Sa giꞌhiaj yìꞌì nimân nej guiì
7
Ni̱ gaꞌanj nichì nej sí fariseo riñan Ma̱ꞌan Jesús,
ni̱ huê danj na̱nj naraꞌhuiꞌ da̱ꞌa̱j nej sí chru̱n ley,
nej sôꞌ ꞌna̱ꞌ yumanꞌ snàꞌànj Jerusalén.
2 Ni̱ giniꞌin nej sí nânj,
si hua̱ da̱ꞌa̱j nej sí ꞌna̱ꞌ ga̱huin chru̱n riñan Ma̱ꞌan Jesús,
ni̱ hua̱ kï̱j raꞌa nej sôꞌ ni̱ nun nànìꞌhiàꞌ nej sôꞌ nga yâ nej sô rachrúun,
ni̱ rayiꞌî dânj ni̱ gataj nej sij si gininj nej sôꞌ riñan gakï̱nꞌïn.
3 (Dadinꞌ nej fariseo nga daranꞌ nej judío,
ni̱ ûta nikaj chre̱j nej sij si-chrej nej síchìj achij i,
ni̱ nga nitaj si naniꞌhiaꞌ nej sij raꞌa nej sij,
hiôꞌ ni̱ nitaj si yâ nej sij mánj.
4 Ni̱ nga gunumân nej sij gaꞌanj nej sij raꞌhuee,
ni̱ nga nun nànìꞌhiàꞌ nej sij raꞌa nej sij hiôꞌ ni̱ nitaj si yâ nej sij.
Ni̱ ni̱ka̱j chre̱j nej sij chrej giri raa̱ nej ma̱ꞌan nej sij,
huê danj na̱nj ganaꞌnïnꞌ nej sij nej basû garânj sun nej sij nga goꞌo nej sij nnee,
ni̱ huê danj na̱nj ganaꞌnïnꞌ nej sij nej gukuaj a,
huê danj na̱nj ganaꞌnïnꞌ nej sij nej ruj agaꞌ garânj sun nej sij,
ni̱ huê danj na̱nj ganaꞌnïnꞌ nej sij na tàj nej sij.)
5 Ni̱ gachín naꞌanj nej sí fariseo ngà nej sí chru̱n ley Ma̱ꞌan Jesús ni̱ gataj nej sôꞌ:
—Nùnj huin saj ni̱ nej sí ꞌna̱ꞌ ga̱huin chru̱n riñan Ma̱ꞌân rèꞌ ni̱ nitaj si dagahuin nej sôꞌ nej chrej gidigân nej síchìj achij i,
dadinꞌ yâ nej sôꞌ nga hua kï̱j raꞌa nej sôꞌ ràꞌaj.
6 Ni̱ nanikàj Ma̱ꞌan Jesús ni̱ gata:
—Sí gidigañuꞌunj un huin nej suj ni̱ dùgùnàj hua sa gaꞌmin Isaias rayiꞌî nej suj,
ni̱ huê danj gachrûn sôꞌ riñan ñanj:
Yumanꞌ nânj ni̱ man ngà nnïnj duꞌhua nej guiì ginikaj chre̱j ninj riñânj,
sani̱ gahuin anêj nimanj ninj riñânj.
7 Nitaj nùnj gue̱nda̱ niꞌñanj ginûn ña̱ꞌa̱nj nej sij riñânj,
dadinꞌ sa gidigân nej sij gahuin nej yìꞌnï̀nꞌ nuguanꞌ giri raa̱ nej síi.
8 Dadinꞌ gudunâj nej suj nej nuguanꞌ gaꞌnïnꞌ su̱n Ma̱ꞌan Ñaꞌanj an,
ni̱ ûta nìchràj ruhuâ nej suj guendâ gi̱digân nej suj nej chrej giri raa̱ nej síi.
