Sa giꞌhiaj ganahuin kï̱j nimân nej síi
15
Hiôꞌ ni̱ gaꞌnaꞌ nichì da̱ꞌa̱j nej sí maestrû chru̱n ley ngà nej sí fariseo ꞌna̱ꞌ Jerusalén riñan Ma̱ꞌan Jesús, ni̱ gataj nej sôꞌ:
2 —Nùnj huin saj ni̱ nej sí ꞌna̱ꞌ ga̱huin chru̱n riñan Ma̱ꞌân rèꞌ ni̱ nitaj si ni̱ka̱j chre̱j nej sôꞌ nej nuguanꞌ gidigân nej síchìj achij i ràꞌaj. Dadinꞌ nitaj si naniꞌhiaꞌ nej sôꞌ raꞌa nej sôꞌ nga yâ nej sôꞌ ràꞌaj.
3 Nanikàj Ma̱ꞌan Jesús ni̱ gata:
—Nùnj huin saj ni̱ nitaj si ni̱ka̱j chre̱j nej suj daranꞌ nej nuguanꞌ gaꞌnïnꞌ su̱n Ma̱ꞌan Ñaꞌanj an ngà chrej yìñànj nikaj nej suj ràꞌaj.
4 Dadinꞌ gaꞌnïnꞌ su̱n Ma̱ꞌan Ñaꞌanj an ni̱ gata: “Gi̱nikaj chre̱j riñan rét ni̱ huê danj na̱nj gi̱nikaj chrej riñan nnît”, ni̱ “ahuin na̱nj sí gaꞌmin kï̱j riñan rej ngà riñan nni ni̱ hua̱ ni̱ña̱n si du̱guaꞌì nej sij ni̱ daꞌhui sij gàhuìꞌ sij na̱nj ánj.”
5 Sani̱ gataj nej suj: Si ga̱ꞌhue ga̱ta̱j ꞌngo̱ síi gu̱nïn rej sôꞌ ngà gu̱nïn nni sôꞌ: “Si̱ gaꞌhue gu̱ru̱gûñuꞌun sòꞌ, dadinꞌ daranꞌ nej sa hua̱ riñânj ni̱ huin ofrenda gàꞌ gaꞌhuí riñan Ma̱ꞌan Ñaꞌanj an na̱nj ánj”;
6 ni̱ gataj nej suj si ahuin na̱nj sí gataj dànanj, ni̱ nitaj si daꞌhui sôꞌ gu̱ru̱gûñuꞌunj sôꞌ rej sôꞌ ngà nni sôꞌ. Huê danj ni̱ gudurëꞌ nej suj nej nuguanꞌ gaꞌnïnꞌ su̱n Ma̱ꞌan Ñaꞌanj an riñan nej suj dadinꞌ dànanj nikaj chre̱j nej suj chrej yìñànj giri rà nej síchìj achij i.
7 Sí gidigañuꞌunj un nej suj gàꞌ manꞌ, ni̱ dùgùnàj hua nuguanꞌ gaꞌmin Isaias sôꞌ gataj dàj ga̱huin rayiꞌî nej suj nga gataj sôꞌ:
8 Yumanꞌ nânj ni̱ man ngà nnïnj duꞌhua nikaj chre riñânj;
sani̱ ûta ga̱nꞌ nne nimanj riñânj.
9 Nitaj nùnj gue̱nda̱ niꞌñanj si ni̱ka̱j chre̱j ninj riñânj mánj,
dadinꞌ nej yìꞌnï̀nꞌ sa gidigân ninj ni̱ huin nej nuguanꞌ giri ra̱ nej síi.
10 Ni̱ gakḯn Ma̱ꞌan Jesús nej guiì rigìi ni̱ gata gu̱nïn ninj:
—Gu̱nïn nej suj ni̱ ga̱ra̱n daꞌngaꞌ ruhuâ nej suj:
11 Sê nej sa gatûj ruhuâ duꞌhua síi huin sa gàꞌhuìꞌ yìꞌì sôꞌ mánj; nej nuguanꞌ kï̱j gahui ruhuâ duꞌhua sôꞌ, huê nej nuguanꞌ dânj huin sa gàꞌhuìꞌ yìꞌì sôꞌ.
