Ñanj kartâ nânj huin gachrûn Apóstol Pablo riñan nej
ROMANOS
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Roma
1
Ñùnj huin Pablo,
ni̱ huín si-musû Ma̱ꞌan Jesucristo,
ni̱ gakḯn Ma̱ꞌan Ñaꞌanj an ñùnj guendâ ga̱huin sí ga̱ꞌa̱nj gi̱di̱gân si̱nï̱n si-nùguànꞌ Ma̱ꞌan,
ni̱ ganagui Ma̱ꞌan ñùnj guendâ gànàtàj nuguanꞌ gi̱ꞌhiaj ga̱na̱ni̱n nej guiì,
2 dadinꞌ àsìj diû ri̱ki ni̱ gàꞌ gachrûn nej sôꞌ gataj dàj gahuin giꞌhiaj Ma̱ꞌan Ñaꞌanj an.
3 Si hua̱ ni̱ña̱n si gàꞌnïn ga̱ꞌna̱ꞌ Ma̱ꞌan Jesús huin Daꞌnin,
dadinꞌ gàꞌnaj riki yiꞌnïnꞌ nej daꞌní David ni̱ ginika tun sôꞌ,
4 gahuiꞌ Ma̱ꞌan Jesús sani̱ ganaꞌnïn siganï̂nj nej nîman ni̱ huin daꞌní Ma̱ꞌan Ñaꞌanj an giꞌhiaj Ma̱ꞌan Espíritu Santo,
5 ni̱ huê Ma̱ꞌan Jesús huin sa rikî si ga̱huín sí ga̱ꞌa̱nj gi̱di̱gân si̱nï̱n si-nùguànꞌ Ma̱ꞌan Ñaꞌanj an riñan nej guiì,
daꞌnga ni̱ gaꞌhue gu̱nïn nej guiì si-nùguànꞌ Ma̱ꞌan ni̱ gùyùmàn ruhuâ ninj niꞌin ninj Ma̱ꞌan,
ni̱ da̱gahuin ninj riñan Ma̱ꞌan,
ni̱ ga̱ ꞌì ruhuâ ninj niꞌin ninj Ma̱ꞌan.
6 Ni̱ siganï̂nj nej guiì dânj nne nej suj,
ni̱ gakḯn Ma̱ꞌan Ñaꞌanj an ga̱ꞌna̱ꞌ nej suj guendâ ga̱huin nej suj guiì ginikòꞌ rukû Ma̱ꞌan Jesucristo.
7 Ni̱ riñan daranꞌ nej suj nne ruhuâ yumanꞌ snàꞌànj Roma huaj nuguanꞌ nânj,
ni̱ ûta ꞌì ruhuâ Ma̱ꞌan Ñaꞌanj an niꞌin nej suj,
dadinꞌ gakḯn Ma̱ꞌan guendâ ga̱huin nej suj guiì gèe riñanj:
Ni̱ ga̱na̱huin ràꞌa nej suj sunuj u ni̱ ga̱ dïnꞌïnj ruhuâ nej suj,
dadinꞌ huin nej suj daꞌní Ma̱ꞌan Ñaꞌanj huin rej nêꞌ ni̱ huin nej suj daꞌní Ma̱ꞌan Señor Jesucristo.
Huin ruhuâ Pablo ga̱ꞌa̱nj niꞌhiaj sôꞌ yumanꞌ snàꞌànj Roma
8 Gàꞌ si̱nï̱n gaꞌhuí si guruhuâ Ma̱ꞌan Daꞌân rayiꞌî daꞌ ꞌngo̱ nej suj,
dadinꞌ guyumân ruhuâ nej suj niꞌin nej suj Ma̱ꞌan Jesucristo,
ni̱ gunïn nej guiì màn nï̀nꞌ gàchràꞌ ruhuâ yumiguìi si guyumân ruhuâ nej suj niꞌin nej suj Ma̱ꞌan Jesús.
