Nuguanꞌ gè gi̱ꞌhiaj ga̱na̱ni̱nꞌ nânj huin gachrûn
SAN LUCAS
Nuguanꞌ nnùn riñan ñanj nânj gaꞌnḯn sachij Lucas riñan Teófilo
1
Ûta gàꞌì ranꞌ nej sij gachrûn riñan ñanj rayiꞌî daranꞌ nej sa gahuin yàngàꞌ giꞌhiaj Ma̱ꞌan Ñaꞌanj an siganï̂nj nêꞌ,
2 dàj rûnꞌ ganataꞌ nej sí giniꞌin si̱nï̱n gàꞌ daꞌ nêꞌ dadinꞌ giniꞌin nej sôꞌ ngà rune ñan nej sôꞌ,
ni̱ gahuin nej sôꞌ sí ganataꞌ si-nùguànꞌ Ma̱ꞌan Ñaꞌanj an.
3 Dadinꞌ neꞌ rùkù nga gisîj ûta gùdadu nadigiꞌñûnj daranꞌ nej sa gahuin nga gayi̱ꞌij àsìj si̱nï̱ïn,
ni̱ dùgùnàj huaj rûꞌhuaj ni̱ gachrûnj daꞌ nìkòꞌ duguiꞌij,
riñanꞌ huînꞌ ꞌngo̱ sí ûta sàꞌ niꞌin na̱nj Teófilo.
4 Daꞌnga ni̱ giniꞌin hueꞌêꞌ rayiꞌî nej sa yàngàꞌ gàꞌ gi̱digân nej sij riñanꞌ.
Gataj naꞌanj ꞌngo̱ ángel si ga̱ꞌnga̱ Juan Bautista
5 Gane ꞌngo̱ sí dânj nej gui nga ginikaj su̱n rey Herodes riñan hioꞌó Judea,
ni̱ gahuin sôꞌ rej riñan nej yiꞌnïnꞌ nej dùguìꞌ sachij Abías ni̱ gùꞌnàj sôꞌ Zacarías;
ni̱ nika sôꞌ huin ꞌngo̱ nej daꞌnin sìꞌnï̀n Aarón,
ni̱ gùꞌnàj siyànà dânj Elisabet.
6 Ni̱ gahuin nguèj ni̱ka̱ sôꞌ sa ni̱ka̱a riñan Ma̱ꞌan Ñaꞌanj an,
ni̱ ûta hueꞌê dagahuin nguèj ni̱ka̱ sôꞌ daranꞌ nej su̱n giyiꞌnïnꞌ su̱n giꞌhiaj Ma̱ꞌan Señor.
7 Sani̱ nitaj daꞌní nguèj ni̱ka̱ sôꞌ hua̱ dadinꞌ siyànà a̱tïn gahuin Elisabet,
ni̱ gu̱ña̱n chre ni̱ gàꞌ ûta gachij nguèj ni̱ka̱ sôꞌ.
8 Ni̱ Zacarías huin rej ni̱ diû dânj ganunj gu̱na̱nj gi̱tsi yiꞌnïnꞌ ni̱ka̱j duguiꞌ ngà sôꞌ riñan Ma̱ꞌan Ñaꞌanj an.
9 Dàj rûnꞌ hua̱ chre̱j ginikaj nej dùguìꞌ sachij rej,
ni̱ gininj número riñan sôꞌ guendâ du̱guaka sôꞌ sikíi riñan Ma̱ꞌan Ñaꞌanj an,
ni̱ gatûj sôꞌ ruhuâ si-nùhuì Ma̱ꞌan Ñaꞌanj an.
10 Ni̱ màn daranꞌ nej guiì rigìi neꞌ yèꞌe ni̱ aꞌmin ninj ngà Ma̱ꞌan Ñaꞌanj an mân ninj orâ nga gaka sikíi.
11 Ni̱ guyumân ꞌngo̱ si-ángel Ma̱ꞌan Señor ni̱ ganikïnj neꞌ huàꞌ ña̱n ni̱kï̱nꞌ si-na ñaꞌanj ri̱ña̱n duguaka nej sij sikíi.
