Gaꞌnga Ma̱ꞌan Jesús
2
Gahuin nej gui dânj ni̱ gaꞌnïnꞌ su̱n Augusto César,
nï̀nꞌ gàchràꞌ riñan hioꞌó ni̱ka̱j ñuꞌunj sôꞌ,
si̱ ga̱ꞌa̱nj gùnùtàꞌ daranꞌ nej guiì siyu̱gui ninj riñan ꞌngo̱ librû tàj yiñán ninj.
2 Librû nânj huin sa ganachra si̱nï̱n nej sij nga ginikaj su̱n Sirenio ni̱ gahuin sôꞌ gobernador riñan hioꞌó Siria.
3 Ni̱ gaꞌanj gùnùtàꞌ daranꞌ nej guiì siyu̱gui ninj,
riñan librû tàj daꞌ goꞌngo̱ nej yumanꞌ snàꞌànj ni̱ka̱j ñuꞌunj riñan ninj.
4 Ni̱ gahui José ruhuâ yumanꞌ snàꞌànj Nazaret huin doꞌó Galilea,
ni̱ gaꞌanj sôꞌ yumanꞌ snàꞌànj gùꞌnàj Belén huin yiñán David ni̱ Judea huin sa ni̱ka̱j ñuꞌunj riñan hioꞌó nânj,
dadinꞌ duguiꞌ sôꞌ gahuin David;
5 guendâ gànàtàꞌ siyu̱gui nguèj ni̱ka̱ sôꞌ María,
siyànà gàꞌ hua̱ yu̱gui guendâ ga̱huin nika sôꞌ,
ni̱ gàꞌ nu̱n ri̱ki̱ siyànà dânj.
6 Ni̱ nga nï̀nꞌ nne nguèj ni̱ka̱ sôꞌ hiuj dânj,
ni̱ guyumân diû ga̱ꞌnga̱ daꞌní María.
7 Ni̱ gaꞌnga daꞌní María neꞌej yàhuàꞌaj,
ni̱ duriꞌñan atsîj i yichrá neꞌej dânj,
ni̱ guchru gingaj neꞌej dânj ña̱n gachra nej sij sa yâ nej yuku,
dadinꞌ nitaj hueꞌe hua gi̱rïꞌïnj nej guiì màn hiuj dânj gùnàj nguèj ni̱ka̱ sij.
Nej ángel ngà nej síchìj dugumîn matsïj ï
8 Ni̱ màn nej sí màn dugumîn matsïj ï riñan hioꞌó dânj,
dadinꞌ gàꞌ ꞌngo̱ gunâj nej sôꞌ neꞌ ñànꞌan riñan hioꞌó dânj guendâ du̱gumîn nej sôꞌ dân nej sôꞌ matsïj ï.
9 Ni̱ orâ dânj ni̱ gaꞌnaꞌ ꞌngo̱ si-ángel Ma̱ꞌan Señor ni̱ ganikïnj riñan nej sôꞌ,
ni̱ nda raa̱n chre ganikàj neꞌ rùkù nej sôꞌ ngà sinàn Ma̱ꞌan Señor;
ni̱ ûta guyuꞌhuiꞌ nej sôꞌ giꞌhia.
10 Ni̱ gataj ángel dânj gu̱nïn nej sôꞌ:
—Si̱ guyuꞌhuiꞌ nej suj mánj;
dadinꞌ ꞌna̱ꞌ gànànï̀nj ꞌngo̱ nuguanꞌ hua̱ hueꞌê riñan nej suj ni̱ ûta ga̱na̱huin nìhiàꞌ ruhuâ nej suj,
ni̱ huê danj na̱nj ga̱na̱huin nìhiàꞌ ruhuâ daranꞌ nej guiì yùmànꞌan nga gu̱nïn ninj nuguanꞌ nânj:
11 Dadinꞌ hia̱j gaꞌnga ꞌngo̱ neꞌej gi̱ꞌhiaj ga̱na̱ni̱n nej guiì ruhuâ yumanꞌ snàꞌànj huin yiñán David,
ni̱ huej huin Ma̱ꞌan Cristo.
