Gaꞌhuiꞌ Ma̱ꞌan Jesús ya ga̱ꞌânj mîn
8
Nej gui dânj ni̱ màn ûta gàꞌì nej guiì,
ni̱ nitaj si ni̱ka̱j ninj sa ya̱ ninj,
ni̱ gakḯn Ma̱ꞌan Jesús nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
2 —Gananï̂n àko ruhuâj niꞌín nej guiì,
dadinꞌ gàꞌ gisîj huàꞌnï̀nj gui mân ninj ngàj,
ni̱ nitaj si ni̱ka̱j ninj sa ya̱ ninj mánj;
3 Ni̱ si̱ ganaꞌnï̂n na̱nꞌ ninj dukuâ ninj dadinꞌ hua̱ gi̱ni̱ne̱j ninj,
ni̱ huaj ninj ni̱ gi̱ni̱chre ninj ruhuâ chrej e,
dadinꞌ hua̱ da̱ꞌa̱j ninj ꞌnaꞌ ûta gànꞌ.
4 Ni̱ nanikàj nej sí ꞌna̱ꞌ ga̱huin chru̱un ni̱ gataj nej sôꞌ:
—Dànèꞌ ga̱ꞌhue gìrìꞌ ꞌngo̱ síi rachrúun ya̱ nej guiì riñan hioꞌó nàkò nânj ràꞌaj.
5 Ni̱ gachín naꞌanj Ma̱ꞌan Jesús ni̱ gata:
—Andaj rachrúun nikaj nej suj ràꞌaj.
Ni̱ gataj nej sij:
—Chi̱j nikaj nej ñûnj.
6 Hiôꞌ ni̱ gaꞌnïnꞌ su̱n Ma̱ꞌan Jesús riñan daranꞌ nej guiì màn hiuj dânj si ga̱ꞌa̱nj ga̱ne ninj riñan hioꞌóo;
ni̱ gidaꞌa nej chi̱j rachrúun,
ni̱ nga gisîj gaꞌhuij si guruhuâ Ma̱ꞌan Ñaꞌanj an,
ni̱ guchraꞌ da̱ꞌa,
ni̱ gaꞌhuij raꞌa nej sí ꞌna̱ꞌ ga̱huin chru̱n riñanj guendâ ga̱daꞌngaꞌ nej sôꞌ riñan nej guiì;
huê danj ni̱ gaꞌhuiꞌ nej sôꞌ ya daranꞌ nej guiì màn hiuj dânj.
7 Ni̱ ni̱ka̱j nej sij do̱j nej yukuaj a gaꞌnaꞌ nej sij;
ni̱ gaꞌhuiꞌ nej sij raꞌa Ma̱ꞌan Jesús ni̱ gaꞌhuij si guruhuâ Ma̱ꞌan Ñaꞌanj an,
ni̱ gaꞌnïnꞌ sunj riñan nej sí ꞌna̱ꞌ ga̱huin chru̱un si gàꞌhuìꞌ nej sôꞌ raꞌa nej guiì màn hiuj dânj.
8 Ni̱ ya daranꞌ nej guiì màn hiuj dânj nda gunumân riki ninj;
ni̱ ganaranꞌ nej sij nej dasû lij gunâj dânj,
ni̱ ganachra chi̱j yugûti ganaranꞌ nej sij.
9 Ni̱ nej guiì ya gahuin daꞌngaꞌ ꞌngo̱ si gaꞌânj mîn;
ni̱ ganaꞌnïn nanꞌ nej guiì dukuâ ninj.
10 Ni̱ nga gatûj Ma̱ꞌan Jesús ruhuâ barku ngà nej sí ꞌna̱ꞌ ga̱huin chru̱n riñanj,
ni̱ gaꞌnaj riñan hioꞌó gùꞌnàj Dalmanuta.