9 Dadinꞌ gàꞌ niꞌin Ma̱ꞌan Ñaꞌanj ri̱ña̱n gunânj gi̱tsí si gànànï̀nj nuguanꞌ gi̱ꞌhiaj ga̱na̱ni̱n nej guiì,
dadinꞌ huê riñanj giꞌhiaj sûnj ngà nanè nimânj,
ni̱ nga gaꞌmînj nngaj ni̱ daranꞌ diû gununâj rayiꞌî nej suj riñanj,
10 ni̱ daranꞌ diû gachín ni̱ꞌhia riñan Ma̱ꞌan Ñaꞌanj an ni̱ si garanꞌ ruhuaj ni̱ hua̱ ꞌngo̱ gui ni̱ ga̱ꞌnïn gùchìj riñan nej suj.
11 Dadinꞌ ruhuâj gi̱niꞌín riñan nej suj,
ni̱ gànàtàj gu̱nïn nej suj si hua̱ ꞌngo̱ nej sun ga̱ꞌhue riki Ma̱ꞌan Ñaꞌanj an riñan nej suj,
ni̱ ga̱na̱huin ran ruhuâ nej suj;
12 ni̱ huê danj ni̱,
dàj rûnꞌ guyumân ruhuâj niꞌín Ma̱ꞌan Ñaꞌanj an ni̱ huê danj na̱nj gùyùmàn ruhuâ nej suj.
13 Sani̱ ruhuâj si ga̱ra̱n daꞌngaꞌ ruhuâ nej suj di̱nï̂nj,
dadinꞌ ûta gàꞌì ganï̂n ruhuâj gùchìj ñan màn nej suj sani̱ nda gui hia̱j ni̱ nun ga̱ꞌhue gùchìj ñan màn nej suj,
dadinꞌ garanꞌ ruhuâj gi̱di̱gán si-nùguànꞌ Ma̱ꞌan Ñaꞌanj an siganï̂nj nej suj,
dàj rûnꞌ giꞌhia siganï̂nj aꞌngô nej sí nàsìnùnj un sani̱ nun gìyìꞌnï̀nꞌ suun si gùchìj ñan màn nej suj mánj.
14 Daꞌhuí riñan daranꞌ nej guiì,
ni̱ daꞌhuí riñan nej sí aꞌmin nânj griego ngà riñan nej sí ranꞌ àko,
ni̱ daꞌhuí riñan nej sí ûta sàꞌ chru̱un ngà riñan nej sí nitaj si chru̱un.
15 Huê danj na̱nj ûta nìhiàꞌ hua ruhuâj,
ni̱ ganï̂n ruhuâj gùchìꞌ raꞌña̱n riñan nej suj màn Roma guendâ gànàtàj riñan nej suj nuguanꞌ gi̱ꞌhiaj ga̱na̱ni̱n nej suj.
Ûta nùkuaj nuguanꞌ gi̱ꞌhiaj ga̱na̱ni̱nꞌ
16 Dadinꞌ nitaj si giriꞌí sinàꞌàj a guendâ gànànï̀nj nuguanꞌ gi̱ꞌhiaj ga̱na̱ni̱n nej guiì,
dadinꞌ huej huin sa nùkuaj rikî Ma̱ꞌan Ñaꞌanj an riñânj ni̱ huej huin sa gi̱ꞌhiaj ga̱na̱ni̱n daranꞌ nej guiì gùyùmàn ruhuâ;
ni̱ gàꞌ si̱nï̱n gu̱nïn nej judío,
ni̱ neꞌ rùkù gu̱nïn nej sí nàsìnùnj un.
17 Dadinꞌ nuguanꞌ gi̱ꞌhiaj ga̱na̱ni̱n nej guiì gidigân dàj ga̱ꞌhue ga̱na̱huin ni̱ka̱ ꞌngo̱ guiì gi̱ꞌhiaj Ma̱ꞌan Ñaꞌanj an:
Ni̱ guiì guyumân ruhuâ ni̱ sa guyumân ruhuâ ninj dânj gi̱ꞌhiaj ga̱na̱ni̱n ninj,
dàj rûnꞌ taj riñan ñanj si-nùguànꞌ Ma̱ꞌan Ñaꞌanj an:
“Sí giꞌhiaj sa ni̱ka̱a ni̱ guendâ guyumân ruhuâ sôꞌ ni̱ ga̱ꞌhue ga̱ nìꞌnàꞌ sôꞌ.”
