Nne Pablo ngà aꞌngô nej síi ruhuâ yumanꞌ Malta
28
Ni̱ nga gananin daranꞌ nej ñûnj,
ni̱ gunïn nej ñûnj si Malta gùꞌnàj hioꞌó nu̱n da̱nï̱n nne ña̱ꞌa̱nj dânj.
2 Ni̱ ganahuin ra̱ꞌa nej sí yìñànj màn hiuj dânj nej ñûnj,
ni̱ ûta hueꞌê gataj niꞌñanj nej sôꞌ nej ñûnj;
ni̱ ganaranꞌ nej sôꞌ ñaꞌaan,
dadinꞌ ûta amanꞌ ni̱ ûta nu̱huij.
3 Hiôꞌ ni̱ ganaranꞌ Pablo raꞌa nej rekoj hua̱ nakòo,
ni̱ gaꞌnḯn sôꞌ raꞌa nej rekoj nakò dânj riñan ñaꞌaan;
ni̱ guendâ gaꞌhuij gachiꞌi,
ni̱ gunânj ꞌngo̱ yukuáa ni̱ nanikòꞌ yôꞌ raꞌa Pablo.
4 Ni̱ nga giniꞌin nej sí yìñànj màn hiuj dânj si nanikòꞌ yukuáa raꞌa Pablo ni̱ ya yôꞌ sij,
ni̱ gataj nej sôꞌ gunïn daꞌ goꞌngô nej duguiꞌ nej sôꞌ:
—Yàngà hia nï̀nꞌ ni̱ sí dagahuiꞌ guiì huin sí nânj,
dadinꞌ nùnj huin si gananin sij ruhuâ nne ña̱ꞌa̱nj,
ni̱ naꞌhuej ruhuâ Ma̱ꞌan Ñaꞌanj an ga̱ne sij gàꞌ mánj.
5 Sani̱ nagunanꞌ Pablo raꞌa sôꞌ riñan ñaꞌaan ni̱ gininj yukuá dânj riñan ñaꞌaan,
sani̱ nitaj nùnj giranꞌ sôꞌ.
6 Ni̱ ànàꞌhuìj nej sôꞌ mân nej sôꞌ si gu̱ꞌma̱n raꞌa Pablo,
nej si gàhuìꞌ sôꞌ orâ chre ni̱ ga̱na̱tu̱ sôꞌ;
sani̱ ûta ganaꞌhuìj nej sí dânj dàj giranꞌ Pablo,
sani̱ nitaj nùnj si giꞌhia giranꞌ sôꞌ,
huê danj ni̱ nadunâ nej sí dânj dàj ganï̂n ruhuâ nej sôꞌ ngà Pablo,
ni̱ gataj nej sí yìñànj màn hiuj dânj si ñaꞌanj an huin Pablo.
7 Ni̱ nìchrùnꞌ ñan ni̱kï̱n nej ñûnj dânj hua doꞌó sí huin ña̱n riñan yumanꞌ dânj,
ni̱ gùꞌnàj sôꞌ Publio,
ni̱ sôꞌ ganahuin ra̱ꞌa nej ñûnj,
ni̱ riki sôꞌ dukuâ sôꞌ gane nej ñûnj huàꞌnï̀nj gui.
8 Ni̱ ûta aꞌnanꞌ rej Publio giꞌhiaj yiꞌì tun ni̱ nngaj síchìj dânj aꞌnanꞌ sôꞌ riñan nna;
ni̱ gatûj Pablo gaꞌanj gi̱niꞌhiaj sôꞌ ñan nngaj síchìj dânj,
ni̱ gachín nìꞌhiaj sôꞌ ni̱ gutaꞌ sôꞌ raꞌa sôꞌ yichrá síchìj nânj,
huê danj ni̱ ganahuin sôꞌ.
9 Ni̱ nga giniꞌin nej guiì màn riñan hioꞌó nânj si ganahuin rej Publio,
ni̱ ginikaj ninj nej duguiꞌ ninj sa aꞌnanꞌan gaꞌnaꞌ ninj riñan Pablo,
ni̱ giꞌhiaj sôꞌ si ganahuin nej guiì aꞌnanꞌan;
10 huê danj na̱nj ûta ginikaj chre̱j nej guiì màn hiuj dânj ngà nej ñûnj;
ni̱ nga gatûj nej ñûn ruhuâ aꞌngô barkû nìko,
ni̱ riki ninj nej sa ga̱ra̱n sun nej ñûnj nga ga̱ꞌa̱nj nej ñûnj ruhuâ barkû dânj.
Guchiꞌ Pablo yumanꞌ snàꞌànj Roma
11 Ni̱ gachîn huàꞌnï̀nj ahuii gane nej ñûnj hiuj nânj,
ni̱ guyumân ꞌngo̱ barkû nìko ꞌna̱ꞌ yumanꞌ snàꞌànj Alejandría riñan hioꞌó nânj ni̱ gatûj nej ñûnj ruhuâ barkû dânj,
ni̱ nnùn ñan du̱ꞌhua nguèj ñaꞌanj gùꞌnàj Kástor ngà polux riñan barkû dânj.
