Gachín nej fariseo ngà nej saduseo si gi̱ꞌhiaj Ma̱ꞌan Jesús ga̱na̱huin nej guiì
16
Gaꞌnaꞌ nej sí chru̱n ley ngà nej sí saduseo guendâ ga̱ra̱n hue̱ nej sôꞌ Ma̱ꞌan Jesús, ni̱ gachín nej sôꞌ ꞌngo̱ daꞌngaꞌa guendâ ruhuâ nej sôꞌ gi̱ni̱ꞌin nej sôꞌ si Ma̱ꞌan Ñaꞌanj an gaꞌnḯn gaꞌnaꞌ Ma̱ꞌan Jesús.
2 Nanikàj Ma̱ꞌan Jesús ni̱ gata:
—Nga ginìn ni̱ gataj nej suj: “Ûta hueꞌê hua diû dadinꞌ ganahuin ma̱re nnga màn yàtàꞌa”;
3 Nga giyigï̀n neꞌ ni̱ganꞌan ni̱ gataj nej suj: Hia̱j ni̱ gàmànꞌ gumàn nanèe dadinꞌ ganahuin ma̱re nga màn yàtàꞌa. Sí gidigañuꞌunj un huin nej suj. Dadinꞌ chru̱n nej suj ga̱na̱ni̱ꞌin daꞌngaꞌ nej suj dàj hua yàtàꞌa, sani̱ nej sa hua̱ diû nânj ni̱ nitaj si chru̱n nej suj ga̱na̱ka̱j guendâ nej suj mánj.
4 Nej guiì kï̱j huaa ni̱ nej guiì gudunâj Ma̱ꞌan Ñaꞌanj an gachín daꞌngaꞌa gi̱ni̱ꞌin ninj; sani̱ si̱ gaꞌhue gi̱ni̱ꞌin ninj aꞌngô daꞌngaꞌa mánj, ga̱na̱nun ruhuâ ninj dàj giranꞌ Jonás sôꞌ gataj dàj ga̱huin.
Huê danj ni̱ guduna nej sij, ni̱ gaꞌan aꞌngô yumanꞌan.
Ga̱ gudadûꞌ ngà nej sa gidigân nej sí fariseo
5 Ni̱ gachîn nej sí ꞌna̱ꞌ ga̱huin chru̱n riñan Ma̱ꞌan Jesús neꞌ ané duꞌhua nne ña̱ꞌa̱nj, ni̱ giniꞌñûn nej sôꞌ gi̱nikaj nej sôꞌ rachrúun ga̱ꞌa̱nj nej sôꞌ.
6 Ni̱ gataj Ma̱ꞌan Jesús gu̱nïn nej sôꞌ:
—Gi̱ni̱ꞌhiaj nej suj ni̱ ga̱ gu̱dadû nej suj ngà chru dunuꞌmanꞌ huin nej sa gidigân nej sí chru̱n ley ngà nej sí saduseo.
7 Ni̱ ganarïsnaꞌanj nej sí ꞌna̱ꞌ ga̱huin chru̱un siganï̂nj nej sôꞌ ni̱ gataj nej sôꞌ:
—Gataj Ma̱ꞌan Jesús dànanj dadinꞌ nun gi̱nikaj neꞌ rachrúun ga̱ꞌna̱ꞌ neꞌ mánj.
8 Ni̱ garânj daꞌngaꞌ ruhuâ Ma̱ꞌan Jesús dàj gaꞌmin nej sij, ni̱ gata gu̱nïn nej sij:
—Nùnj huin saj ni̱ ganï̂n ruhuâ nej suj si rayiꞌî guendâ nitaj si ni̱ka̱j nej suj rachrúun gaꞌmînj ràꞌaj, do̱j sînj guyumân ruhuâ nej suj na̱nj ánj.
9 Hua̱ na̱nj naꞌhue ga̱ra̱n daꞌngaꞌ ruhuâ nej suj, ni̱ nun ga̱na̱nun ruhuâ nej suj dàj giꞌhiâ ngà nej ùnꞌùnꞌ rachrúun ni̱ gisi yâ nda ùnꞌùnꞌ mîn nej síi, ni̱ andaj yugûti nej dasû ganachra ganaranꞌ nej suj ràꞌaj.
10 Ni̱ nun ga̱na̱nun ruhuâ nej suj rayiꞌî nej chi̱j rachrúun nga gisi yâ ga̱ꞌânj mîn nej guiì giꞌhiâ, ni̱ andaj yugûti ganachra ganaranꞌ nej suj ràꞌaj.