12 Ni̱ gaꞌanj daꞌngaꞌ Zacarías,
nga giniꞌin sôꞌ ángel ni̱kï̱nꞌ riñan sôꞌ ni̱ gidaꞌa sa yuꞌhuiꞌi dânj sôꞌ.
13 Sani̱ gataj ángel dânj gu̱nïn sôꞌ:
—Zacarías,
si̱ guyuꞌhuîꞌ mánj;
dadinꞌ gàꞌ gu̱nïn Ma̱ꞌan Ñaꞌanj an sa gachínꞌ riñanj,
ni̱ ga̱ ꞌngo̱ daꞌníꞌ neꞌej naꞌuu ngà nikaꞌ Elisabet,
ni̱ du̱guꞌnàjꞌ Juan gahuin siyu̱gui neꞌej dânj.
14 Ni̱ ûta ga̱na̱huin nìhiàꞌ ruhuâꞌ,
ni̱ huê danj na̱nj ûta ga̱na̱huin nìhiàꞌ ruhuâ gàꞌì nej guiì nga ga̱ꞌnga̱ neꞌej dânj;
15 Dadinꞌ gahuin ꞌngo̱ sí gi̱nikaj sun nìko riñan Ma̱ꞌan Ñaꞌanj an.
Ni̱ si̱ goꞌoj nne chruj uba ngà aꞌngô nej nne yi̱na̱j a,
ni̱ nga nï̀nꞌ nunj ruhuâ riki nni ni̱ gàꞌ gane Ma̱ꞌan Espíritu Santo ruhuâ nimanj.
16 Ni̱ gi̱ꞌhia si̱ ûta gàꞌì nej sí huin daꞌní Israel na̱du̱na̱ nej sôꞌ maꞌan nej sôꞌ ni̱ gùyùmàn ruhuâ nej sôꞌ niꞌin nej sôꞌ Daꞌanj nej sôꞌ.
17 Ni̱ ga̱ꞌna̱ꞌ Juan neꞌ ña̱an riñan Ma̱ꞌan Señor ngà nanè nimân ni̱ ngà nuguanꞌ nùkuaj gaꞌmin Elías,
guendâ gi̱ꞌhiaj sôꞌ si ga̱na̱huin ꞌì ruhuâ nej síchìj achij i niꞌin nej sôꞌ daꞌní nej sôꞌ,
ni̱ nej sí naꞌhuej gùyùmàn ruhuâ ni̱ gùyùmàn ruhuâ nej sôꞌ ni̱ gi̱ꞌhiaj nej sôꞌ dàj rûnꞌ giꞌhiaj nej sí giꞌhiaj sa ni̱ka̱a,
guendâ gi̱ꞌhiaj yu̱gui nej sôꞌ ma̱ꞌan nej sôꞌ ni̱ gahuin nej sôꞌ ꞌngo̱ yumanꞌ ga̱ ruhuâ da̱gahuin riñan Ma̱ꞌan Señor.
18 Ni̱ gataj Zacarías gu̱nïn ángel dânj:
—Dáj gi̱ꞌhia gi̱ni̱ꞌín nânj ràꞌaj.
Dadinꞌ ñùnj ni̱ gàꞌ achî,
ni̱ huê danj na̱nj gàꞌ achij nikâj.
19 Nanikàj ángel dânj ni̱ gata:
—Ñùnj huin Gabriel,
ni̱ nìkï̀nj riñan Ma̱ꞌan Ñaꞌanj an ni̱ huê Ma̱ꞌan huin sa gaꞌnḯn gaꞌná,
guendâ gàtà nuguanꞌ hueꞌê ga̱ riñanꞌ.