9 Ni̱ huê danj na̱nj gataj Ma̱ꞌan Jesús:
—Hiôꞌ ni̱ gudurëꞌ nej suj nej nuguanꞌ gaꞌnïnꞌ su̱n Ma̱ꞌan Ñaꞌanj an,
dadinꞌ dànanj dagahuin nej suj nej nuguanꞌ gidigân nej síchìj achij i.
10 Dadinꞌ gataj Moisés:
“Gi̱nikaj chre̱j nej suj riñan rej nej suj ngà riñan nni nej suj”,
“Ni̱ sí gaꞌmin si ga̱ꞌna̱ꞌ sa yìꞌìi riñan rej ngà riñan nni,
ni̱ yìtï̀nj chre daꞌhui sôꞌ gàhuìꞌ sôꞌ.”
11 Sani̱ gataj nej suj:
Si ga̱ꞌhue ga̱ta̱j ꞌngo̱ síi gu̱nïn rej sôꞌ ngà gu̱nïn nni sôꞌ:
“Si̱ giriꞌí sanꞌanj an rìkìj riñan nguèj suj,
dadinꞌ daranꞌ sanꞌanj nìkà ni̱ sanꞌanj corbán huin rûꞌhuaj” (ni̱ Corbán ruhuaj ga̱ta sanꞌanj gàꞌhuìj riñan Ma̱ꞌan Ñaꞌanj an huin na̱nj ánj).
12 Ni̱ huê danj ni̱ nitaj si gaꞌnï̂nj nej suj,
si gu̱ru̱gûñuꞌunj nej síi rej nej sôꞌ ngà nni nej sôꞌ.
13 Ni̱ huê dànanj giꞌhiaj nej suj ni̱ gudurëꞌ nej suj si-nùguànꞌ Ma̱ꞌan Ñaꞌanj an dadinꞌ gidigân nej suj nej chrej giri ra̱ nej ma̱ꞌan nej suj ni̱ duguachîn nej suj nej nuguanꞌ nânj riñan ꞌngo̱ ni̱ aꞌngô nej guiì.
Ni̱ huê dàj rûnꞌ ginikaj chre̱j nej suj ngà chrej nânj huê danj gi̱nikaj chre̱j nej suj ngà aꞌngô nej chrej giri ra̱ nej síi.
14 Ni̱ gakḯn ñûn Ma̱ꞌan Jesús gaꞌnaꞌ daranꞌ nej guiì riñanj ni̱ gata gu̱nïn ninj:
—Gu̱nïn daranꞌ nej suj sa ga̱ꞌmi̱n,
ni̱ ga̱ra̱n daꞌngaꞌ ruhuâ nej suj.
15 Gàꞌ si ꞌngo̱ nej sa yâ nej guiì ni̱ nga gatu ruhuâ riki ninj ni̱ si̱ nagiꞌhiaj kïj ninj mánj;
dadinꞌ daranꞌ nej nuguanꞌ kï̱j gahui ruhuâ duꞌhua nej guiì ni̱ nda ruhuâ nîman ninj gahui nej nuguanꞌ dânj,
ni̱ huê nej nuguanꞌ dânj huin sa nagiꞌhiaj kï̱j ninj.
16 Si hua̱ ꞌngo̱ nej suj tá hiuꞌuj rakïj guendâ gu̱nïn,
ni̱ gu̱nïn nej suj.
17 Ni̱ gahuin anêj Ma̱ꞌan Jesús ñan màn nej guiì rigì dânj ni̱ gatu ruhuâ hueꞌe,
ni̱ gachín naꞌanj nej sí ꞌna̱ꞌ ga̱huin chru̱n riñanj nùnj huin si ga̱ta̱j nuguanꞌ rán dânj ruhuâꞌ.
18 Ni̱ gataj Ma̱ꞌan Jesús gu̱nïn nej sij:
—Hua̱ na̱nj naꞌhue ga̱ra̱n daꞌngaꞌ ruhuâ nej suj mínj.