Giꞌhiaj nej guiì gakï̱nꞌïn
18 Dadinꞌ ûta naꞌan ruhuâ Ma̱ꞌan Ñaꞌanj nne yàtàꞌa niꞌin nej sí giꞌhiaj gakï̱nꞌïn ni̱ huê danj na̱nj naꞌan ruhuaj niꞌin nej sí nitaj si giꞌhiaj sa ni̱ka̱a,
dadinꞌ rayiꞌî nej sôꞌ huin ni̱ naꞌhuej ruhuâ nej guiì gùyùmàn ruhuâ ninj niꞌin ninj nuguanꞌ yàngàꞌa;
19 ga̱ꞌhue gi̱ni̱ꞌînꞌ dàj rà Ma̱ꞌan Ñaꞌanj an,
dadinꞌ gàꞌ ûta sàꞌ niꞌin nej sij dàj rà Ma̱ꞌan Ñaꞌanj an,
dadinꞌ gàꞌ gidiganj dàj raj riñan nej sij.
20 Nitaj si niꞌînꞌ dàj hua Ma̱ꞌan Ñaꞌanj an sani̱ rayiꞌî nej rasu̱n màn giꞌhiaj Ma̱ꞌan ruhuâ yumiguìi ni̱ ga̱ꞌhue gi̱ni̱ꞌînꞌ dàj hua Ma̱ꞌan,
ni̱ ga̱ꞌhue gi̱ni̱ꞌînꞌ dàj nùkuaj Ma̱ꞌan,
huê danj ni̱ nitaj ahuin ràyìꞌì gìrìꞌ nej guiì ga̱chru̱n ninj gàꞌ mánj.
21 Dadinꞌ gàꞌ giniꞌin nej sij Ma̱ꞌan Ñaꞌanj an,
sani̱ nun gi̱nikaj chre̱j nej sij nngaj ni̱ gàꞌ nun gàꞌhuìꞌ nej sij si gu̱ruhuaj,
dadinꞌ ganï̂n ruhuâ nej sij si ûta huin nej sij,
ni̱ nitaj si gayakaj guendâ nej sij si gakï̱nꞌïn huin sa giꞌhiaj nej sij,
huê danj ni̱ gahuin ru̱mi̱nꞌ nimân nej sij.
22 Ni gataj nej sij si ûta chru̱n nej sij,
sani̱ nitaj nùnj niꞌin nej sij,
23 ni̱ ganadunâ nej sij sa nìko hua Ma̱ꞌan Ñaꞌanj an ni̱ nagiꞌhiaj nej sij si ñaꞌanj an huin nej sí gakï̱nꞌïn,
ni̱ ñaꞌanj an huin nej yataj a,
nej yukuáa,
nej yuku nnùn ga̱ꞌanj raꞌa.
24 Rayiꞌî dan ni̱ gaꞌnï̂nj Ma̱ꞌan Ñaꞌanj an si giꞌhiaj nej sij sa kï̱j huaa,
ni̱ giꞌhiaj nej sij dàj rûnꞌ garanꞌ ruhuâ nimân nej sij,
huê danj ni̱ nun gi̱nikaj chre̱j nej sij ngà nneè kú nej sij,
25 huê danj ni̱ gudunâj nej sij nuguanꞌ yàngàꞌ gidigân Ma̱ꞌan Ñaꞌanj an ni̱ nadaꞌa nej sij nuguanꞌ gidigañuꞌunj un,
ni̱ ginikaj chre̱j nej sij ni̱ ginûn ña̱ꞌa̱nj nej sij riñan nej rasu̱n giꞌhiaj Ma̱ꞌan Ñaꞌanj an ni̱ gudunâj nej sij guendâ ginùn ña̱ꞌa̱nj nej sij Ma̱ꞌan Ñaꞌanj an,
ni̱ gàꞌ dânj ni̱ nun ga̱ꞌmi̱n hueꞌê nej sij ni̱ nun ga̱chra̱ nej sij chraꞌa riñanj.
Ni huê danj gahuin.
