San Juan 1

Nuguanꞌ gè gi̱ꞌhiaj ga̱na̱ni̱nꞌ nânj huin gachrûn

SAN JUAN

Nuguanꞌan ganahuin nneè

Àsìj sinï̱ïn ni̱ Nuguanꞌan gahuin,

ni̱ gane nìchrùnꞌ Nuguanꞌ dânj ngà Ma̱ꞌan Ñaꞌanj an,

ni̱ Nuguanꞌ dânj huin Ma̱ꞌan Ñaꞌanj an.

2 Ni̱ nuguanꞌ nânj gane àsìj sinï̱ïn ngà Ma̱ꞌan Ñaꞌanj an.

La Palabra (Juan 1.1-18)

3 Ni̱ Nuguanꞌ nânj huin sa giꞌhiaj daranꞌ nej sa màn guruguiꞌ giniꞌhioꞌ;

ni̱ si nuhuiꞌ Nuguanꞌan giꞌhiaj,

ni̱ gàꞌ si ꞌngo̱ nej sa màn giniꞌhioꞌ nitaj mân mánj.

4 Ni̱ ngà Nuguanꞌ nânj gane sa nìꞌnàꞌa,

ni̱ sa nìꞌnàꞌ dânj giꞌhiaj garânj daꞌngaꞌ ruhuâ nej guiì.

5 Ni̱ sa yigï̀n dânj giꞌhiaj giyigï̀n ñan hua̱ ru̱mi̱nꞌin,

sani̱ nun gùnùkuaj sa ru̱mi̱nꞌ dânj gi̱ꞌhia ga̱huin ru̱mi̱nꞌ riñan sa yigï̀ïn mánj.

6 Ga ꞌngo̱ sí dânj ni̱ Juan gùꞌnàj sôꞌ,

dadinꞌ Ma̱ꞌan Ñaꞌanj an gaꞌnḯn gaꞌnaꞌ sôꞌ.

7 Gaꞌnaꞌ sôꞌ dadinꞌ gahuin sôꞌ ꞌngo̱ sí giniꞌin,

ni̱ ganataꞌ sôꞌ rayiꞌî sa yigï̀n dânj daꞌnga ni̱ gùyùmàn ruhuâ nej guiì niꞌin ninj rayiꞌî sa yigï̀ïn ngà si-nùguànꞌ sôꞌ.

8 Sê sa yigï̀n huin sôꞌ mánj,

gaꞌnaꞌ gànàtàꞌ sôꞌ rayiꞌî sa yigï̀ïn.

9 Ni̱ sa yigï̀n yàngàꞌ dânj,

huin sa gudugùn riñan daranꞌ nej guiì ni̱ gaꞌnaj ruhuâ yumiguìi nânj.

10 Ni̱ nne sa yigï̀n dânj ruhuâ yumiguìi,

ni̱ Ma̱ꞌan sa yigï̀n dânj giꞌhiaj yumiguìi;

sani̱ nun gi̱ni̱ꞌin nej guiì màn ruhuâ yumiguìi nânj sa yigï̀ïn mánj.

11 Gaꞌnaꞌ Ma̱ꞌan sa yigï̀n dânj riñan nej guiì huin yiñan,

sani̱ nun ga̱na̱huin ràꞌa ninj Ma̱ꞌan mánj.

12 Sani̱ daranꞌ nej guiì ganahuin ra̱ꞌa Ma̱ꞌan Jesús,

ni̱ guyumân ruhuâ ninj niꞌin ninj siyu̱gui Ma̱ꞌan,

ni̱ ga̱na̱huin ra̱ꞌa ninj nanìꞌhiaj ninj ni̱ ga̱huin ninj daꞌní Ma̱ꞌan Ñaꞌanj an.

13 Ni̱ ga̱ꞌnga̱ nàkà nej guiì nânj sani̱ sê sa garanꞌ ruhuâ nej guiì gahuin mánj Ma̱ꞌan Ñaꞌanj an huin sa giꞌhiaj na̱nj ánj.