12 Hiôꞌ ni̱ gaꞌnaꞌ nichì nej sí ꞌna̱ꞌ ga̱huin chru̱un riñan Ma̱ꞌan Jesús ni̱ gataj nej sôꞌ:
—Giniꞌin Ma̱ꞌân rèꞌ si ginaꞌan ruhuâ nej sí chru̱n ley nga gunïn nej sôꞌ nej nuguanꞌ nânj nîꞌ.
13 Sani̱ nanikàj Ma̱ꞌan Jesús ni̱ gata:
—Daranꞌ nej koj nun gu̱nu̱n Ma̱ꞌan Rê nne yàtàꞌa ni̱ gi̱ri̱hia na̱nj ánj.
14 Gu̱du̱naj nej suj nej sij; dadinꞌ duchri huin nej sij ni̱ huê danj na̱nj hua du̱chri nej guiì riñan gidigân nej sij; ni̱ si gidigân ꞌngo̱ sí du̱chri aꞌngô sí du̱chri, ni̱ gu̱ña̱n chre ni̱ gi̱ni̱nj nguèj sij ruhuâ ꞌngo̱ hiuꞌuj u.
15 Nanikàj Pedro, ni̱ gataj sôꞌ:
—Gànàtàꞌ rèꞌ riñan nej ñûnj, nùnj huin si ga̱ta̱j nuguanꞌ rán gaꞌmin rèꞌ.
16 Nanikàj Ma̱ꞌan Jesús ni̱ gata:
—Hua̱ na̱nj naꞌhue ga̱ra̱n daꞌngaꞌ ruhuâ nej suj mínj.
17 Nun garânj daꞌngaꞌ ruhuâ nej suj si daranꞌ nej sa gatûj ruhuâ duꞌhua nej guiì ni̱ huaꞌan ruhuâ riki ninj, ni̱ neꞌ rùkù ni̱ huaꞌan ruhuâ bâñun mínj.
18 Sani̱ nej nuguanꞌ kï̱j gahui ruhuâ duꞌhua nej guiì; ni̱ ruhuâ nimân ninj gahui; ni̱ nej nuguanꞌ kï̱j hua nânj huin sa gaꞌhuiꞌ yìꞌì aꞌngô nej guiì.
19 Dadinꞌ ruhuâ nimân nej guiì gahui nej nuguanꞌ kï̱j huaa, ruhuâ ninj da̱gahuiꞌ ninj, ruhuâ ninj gi̱nikaj ninj nika duguiꞌ ninj, ruhuâ ninj ga̱ne sìgìchràꞌ ninj, ni̱ ganï̂n ruhuâ ninj giꞌhiaj tu̱ ninj, ni̱ ganï̂n ruhuâ ninj gànàtàꞌ ninj nuguanꞌ gidigañuꞌunj, ganï̂n ruhuâ ninj ga̱ꞌmi̱n kïj ninj yiꞌî Ma̱ꞌan Ñaꞌanj an.
20 Nej gakï̱nꞌ nânj huin sa gaꞌhuiꞌ yìꞌì nej guiì; sani̱ guendâ yâ ninj nga nun nànìꞌhiàꞌ ninj raꞌa ninj ni̱ sê gakï̱nꞌïn huin ôꞌ mánj.