20 Hia̱j ni̱ gahuin ꞌmìnj ni̱ si̱ gaꞌhue ga̱ꞌmi̱nꞌ nda gui ga̱ꞌnga̱ daꞌnít,
guendâ nun gùyùmàn ruhuâꞌ niꞌîn si-nùguànꞌànj,
ni̱ huê danj ga̱huin nda gìsìj diû.
21 Ni̱ ànàꞌhuìj nej guiì yùmànꞌan mân ninj síchìj Zacarías,
ni̱ ûta huin ruhuâ ninj guendâ ûta gahuin ràn sôꞌ ruhuâ hueꞌ huin nûhui.
22 Sani̱ nga gahui sôꞌ ruhuâ hueꞌ nûhui nìko ni̱ naꞌhue ga̱ꞌmi̱n sôꞌ;
ni̱ ganï̂n ruhuâ nej sí màn neꞌ ye̱ꞌ dânj si hua̱ ꞌngo̱ sa giniꞌin sôꞌ ruhuâ huêꞌ nûhui nìko.
Ni̱ man si gidigân sôꞌ ngà dë̂j raꞌa sôꞌ nga ruhuâ sôꞌ ga̱ꞌmi̱n sòꞌ,
ni̱ gàꞌ ꞌngo̱ naꞌhue ga̱ꞌmi̱n sôꞌ gàꞌ mánj.
23 Ni̱ nga ganahuij nej gui gunânj gi̱tsi sôꞌ riñan Ma̱ꞌan Ñaꞌanj an ni̱ nanꞌ sôꞌ dukuâ sôꞌ.
24 Neꞌ rùkù nga gachîn nej gui dânj ni̱ ginun ri̱ki Elizabet,
ni̱ gane ni̱nïnj dukuaj nda gisîj ùnꞌùnꞌ ahuii,
ni̱ gata:
25 “Ma̱ꞌan Señor huin sa giꞌhiaj dànanj ngàj nej gui nânj,
ni̱ gananï̂n àko ruhuaj niꞌin ñùnj ni̱ gaꞌne sinàꞌàj a riñânj siganï̂nj nej guiì.”
Gataj naꞌanj ꞌngo̱ ángel si ga̱ꞌnga̱ Ma̱ꞌan Jesús
26 Ahui huàtànꞌan ni̱ gaꞌnḯn Ma̱ꞌan Ñaꞌanj an gaꞌnaꞌ ángel Gabriel riñan yumanꞌ snàꞌànj Nazaret huin hioꞌó ni̱ka̱j ñuꞌunj Galilea.
27 Ni̱ María huin siyu̱gui ꞌngo̱ siyànà ña̱an ni̱ ga̱ꞌ hua̱ yu̱gui ga̱huin nika sôꞌ gùꞌnàj José,
huin ꞌngo̱ siꞌnï̂n huin daꞌní nej daꞌní David.
28 Ni̱ gatûj ángel ñan nne siyànà dânj ni̱ gata:
—Man yu̱gueꞌ ga̱na̱huin nìhiàꞌ ruhuâ rèꞌ dadinꞌ huin rèꞌ ꞌngo̱ siyànà giꞌhiaj sa hua̱ hueꞌê siganï̂nj aꞌngô nej siyànàa,
ni̱ Ma̱ꞌan Señor huin ngà rèꞌ.
29 Nga giniꞌin siyànà nânj ni̱ nga gu̱nïn nej nuguanꞌ gataj ángel ni̱ gaꞌanj daꞌngaj,
ni̱ ganï̂n ruhuaj ni̱ gata gu̱nïn ma̱ꞌan,
nùnj huin saj ni̱ gaꞌmin ángel dànanj gàꞌ ûnj.
30 Hiôꞌ ni̱ gataj ángel gu̱nïn:
—María,
si̱ guyuꞌhuiꞌ mánj,
dadinꞌ giꞌhiaj sàꞌ Ma̱ꞌan Ñaꞌanj an ngàꞌ.
