Gaꞌnḯn nej sij gaꞌanj Pablo nda Roma
27
Nga gahuin hia si ga̱ꞌa̱nj nej ñûnj riñan nne ña̱ꞌa̱nj ni̱ guchiꞌ nej ñûnj Italia,
ni̱ ganachrîj nej sij Pablo ngà aꞌngô nej sí ꞌnï̱nj dukuâ gaꞌa raꞌa síchìj kapitán gùꞌnàj Julio,
ni̱ aꞌnïnꞌ sôꞌ riñan batayón gùꞌnàj Augusta.
2 Ni̱ gatûj nej ñûnj ruhuâ ꞌngo̱ barkû ꞌna̱ꞌ yumanꞌ Adramitio ni̱ hua ga̱ꞌan riñan hioꞌó Asia,
ni̱ gatûj nej ñûnj ruhuâ barku dânj,
ni̱ hua̱j Aristarco ngà nej ñûnj,
ni̱ sôꞌ ꞌna̱ꞌ yumanꞌ Tesalónica huin doꞌó Estado Macedonia.
3 Aꞌngô gui dânj ni̱ guchiꞌ nej ñûnj yumanꞌ Sidón;
ni̱ ûta hueꞌê gataj niꞌñanj síchìj Julio Pablo,
ni̱ gaꞌhuiꞌ sôꞌ permisu si ga̱ꞌa̱nj gi̱niꞌhiaj Pablo nej sí ni̱ka̱j duguiꞌ ngà sôꞌ,
ni̱ huê danj na̱nj ga̱ꞌhue ga̱ta̱j niꞌñanj nej sôꞌ Pablo.
4 Ni̱ gahui nej ñûnj yumanꞌ Sidón ni̱ gatûj nej ñûnj ruhuâ barkû aché riñan nne ña̱ꞌa̱nj,
ni̱ gaꞌanj nej ñûnj Chipre,
dadinꞌ dànanj gaꞌhuiꞌ nanèe neꞌ ri̱ña̱n nej ñûnj.
5 Ni̱ ganikàj nej ñûnj gaꞌanj nej ñûnj duꞌhua nne ña̱ꞌa̱nj ni̱ gachín nej ñûnj duꞌhua doꞌó Silisia ngà Panfilia,
huê danj ni̱ guchiꞌ nej ñûnj ni̱ gananinj nej ñûnj ñan nngaj yumanꞌ snàꞌànj gùꞌnàj Mira huin doꞌó Licia.
6 Ni̱ hiuj dânj gidaꞌa síchìj kapitán ngo̱ barkû huin siꞌhiaj yumanꞌ Alejandría ni̱ hua ga̱ꞌan Italia,
ni̱ gatûj nej ñûnj ruhuâ barkû dânj ni̱ gaꞌanj nej ñûnj.
7 Ni̱ ûta na̱j gaché barkû dânj ni̱ ûta gàꞌì gui gaꞌan riñan nnee,
ni̱ ûta ꞌì danj gaꞌhue guchiꞌ nej ñûnj neꞌ ri̱ña̱n yumanꞌ Gnido,
dadinꞌ ûta garanꞌ ñuꞌunj nanèe,
huê danj ni̱ gachîn nej ñûnj ni̱ gaꞌanj nej ñûnj neꞌ ri̱ña̱n Salmón huín doꞌó Creta.
8 Ni̱ ganikàj nej ñûnj ni̱ gaꞌanj nej ñûnj duꞌhua hioꞌó dânj sani̱ ûta ꞌì giꞌhia,
huê danj ni̱ guchiꞌ nej ñûnj ñan gùꞌnàj Puerto sàꞌaj,
ni̱ nìchrùnꞌ yiꞌnḯn yumanꞌ dânj nngaj yumanꞌ snàꞌànj Lasea.
9 Ni̱ ûta gàꞌì gui gachîn ni̱ hua̱ naꞌhue gùnùkuaj nej ñûnj gùchìꞌ nej ñûnj ñan hua̱j nej ñûnj,
ni̱ ûta ha̱i̱ hua diû nga huaj nej ñûnj ruhuâ nne ña̱ꞌa̱nj,
dadinꞌ ûta gàꞌì gui ga gi̱ni̱ne̱j nùgui nej ñûnj,
ni̱ dunaꞌnga Pablo si ya̱ nej ñûnj,
10 ni̱ gataj sôꞌ:
—Di̱nï̂nj,
ganï̂n ruꞌhuâj si ûta gi̱ranꞌ sa̱ñu̱n barkû nu̱n nêꞌ huaj nêꞌ ruꞌhuaj,
ni̱ gi̱rë̱ꞌ ûta gàꞌì nej rasu̱n màn ruhuâj,
ni̱ sê man ꞌngo̱ rïn sa màn ruhuaj gi̱rë̱ꞌ mánj,
dadinꞌ ga̱huin ni̱ gàhuìꞌ nêꞌ.