Dàj nìko yuman ruhuâ siyànà ꞌnaꞌ riñan hioꞌó Kanaán
21 Gahui Ma̱ꞌan Jesús hiuj dânj, ni̱ gaꞌan riñan hioꞌó Tiro ngà riñan Sidón.
22 Ni̱ gaꞌnaꞌ nichì ꞌngo̱ siyànà ꞌna̱ꞌ riñan hioꞌó Kanaán ni̱ gaꞌmin nùkua ni̱ gata:
—Señor, Daꞌní David, ni̱ ga̱na̱nï̱n àko ruhuâ Ma̱ꞌân rèꞌ niꞌîn rèꞌ ñùnj dadinꞌ ûta giranꞌ sa̱ñu̱n daꞌnin yànàj giꞌhiaj ꞌngo̱ sa kï̱j ï.
23 Sani̱ nun du̱nanikàj Ma̱ꞌan Jesús gàꞌ si ꞌngo̱ nuguanꞌan riñan siyànà nânj. Hiôꞌ ni̱ gaꞌnaꞌ nichì nej sí ꞌna̱ꞌ ga̱huin chru̱un, ni̱ gachín nìꞌhiaj nej sôꞌ riñan Ma̱ꞌan Jesús ni̱ gataj nej sôꞌ:
—Gànàꞌnï̀nj Ma̱ꞌân rèꞌ na̱nꞌ siyànà nan, dadinꞌ nitaj si yichinꞌ si ga̱ꞌmi̱n riñan nêꞌ mánj.
24 Nanikàj Ma̱ꞌan Jesús, ni̱ gata:
—Gaꞌnḯn Ma̱ꞌan Ñaꞌanj an gaꞌná man riñan nej matsïj gaꞌanj ni̱ꞌhia̱ huin yumanꞌ Israel na̱nj ánj.
25 Hiôꞌ ni̱ gaꞌnaꞌ siyànà nânj ni̱ ganikïnꞌ rúdàko riñan Ma̱ꞌan Jesús, ni̱ gata:
—Señor, gu̱ru̱gûñuꞌunj Maꞌân rèꞌ ñùnj na̱nj ánj.
26 Nanikàj Ma̱ꞌan Jesús, ni̱ gata:
—Nitaj si dùgùnàj huaj si ga̱ꞌne̱ꞌ rachrún ya̱ nej daꞌnîn, ni̱ gàꞌhuìꞌ ya̱ nej yuhue mánj.
27 Ni̱ gataj siyànà dânj:
—Yàngàꞌ, Señor; sani̱ nej yuhue ni̱ ganaranꞌ nej xuj yâ nej xuj nej dasû rachrún gininj riki si-mesa rikiꞌ nej xuj na̱nj ánj.
28 Hiôꞌ ni̱ nanikàj Ma̱ꞌan Jesús, ni̱ gata:
—Aya̱ꞌ siyànà sòꞌ gàꞌ mánj, ûta nìko guyumân ruhuâꞌ; ni̱ ga̱ꞌhue rìkìj sa gachínꞌ.
Ni̱ àsìj orâ nga gaꞌmin Ma̱ꞌan Jesús dànanj ni̱ ganahuin daꞌní siyànà dânj.
Giꞌhiaj Ma̱ꞌan Jesús si ganahuin Ûta gàꞌì nej guiì
29 Gachîn Ma̱ꞌan Jesús hiuj dânj gaꞌan ni̱ guchij nìchrùnꞌ duꞌhua nne ña̱ꞌa̱nj gùꞌnàj Galilea; ni̱ gahui gaꞌan raa̱ kïj ni̱kï̱nꞌ hiuj dânj, ni̱ gaꞌanj ga̱ne.