12 Ni̱ nânj ga̱huin ꞌngo̱ daꞌngaꞌa gi̱ni̱ꞌin nej suj:
Ni̱ gànàrìꞌ nej suj ꞌngo̱ neꞌej ni̱ ganiꞌña̱nj âtsij i yichra,
ni̱ nga ñan gachra nej sij sa yâ nej yuku.
13 Ni̱ orâ chre ni̱ guyumân ûta gàꞌì nej ángel màn neꞌ yàtàꞌa ngà ángel dânj ni̱ ganikïnꞌ ninj ña̱n ni̱kï̱nꞌ ángel dânj,
ni̱ ûta gaꞌmin hueꞌê ninj riñan Ma̱ꞌan Ñaꞌanj an,
ni̱ gataj ninj:
14 Ûta nìko hua su̱n ni̱ka̱j Ma̱ꞌan Ñaꞌanj neꞌ yàtàꞌa,
ni̱ hua̱ dïnꞌïnj siganï̂nj nej síi riñan hioꞌóo,
ni̱ ûta hueꞌê hua ruhuâ Ma̱ꞌan guendâ gi̱ꞌhia ga̱na̱ni̱n nej guiì.
15 Ni̱ gahuin nga gahui nej ángel gaꞌanj ninj neꞌ yàtàꞌa ni̱ gataj ꞌngo̱ ni̱ aꞌngô nej sí ni̱kï̱nꞌ dugumîn nej matsïj ï gu̱nïn nej duguiꞌ nej sôꞌ:
—Ga̱ꞌa̱nj nêꞌ,
nda yumanꞌ Belén,
ni̱ gi̱ni̱ꞌînꞌ nùnj huin si gahuin hiuj dânj,
dadinꞌ gàꞌ gataj naꞌanj Ma̱ꞌan Señor gu̱nïnꞌ.
16 Ni̱ nda nanè chre ni̱ gaꞌanj nej sij yumanꞌ Belén,
ni̱ ganariꞌ nej sij María ngà José,
ni̱ nngaj neꞌej lij dânj ñan gachra nej sôꞌ sa yâ nej yuku.
17 Ni̱ nga giniꞌin nej sij neꞌej dânj,
ni̱ ganataꞌ nej sij dàj gu̱nïn nej sij gataj nej ángel rayiꞌî neꞌej dânj.
18 Ni̱ nga gu̱nïn daranꞌ nej guiì màn hiuj dânj nej nuguanꞌ nânj,
ni̱ gahuin ña̱ꞌanj ruhuâ ninj nga gu̱nïn ninj sa ganataꞌ nej sí dugumîn nej matsïj ï.
19 Sani̱ ganaꞌnï̂n sàꞌ María nej nuguanꞌ nânj,
ni̱ nadigiꞌñunj ngà ruhuâ nimanj rayiꞌî nej nuguanꞌ nânj.
20 Ni̱ gananikàj nej sí ni̱kï̱nꞌ dugumîn nej matsïj ï gaꞌanj nej sôꞌ,
ni̱ gahuin nìhiàꞌ ruhuâ nej sô ni̱ gaꞌmin hueꞌê nej sôꞌ yiꞌî Ma̱ꞌan Ñaꞌanj an rayiꞌî nej nuguanꞌ gunïn nej sôꞌ ni̱ sa giniꞌin nej sôꞌ,
dadinꞌ gahuin yàngàꞌ dàj rûnꞌ gataj nej ángel gu̱nïn nej sôꞌ.
Digân nej sij Ma̱ꞌan Jesús riñan Ma̱ꞌan Ñaꞌanj an ruhuâ nuhuî nìko
21 Ni̱ gisîj tï̱nj gui guendâ ga̱ꞌna̱ꞌ gàꞌnèꞌ nej sij nnïnj arán raa̱ nneè nàꞌàj neꞌej,
ni̱ dugûꞌnàj nej sij siyu̱gui JESÚS,
dadinꞌ huê danj dugûꞌnàj ángel ga̱huin siyu̱gui neꞌej dânj nga nï̀nꞌ ga̱chin gi̱nun ri̱ki nni.