Nun garânj daꞌngaꞌ ruhuâ nej suj si daranꞌ nej sa gatûj ruhuâ riki nej guiì,
ni̱ si giꞌhia si ga̱na̱huin ninj guiì gakï̱nꞌïn mínj,
19 dadinꞌ nitaj si gatu ruhuâ nîman ninj mánj,
dadinꞌ man ruhuâ riki ninj gatu,
ni̱ neꞌ rùkù ni̱ riꞌî ninj.
—Daranꞌ nej nuguanꞌ gahui ruhuâ duꞌhua nej guiì,
ôꞌ huin sa giꞌhiaj si ga̱na̱huin ninj sa kï̱j huaa.
21 Dadinꞌ nda neꞌ rùhuà nimân nej guiì gahui,
nej nuguanꞌ kï̱j ganï̂n ruhuâ ninj gi̱ꞌhiaj ninj,
ni̱ ganï̂n ruhuâ ninj gi̱nikaj ninj nika duguiꞌ ninj,
ni̱ ganï̂n ruhuâ ninj ga̱che̱ sìgìchràꞌ ninj,
ganï̂n ruhuâ ninj da̱gahuiꞌ ninj.
22 Ganï̂n ruhuâ ninj gi̱ꞌhiaj tu̱ ninj,
ruhuâ ninj gaj doj riñan ninj,
ganï̂n ruhuâ ninj gi̱ꞌhiaj yiꞌì ninj nej duguiꞌ ninj,
ganï̂n ruhuâ ninj gi̱di̱gañuꞌunj ninj,
ûta huin ruhuâ ninj gi̱ni̱nj ninj gakï̱nꞌïn ngà nej siyànàa,
huin yìkòj ruhuâ ninj,
gaꞌmin yìꞌì ninj riñan nej duguiꞌ ninj,
ûta huin ninj ruhuâ ninj ni̱ nitaj si chru̱n ninj ga̱na̱ka̱j guendâ ninj.
23 Daranꞌ nej sa aꞌnanꞌ nânj ni̱ ruhuâ nimân ninj gahui,
ni̱ nagiꞌhiaj kïj ninj.
Ûta nìko guyumân ruhuâ siyànà ꞌnaꞌ yumanꞌ sirofenicia niꞌin Ma̱ꞌan Jesús
24 Huê danj ni̱ gahui Ma̱ꞌan Jesús hiuj dânj,
ni̱ gaꞌan riñan hioꞌó Tiro ngà riñan Sidón;
ni̱ gatu ruhuâ ꞌngo̱ hueꞌe,
ni̱ nun ga̱ꞌhue̱j ruhuaj si gi̱ni̱ꞌin nej guiì si nne hiuj dânj;
sani̱ nun ga̱ꞌhue gìyìꞌìj huij riñan ninj.
25 Dadinꞌ gunïn ꞌngo̱ yugûnꞌ yànà dânj si hiuj dânj nne Ma̱ꞌan,
ni̱ hua̱ ꞌngo̱ daꞌnin yànà ñûnꞌ nu̱n ꞌngo̱ nanè kï̱j huaa ruhuâ nimân;
ni̱ gaꞌnaꞌ ñûnꞌ ni̱ ganikïnꞌ rúdàkòj ñûnꞌ yiꞌî Ma̱ꞌan.
26 Ni̱ yiñán yugûnꞌ yànà nânj huin riñan hioꞌó Sirofenicia ni̱ nìkòꞌ hioꞌó dânj yumanꞌ griega,
ni̱ gachín nìꞌhiaj ñûnꞌ riñan Ma̱ꞌan Jesús si gi̱ꞌhia sunuj u ni̱ gi̱rij nanè kï̱j hua nu̱n ruhuâ nimân daꞌnin yànà ñûnꞌ.
27 Sani̱ gataj Ma̱ꞌan Jesús gu̱nïn ñûnꞌ:
—Gu̱du̱nâj sôꞌ si ya̱ si̱nï̱n nej daꞌní nda gùnùmàn riki ninj,
dadinꞌ nitaj si dùgùnàj huaj si gi̱doꞌoꞌ rachrún ya̱ nej daꞌnîꞌ ni̱ gu̱du̱gueꞌ ya̱ nej yuhue lij mánj.