31 Hia̱j ni̱ gi̱nun rikîꞌ neꞌej,
ni̱ ga̱ꞌnga̱ ꞌngo̱ daꞌníꞌ neꞌej naꞌuu,
ni̱ du̱gûꞌnàjꞌ siyu̱gui JESÚS.
32 Ni̱ gahuin neꞌej dânj sa gi̱nikaj sun nìko,
ni̱ huin Daꞌní Ma̱ꞌan Ña̱ꞌa̱nj ni̱ka̱j sun yàkàan;
ni̱ nagaꞌhuiꞌ Ma̱ꞌan Señor huin Ñaꞌanj an gi̱nika si-su̱n David.
33 Ni̱ gi̱nikaj sunj riñan nej daꞌní Jacob daranꞌ diû,
ni̱ nitaj àmàn ga̱na̱huij suun gi̱nika mánj.
34 Hiôꞌ ni̱ gataj María gu̱nïn ángel:
—Dàj gahuin nga gìsìj nej nuguanꞌ gatajꞌ dânj ràꞌaj.
Dadinꞌ hua̱ nun gàyàkà nikâj ràꞌaj.
35 Nanikàj ángel ni̱ gata:
—Ma̱ꞌan Espíritu Santo ga̱ꞌna̱ꞌ riñanꞌ,
ni̱ Ma̱ꞌan Ña̱ꞌa̱nj nne yàtàꞌa gi̱ꞌhiaj gi̱nun ri̱kîꞌ;
ni̱ neꞌej ga̱ꞌnga̱ gi̱ꞌhiáꞌ gahuin ꞌngo̱ sàꞌ gè nï̀nꞌïn,
ni̱ gùꞌna Daꞌní Ma̱ꞌan Ñaꞌanj an.
36 Ni̱ duguît Elisabet,
ni̱ gàꞌ achi sani̱ ganariꞌij neꞌej ginun ri̱ki,
ni̱ gàꞌ gisîj huàtànꞌ ahuii nun ri̱ki,
ni̱ ꞌngo̱ siyànà a̱tïn gahuin gataj nej guiì;
37 Dadinꞌ guendâ Ma̱ꞌan Ñaꞌanj an ni̱ nitaj gàꞌ ꞌngo̱ sa chìꞌi hua̱ mánj.
38 Ni̱ gataj María:
—Ñùnj huin ꞌngo̱ si-musû Ma̱ꞌan Señor;
ni̱ ga̱ꞌhue gi̱ꞌhiáꞌ ngàj dàj rûnꞌ gataj riñânj.
Huê danj ni̱ gaꞌanj ángel dânj.
Gaꞌanj niꞌhiaj María ñan nne Elisabet
39 Hiô ni̱ ganayumàn María nga gu̱nïn nej nuguanꞌ nânj ni̱ nda nanè chre gaꞌan kï̱j ñan màn nej chrun ñan nngaj ꞌngo̱ yumanꞌ snàꞌànj huin doꞌó Judá.
40 Ni̱ gaꞌan ñan nne dukuâ Zacarías,
ni̱ nga guchij ni̱ gata,
man leꞌ gu̱nïn Elisabet.
41 Ni̱ nga gunïn Elisabet gaꞌmin María,
ni̱ nda guêj neꞌej nu̱n ruhuâ riki,
ni̱ gachra ruhuâ nimanj giꞌhiaj Ma̱ꞌan Espíritu Santo.
42 Ni̱ gayiꞌì Elisabet ni̱ ûta nùkuaj gaꞌmin ni̱ gata:
—Huînꞌ ꞌngo̱ siyànà giꞌhiaj sa hua̱ hueꞌê siganï̂nj nej siyànàa,
ni̱ sa gèe huin neꞌej nu̱n rikiꞌ dânj.