26 Rayiꞌî dan ni̱ gudunâj Ma̱ꞌan Ñaꞌanj an nej sij ni̱ ganadunâ nej sij ma̱ꞌan nej sij ni̱ ûta nàꞌàj hua sa ganï̂n ruhuâ nej sij;
huê danj na̱nj nej siyànàa ni̱ naꞌhuej ruhuâ ninj ga̱ya̱ka̱j ninj síi gahuin nika ninj dadinꞌ dànanj giꞌhiaj ni̱ka̱ ninj siyànà ngà ninj.
27 Huê danj na̱nj giꞌhiaj nej síi,
ni̱ ganahuin yànà nej sôꞌ,
ni̱ ûta huin ruhuâ nej sôꞌ gi̱ngaj nej sôꞌ ngà nej sí ngà nej sôꞌ,
ni̱ ûta nàꞌàj hua sa giꞌhiaj nej sôꞌ dadinꞌ síi huin nej sôꞌ ni̱ nngaj nej sôꞌ ngà nej síi,
ni̱ ganahuin ràꞌa nej sôꞌ nej dânj guendâ gudunâj nej sôꞌ si-chrej Ma̱ꞌan Ñaꞌanj an.
28 Sani̱ guendâ nun ga̱ꞌhue̱j nej sij ga̱na̱ka̱j guendâ nej sij si hua̱ Ma̱ꞌan Ñaꞌanj an,
huê danj ni̱ gaꞌnḯn raꞌa nej sij,
huê danj ni̱ giꞌhiaj nej sij sa ganï̂n ruhuâ nej sij,
ni̱ gi̱ꞌhiaj nej sij sa nun daꞌhui nej sij gi̱ꞌhiaj nej sij;
29 ni̱ nun da̱gahuin nej sij ûta gàꞌì sa ni̱ka̱a,
ni̱ gaché sìgìchràꞌ nej sij,
ahuin na̱nj gakï̱nꞌ giꞌhiaj nej sij,
ûta ganahuij ruhuâ nej sij ga̱ doj rasu̱n duꞌhuee riñan nej sij,
ni̱ giꞌhiaj nej sij sa aꞌnanꞌan,
ni̱ ûta yìkòj ruhuâ nej sij,
ni̱ dagahuiꞌ nej sij guiì,
ni̱ ûta gu̱rij nej sij gu̱nï̱nꞌ nej sij,
ni̱ gu̱rij nej sij gi̱di̱gañuꞌunj nej sij,
gu̱rij nej sij ga̱nï̱n yìꞌì ruhuâ nej sij;
30 gaꞌmin nej sij yiꞌî duguiꞌ nej sij,
duyichinꞌ nej sij si-nùguànꞌ duguiꞌ nej sij,
nitaj si gininj hueꞌê Ma̱ꞌan Ñaꞌanj an riñan nej sij,
gaꞌmin nej sij nuguanꞌ yìꞌì chre,
ûta huin nej sij doj ruhuâ nej sij,
ûta nne̱ nej sij,
ûta gurîj nej sij gi̱ri̱ rà nej sij chrej aꞌnanꞌan,
nitaj si dagahuin nej sij riñan rej nej sij.
31 Nitaj si guyumân ruhuâ nej sij niꞌin nej sij Ma̱ꞌan Ñaꞌanj an,
nitaj si dagahuin nej sij riñan sí aꞌnïnꞌ riñan nej sij,
nitaj si ꞌì ruhuâ nej sij niꞌin nej sij nej duguiꞌ nej sij,
nitaj si gananï̂n àko ruhuâ nej sij niꞌin nej sij nej duguiꞌ nej sij;
32 ni̱ gàꞌ niꞌin nej sij si gi̱ꞌhiaj Ma̱ꞌan Ñaꞌanj an kastîgu ngà nej sij,
ni̱ hua̱ ni̱ña̱n si daꞌhui nej sij gàhuìꞌ nej sij,
sani̱ sê man ꞌngo̱ rïn nej sij giꞌhiaj gakï̱nꞌïn mánj,
dadinꞌ huê danj na̱nj ganahuin nìhiàꞌ ruhuâ nej sij ngà aꞌngô nej guiì giꞌhiaj gakï̱nꞌïn.