28 Nanikàj yugûnꞌ dânj ni̱ gataj ñûnꞌ:
—Huê danj yàngàꞌ Señor;
sani̱ nej yuhue lij ni̱ ganaranꞌ nej xuj,
nej dasû lij nej rachrún gahiu riki mesa giꞌhiaj nej sínꞌin ni̱ ganakaj nej xuj yâ nej xuj.
29 Hiôꞌ ni̱ gataj Ma̱ꞌan Jesús:
—Rayiꞌî guendâ gatajꞌ dànanj ni̱ ga̱ꞌa̱njꞌ;
dadinꞌ nanè kï̱j hua ginun ruhuâ nimân daꞌnin yànàꞌ ni̱ gàꞌ gahui gaꞌan na̱nj ánj.
30 Ni̱ nga gunukuiꞌ yugûnꞌ dânj dukuâ ñûnꞌ ni̱ nngaj daꞌnin yànà ñûnꞌ riñan na,
ni̱ giniꞌin ñûnꞌ si gàꞌ gahui nanè kï̱j hua ginun ruhuâ nimân daꞌnin siyànà ñûnꞌ.
Sí so̱ꞌo ni̱ sí ꞌminj in huin ꞌngo̱ sí dânj ni̱ ganahuin sôꞌ giꞌhiaj Ma̱ꞌan Jesús
31 Gahui Ma̱ꞌan Jesús gaꞌan riñan hioꞌó Tiro,
ni̱ gachinj riñan hioꞌó Sidón ni̱ guyumanj ñan nu̱n nne ña̱ꞌa̱nj gùꞌnàj Galilea,
ni̱ guchij riñan hioꞌó Decápolis.
32 Ni̱ ni̱ka̱j nej sij gaꞌnaꞌ nej sij ꞌngo̱ sí sòꞌo ni̱ huê danj na̱nj naꞌhue ga̱ꞌmi̱n hueꞌê sôꞌ,
ni̱ gachín nìꞌhiaj nej sij riñan Ma̱ꞌan Jesús si gu̱taj raꞌa ahui sí dânj dadinꞌ ruhuâ nej sij si ga̱na̱huin sôꞌ.
33 Ni̱ nika sí nânj gaꞌanj ane riñan nej guiì màn hiuj dânj,
ni̱ gidigï dë̂j raꞌa ruhuâ rakïj sí nânj,
ni̱ gachra stanu ni̱ gaganꞌ raꞌa hia sí nânj.
34 Ni̱ ganachi nikaj ñanj yàtàꞌa,
ni̱ ganarânj guche ni̱ gata:
—Efata —ni̱ nuguanꞌ nânj ruhuaj ga̱ta:
Ga̱na̱yi̱ꞌnï̱n sòꞌ ánj.
35 Ni̱ orâ chre ni̱ ganayiꞌnï̂nj nguèj hiuꞌuj tàj rakïj sí nânj,
ni̱ ganachi sa a̱nu̱min hia sôꞌ,
ni̱ gaꞌhue gaꞌmin hueꞌê sôꞌ.
36 Ni̱ gaꞌnïnꞌ su̱n Ma̱ꞌan Jesús riñan nej guiì màn hiuj dânj sisi̱ si̱ ganataꞌ ninj riñan gàꞌ si ꞌngo̱ nej guiì;
sani̱ nga ûta gaꞌnïnꞌ sunj sisi̱ si̱ gananï̂n ninj rayiꞌî sa giꞌhia,
ni̱ dànanj ni̱ña̱n ninj ganataꞌ ninj doj riñan aꞌngô nej guiì.
37 Ni̱ ûta gahuin nìhiàꞌ ruhuâ nej guiì ni̱ gataj ninj:
—Ûta hueꞌê giꞌhia daranꞌanj;
dadinꞌ giꞌhia si gunïn guiì sòꞌo,
ni̱ giꞌhia si ga̱ꞌmi̱n guiì ꞌmìnj in na̱nj ánj.