30 Ni̱ naraꞌhuiꞌ ûta gàꞌì nej guiì ñan nne Ma̱ꞌan Jesús. Ni̱ ni̱ka̱j ninj gaꞌnaꞌ ninj nej guiì naꞌhue ga̱che̱, nej guiì go̱ꞌoj, nej guiì naꞌhue ga̱ꞌmi̱n, nej guiì hua̱ ru̱ꞌu nneè kú, ni̱ huê danj na̱nj giꞌhia si ga̱na̱huin ûta gàꞌì nej guiì aꞌnanꞌan; ni̱ gaꞌanj rë̱ꞌë̱j ninj nej guiì aꞌnanꞌ dânj yiꞌî Ma̱ꞌan Jesús, ni̱ giꞌhia ga̱na̱huin nej guiì dânj;
31 Ni̱ ûta gahuin ña̱ꞌanj ruhuâ daranꞌ nej guiì màn hiuj dânj, nga giniꞌin ninj gaꞌhue gaꞌmin nej guiì ꞌmìnj in, ni̱ ganahuin nneè kú nej guiì hua̱ ruꞌu nneè kú, ni̱ gaꞌhue gaché nej guiì go̱chro̱j o, ni̱ gaꞌhue giyigï̀n gi̱ni̱ꞌhiaj nej guiì go̱ꞌoj ni̱ gaꞌmin hueꞌê nej guiì niꞌin ninj Daꞌanj yumanꞌ Israel.
Gaꞌhuiꞌ Ma̱ꞌan Jesús ya ga̱ꞌânj mîn síi
32 Ni̱ ganakḯn Ma̱ꞌan Jesús, nej guiì ꞌna̱ꞌ ga̱huin chru̱n riñanj ni̱ gata:
—Gananï̂n àko ruhuâj niꞌín nej guiì dadinꞌ gàꞌ gisîj huàꞌnï̀nj gui nne ninj ngàj; ni̱ nitaj nùnj nikaj ninj ya̱ ninj mánj; ni̱ si̱ ganaꞌnï̂n na̱nꞌ ninj dukuâ dadinꞌ nï̀nꞌ hua gi̱ni̱ne̱j ninj rûꞌhuaj, dadinꞌ ga̱ꞌhue si gi̱ni̱nj ru̱mi̱nꞌ ninj nga aché ninj huaj ninj.
33 Hiôꞌ ni̱ gataj nej sí gaꞌnaꞌ gahuin chru̱un riñan Ma̱ꞌan Jesús:
—Dàj gi̱ꞌhioꞌ ga̱ꞌhue gìrìꞌ gàꞌhuìꞌ sa ya̱ nej guiì rìgì màn hiuj nânj, dadinꞌ nitaj nùnj mân riñan hioꞌó hua̱ niꞌnï̱nj nânj ràꞌaj.
34 Ni̱ gataj Ma̱ꞌan Jesús:
—Andaj rachrúun nikaj nej suj ràꞌaj. Ni̱ gataj nej sí ꞌna̱ꞌ ga̱huin chru̱un: Chi̱j rachrúun nikaj nej ñûnj, ni̱ do̱j nï̀nꞌ yukuaj a nikaj nej ñûnj na̱nj ánj.
35 Ni̱ gaꞌnïnꞌ sunj riñan nej guiì si ga̱ꞌa̱nj ga̱ne ninj riñan hioꞌóo.
36 Ni̱ gidaꞌa nej chi̱j rachrúun ngà nej yukuaj a, ni̱ gaꞌhuij si guruhuâ Ma̱ꞌan Ñaꞌanj an, ni̱ gaꞌneꞌ da̱ꞌa nej rachrúun ni̱ gaꞌhuij raꞌa nej sí ꞌna̱ꞌ ga̱huin chru̱n riñanj, ni̱ gadaꞌngaꞌ nej sôꞌ raꞌa daranꞌ nej guiì.
37 Ni̱ yâ daranꞌ nej guiì ni̱ gunumân riki ninj; ni̱ hua̱ na̱nj ganachra nda chi̱j yugûti rachrún dasû lij gunâj ganaranꞌ nej sij.
38 Yâ gaꞌânj mîn nej síi, sani̱ nun ga̱hia̱ nej sij nej siyànàa ngà nej sílìj i mánj.
39 Neꞌ rùkù nânj, ni̱ ganaꞌnḯn Ma̱ꞌan Jesús na̱nꞌ nej guiì dukuâ ninj, ni̱ gatu ruhuâ barku, ni̱ gaꞌnaj riñan hioꞌó Magdala.