14 Ni̱ Nuguanꞌ dânj gahuin síi,

ni̱ gane siganï̂nj nêꞌ ni̱ giniꞌînꞌ si ûta nu̱kua,

ni̱ nu̱kua dadinꞌ huin ꞌngo̱ rïn Daꞌní Ma̱ꞌan Rê,

ûta sunuj hua ruhuaj ni̱ huin ꞌngo̱ sa yàngàꞌa.

15 Ni̱ gananï̂n Juan rayiꞌî Ma̱ꞌan Jesús,

ni̱ ûta nùkuaj gaꞌmin sôꞌ ni̱ gataj sôꞌ:

—Huê rayiꞌî sôꞌ nânj huin sa gatâ:

Ga̱ꞌna̱ꞌ ꞌngo̱ sí dânj neꞌ rùkùj,

ni̱ ga̱na̱huin ña̱n sôꞌ riñânj;

dadinꞌ gàꞌ si̱nï̱n sôꞌ huin gàꞌ daꞌ ñùnj.

16 Dadinꞌ sa ni̱ka̱ hua riñan Ma̱ꞌan sôꞌ huin sa ganahuin ra̱ꞌa darûnꞌ,

ni̱ ganahuin roꞌôꞌ sunuj u ni̱ gànàtàꞌ doj sunuj u yichrá nej sa ganahuin roꞌôꞌ.

17 Dadinꞌ riñan sachij Moisés guyumân si-ley Ma̱ꞌan Ñaꞌanj an,

sani̱ sunuj u ngà sa yàngàꞌa gidigân Ma̱ꞌan Jesucristo.

18 Gàꞌ si ꞌngo̱ nej guiì nun gi̱ni̱ꞌin dàj hua Ma̱ꞌan Ñaꞌanj an mánj;

man ꞌngo̱ rïn Daꞌnin,

sa gane ngà Ma̱ꞌan huin sa niꞌin dàj hua Ma̱ꞌan ni̱ ôꞌ huin sa gidigân dàj hua Ma̱ꞌan.

Gaꞌmin hueꞌê Juan Bautista yiꞌî Ma̱ꞌan Jesús

(Mt. 3:11-12; Mr. 1:7-8; Lc. 3:15-17)

19 Ni̱ huê dànanj gataj Juan duguataꞌ nnee,

riñan nej rej ngà riñan nej levita nga gaꞌnḯn nej judío nne ruhuâ yumanꞌ snàꞌànj Jerusalén nga gaꞌanj gàchìnj naꞌanj nej sôꞌ ni̱ gataj nej sôꞌ:

Ahuin sí huînꞌ ràꞌaj.

Juan el Bautista identifica al Mesías (Juan 1.19-34)

20 Ni̱ ganataꞌ sôꞌ ni̱ nun ga̱chri̱ huì sôꞌ ni̱ gataj sôꞌ:

—Sê huin Cristo mánj.

21 Ni̱ gachín naꞌanj nej sí dânj ni̱ gataj nej sôꞌ:

—Ni̱ ahuin si huînꞌ ràꞌaj.

Si huêꞌ huin Elías sàꞌ.

Ni̱ gataj Juan:

—Sê huin Elías mánj.

Ni̱ gachín naꞌanj nej sí dânj:

—Si huêꞌ huin profeta ga̱ꞌna̱ꞌ sàꞌ:

Nanikàj Juan ni̱ gataj sôꞌ:

—Sê danj huín mánj.

22 Ni̱ gataj nej sí dânj:

—Hiôꞌ ni̱ ahuin sí huînꞌ ràꞌaj.

Daꞌnga ni̱ gi̱nikaj nej ñûnj nuguanꞌan ga̱ꞌa̱nj nej ñûnj riñan nej sí gaꞌnḯn gaꞌna nej ñûnj.

Ni̱ dàj tajꞌ rayiꞌî Ma̱ꞌânꞌ ràꞌaj.