Gachín nìꞌhiaj nej sí fariseo si gi̱ꞌhiaj Ma̱ꞌan Jesús ga̱na̱huin nej guiì
11 Ni̱ gaꞌnaꞌ nej sí fariseo ni̱ gayiꞌì nej sôꞌ ni̱ ganarïsnaꞌanj nej sôꞌ ngà Ma̱ꞌan Jesús,
ni̱ gachín nej sôꞌ ꞌngo̱ daꞌngaꞌ ꞌna̱ꞌ neꞌ yàtàꞌa,
guendâ ruhuâ nej sôꞌ ga̱ra̱n hue̱ nej sôꞌ Ma̱ꞌan.
12 Ni̱ ganarânj guchej Ma̱ꞌan Jesús ngà nanè nimanj ni̱ gata:
—Nùnj huin saj ni̱ gachín nej guiì màn diû nânj ꞌngo̱ daꞌngaꞌa ràꞌaj.
Yàngàꞌ hia nï̀nꞌ tâ ni̱ si̱ gaꞌhue gi̱ni̱ꞌin nej guiì nânj daꞌngaꞌa mánj.
13 Ni̱ guduna nej sí dânj ni̱ gatu ruhuâ barku ngà nej sí ꞌnaꞌ gahuin chru̱n riñanj,
ni̱ gaꞌan ané duꞌhua nne ña̱ꞌa̱nj.
Ga̱ gu̱dadû ngà nej sa gidigân nej sí fariseo
14 Ni̱ giniꞌñûn nej sij gi̱nikaj nej sij rachrúun ga̱ꞌna̱ꞌ nej sij,
ni̱ man ꞌngo̱ rïn rachrúun nikaj nej sij ꞌnaꞌ nej sij ruhuâ barku.
15 Ni̱ gaꞌnïnꞌ sunj riñan nej sij ni̱ gata:
—Ni̱ꞌhiaj nej suj;
ni̱ ga̱ gudadû nej suj ngà chru dunuꞌmanꞌ garânj sun nej sí fariseo ngà Herodes,
nânj huin sa gidigân nej sôꞌ.
16 Ni̱ ganarïsnaꞌanj nej sí ꞌna̱ꞌ ga̱huin chru̱n riñanj siganï̂nj nej ma̱ꞌan nej sôꞌ ni̱ gataj nej sôꞌ:
—Gaꞌmin Ma̱ꞌan Jesús dànanj dadinꞌ nun gi̱nikaj nêꞌ rachrúun ga̱ꞌna̱ꞌ nêꞌ.
17 Ni̱ garânj daꞌngaꞌ ruhuâ Ma̱ꞌan Jesús sa taj nej sij ni̱ gata gu̱nïn nej sij:
—Ahuin si ràyìꞌì ganarïsnaꞌanj nej suj ràꞌaj,
ganarïsnaꞌanj nej suj rayiꞌî guendâ nitaj rachrúun nikaj nej suj ꞌnaꞌ nej suj nîꞌ.
Hua̱ nï̀nꞌ hua tsì ruhuâ nimân nej suj na̱nj nîꞌ.
18 Hua̱ rune ñan nej suj ni̱ naꞌhue gi̱ni̱ꞌin nej suj,
ni̱ tàj hiuꞌuj u rakïj nej suj ni̱ naꞌhue gu̱nïn nej suj.
Ni̱ naꞌhue ga̱na̱nun ruhuâ nej suj ûnꞌ.
19 Nga guchraꞌ da̱ꞌa nej ùnꞌùnꞌ rachrúun siganï̂nj nej ùnꞌùnꞌ mîn nej guiì,
ni̱ andaj yugûti gachra nga ganaranꞌ nej suj ràꞌaj.
Ni̱ gataj nej sij:
—Yùhuìj.
20 —Ni̱ nga guchraꞌ da̱ꞌa nej chi̱j rachrúun ni̱ gisi yâ gaꞌânj mîn nej guiì.
Andaj yugûti ganachra nej dasû lij nej rachrún dânj ganaranꞌ nej suj ràꞌaj.
Ni̱ gataj nej sij:
—Chi̱j.