11 Sani̱ dànanj guyumân doj ruhuâ síchìj kapitán nej nuguanꞌ gataj síchìj duguâj barku ngà nuguanꞌ gataj sí yi̱ruꞌhue huin siꞌhiaj barku dânj,
gàꞌ daꞌ nej nuguanꞌ gataj Pablo.
12 Dadinꞌ nitaj si dùgùnàj hua hiuj dânj ga̱huin rànꞌ nej sij nda ga̱chi̱n diû nu̱huij,
ni̱ gaꞌmin gu̱ña̱n daranꞌ nej sij si ga̱ꞌa̱nj nej sij,
si nàsìnùnj gùnùkuaj nej sij gùchìꞌ nej sij yumanꞌ Fenice ni̱ hiuj dânj ga̱ne nej sij nda ga̱chin diû ꞌhueꞌe,
Fenice nngaj riñan doꞌó Creta,
ni̱ hiuj nânj ga̱ꞌhue gi̱daꞌa nej sij barkû huaꞌanj neꞌ yìchràj a ngà neꞌ ri̱ki.
Gaꞌhuij gumàn nànè hu̱e xi ruhuâ nne ña̱ꞌa̱nj
13 Ni̱ na̱j chre gayi̱ꞌij gaꞌhuij nanè ꞌna̱ꞌ neꞌ ri̱ki,
ni̱ ganï̂n ruhuâ nej sij si gùnùkuaj nej sij gùchìꞌ nej sij yumanꞌ Fenice,
ni̱ ganikàj barkû dânj duꞌhua nej dasû hioꞌó nu̱n ruhuâ nne ri̱ña̱n nikaj ñuꞌunj Creta.
14 Sani̱ neꞌ rùkù doj ni̱ guyumân ꞌngo̱ nanè huê xi ni̱ ûta nùkuaj gaꞌhuij neꞌ ri̱ña̱n barkû nu̱n nej ñûn huaj nej ñûnj ni̱ gayiꞌij ni̱ ûta gamanꞌ ni̱ gaꞌhuij gumàn nanè xi ni̱ Euroclidón gùꞌnàj gumàn huê xi dânj.
15 Sani̱ nun ga̱ꞌhue gùnùkuaj nej ñûnj ga̱ꞌa̱nj nej ñùnj ñan ganï̂n ruhuâ nej ñûnj gùchìꞌ nej ñûnj,
huê danj ni̱ gaꞌnïnꞌ ruhuâ nej ñûnj ni̱ gata nanèe barkû nu̱n nej ñûnj huaj nej ñûnj.
16 Huê danj ni̱ gachîn nej ñûnj rukû hioꞌó gùꞌnàj Clauda,
ni̱ hioꞌó nânj garán nanèe ñan hua̱j nej ñûnj,
ni̱ huê danj ni̱ ûta ꞌì gaꞌhue ganachinikaj nej ñûnj nej rio lij guduninj nej ñûnj riñan nne ña̱ꞌa̱nj.
17 Ni̱ nga gunukuaj nej sij gudusîj nej sij nej rio lij dânj ruhuâ barku nìko xi dânj,
ni̱ gumînj nej sij nej chrun àràꞌhuèꞌ barkû nìko xi dânj guendâ ga̱na̱huin ranj;
sani̱ guyuꞌhuiꞌ nej sij si ga̱ga̱nꞌ barkû nìko xi dânj riñan hioꞌó chru nngaj riki nne ña̱ꞌa̱nj,
ni̱ naduninj nej sij atsîj manta taj raa̱ barku xi dânj ni̱ gaꞌnïnꞌ ruhuâ nej sij si ga̱ta nanèe dànèꞌ garanꞌ ruhuaj ga̱ꞌa̱nj barkû nìko xi dânj.
18 Aꞌngô gui dânj,
ni̱ dànanj ûta nùkuaj gaꞌhuiꞌ gumàn nanè hue xi ñan hua̱j nej ñûnj,
huê danj ni̱ gayiꞌì daranꞌ nej sij ni̱ gahiu nej sij nej sa màn ruhuâ barku dânj ruhuâ nne ña̱ꞌa̱nj,
19 ni̱ gachîn huàꞌnï̀nj gui ni̱ gidaꞌa nej sij nej nneꞌ garânj sun nej sij ngà barkû nìko xi dânj ni̱ garrûn nej sij ruhuâ nne ña̱ꞌa̱nj.