12 Huê danj ni̱ guchiꞌ nej ñûnj yumanꞌ gùꞌnàj Siracusa,
ni̱ gahuin ràn nej ñûnj huàꞌnï̀nj gui hiuj dânj.
13 Ni̱ hiuj dânj,
gahui nej ñûnj ni̱ ganikàj nej ñûnj duꞌhua hioꞌó dânj ni̱ gaꞌanj nej ñûnj,
huê danj ni̱ guchiꞌ nej ñûnj yumanꞌ gùꞌnàj Regio;
ni̱ neꞌ rùkù nga gachîn aꞌngô gui,
ni̱ gaꞌhuiꞌ nànè hua̱j neꞌ ri̱ki,
ni̱ gui huìj i ni̱ guchiꞌ nej ñûnj yumanꞌ gùꞌnàj Puteoli,
14 ni̱ màn nej dinï̂nt hiuj nânj ganariꞌ nej ñûnj,
ni̱ gachín nìꞌhiaj nej sôꞌ si ga̱ne nej ñûnj chi̱j gui hiuj dânj ngà nej sôꞌ;
neꞌ rùkù dânj ni̱ gaꞌanj nej ñûnj nda yumanꞌ snàꞌànj Roma,
15 ni̱ gàꞌ gunïn nej dinï̂nt màn yumanꞌ snàꞌànj Roma si gùchìꞌ nej ñûnj,
ni̱ guchiꞌ ga̱na̱huin ra̱ꞌa nej sôꞌ nej ñûnj nda ñan gùꞌnàj Apio ngà ñan gùꞌnàj huàꞌnï̀nj Taberna;
ni̱ nga giniꞌin Pablo nej dinï̂nt,
ni̱ gaꞌhuiꞌ sôꞌ si guruhuâ Ma̱ꞌan Ñaꞌanj an ni̱ ganariꞌ ruhuâ sôꞌ.
16 Ni̱ nga guchiꞌ nej ñûnj yumanꞌ snàꞌànj Roma,
ni̱ ganachrîj síchìj stadû kapitán nej sí ꞌnïnj dukuâ gaꞌa raꞌa síchìj general,
sani̱ garânj yina nej sôꞌ si ga̱ne ni̱nï̱n Pablo,
ni̱ nne ꞌngo̱ stâdu guendâ dugumîn sôꞌ Pablo.
Ganataꞌ Pablo si-nùguànꞌ Ma̱ꞌan Ñaꞌanj an riñan nej guiì màn Roma
17 Neꞌ rùkù nga gachín huàꞌnï̀nj gui,
ni̱ gakḯn Pablo gaꞌnaꞌ nej síchìj judío huin ña̱n doj,
ni̱ nga ganahuin chre̱ꞌ nej síchìj dânj,
ni̱ gataj Pablo gu̱nïn nej sôꞌ:
—Nitaj nùnj huin si giꞌhia ngà nej judío,
ni̱ nitaj nùnj huin si giꞌhia ngà chrej yìñànj ni̱ka̱j nej síchìj màn yiñán nêꞌ,
sani̱ àsìj yumanꞌ snàꞌànj Jerusalén gachrîj nej sij dukuâ gaꞌa ni̱ ganachrîj nej sij ñùnj raꞌa nej sí romano;
18 ni̱ nga nadigiꞌñûn nej sôꞌ rayiꞌí,
ni̱ ganï̂n ruhuâ nej sôꞌ gànàꞌnï̀nj raꞌa nej sôꞌ ñùnj,
dadinꞌ nitaj gàꞌ si ꞌngo̱ gakï̱nꞌ giꞌhia si gìyìꞌnï̀nꞌ suun gàhuìj.
19 Sani̱ nga gunïn nej judío nej nuguanꞌ nânj ni̱ nun ga̱ra̱n yina nej sôꞌ,
huê danj ni̱ gatâ gu̱nïn nej sôꞌ si daꞌhuí ga̱ꞌa̱n guendâ ga̱huin hia si-ga̱kḯn riñan síchìj César.
Sani̱ sê si̱ gahuin ruhuâj ga̱ra̱n ruhuâj rayiꞌî nej sôꞌ màn Israel mánj.
20 Rayiꞌî dan gakï̂n gaꞌnaꞌ nej suj dadinꞌ ruhuâj si gi̱ni̱ꞌin nej suj gànàtàj gu̱nïn nej suj;
dadinꞌ ànàꞌhuìj nej guiì màn yumanꞌ Israel si gi̱ꞌhiaj sàꞌ Ma̱ꞌan Ñaꞌanj an ni̱ ga̱ꞌnïn gàꞌnàꞌ Mesías riñan ninj ni̱ rayiꞌî dan anu̱mín ngà agaꞌ kadena.