21 Ni̱ gata:
—Nùnj huin saj ni̱ hua na̱nj naꞌhue ga̱ra̱n daꞌngaꞌ ruhuâ nej suj ràꞌaj.
Giꞌhiaj Ma̱ꞌan Jesús si ga̱na̱huin ꞌngo̱ sí du̱chri ruhuâ yumanꞌ Betsaida
22 Ni̱ gaꞌnaꞌ Ma̱ꞌan Jesús ñan nngaj yumanꞌ Betsaida;
ni̱ ni̱ka̱j nej sí màn hiuj dânj gaꞌnaꞌ nej sôꞌ ꞌngo̱ sí hua̱ du̱chri,
ni̱ gachín nìꞌhiaj nej sôꞌ si gàgànꞌ raꞌa Ma̱ꞌan Jesús sí dânj.
23 Hiôꞌ ni̱ gidaꞌa Ma̱ꞌan Jesús raꞌa sí du̱chri dânj,
ni̱ girij nika gaꞌan duꞌhua yumanꞌan sôꞌ;
ni̱ gachra stanu nguèj rune ñan sôꞌ,
ni̱ gutaj raꞌa ahui sôꞌ ni̱ gachín naꞌan si guruguiꞌ giniꞌhiaj sôꞌ do̱j.
24 Ni̱ ganachi nikaj ñan sí dânj ni̱ giniꞌhiaj sôꞌ ni̱ gataj sôꞌ:
—Guruguiꞌ giniꞌhiâ nej síi ni̱ dàj rûnꞌ hua nej chrun hua nej sij na̱nj ánj.
25 Ni̱ gutaꞌ ñûn Ma̱ꞌan Jesús raꞌa nguèj rune ñan sí dânj ni̱ gata si gi̱ni̱ꞌhiaj sô;
huê danj ni̱ ganahuin nguèj rune ñan sôꞌ,
ni̱ giyigï̀n giniꞌhiaj sôꞌ nda ga̱nꞌ ni̱ nda hueꞌê chre guruguiꞌ giniꞌhiaj sôꞌ daranꞌ nej guiì.
26 Ni̱ ganaꞌnḯn Ma̱ꞌan Jesús nanꞌ sí dânj dukuâ sôꞌ ni̱ gata gu̱nïn sôꞌ:
—Si gatûjꞌ ruhuâ yumanꞌ nânj mánj,
ni̱ gàꞌ si ganatâꞌ gu̱nïn nej guiì màn yumanꞌ nânj mánj.
Ganataꞌ Pedro si Ma̱ꞌan Jesús huin Cristo
27 Gahui Ma̱ꞌan Jesús ni̱ gaꞌan yumanꞌ Sesarea huin doꞌó Filipo ngà nej sí gaꞌnaꞌ ga̱huin chru̱n riñanj.
Ni̱ nga aché nej sij huaj nej sij ni̱ gachín naꞌan nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ.
—Dàj taj nej síi ni̱ ahuin sa huín taj nej sôꞌ ràꞌaj.
28 Ni̱ nanikàj nej sôꞌ ni̱ gataj nej sôꞌ:
—ꞌNgo̱ nej sij taj si huê Ma̱ꞌân rèꞌ huin Juan Bautista;
ni̱ aꞌngô nej sij taj si huê Ma̱ꞌân rèꞌ huin Elias;
ni̱ aꞌngô nej sij taj si huê Ma̱ꞌân rèꞌ huin goꞌngo̱ nej sôꞌ gataj dàj ga̱huin.
29 Ni̱ gataj Ma̱ꞌan Jesús:
—Ni̱ ahuin sa huín taj nej suj ràꞌaj.
Hiôꞌ ni̱ gataj Pedro:
—Huê Maꞌân rèꞌ huin Cristo.
30 Sani̱ gaꞌnïnꞌ su̱n Ma̱ꞌan Jesús riñan nej sí ꞌna̱ꞌ ga̱huin chru̱n riñanj sisi̱ si̱ ganataꞌ nej sôꞌ riñan gàꞌ si ꞌngo̱ nej guiì ahuin sa huin Ma̱ꞌan.