23 Ni̱ gataj sôꞌ:

—Ñùnj huin ꞌngo̱ sí ni̱ka̱j si-nùguànꞌ ꞌngo̱ sí ga̱ꞌmi̱n nùkuaj riñan hioꞌó nàkòo:

“Na̱gi̱ꞌhiaj ni̱ka̱ nej suj ma̱ꞌan nej suj riñan Ma̱ꞌan Señor” —dàj rûnꞌ gataj Isaias sôꞌ gataj dàj ga̱huin.

24 Ni̱ nej sí gaꞌanj gàchìnj naꞌanj dânj huin yiꞌnïnꞌ nej dùguìꞌ nej sí fariseo.

25 Ni̱ gachín naꞌanj nej sôꞌ,

ni̱ gataj nej sôꞌ:

—Nùnj huin saj ni̱ duguataꞌ nneꞌ,

si sê Cristo,

ni̱ si sê Elías,

ni̱ si sê sôꞌ gataj dàj ga̱huin huînꞌ ràꞌaj.

26 Nanikàj Juan ni̱ gataj sôꞌ:

—Ñùnj ni̱ man ruhuâ nnee duguataꞌ nnej nej guiì;

sani̱ siganï̂nj nej suj nne ꞌngo̱ sí danj sani̱ nun niꞌin nej suj sôꞌ mánj.

27 Sí nânj ꞌnaꞌ neꞌ rùkùj,

sani̱ gàꞌ si̱nï̱n sôꞌ huin gàꞌ daꞌ ñùnj,

sani̱ nàꞌàj ñânj ga̱na̱chí nnïnj ꞌnï̱nj kanj ꞌnï̱nj dakó sôꞌ.

28 Huê dànanj gahuin riñan hioꞌó Betania,

neꞌ ané duꞌhua kïn Jordán,

ñan nu̱n Juan duguataꞌ nne sôꞌ nej guiì.

Jesús huin si-Ma̱tsï̱j Ma̱ꞌan Ñaꞌanj an

29 Aꞌngô gui dânj ni̱ giniꞌin Juan duguataꞌ nnee si ꞌna̱ꞌ nichì Ma̱ꞌan Jesús ñan ni̱kï̱nꞌ sôꞌ ni̱ gataj sôꞌ:

—Gi̱ni̱ꞌhiaj nej suj dadinꞌ hiuj nânj ꞌnaꞌ si-Ma̱tsï̱j Ma̱ꞌan Ñaꞌanj an ni̱ huej huin sa gi̱ꞌhiaj gànàrë̀ꞌ si-ga̱kïnꞌ nej guiì.

30 Huê rayiꞌî Ma̱ꞌan nânj huin sa gatâ gu̱nïn nej suj:

“Neꞌ rùkùj ꞌnaꞌ ꞌngo̱ sí dânj,

ni̱ huin ña̱n sôꞌ riñânj;

dadinꞌ gàꞌ si̱nï̱n sôꞌ huin gàꞌ daꞌ ñùnj.”

31 Sani̱ nun niꞌín dàj hua Ma̱ꞌan sôꞌ mánj;

sani̱ gaꞌnaꞌ Ma̱ꞌan sôꞌ guendâ gi̱ni̱ꞌin nej guiì màn yumanꞌ Israel Ma̱ꞌan sôꞌ,

rayiꞌî dan duguataꞌ nnêj nej guiì daꞌnga ni̱ giniꞌin ninj Ma̱ꞌan sôꞌ.

32 Ni̱ ganataꞌ Juan sa giniꞌin sôꞌ ni̱ gataj sôꞌ:

—Giniꞌín gininj Ma̱ꞌan Espíritu Santo gaꞌnaj neꞌ yàtàꞌa ni̱ huaj dàj rûnꞌ hua yaꞌàan ni̱ ga̱ta̱j ahui sôꞌ na̱nj ánj.