22 Nga ganahuin gui nagiꞌhiaj sàꞌ nguèj ni̱ka̱ sij ma̱ꞌan sij,
dàj rûnꞌ giyiꞌnïnꞌ suun giꞌhiaj Moisés,
ni̱ ni̱ka̱j nguèj ni̱ka̱ sij neꞌej gaꞌnaꞌ nguèj ni̱ka̱ sij,
yumanꞌ snàꞌànj Jerusalén guendâ digan nej sij neꞌej riñan Ma̱ꞌan Ñaꞌanj an.
23 Dàj rûnꞌ nnunj riñan si-ley Ma̱ꞌan Señor:
“Daranꞌ neꞌej naꞌu gaꞌnga si̱nï̱n ruhuâ dukuâ ni̱ gùꞌna sa gèe riñan Ma̱ꞌan Señor,
24 Ni̱ gaꞌanj da̱gahuiꞌ nguèj ni̱ka̱ sij huìj gunïïn nej sij huìj yaꞌàan riñan Ma̱ꞌan Ñaꞌanj an:
Dàj rûnꞌ taj riñan ñanj si-nùguànꞌ Ma̱ꞌan Ñaꞌanj an.”
25 Ni̱ nne ꞌngo̱ síchìj gùꞌnàj Simeón ruhuâ yumanꞌ snàꞌànj Jerusalén,
ni̱ sí giꞌhiaj sa ni̱ka̱a ni̱ sí ni̱ka̱j chre̱j riñan Ma̱ꞌan Ñaꞌanj an huin sôꞌ,
ni̱ nne sôꞌ ganaꞌhuìj sôꞌ si gi̱ꞌhiaj Ma̱ꞌan Ñaꞌanj an si ga̱na̱ni̱n Israel;
ni̱ nne Ma̱ꞌan Espíritu Santo ngà sôꞌ.
26 Ni̱ gàꞌ gataj Ma̱ꞌan Espíritu Santo gu̱nïn sôꞌ,
si hua̱ ni̱ña̱n si gi̱ni̱ꞌin sôꞌ Ma̱ꞌan si-Cristo Ma̱ꞌan Ñaꞌanj an ni̱ ga̱ꞌhue gàhuìꞌ sôꞌ.
27 Ni̱ gataj Ma̱ꞌan Espíritu Santo si ga̱ꞌa̱nj sôꞌ ruhuâ nuhuî nìko nne Jerusalén.
Ni̱ ni̱ka̱j José ngà María neꞌej Jesús gaꞌnaꞌ nguèj ni̱ka̱ sij,
guendâ gàhuìꞌ yuku rayiꞌij dàj rûnꞌ giyiꞌnïnꞌ suun riñan ley.
28 Ni̱ gidaꞌa sachij Simeón gana̱n sôꞌ neꞌej Jesús,
ni̱ gaꞌmin hueꞌê sôꞌ riñan Ma̱ꞌan Ñaꞌanj an.
29 Ni̱ gataj sôꞌ:
Señor,
hia̱j ni̱ ga̱ꞌhue gàhuìj ni̱ nda dïnꞌïnj chre hua ruhuâj,
dadinꞌ dàj rûnꞌ gataj Ma̱ꞌân rèꞌ gu̱nḯn ni̱ huê danj gahuin;
30 Dadinꞌ gàꞌ giniꞌín ngà rune ñânj Ma̱ꞌan sa gaꞌnḯn Ma̱ꞌân rèꞌ gaꞌnaꞌ ni̱ Ma̱ꞌan gi̱ꞌhiaj ga̱na̱ni̱n nej guiì,
31 Ni̱ gàꞌ giꞌhiaj yu̱gui Ma̱ꞌân rèꞌ si gi̱ni̱ꞌin daranꞌ nej yùmànꞌan Ma̱ꞌan;
32 Ni̱ huê Ma̱ꞌan gi̱ꞌhiaj gìyìgï̀n riñan nej guiì nàsìnùnj un,
ni̱ gahuin ꞌngo̱ sa nìko riñan yiñán Ma̱ꞌân rèꞌ yumanꞌ Israel.