Gataj Ma̱ꞌan Jesús si ga̱huij
31 Dadinꞌ gidiganj riñan nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
Hua̱ ni̱ña̱n si ûta giranꞌ sàñùnj,
ni̱ si̱ gininj hueꞌê riñan nej síchìj achij i,
riñan nej rej ni̱ riñan nej sí chru̱n ley ni̱ da̱gahuiꞌ nej sôꞌ ñùnj.
Sani̱ nga gahuí ni̱ ga̱chin huàꞌnï̀nj gui ni̱ gànàꞌnï̀n siganï̂nj nej nîman.
32 Ni̱ nda nîꞌnï̀nj chre gaꞌmin Ma̱ꞌan.
Hiôꞌ ni̱ gakḯn anêj Pedro Ma̱ꞌan ni̱ ranꞌ sôꞌ Ma̱ꞌan.
33 Sani̱ nanikàj Ma̱ꞌan ni̱ giniꞌhia riñan nej sí ꞌna̱ꞌ ga̱huin chru̱n riñanj ni̱ dugunïn gàꞌij Pedro ni̱ gata gu̱nïn sôꞌ:
—Gu̱xu̱n ma̱ꞌânꞌ riñânj sichrej.
Dadinꞌ nitaj si nu̱n ruhuâ ahuîꞌ nej rasu̱n garanꞌ ruhuâ Ma̱ꞌan Ñaꞌanj an mánj,
dadinꞌ gaꞌnḯn ñanꞌ riñan nej rasu̱n garanꞌ ruhuâ nej síi.
34 Ni̱ gakï̱n nej guiì ngà nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
—Si hua̱ ꞌngo̱ nej suj ruhuâ gi̱nikòꞌ rukú Ma̱ꞌán,
ni̱ gu̱du̱nâj nej suj nej sa garanꞌ ruhuâ nneè kú nej suj,
ni̱ ga̱ ruhuâ nej suj gi̱ranꞌ sa̱ñu̱n nej suj,
ni̱ gi̱nikòꞌ nej suj rukû Maꞌán.
35 Dadinꞌ daranꞌ nej guiì ruhuâ ga̱na̱ni̱n riñan sañun hua̱ ruhuâ yumiguìi nânj ni̱ naꞌhuej ruhuâ ninj gàhuìꞌ ninj rayiꞌí,
ni̱ si ganariꞌ ninj ñan ni̱ka̱j su̱n Ma̱ꞌan Ñaꞌanj an ga̱ne ninj mánj,
sani̱ daranꞌ nej guiì hua̱ ruhuâ gàhuìꞌ rayiꞌí ni̱ ngà rayiꞌî nuguanꞌ giꞌhiaj ga̱na̱ni̱n ninj,
ni̱ ga̱na̱ni̱n ninj na̱nj ánj.
36 Dadinꞌ ahuin gue̱nda̱ niꞌñanj si ûta gìrìꞌ nej guiì nej rasu̱n màn ruhuâ yumiguìi nânj ga̱ riñan ninj,
si ga̱ꞌa̱nj ni̱ꞌhia̱ ma̱ꞌan nimân ninj ràꞌaj.
37 Ni̱ ahuin si gìrìꞌ nej guiì na̱ruꞌhue ninj rayiꞌî ma̱ꞌan nimân ninj ràꞌaj.
38 Dadinꞌ ahuin na̱nj guiì giriꞌ sinàꞌàj a rayiꞌí ngà rayiꞌî si-nùguànꞌànj diû màn nej sí giꞌhiaj gakï̱nꞌ nânj,
ni̱ gìrìꞌìj sinàꞌàj a rayiꞌî ninj nga gàꞌnàj ni̱ gaꞌnaꞌ nej ángel gèe ni̱ gi̱nikaj sùnj si-su̱n Ma̱ꞌan Re Ñaꞌanj an na̱nj ánj.