NEJ SA GIꞌHIAJ
nej Apóstol
Gataj Ma̱ꞌan Jesús si ga̱ꞌnïn ga̱ꞌna̱ꞌ Ma̱ꞌan Espíritu Santo
1
Di̱nï̂nj Teófilo,
riñan ñanj gachrûn sìnï̀nj guchiꞌ riñanꞌ,
ni̱ gaꞌmînj rayiꞌî nej nuguanꞌ gayiꞌì Ma̱ꞌan Jesús giꞌhia ni̱ gidigân sìnï̀nj.
2 Nda gui gahui gaꞌan yàtàꞌa,
neꞌ rùkù nga gisîj gaꞌnïnj suun riñan nej sí gidigân si̱nïnj si-nùguànꞌ Ma̱ꞌan Ñaꞌanj an dàj rûnꞌ gataj Ma̱ꞌan Espíritu Santo gu̱nïn.
3 Neꞌ rùkù nga gisîj giranꞌ sa̱ñu̱n Ma̱ꞌan ni̱ gahuij riñan rugutsìi,
sani̱ ganaꞌnïn ni̱ ganikïnj riñan nej sij,
ni̱ hua̱ nìꞌnàꞌ gej ni̱ nitaj si huaj gùrùguìꞌ chìꞌ ruhuôꞌ niꞌînꞌ Ma̱ꞌan,
ni̱ gàꞌì ganikïnj riñan nej sij riki huìj xia gui ni̱ ganataj si-nùguànꞌ Ma̱ꞌan Ñaꞌanj an riñan nej sij.
4 Ni̱ nga mân nùguànꞌàn nej sij,
ni̱ gaꞌnïnꞌ Ma̱ꞌan Jesús suun riñan nej sij ni̱ gata:
—Sisi̱ si̱ gahui nej sij ga̱ꞌa̱nj nej sij neꞌ ye̱ꞌ yumanꞌ snàꞌànj Jerusalén,
dadinꞌ daꞌhui nej sij gànàꞌhuìj nej sij nda ga̱na̱huin ra̱ꞌa nej sij Ma̱ꞌan Espíritu Santo dàj rûnꞌ gataj Ma̱ꞌan Re,
ni̱ huê danj gaꞌmin,
ni̱ gàꞌ gunïn nej suj dàj gata.
5 Ni̱ gataj Ma̱ꞌan gu̱nïn nej guiì,
Juan ni̱ duguataꞌ nne sôꞌ nej guiì ruhuâ nnee,
sani̱ nej suj ni̱ si̱ gachîn gàꞌì gui ni̱ gàtàꞌ nne nej suj ngà Ma̱ꞌan Espíritu Santo.
Gahui Ma̱ꞌan Jesús gaꞌan yàtàꞌa
6 Ni̱ gachín naꞌanj nej guiì ganaraꞌhuiꞌ hiuj dânj Ma̱ꞌan Jesús,
ni̱ gataj ninj:
—Giꞌhiaj Ma̱ꞌân rèꞌ si ga̱na̱huin Israel ꞌngo̱ país diû nan nînꞌ.
7 Ni̱ gataj Ma̱ꞌan Jesús:
—Sê nej suj huin sa daꞌhui gi̱ni̱ꞌin àmàn ga̱huin ni̱ dàj gi̱ꞌhiaj Ma̱ꞌan Rê,
dadinꞌ ꞌngo̱ rïn huin sa niꞌin dàj giꞌhia ni̱ àmàn na̱gi̱ꞌhia ga̱na̱huin yumanꞌ Israel ꞌngo̱ país na̱nj ánj.
8 Sani̱ nga gaꞌnaꞌ Ma̱ꞌan Espíritu Santo riñan nej suj,
ni̱ ga̱na̱huin nùkuaj nej suj gi̱ꞌhia,
ni̱ gàyìꞌì nej suj ni̱ gànàtàꞌ si̱nï̱n nej suj rayiꞌí àsìj Jerusalén,
ni̱ ga̱ꞌa̱nj nej suj daꞌ hua̱ nï̀nꞌ gàchràꞌ riñan hioꞌó Judea,
ni̱ nï̀nꞌ gàchràꞌ riñan hioꞌó Samaria,
ni̱ ga̱ꞌa̱nj ga̱ꞌmi̱n nej suj nï̀nꞌ gàchràꞌ riñan nej hioꞌó màn ruhuâ yumiguìi.