33 Ni̱ ûta gahuin ña̱ꞌanj ruhuâ José ngà María niꞌin sôꞌ sa gataj nej guiì niꞌin ninj rayiꞌî Ma̱ꞌan Jesús.
34 Ni̱ gaꞌmin hueꞌê Simeón yiꞌî neꞌej ni̱ gataj sôꞌ gu̱nïn nni María:
—Silíj nânj ni̱ hua̱ yu̱gui sij guendâ gi̱ꞌhiaj sij ga̱na̱tu̱ ûta gàꞌì nej guiì ni̱ hua̱ yu̱gui sij guendâ ga̱na̱chi nikaj sij ûta gàꞌì nej guiì màn yumanꞌ Israel,
ni̱ ga̱huin nânj ꞌngo̱ daꞌngaꞌa ni̱ gi̱ni̱ꞌînꞌ sisi̱ si̱ garânj yina nej guiì sa ga̱ꞌmi̱n sij mánj.
35 Ni̱ huê dànanj gahuin daꞌnga ni̱ ga̱ꞌhue gi̱ni̱ꞌin Ma̱ꞌan Ñaꞌanj an dàj ganï̂n ruhuâ ma̱ꞌan nimân ûta gàꞌì nej guiì,
ni̱ ga̱chi̱n ꞌngo̱ yîti da̱ꞌa̱j sa nu̱n ruhuâ nimânt.
36 Ni̱ ni̱kï̱nꞌ ꞌngo̱ sachij gùꞌnàj Ana hiuj dânj,
ni̱ huin sachij dânj siyànà ganataꞌ dàj ga̱huin,
ni̱ huin sachij dânj nika sôꞌ gùꞌnàj Fanuel,
huin yiꞌnïnꞌ Aser,
ni̱ gàꞌ ûta ata sachij dânj hioꞌo,
ni̱ hua̱ li nga gayaka Fanuel ni̱ gane chi̱j hioꞌo ngà sôꞌ,
37 Ni̱ gàꞌ gisîj ga̱ꞌânj xia hioꞌo huin sachij dânj siyànà minj in;
ni̱ nitaj si gudunâj sachij dânj guendâ ga̱ꞌan ñan nne hueꞌ huin nûhui,
ni̱ gunânj gi̱tsi sachij dânj riñan Ma̱ꞌan Ñaꞌanj an neꞌ ñànꞌan ngà neꞌ gu̱niꞌñanj an,
ni̱ hua̱ da̱ꞌa̱j nej gui ni̱ ga gi̱ni̱ne̱j sachij dânj,
guendâ gaꞌmin ngà Ma̱ꞌan Ñaꞌanj an.
38 Ni̱ huê gè orâ nânj,
gaꞌnaꞌ sachij dânj,
ni̱ gaꞌhuij si guruhuâ Ma̱ꞌan Ñaꞌanj an,
ni̱ ganataj rayiꞌî neꞌej dânj riñan daranꞌ nej guiì ganaꞌhuìj si ga̱ꞌna̱ꞌ ꞌngo̱ sa gi̱ꞌhiaj ga̱na̱ni̱n nej guiì màn Jerusalén.
Nanikàj nej sij nanꞌ nej sij Nazaret
39 Neꞌ rùkù nga gisîj dagahuin nguèj sij daranꞌ nej su̱n taj riñan si-ley Ma̱ꞌan Señor,
ni̱ nanikàj nguèj ni̱ka̱ sij ni̱ nanꞌ nguèj sij Galilea,
ni̱ gaꞌanj nguèj sij yumanꞌ snàꞌànj Nazaret.
40 Ni̱ gachij Ma̱ꞌan Jesús ni̱ gahuin nùkuaj nanè nimanj riñan Ma̱ꞌan Ñaꞌanj an,
ni̱ ûta gahuin chrunj;
ni̱ ûta guruguꞌñunj Ma̱ꞌan Ñaꞌanj an rukuj.
Nne silíj Jesús ruhuâ nûhui
41 Ni̱ daꞌ hioꞌo huaꞌanj rej Ma̱ꞌan Jesús ngà nni yumanꞌ snàꞌànj Jerusalén nga guyumân giꞌñanj pascua;
42 Ni̱ hioꞌ yùhuìj i huaj Ma̱ꞌan Jesús,
ni̱ gaꞌanj nej sij yumanꞌ snàꞌànj Jerusalén dàj rûnꞌ ginikaj chre̱j nej sij nga ginun nej giꞌñanj an.