33 Ni̱ gàꞌ nun niꞌín sij mánj;

sani̱ Ma̱ꞌan sa gaꞌnḯn gaꞌnaꞌ du̱guataꞌ nnêj gataj:

“Ni̱ sa a̱hui gi̱ni̱ꞌînꞌ gàtàꞌ Ma̱ꞌan Espíritu Santo,

ni̱ gaꞌanj ga̱ne ahui sôꞌ,

ni̱ huê Ma̱ꞌan sôꞌ huin sa du̱guataꞌ nne ngà Ma̱ꞌan Espíritu Santo nej guiì na̱nj ánj.”

34 Ni̱ giniꞌín,

ni̱ rayiꞌî dan ganatá si huê sij huin Daꞌní Ma̱ꞌan Ñaꞌanj an.

Nej sôꞌ gaꞌnaꞌ ga̱huin chru̱n si̱nï̱n riñan Ma̱ꞌan Jesús

35 Aꞌngô gui dânj ni̱ ni̱kï̱nꞌ ñûn Juan,

ngà huìj nej sí gaꞌnaꞌ ga̱huin chru̱n riñan sôꞌ.

Los seguidores siguen a Jesús (Juan 1.35-51)

36 Ni̱ nga giniꞌin sôꞌ aché nun Ma̱ꞌan Jesús hiuj dânj,

ni̱ gataj sôꞌ:

—Si-Ma̱tsï̱j Ma̱ꞌan Ñaꞌanj an aché nun hiuj nânj na̱nj ánj.

37 Ni̱ nga gunïn nguèj sí gaꞌnaꞌ ga̱huin chru̱n riñan Juan nej nuguanꞌ nânj,

ni̱ ginikòꞌ nguèj sôꞌ gaꞌanj nguèj sôꞌ rukû Ma̱ꞌan Jesús.

38 Ni̱ nanikàj Ma̱ꞌan Jesús giniꞌhia riñan nguèj sôꞌ ni̱ gata:

—Ahuin si nanaꞌhuiꞌ nguèj suj ràꞌaj.

Ni̱ gataj nguèj sôꞌ:

—Rabí (nuguanꞌ nânj ruhuaj ga̱ta Maestrûj),

dànèꞌ nne Ma̱ꞌân rèꞌ ràꞌaj.

39 Ni̱ gata gu̱nïn nguèj sôꞌ:

—Ga̱ꞌna̱ꞌ nguèj suj ni̱ gi̱ni̱ꞌin nguèj suj ñan nné.

Ni̱ gaꞌanj nguèj sij nngaj ni̱ giniꞌin nguèj sij ñan nne,

ni̱ gane nguèj sij gui dânj ñan nne Ma̱ꞌan;

dadinꞌ gàꞌ gisîj agaꞌ gaꞌânj neꞌ niìn.

40 Andrés huin dinḯn Simón Pedro,

huin ꞌngo̱ nguèj sí gunïn gaꞌmin Juan,

ni̱ ginikòꞌ nguèj sôꞌ rukú Ma̱ꞌan Jesús gaꞌanj nguèj sôꞌ.

41 Ni̱ ganariꞌ si̱nï̱n sôꞌ dinḯn sôꞌ Simón,

ni̱ gataj sôꞌ:

—Ganariꞌ nej ñûnj Ma̱ꞌan Mesías —ni̱ nuguanꞌ nânj ruhuaj ga̱ta,

Ma̱ꞌan Cristo.

42 Ni̱ ni̱ka̱j sôꞌ dinḯn sôꞌ Simón gaꞌnaꞌ sôꞌ riñan Ma̱ꞌan Jesús.

Ni̱ giniꞌhiaj Ma̱ꞌan Jesús riñan Simón ni̱ gata gu̱nïn sôꞌ:

—Sòꞌ huin Simón,

ni̱ huînꞌ daꞌní Jonás;

ni̱ si-yu̱guît ga̱huin Cefas —ni̱ Cefas ruhuaj ga̱ta,

Pedro.