43 Nùnj huin saj ni̱ giriꞌ ni̱ꞌhia,
si ga̱ꞌna̱ꞌ gi̱ni̱ꞌhiaj nni Ma̱ꞌan si-Señoj ñùnj gàꞌ ûnj.
44 Dadinꞌ nga gunḯn gaꞌminꞌ ni̱ nda guêj neꞌej nu̱n ruhuâ rikí,
guendâ gahuin nìhiàꞌ ruhuaj.
45 Ni̱ ûta ganahuin nìhiàꞌ ruhuâ siyànà guyumân ruhuâ,
dadinꞌ gisîj nuguanꞌan dàj rûnꞌ gataj Ma̱ꞌan Señor.
46 Hiôꞌ ni̱ gataj María:
Ûta gaꞌmin hueꞌê ma̱ꞌan nimânj rayiꞌî Ma̱ꞌan Señor dadinꞌ ûta nìko huaj,
47 Ni̱ ganahuin nìhiàꞌ ruhuâ nanè nimânj niꞌin Ma̱ꞌan Ñaꞌanj gi̱ꞌhiaj ga̱na̱ni̱nj.
48 Dadinꞌ giniꞌhia ñùnj sani̱ huín ꞌngo̱ musû ninaj chre,
sani̱ àsìj gui hia̱j ni̱ gayakaj gaꞌanj neꞌ ña̱an ni̱ ga̱ta̱j nej guiì si huín ꞌngo̱ siyànà nitaj si gananï̂n ruhuâ ni̱ gu̱nu̱na̱ ninj rayiꞌí daranꞌ diû.
49 Dadinꞌ ûta nìko hua sa giꞌhiaj Ma̱ꞌan Ñaꞌanj an ngàj ni̱ ûta nùkua;
ni̱ sa gèe huin siyu̱gui Ma̱ꞌan.
50 Ni̱ gananï̂n àko ruhuâ Ma̱ꞌan Ñaꞌanj an niꞌin daꞌ hioꞌo ni̱ daꞌ hioꞌo nej guiì nitaj si̱ giꞌhiaj gakï̱nꞌïn riñanj.
51 Ni̱ giꞌhiaj ga̱nan Ma̱ꞌan Ñaꞌanj an riñan nej guiì gunïnꞌ ngà Ma̱ꞌan;
ni̱ duya̱ꞌnïnj nej guiì hu̱e ngà daranꞌ nej sa aꞌnanꞌ ganï̂n ruhuâ nimân ninj.
52 Ni̱ guxun Ma̱ꞌan Ñaꞌanj an nej guiì ni̱ka̱j sun yàkàan ñan nne ninj nikaj su̱n ninj
ni̱ giꞌhia si ga̱na̱huin ña̱n nej guiì ninaj chre.
53 Ni̱ gaꞌhuij sa ya nej guiì gànìki ni̱ gaꞌhuij aꞌngô rasu̱n ga̱chin riñan ninj,
ni̱ gaꞌnej Ma̱ꞌan Ñaꞌanj an nej rasu̱un riñan nej guiì hua̱ yi̱ruꞌhuee ni̱ ganahuin gànìki ninj giꞌhia.
54 Ni̱ guruguꞌñun rukû yumanꞌ Israel huin si-musuj,
ni̱ gananun ruhuaj ni̱ ginika sun ga̱ rûhua ngà nej guiì màn yumanꞌ dânj.
55 Dàj rûnꞌ gaꞌmin ngà rej nêꞌ,
sachij Abraham ni̱ ngà nej daꞌní ñûnꞌ daranꞌ diû ga̱ꞌna̱ꞌ neꞌ ña̱an.
56 Ni̱ gane María dukuâ Elisabet huàꞌnï̀nj ahuii;
ni̱ neꞌ rùkù ni̱ ganaꞌnaj dukuaj.