11 Nùnj huin saj ni̱ naꞌhue ga̱ra̱n daꞌngaꞌ ruhuâ nej suj si sê rayiꞌî rachrúun huin sa gaꞌmînj si ga̱ gu̱dadû nej suj ràꞌaj, ga̱ gudadû nej suj ngà chru dunuꞌmanꞌ huin sa gidigân nej sí chru̱n ley ngà nej sí saduseo.
12 Hiôꞌ ni̱ garânj daꞌngaꞌ ruhuâ nej sij si sê rayiꞌî chru dunuꞌmanꞌan huin gaꞌmin Ma̱ꞌan Jesús, dadinꞌ gaꞌmin si ga̱ gu̱dadû nej sij ngà nej yìꞌnï̀nꞌ nej nuguanꞌ gidigân nej sí chru̱n ley ngà nej sí saduseos.
Ganataꞌ Pedro si Ma̱ꞌan Jesús huin Cristo
13 Nga guchiꞌ Ma̱ꞌan Jesús riñan hioꞌó Sesarea huin doꞌó Filipo, ni̱ gachín naꞌan riñan nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
—Ahuin si huín gataj nej guiì ràꞌaj.
14 Ni̱ gataj nej sí gaꞌnaꞌ ga̱huin chru̱n riñanj:
—Da̱ꞌa̱j nej guiì gataj si huê Ma̱ꞌân rèꞌ huin Juan Bautista; ni̱ aꞌngô da̱ꞌa̱j ninj gataj si huê Ma̱ꞌân rèꞌ huin Elías; ni̱ aꞌngô da̱ꞌa̱j ninj gataj si huê Ma̱ꞌân rèꞌ huin Jeremías, ni̱ aꞌngô da̱ꞌa̱j ninj gataj si huê Ma̱ꞌân rèꞌ huin goꞌngo̱ nej sôꞌ gataj dàj ga̱huin.
15 Ni̱ gataj Ma̱ꞌan Jesús gu̱nïn nej sij:
—Ahuin si huín taj nej suj ràꞌaj.
16 Nanikàj Simón Pedro ni̱ gataj sôꞌ:
—Huê Ma̱ꞌân rèꞌ huin Cristo, Daꞌní Ma̱ꞌan Ñaꞌanj hua̱ nìꞌnàꞌa.
17 Hiôꞌ ni̱ nanikàj Ma̱ꞌan Jesús ni̱ gata:
—Ga̱na̱huin nìhiàꞌ ruhuâ sòꞌ na̱nj Simónꞌ, dadinꞌ huêꞌ huin daꞌní Jonás ni̱ sê nej guiì huin sa gidigân riñanꞌ mánj, dadinꞌ Ma̱ꞌan Rê nne yàtàꞌa huin sa gidigân riñanꞌ.
18 Ni̱ ñùnj ga̱ta̱j si hueꞌ huin Pedro, ni̱ riñan huej nânj ga̱na̱chi nikâ nej sôꞌ huin si-nùhuìj; ni̱ si̱ giꞌhiaj ga̱nân sichre ni̱ si̱ giꞌhiaj ga̱nân nej guiì ni̱ka̱j duguiꞌ ngà sichre nej guiì ga̱huin si-nùhuìj mánj.
19 Ni̱ rìkìj raꞌâꞌ nej agaꞌ ra̱ꞌa guendâ gi̱nikaj su̱nꞌ riñan nej guiì gi̱nikòꞌ rukú; ni̱ daranꞌ nej nuguanꞌ ga̱ꞌhue gi̱ꞌhiaj hiâꞌ riñan hioꞌóo ni̱ ga̱huin hia riñan Ma̱ꞌan Ñaꞌanj an ne̱ꞌ yàtàꞌa; ni̱ daranꞌ nej nuguanꞌ nun ga̱ꞌhue gi̱ꞌhiaj hiâꞌ riñan hioꞌó ni̱ hua̱ nîꞌnïnj man riñan Ma̱ꞌan Ñaꞌanj an neꞌ yàtàꞌa.
20 Hiôꞌ ni̱ gaꞌnïnꞌ sunj riñan daranꞌ nej sí ꞌna̱ꞌ ga̱huin chru̱n riñanj sisi̱ si̱ ganataꞌ nej sôꞌ riñan gàꞌ si ꞌngo̱ nej guiì si huê Ma̱ꞌan huin Cristo.