43 Nga ganahuij giꞌñanj an ni̱ ganaꞌnaꞌ nej sij dukuâ nej sij ni̱ gunâj Ma̱ꞌan Jesús ruhuâ yumanꞌ snàꞌànj Jerusalén,
ni̱ nun gi̱ni̱ꞌin José ngà María si gunâj Ma̱ꞌan Jesús hiuj dânj.
44 Ni̱ ganï̂n ruhuâ nguèj ni̱ka̱ sij si hua̱j Ma̱ꞌan Jesús siganï̂nj aꞌngô da̱ꞌa̱j nej silíj hua̱j nanꞌ hiuj dânj;
ni̱ gàꞌ gisîj ꞌngo̱ gui gaché nej sij huaj nanꞌ nej sij;
ni̱ gayiꞌì nguèj ni̱ka̱ sij ni̱ nanaꞌhuiꞌ nguèj sij siganï̂nj nej duguiꞌ nguèj sij nga siganï̂nj nej guiì niꞌin nguèj sij.
45 Sani̱ ña̱n nun gànàrìꞌ nguèj sij,
ni̱ nanikàj ñûn nguèj sij gaꞌanj nànàꞌhuìꞌ nguèj sij Ma̱ꞌan Jesús ruhuâ yumanꞌ snàꞌànj Jerusalén.
46 Ni̱ nda gachîn huàꞌnï̀nj gui daꞌnga ganariꞌ nguèj nika sij Ma̱ꞌan Jesús,
ni̱ nne da̱nï̱n ña̱n nne nej sí gidigân si-nùguànꞌ Ma̱ꞌan Ñaꞌanj an,
ni̱ gunïn nej sôꞌ sa gaꞌmin ni̱ gachín naꞌan nej sôꞌ riñanj sa chìꞌ huaa.
47 Ni̱ ûta gahuin ña̱ꞌanj ruhuâ daranꞌ nej sí dânj nga gunïn nej sôꞌ nuguanꞌ gaꞌmin Ma̱ꞌan,
dadinꞌ ûta sàꞌ niꞌin ni̱ ûta sàꞌ dunani̱ka nuguanꞌan riñan nej sôꞌ.
48 Ni̱ nga giniꞌin nguèj ni̱ka̱ sôꞌ si hiuj dânj nne ni̱ ûta gahuin ña̱ꞌanj ruhuâ nguèj ni̱ka̱ sôꞌ,
ni̱ gataj nni Ma̱ꞌan Jesús gu̱nïn:
—Tuꞌ,
nùnj huin saj ni̱ giꞌhiâꞌ dànanj ngà nguèj ñûnj rét ràꞌaj.
Dadinꞌ ûta gahuin ruhuâ nguèj ñûnj ni̱ ûta nanaꞌhuiꞌ nguèj ñûnj sòꞌ ràꞌaj.
49 Hiôꞌ ni̱ nanikàj Ma̱ꞌan Jesús ni̱ gata:
—Nùnj huin saj ni̱ nanaꞌhuiꞌ nguèj suj ñùnj ràꞌaj.
Nun niꞌin nguèj et si hua̱ ni̱ña̱n si daꞌhuí ga̱né ni̱ gi̱ꞌhiaj sûnj si-su̱n Ma̱ꞌan Rê ràꞌ saj ûnꞌ.
50 Sani̱ nun ga̱ꞌhue ga̱ra̱n daꞌngaꞌ ruhuâ nguèj ni̱ka̱ sij nej nuguanꞌ gaꞌmin Ma̱ꞌan Jesús.
51 Huê danj ni̱ nanika naꞌanj ngà nguèj sij ni̱ gane Nazaret,
ni̱ dagahuin daranꞌ sa gataj nguèj ni̱ka̱ sij gu̱nïn.
Ni̱ ganachra sàꞌ nni ruhuâ nimânꞌ daranꞌ nej nuguanꞌ nânj.
52 Ni̱ gahuin yàkàn kú Ma̱ꞌan Jesús,
ni̱ huê danj na̱nj ûta hueꞌê gahuin chrunj doj,
ni̱ ûta garanꞌ ruhuâ Ma̱ꞌan Ñaꞌanj an niꞌin sa giꞌhiaj Ma̱ꞌan,
ni̱ huê danj na̱nj garanꞌ ruhuâ nej síi niꞌin nej sôꞌ sa giꞌhiaj Ma̱ꞌan.