Gaꞌnga Juan Bautista
57 Ni̱ gisîj diû ga̱ꞌnga̱ daꞌní Elisabet,
huê danj ni̱ gaꞌnga ꞌngo̱ neꞌej naꞌuu.
58 Ni̱ gunïn nej guiì màn ñan nne Elisabet ni̱ gunïn nej duguiꞌij si ûta nìko hua sa giꞌhiaj Ma̱ꞌan Ñaꞌanj an nngaj ni̱ dàj nìko gananï̂n àko ruhuaj,
ni̱ ûta ganahuin nìhiàꞌ ruhuâ nej guiì nngaj.
59 Ni̱ nga gisîj tï̱nj gui ni̱ ni̱ka̱j nej sij neꞌej gaꞌnaꞌ nej sij guendâ gàꞌnèꞌ nej sôꞌ nnïnj arán raa̱ nneè nàꞌàj neꞌej,
ni̱ du̱gûꞌnàj nej sij Zacarías gahuin siyu̱gui neꞌej dânj dadinꞌ huê danj gùꞌnàj rej neꞌej dânj;
60 sani̱ nanikàj nni neꞌej dânj ni̱ gata:
—Sê danj ga̱huin siyu̱gui mánj,
Juan gùꞌna na̱nj ánj.
61 Ni̱ gataj nej sôꞌ:
—Nùnj huin saj ni̱ du̱gûꞌnòꞌ dànanj sij únj.
Dadinꞌ nitaj gàꞌ si ꞌngo̱ nej duguît gùꞌnàj dànanj únj.
62 Ni̱ gachín naꞌanj nej sij ngà raꞌa nej sij rej neꞌej dânj,
dàj garanꞌ ruhuâ sôꞌ du̱gûꞌnàj sôꞌ neꞌej dânj.
63 Ni̱ gachín sôꞌ ꞌngo̱ ruguechràꞌ lij ni̱ gachrûn sôꞌ,
ni̱ taj riñan ruguechràꞌ dânj:
“Juan gahuin siyu̱gui sij na̱nj ánj.”
Ni̱ gahuin ña̱ꞌanj ruhuâ daranꞌ nej sij nga gunïn nej sij nuguanꞌ nânj.
64 Ni̱ orâ dânj ni̱ gayiꞌij ni̱ gisikiꞌ hia sachij Zacarías,
ni̱ gaꞌmin hueꞌê sôꞌ riñan Ma̱ꞌan Ñaꞌanj an.
65 Ni̱ ûta guyuꞌhuiꞌ nej guiì màn ña̱n nne sôꞌ;
ni̱ gayaꞌnï̀n sa gahuin nânj daꞌ hua̱ nï̀nꞌ gàchràꞌ nej yumanꞌ màn kï̱j Judea.
66 Ni̱ daranꞌ nej guiì giniꞌin dàj gahuin ni̱ gaꞌnï̂n ninj nej nuguanꞌ nânj ruhuâ nimân ninj ni̱ gataj ninj:
—Ahuin su̱n gi̱nikaj silíj nânj gàꞌ ûnj.
Dadinꞌ guruguñuꞌunj Ma̱ꞌan Ñaꞌanj an sij únj.
Gataj Zacarías dàj ga̱huin
67 Ni̱ ûta ganahuin nùkuaj sachij Zacarías giꞌhiaj Ma̱ꞌan Espíritu Santo,
ni̱ gaꞌmin sôꞌ nej sa ga̱huin ni̱ gataj sôꞌ:
68 Ûta hueꞌê giꞌhiaj Ma̱ꞌan Señor ni̱ka̱j ñuꞌunj riñan yumanꞌ Israel,
dadinꞌ gaꞌnaꞌ gi̱niꞌhiâ riñan yiñan ni̱ giꞌhia si ga̱na̱ni̱n yiñan.
