej síi,
23 ni̱ da̱gahuiꞌ nej sij ñùnj; sani̱ ga̱chin huàꞌnï̀nj gui ni̱ ga̱na̱huin nìꞌnàj siganï̂nj nej nîman. Ni̱ nga gunïn nej sí na̱ꞌ ga̱huin chru̱un nuguanꞌ nânj ni̱ ûta gananï̂n ruhuâ nej sôꞌ.
Gàꞌhuìꞌ Kuestu riñan nuhuî nìko
24 Nga guchiꞌ nej sij yumanꞌ Kapernaúm, ni̱ gaꞌnaꞌ nej sí gaꞌnêj huìj sanꞌanj gùꞌnàj dracma guendâ kuestu riñan Pedro ni̱ gataj nej sôꞌ:
—Sê gu̱ruꞌhue sí gidigân riñan nej suj huìj sanꞌanj kuestu guendâ hueꞌ huin nûhui ràꞌ saj ûnꞌ.
25 Ni̱ gataj Pedro:
—Ga̱ꞌhue gu̱ruꞌhue̱ sij na̱nj ánj.
Ni̱ nga gunukuiꞌ sôꞌ ruhuâ hueꞌ ñan nne Ma̱ꞌan Jesús, ni̱ gàꞌ si̱nï̱n Ma̱ꞌan Jesús gaꞌmin ni̱ gata:
—Dàj anï̂n ruhuâ sòꞌ ràꞌaj Simónj. Ahuin si ri̱ña̱n gaꞌnêj nej sí ni̱ka̱j suun kuestu ngà saꞌanj gaché riñan nej guiì ràꞌaj. Gaꞌnêj nej sij riñan nej guiì màn yiñán nej sij nîꞌ si gaꞌnêj sij riñan nej guiì ꞌna̱ꞌ aꞌngô yumanꞌan sàꞌ.
26 Nanikàj Pedro ni̱ gataj sôꞌ:
—Gaꞌnêj nej sij kuestu riñan nej guiì ꞌna̱ꞌ aꞌngô yumanꞌan na̱nj ánj.
Ni̱ gataj Ma̱ꞌan Jesús:
—Huê danj ni̱ nitaj si gaꞌnêj nej sij riñan nej guiì yiñán nej sij mánj.
27 Sani̱ guendâ si̱ giꞌhiôꞌ si gi̱na̱ꞌan ruhuâ nej sij, ni̱ ga̱ꞌa̱nj sôꞌ ruhuâ nne ña̱ꞌa̱nj ni̱ gu̱du̱guêjꞌ ganchû giri yukuaj a ni̱ yukuaj giriꞌ si̱nï̱nꞌ, ni̱ gidaꞌaꞌ xuj ni̱ na̱guchraꞌ duꞌhua xuj ni̱ gànàrìꞌ ngo̱ sanꞌanj gùꞌnàj estatero, ni̱ ga̱na̱ka̱j sanꞌanj dânj ni̱ gu̱ruꞌhueꞌ riñânj ngà riñanꞌ na̱nj ánj.