20 Ni̱ ûta gàꞌì gui nun gi̱ni̱ꞌin nej ñûnj riñan gui ngà riñan nej atïꞌï,
ni̱ ûta nùkuaj gamanꞌ gumàn hue xi dânj riñan nej ñûnj,
ni̱ nun ga̱nï̱n ruhuâ nej ñûnj si ga̱na̱ni̱n nej ñûnj.
21 Sani̱ ñan gàꞌ gisîj ûta gàꞌì gui nun ya̱ nej ñûnj,
hiôꞌ ni̱ ganayumàn Pablo ni̱ gataj sôꞌ:
—Gàꞌ gisîj gàꞌì gui nitaj si ya nêꞌ chra,
ni̱ dùgùnàj huaj ni̱ asàꞌ nej suj ni̱ gunïn nej suj sa gaꞌmînj,
dadinꞌ gatâ si ga̱hui̱ nêꞌ riñan hioꞌó Creta ni̱ si̱ giranꞌ sa̱ñu̱n nêꞌ saj mánj.
22 Sani̱ hia̱j ni̱ nàrìkìj chrej nùkuaj rûhua riñan nej suj ni̱ si̱ guyuꞌhuiꞌ nej suj mánj,
dadinꞌ si̱ gahuiꞌ gàꞌ si ꞌngo̱ nêꞌ mánj,
man sa gìrë̀ꞌ huin barkû xi nânj.
23 Dadinꞌ ñanꞌ hia̱j ni̱ gaꞌnḯn Ma̱ꞌan Ña̱ꞌanj an si-ángel gaꞌnaꞌ riñânj,
dadinꞌ huê Ma̱ꞌan huin Ñaꞌanj nìkòj ni̱ huê riñan Ma̱ꞌan huin sa gunânj gi̱tsí,
24 ni̱ gata gunḯn:
“Pablo,
si̱ guyuꞌhuiꞌ mánj;
dadinꞌ ña̱ꞌa̱n huaj si ga̱nikḯn riñan César;
ni̱ huê danj na̱nj rayiꞌîꞌ ni̱ gi̱ꞌhiâ si ga̱na̱ni̱n nej guiì hua̱j ngàꞌ dânj.”
25 Huê danj,
ni̱ ga̱na̱huin nìhiàꞌ ruhuâ nej suj na̱nj di̱nï̂nj,
dadinꞌ yumân ruhuâj niꞌín Ma̱ꞌan Ñaꞌanj an si huê dàj rûnꞌ gatâ ni̱ huê danj ga̱huin.
26 Nùnj huin si dànanj gi̱ranꞌ nêꞌ,
sani̱ dàñùn gùchìꞌ ñan hua̱ doj hioꞌó ruhuâ nne ña̱ꞌa̱nj.
27 Ni̱ gachîn yìgànꞌânj ñanꞌan,
ni̱ ûta gamanꞌ gumàn nànè huê xi dânj ni̱ gata nej ñûnj gaꞌan dànèꞌ garanꞌ ruhuaj ni̱ guchiꞌ nej ñûnj ruhuâ nne ña̱ꞌa̱nj gùꞌnàj Adriático,
ni̱ ruhuâ da̱ꞌa̱j neꞌ ñànꞌan ni̱ garânj daꞌngaꞌ ruhuâ nej sí chru̱n guduguâj barku si huaj nìchrùnꞌ nej ñûnj duꞌhua hioꞌóo;
28 ni̱ guduninj nej sij ꞌngo̱ retâ tàj raa̱ agaꞌ plomo,
ni̱ giniꞌin nej sij si ko̱ yinunꞌ ñàn metru gùnùn ruhuâ nne ña̱ꞌa̱nj hiuj dânj;
huê danj ni̱ gaꞌanj nej sij neꞌ ñan doj,
ni̱ guduninj ñûn nej sij retâ tàj raa̱ agaꞌ plomo ruhuâ nne ña̱ꞌa̱nj,
ni̱ giniꞌin nej sij si ko̱ huàtànꞌ metru gùnùn ruhuâ nne ña̱ꞌa̱nj hiuj dânj.
29 Ni̱ ñan guyuꞌhuiꞌ nej sij si ga̱ga̱nꞌ barku dânj ngà ꞌngo̱ huej e,
ni̱ guduninj nej sij ga̱ꞌânj retâ tàj agaꞌ àꞌì xi raa̱ ni̱ nnùn huìj raꞌa agaꞌ dânj ni̱ guduninj nej sij neꞌ rùkù barku xi dânj,
ni̱ ûta huin ruhuâ nej sij si gìyìgï̀n râꞌñanj.