Ganataꞌ naꞌanj Ma̱ꞌan Jesús si ga̱huij
21 Àsìj orâ dânj ni̱ gayiꞌì Ma̱ꞌan Jesús ni̱ ganataꞌ nîꞌnïn riñan nej sí ꞌna̱ꞌ ga̱huin chru̱n riñanj, si hua̱ ni̱ña̱n si ga̱ꞌa̱n Jerusalén ni̱ ûta gi̱ranꞌ sàñùnj gi̱ꞌhiaj nej síchìj achij i, ngà nej rej huin ña̱an ni̱ nej sí maestrû chru̱n ley; ni̱ da̱gahuiꞌ nej sôꞌ Ma̱ꞌan sani̱ ga̱chi̱n huàꞌnï̀nj gui ni̱ ga̱na̱huin nìꞌnàꞌ Ma̱ꞌan siganï̂nj nej nîman.
22 Hiôꞌ ni̱ ginikaj anêj Pedro gaꞌanj sôꞌ Ma̱ꞌan, ni̱ gayiꞌì sôꞌ ni̱ ranꞌ sôꞌ Ma̱ꞌan ni̱ gataj sôꞌ:
—Señor, si̱ gaꞌnï̂nj Ma̱ꞌan Ñaꞌanj an; ni̱ si̱ giranꞌ sa̱ñu̱n Ma̱ꞌân rèꞌ gàꞌ si ꞌngo̱ nej sañun nânj mánj.
23 Sani̱ nanikàj Ma̱ꞌan Jesús ni̱ gata gu̱nïn Pedro:
—Gu̱xu̱n sichre sòꞌ maꞌânꞌ riñânj. Dadinꞌ huînꞌ ꞌngo̱ sa garanꞌ ñuꞌunj, dadinꞌ nitaj si giniꞌhiajꞌ riñan nej rasu̱un dàj rûnꞌ giniꞌhiaj Ma̱ꞌan Ñaꞌanj an mánj, dadinꞌ dànanj gaꞌnḯn ñanꞌ riñan nej rasu̱n garanꞌ ruhuâ nej síi.
24 Hiôꞌ ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
—Si hua̱ ꞌngo̱ nej suj huin ruhuâ gi̱nikòꞌ rukú ni̱ gu̱du̱nâj nej suj sa garanꞌ ruhuâ nneè kú nej suj, ni̱ gi̱daꞌa nej suj rugutsìi ni̱ ga̱ ruhuâ nej suj gi̱ranꞌ sa̱ñu̱n nej suj ni̱ gi̱nikòꞌ nej suj ga̱ꞌna̱ꞌ nej suj rukú.
25 Dadinꞌ daranꞌ nej guiì yuꞌhuiꞌ gàhuìꞌ rayiꞌí ni̱ gi̱ranꞌ sa̱ñu̱n ninj, ni̱ daranꞌ nej guiì nitaj si yuꞌhuiꞌ gàhuìꞌ rayiꞌí, ni̱ gànàrìꞌ ninj yiñán Ma̱ꞌan Ñaꞌanj an ga̱ne nìgànj ninj.
26 Dadinꞌ ahuin gue̱nda̱ niꞌñanj si gi̱ꞌhiaj ganân síi daranꞌ nej rasu̱n màn ruhuâ yumiguìi ga̱ riñan sôꞌ, si ga̱ꞌa̱nj ni̱ꞌhia̱ ma̱ꞌan nimân sôꞌ ràꞌaj. Ga̱ꞌhue na̱ruꞌhue sij rayiꞌî ma̱ꞌan nimân sij na̱nj nîꞌ.
27 Dadinꞌ gàꞌnàj neꞌ yàtàꞌa ngà sun ni̱ka̱j su̱n Ma̱ꞌan Re, ni̱ huê danj na̱nj ga̱ꞌna̱ꞌ nej ángel ngà Ma̱ꞌán, hiôꞌ ni̱ na̱ru̱ꞌhuej riñan daꞌ goꞌngo̱ nej guiì dàj na̱nj hua Ma̱ꞌan sa giꞌhiaj ninj.
28 Yàngàꞌ hia nï̀nꞌ tâ si hua̱ da̱ꞌa̱j nej guiì màn hiuj nânj, ni̱ si̱ gahuiꞌ ninj dadinꞌ dàñùn gi̱ni̱ꞌin ninj nga ga̱ꞌna̱ꞌ gi̱nikaj sùnj riñan ninj na̱nj ánj.