9 Ni̱ nga gisîj gaꞌmin Ma̱ꞌan Jesús nej nuguanꞌ nânj,
ni̱ niꞌhiaj riñan nej sij mân nej sij ni̱ gahui gaꞌan yàtàꞌa,
ni̱ gaꞌnaꞌ ꞌngo̱ nnga ni̱ gahuin huij riki nga dânj,
huê danj ni̱ nun gi̱ni̱ꞌin nej sij dànèꞌ gaꞌan gàꞌ mánj.
10 Ni̱ màn nej sij niꞌhiaj nej sij neꞌ yàtàꞌa,
nga nï̀nꞌ gahui Ma̱ꞌan Jesús hua neꞌ yàtàꞌa,
ni̱ ñan màn nej sij dânj ganikïnꞌ huìj sí dânj ni̱ nda gàtsì chre hua atsîj nun nguèj sôꞌ.
11 Ni̱ gataj nguèj sôꞌ gunïn nej sij:
—Nej suj sí ꞌnaꞌ yumanꞌ Galilea,
nùnj huin saj ni̱ giniꞌhiaj nej suj yàtàꞌa ràꞌaj.
Dàj rûnꞌ giniꞌin nej suj,
gahui Ma̱ꞌan Jesús gaꞌan yàtàꞌa,
ni̱ huê dànanj gi̱ni̱ꞌin nej suj nànìkàj ñunj ga̱ꞌnaj na̱nj ánj.
Ganagui nej sij Matías ni̱ sôꞌ ga̱na̱tu̱ si-lugâ Judas Iscariote
12 Raa̱ kïj gùꞌnàj Olibo mân nej sij ni̱ nanikàj nej sij nanꞌ nej sij yumanꞌ snàꞌànj Jerusalén,
dadinꞌ ni̱kï̱nꞌ nìchrùnꞌ kïj dânj ñan nngaj yumanꞌ snàꞌànj Jerusalén ni̱ ꞌngo̱ gui ganarânj rûhua nika gaché nej sij guchiꞌ nej sij ñan ni̱kï̱nꞌ kïj dânj.
13 Ni̱ nga gunumân nej sij ruhuâ yumanꞌ snàꞌànj dânj,
ni̱ gaꞌanj nej sij ñan nne ꞌngo̱ hueꞌ ganataꞌ yàtàꞌa,
ñan nne Pedro,
Jacobo,
Juan,
Andrés,
Felipe,
Tomás,
Bartolomé,
Mateo,
Jacobo sôꞌ huin daꞌní Alfeo,
Simón sôꞌ gùꞌnàj Zelote ni̱ Judas sôꞌ huin dinḯn Jacobo.
14 Ni̱ hua̱ yìtï̀nj ruhuâ daranꞌ nej sij ni̱ hua̱ gu̱ña̱n ruhuâ nej sij mân nej sij ni̱ gachín nìꞌhiaj nej sij ni̱ ûta àko gaꞌmin nej sij riñan Ma̱ꞌan Ñaꞌanj an,
ni̱ màn nej siyànàa ngà nej sij,
ni̱ nne nni Ma̱ꞌan Jesús ngà nej sij ni̱ nne nej dinïn ngà nej sij.
15 Ni̱ nej gui dânj ni̱ ganahuin ña̱n Pedro riñan nej dinï̂nt (ni̱ nej guiì naraꞌhuiꞌ hiuj dânj huin daꞌnga ꞌngo̱ siêntu tá ko̱),
ni̱ gataj sôꞌ:
16 —Ginun ruhuâ nej suj di̱nï̂nj,
si ña̱ꞌa̱n ni̱ña̱n huaj si gìsìj nej nuguanꞌ gaꞌmin Ma̱ꞌan Espíritu Santo nga garânj sunj duꞌhua David rayiꞌî Judas,
dadinꞌ sôꞌ gahuin sí gidigân nga ga̱ꞌna̱ꞌ gi̱daꞌa nej sí dânj Ma̱ꞌan Jesús.