Gakḯn Ma̱ꞌan Jesús gaꞌnaꞌ Felipe ngà Natanael riñanj

43 Aꞌngô gui dânj ni̱ ganï̂n ruhuâ Ma̱ꞌan Jesús gàꞌan riñan hioꞌó Galilea,

ni̱ ganariꞌij Felipe,

ni̱ gata gu̱nïn sôꞌ:

—Gi̱nikôꞌ sòꞌ rukú.

44 Ni̱ yiñán Felipe huin yumanꞌ snàꞌànj gùꞌnàj Betsaida,

yumanꞌ snàꞌànj huin yiñán Andrés ngà Pedro.

45 Ni̱ ganariꞌ Felipe Natanael ni̱ gataj sôꞌ:

—Ganariꞌ nej ñûnj Ma̱ꞌan Jesús nne ruhuâ yumanꞌ Nazaret,

sôꞌ huin daꞌní José,

sôꞌ ràyìꞌì gachrûn sachij Moisés riñan si-ley Ma̱ꞌan Ñaꞌanj an,

dadinꞌ huê dànanj gachrûn nej sôꞌ gataj dàj ga̱huin.

46 Ni̱ gataj Natanael:

—Ga̱ꞌhue ga̱hui̱ ꞌngo̱ sa hua̱ hueꞌê ruhuâ yumanꞌ Nazaret na̱nj nîꞌ.

Ni̱ gataj Felipe:

—Ga̱ꞌna̱ꞌ sòꞌ ni̱ gi̱niꞌînꞌ àj nï̂n.

47 Ni̱ nga giniꞌin Ma̱ꞌan Jesús si ꞌna̱ꞌ nichì Natanael riñanj,

ni̱ gata gu̱nïn sôꞌ:

—Hiuj nânj ꞌnaꞌ ꞌngo̱ sí Israelita dagahuin yàngàꞌ,

ni̱ nitaj sa digañuꞌunj un nun ruhuâ nimân sôꞌ mánj.

48 Ni̱ gataj Natanael gu̱nïn Ma̱ꞌan Jesús:

—Dànèꞌ giniꞌîn rèꞌ ñùnj ràꞌaj.

Nanikàj Ma̱ꞌan Jesús ni̱ gata gu̱nïn sôꞌ:

—Nga nï̀nꞌ ga̱chin gàkï̀nj Felipe ga̱ꞌna̱ꞌ riñânj,

ni̱ gàꞌ giniꞌín sòꞌ nga nikïnꞌ riki chrun îgu.

49 Nanikàj Natanael ni̱ gataj sôꞌ:

—Rabí,

sòꞌ huin Daꞌní Ma̱ꞌan Ñaꞌanj an;

ni̱ Ma̱ꞌan rèꞌ huin Rey ni̱ka̱j su̱n riñan hioꞌó Israel.

50 Nanikàj Ma̱ꞌan Jesús ni̱ gata:

—Guendâ gatâ:

Si giniꞌín si ni̱kï̱nꞌ riki chrun îgu,

ni̱ rayiꞌî dan ni̱ guyumân ruhuâꞌ niꞌînꞌ ñùnj.

Sani̱ dànanj nìko doj ga̱ sa gi̱ni̱ꞌînꞌ na̱nj ánj.

51 Ni̱ gataj Ma̱ꞌan Jesús:

—Yàngàꞌ,

ni̱ yàngàꞌ hia nï̀nꞌ gàtà gu̱nïn nej suj:

Ni̱ gi̱ni̱ꞌin nej suj si ga̱na̱ꞌyi̱ꞌnï̱n yàtàꞌa ni̱ gi̱ni̱ꞌin nej suj si ga̱hui̱ nej ángel gunânj gi̱ꞌtsi riñan Ma̱ꞌan Ñaꞌanj an gaꞌanj ninj yàtàꞌa ni̱ ga̱na̱ni̱nj ninj ga̱ꞌna̱ꞌ ninj ñan nne Ma̱ꞌán.