69 Ni̱ ga̱na̱chi nika ꞌngo̱ sí ûta nìko nikaj su̱n ni̱ huê sôꞌ gi̱ꞌhiaj ga̱na̱ni̱n nêꞌ.
Ni̱ huin sôꞌ ꞌngo̱ nej duguiꞌ David huin ꞌngo̱ musu riñan Ma̱ꞌan Ñaꞌanj an.
70 Dàj rûnꞌ gaꞌmin nga garânj sunj duꞌhua nej si-profetaj nej sí gè gimân àsìj nâ.
71 Giꞌhia si ga̱na̱ni̱nꞌ riñan nej sí gu̱nïnꞌ ngòꞌ,
ni̱ ga̱na̱ni̱nꞌ riñan nej sí nitaj si ꞌì ruhuâ niꞌin ñùnꞌ.
72 Ni̱ gananï̂n àko ruhuaj ngà rej nêꞌ,
ni̱ gananun ruhuaj niꞌin nej nuguanꞌ gè guchij ꞌngo̱ duꞌhua ngà nej sôꞌ.
73 Ni̱ gata gu̱nïn rej nêꞌ Abraham,
si hua̱ ni̱ña̱n si ri̱kij nani̱ꞌhiaj nêꞌ.
74 Ni̱ nga giꞌhia gananinꞌ riñan nej sí gunïnꞌ ngòꞌ,
ni̱ si̱ guyuꞌhuiꞌ guendâ gu̱na̱nj gi̱tsiꞌ riñan Ma̱ꞌan Ñaꞌanj an mánj.
75 Ni̱ na̱gi̱ꞌhiaj hueꞌê nêꞌ nimân nêꞌ ni̱ gi̱ꞌhiaj nêꞌ sa ni̱ka̱a,
daranꞌ nej gui ga̱ nìꞌnàꞌ nêꞌ.
76 Ni̱ sòꞌ huînꞌ ꞌngo̱ sílìj i,
ni̱ ga̱huînꞌ si-profeta Ma̱ꞌan Ña̱ꞌa̱nj nne yàtàꞌa,
dadinꞌ ga̱ꞌa̱njꞌ neꞌ ña̱an riñan Ma̱ꞌan Señor,
daꞌnga ni̱ giꞌhiaj yuguîꞌ nej guiì ri̱ña̱n ga̱ꞌmi̱n Ma̱ꞌan.
77 Guendâ gi̱di̱gânꞌ si huej huin sa gi̱ꞌhiaj ga̱na̱ni̱n yiñan,
ni̱ huej huin sa ga̱ꞌhue gi̱nikaj nimân nìko rayiꞌî si-ga̱kïnꞌ nej guiì.
78 Ni̱ ûta huin ruhuâ Ma̱ꞌan Duꞌunꞌ ngà nimanj guendâ gu̱ru̱gûñuꞌun ñùnꞌ,
ni̱ gaꞌnaj nda neꞌ yàtàꞌa ni̱ dàj rûnꞌ gisîj gui neꞌ ni̱ganꞌ daꞌ gui ni̱ giyigï̀n giꞌhia ni̱ huê danj ga̱ꞌhue ga̱ra̱n daꞌngaꞌ ruhuâ nêꞌ gi̱ꞌhia.
79 Ni̱ ga̱ꞌhue gi̱ꞌhia ga̱ra̱n daꞌnga ruhuâ nej guiì nne riñan gakï̱nꞌïn,
dadinꞌ gàꞌ huin ninj guiì gahuiꞌi rayiꞌî nej si-ga̱kïnꞌ ninj;
ni̱ ga̱ꞌhue gi̱di̱ganj ga̱che̱ ninj chre̱j hua̱ dïnꞌïnj.
80 Ni̱ gachij silíj dânj ni̱ gahuin ran nanè nimân sôꞌ,
ni̱ gane sôꞌ riñan hioꞌó hua̱ nîꞌnï̀nj ïn nda gui gi̱di̱gân sôꞌ Ma̱ꞌan sôꞌ riñan nej guiì màn Israel.