17 Dadinꞌ huê sôꞌ huin ꞌngo̱ nej yùhuìj sí gaꞌnaꞌ ga̱huin chru̱n ngà nêꞌ,
ni̱ giꞌhiaj sun nùguànꞌàn sôꞌ ngà nêꞌ.
18 Ni̱ sanꞌanj gahuin duꞌhue sôꞌ nga guduꞌhuêj sôꞌ Ma̱ꞌan Jesús,
girânj sôꞌ ꞌngo̱ hioꞌóo,
ni̱ gininj sôꞌ ni̱ gaꞌhuiꞌ sôꞌ ahui sôꞌ riñan hioꞌó,
ni̱ gisitsiꞌ riki sôꞌ ni̱ gahui daranꞌ nej yichriꞌ sôꞌ.
19 Ni̱ giniꞌin daranꞌ nej guiì màn yumanꞌ snàꞌànj Jerusalén dàj giranꞌ sôꞌ,
ni̱ dugûꞌnàj nej sôꞌ nânj aꞌmin nej sôꞌ hioꞌó dânj,
hioꞌó gahuin duꞌhue tun.
20 Dadinꞌ huê danj nnunj riñan librû gùꞌnàj Salmos:
Ni̱ gùnàj ꞌngo̱ rïn dukuâ sij,
ni̱ si̱ gane nej guiì ruhuaj.
Huê danj nnunj riñanj ni̱:
Ga̱na̱ka̱j aꞌngô síi si-su̱n sij.
21 ’Huê danj ni̱ ña̱ꞌa̱n huaj si ga̱na̱chru̱n su̱n nêꞌ ꞌngo̱ sí ga̱na̱ka̱j si-su̱n Judas,
ni̱ daꞌhui sôꞌ ga̱huin sôꞌ goꞌngo̱ sí gaché nùguànꞌàn ngà nêꞌ daranꞌ diû nga gahui Ma̱ꞌan Jesús huaꞌan ni̱ nanikàj ñunj gunumanj siganï̂nj nêꞌ,
22 sí giniꞌin nga gataꞌ nne Ma̱ꞌan Jesús giꞌhiaj Juan ni̱ sí giniꞌin nga ganaꞌnï̂nj Ma̱ꞌan Jesús siganï̂nj nej nîman ni̱ giniꞌin sôꞌ nga gahui Ma̱ꞌan Jesús gaꞌan yàtàꞌa,
huê sí danj huin si gànànùn sun ni̱ ga̱na̱ka̱j duguiꞌ sôꞌ nga nêꞌ.
23 Ni̱ ganagui nej sij huìj ranꞌ nej sôꞌ nne ngà nej sij hiuj dânj:
Ni̱ ꞌngo̱ sôꞌ huin José ni̱ huê sôꞌ gùꞌnàj Barsabás,
ni̱ huê sôꞌ gùꞌnàj sí giꞌhiaj sa ni̱ka̱a,
ni̱ aꞌngô sôꞌ gùꞌnàj Matías.
24 Ni̱ gaꞌmin nej sij ngà Ma̱ꞌan Ñaꞌanj an ni̱ gataj nej sij:
—Señor,
Ma̱ꞌân rèꞌ huin sa niꞌin dàj hua ruhuâ nimân nej guiì,
ni̱ gi̱di̱gân Ma̱ꞌân rèꞌ ahuin ꞌngo̱ nguèj sí nânj ganagui Ma̱ꞌân rèꞌ,
25 ni̱ sôꞌ ga̱na̱huin ra̱ꞌa sun ginikaj Judas,
dadin gaꞌanj ni̱ꞌhia̱ nìgànj sôꞌ rayiꞌî gakï̱nꞌ giꞌhiaj sôꞌ ni̱ gaꞌanj sôꞌ ñan daꞌhui sôꞌ ga̱ꞌa̱nj sôꞌ.
26 Ni̱ gachrûn nej sij siyu̱gui nguèj sôꞌ ni̱ guduku nguèj sôꞌ número ni̱ gininj número riñan siyu̱gui sôꞌ gùꞌnàj Matías;
ni̱ àsìj orâ dânj ni̱ ganakaj su̱n sôꞌ ni̱ ganakaj duguiꞌ sôꞌ ngà aꞌngô nej yàn nej sôꞌ gaꞌnaꞌ gahuin chru̱n riñan Ma̱ꞌan Jesús.