21 Hiôꞌ ni̱ gataj nej sí dânj:
—Sani̱ nun gàꞌnï̀nj nej sôꞌ màn Judea ñanj gùyùmàn rayiꞌîꞌ mánj,
ni̱ gàꞌ nun ga̱ꞌna̱ꞌ ga̱ra̱n ruhuâ goꞌngo̱ nej dinï̂nt judío rayiꞌîꞌ,
ni̱ gàꞌ nun gaꞌmin yìꞌì nej sij rayiꞌîꞌ mánj.
22 Sani̱ hua̱ ruhuâ nej ñûnj gu̱nïn nej ñûnj dàj ganï̂n ruhuâꞌ;
dadinꞌ gàꞌ gunïn nej ñûnj si dànèꞌ gahuin ni̱ aꞌmin aꞌnanꞌ nej guiì rayiꞌî yiꞌnïn nàkà nìkòꞌ.
23 Ni̱ ganï̂n nej sij ꞌngo̱ gui ga̱ꞌna̱ꞌ nej sij ñan nne Pablo,
ni̱ gaꞌnaꞌ ûta gàꞌì nej judío ni̱ gunâj nej sôꞌ ñan nne sij,
ni̱ ganataꞌ sij dàj aꞌmin si-ley Moisés ngà nej nuguanꞌ gachrûn nej sôꞌ gataj dàj ga̱huin,
ni̱ gayiꞌì Pablo àsìj hua nìganꞌ mánj ni̱ nda ginìn gananï̂n sôꞌ rayiꞌî Ma̱ꞌan Ñaꞌanj ni̱ka̱j su̱n yàtàꞌa ngà rayiꞌî Ma̱ꞌan Jesús.
24 Ni̱ hua̱ da̱ꞌa̱j nej sôꞌ guyumân ruhuâ nej nuguanꞌ gataj Pablo,
sani̱ hua̱ aꞌngô da̱ꞌa̱j nej sôꞌ nun gùyùmàn ruhuâ.
25 Ni̱ ñan nun ga̱ꞌhue ga̱ gu̱ña̱n ruhuâ nej sí dânj,
huê dan ni̱ gaꞌanj nej sôꞌ,
ni̱ gataj Pablo nej nuguanꞌ nânj gu̱nïn nej sôꞌ:
—Dùgùnàj hua nuguanꞌ gataj Ma̱ꞌan Espíritu Santo ngà garânj sunj Isaias sôꞌ ganataꞌ dàj gahuin nga gaꞌmin sôꞌ riñan rej nêꞌ ni̱ gataj sôꞌ:
26 Ga̱ꞌa̱njꞌ riñan yumanꞌ nânj,
ni̱ ga̱ta̱jꞌ:
Gu̱nïn nej suj ngà hiuꞌuj tàj rakïj nej suj,
sani̱ si̱ gaꞌhue ga̱ra̱n daꞌngaꞌ ruhuâ nej suj;
ni̱ gi̱niꞌhiaj nej suj,
sani̱ si gaꞌhue ga̱na̱ni̱ꞌin nej suj;
27 Dadinꞌ gàꞌ ganahuin tsì ruhuâ nimân nej suj,
ni̱ ganarán hiuꞌuj tàj rakïj nej suj,
ni̱ garán rune ñan nej suj,
Daꞌnga ni̱ si̱ giniꞌin nej suj,
ni̱ naꞌhue gu̱nïn nej suj ngà hiuꞌuj tàj rakïj nej suj,
ni̱ naꞌhue ga̱ra̱n daꞌngaꞌ ruhuâ nimân nej suj;
ni̱ nitaj si ganadunâ nej suj ma̱ꞌan nej suj,
ni̱ si̱ ganahuin nej suj gi̱ꞌhia mánj.
28 Gu̱nïn nej suj hia̱j,
dadinꞌ ga̱chi̱n si-nùguànꞌ Ma̱ꞌan Ñaꞌanj an riñan nej sí nàsìnùnj un;
ni̱ ga̱na̱huin ra̱ꞌa nej sôꞌ ni̱ gi̱ꞌhiaj Ma̱ꞌan Ñaꞌanj an si ga̱na̱ni̱n nej sôꞌ.
29 Ni̱ nga gisîj gaꞌmin Pablo nej nuguan nânj,
huê danj ni̱ gaꞌanj nej síchìj judío ganaraꞌhuiꞌ hiuj dânj,
ni̱ gunïnꞌ nej sôꞌ siganï̂nj nej ma̱ꞌan nej sôꞌ rayiꞌî nej nuguanꞌ nânj.
30 Ni̱ girïꞌïnj Pablo ꞌngo̱ hueꞌe gane sôꞌ ni̱ huìj hioꞌo gane sôꞌ,
ni̱ ganahuin ra̱ꞌa sôꞌ daranꞌ nej sí gaꞌnaꞌ gi̱niꞌhiaj ñan nne sôꞌ,
31 ni̱ ganataꞌ sôꞌ si-nùguànꞌ Ma̱ꞌan Ñaꞌanj an ni̱ gidigán sôꞌ rayiꞌî Ma̱ꞌan Señor Jesucristo,
nda nîꞌnï̀nj chre ni̱ nitaj gàꞌ si ꞌngo̱ sí garanꞌ ñuꞌunj sôꞌ gàꞌ mánj.