30 Hiôꞌ ni̱ ûta huin ruhuâ nej sí chru̱n guduguâj barkû dânj gu̱na̱nj nej sôꞌ ni̱ gùnàj barkû dânj ruhuâ nej sôꞌ,
ni̱ guduninj nej sôꞌ nej rio lij dânj ruhuâ nne ña̱ꞌa̱nj,
ni̱ man si giꞌhiaj nej sôꞌ si gaꞌnḯn nej sôꞌ nej retâ a̱nu̱min nej agaꞌ àꞌì xi dânj neꞌ riñan barkû xi dânj.
31 Sani̱ gataj Pablo gu̱nïn síchìj kapitán ngà gunïn nej stâdu:
—Sisi̱ si̱ gimân dïnꞌïnj nej sí nânj ruhuâ barkû xi nânj,
ni̱ si̱ gunùkuaj nej suj du̱nanin nej suj nej sôꞌ mánj.
32 Hiôꞌ ni̱ gaꞌneꞌ nej stâdu nneꞌ retâ ànumin nej rio lij dânj,
ni̱ gaꞌanj nej rio lij dânj ruhuâ nne ña̱ꞌa̱nj.
33 Ni̱ nga ꞌnaꞌ gìyìgï̀n,
ni̱ dunaꞌnga Pablo si ya̱ nej sij ni̱ gataj sôꞌ:
—Ni̱ gàꞌ gisîj yìgànꞌanj gui hua gi̱ni̱ne̱j nu̱gui nêꞌ,
ni̱ nitaj si ya nêꞌ chra mánj.
34 Rayiꞌî dan,
ni̱ gachîn nìꞌhia riñan nej suj ni̱ ya̱ nej suj si ruhuâ nej suj ga̱ne nej suj;
dadinꞌ gàꞌ si ꞌngo̱ huê ahui nej suj si gaꞌanj ni̱ꞌhia mánj.
35 Ni̱ nga gisîj gaꞌmin sôꞌ nej nuguanꞌ nânj,
ni̱ gidaꞌa sôꞌ rachrúun ni̱ gaꞌhuiꞌ sôꞌ si guruhuâ Ma̱ꞌan Ñaꞌanj an ni̱ giniꞌin daranꞌ nej sí hua̱j ruhuâ barkû dânj,
ni̱ guchraꞌ da̱ꞌa̱j sôꞌ rachrúun ni̱ gayiꞌì sôꞌ ni̱ ya sôꞌ.
36 Hiôꞌ ni̱ ganahuin nìhiàꞌ ruhuâ daranꞌ nej sôꞌ,
huê danj ni̱ gayiꞌì daranꞌ nej sôꞌ ni̱ yâ nej sôꞌ.
37 Ni̱ daranꞌ nej guiì màn ruhuâ barkû xi dânj huin huìj sientu tá huàꞌnï̀nj xia yinunꞌ ñàn.
38 Ni̱ nga gisîj gunumân riki nej sij,
ni̱ nagiꞌhiaj hio nej sij barkû nìko xi dânj,
ni̱ dagamanꞌ nej sij nej nnanj hiaꞌ nu̱n trigu ruhuâ nne ña̱ꞌa̱nj.
Ganagaꞌ barku riki nnee
39 Ni̱ nga giyigï̀n gui dânj,
ni̱ naꞌhue ga̱na̱ni̱ꞌin nej sij ahuin riñan hioꞌó huaj nej ñûnj,
sani̱ giniꞌin nej sij si gatûj nne ña̱ꞌa̱nj gaꞌan da̱nï̱n hioꞌó dânj ni̱ hua̱ nìko duꞌhua hioꞌó dânj,
ni̱ gaꞌmin gu̱ña̱n nej sij si ga̱ꞌhue gi̱nikaj nej sij barkû nìko dânj ga̱ꞌa̱nj nej sij hiuj dânj.
40 Huê danj ni̱ gaꞌneꞌ nej sij,
nej retâ ànùmin agaꞌ àꞌì xi nnùn huìj raꞌa dânj,
ni̱ ginin ruhuâ nne ña̱ꞌa̱nj,
ni̱ nagiꞌhiaj yèꞌè nej sij nneꞌ retâ ànumin chrun timón;
ni̱ ganachi nikaj nej sij atsîj manta xi tàj raa̱ chrun ni̱kï̱nꞌ neꞌ riñan barkû nìko dânj,
huê danj ni̱ gaꞌanj barkû nìko dânj duꞌhua hioꞌó hua̱ nîꞌnïnj ïn.
41 Sani̱ guchiꞌ barkû dânj ñan màn nìko xi hioꞌó chru̱u,
ni̱ hiuj dânj guꞌnïnꞌ neꞌ ri̱ña̱n barkû nìko dânj;
riki hioꞌó chru̱u ni̱ gàꞌ ꞌngo̱ naꞌhue gìsìkij,
huê danj ni̱ gayi̱ꞌij ni̱ ûta nùkuaj ganûn nne ña̱ꞌa̱nj ganayumàn dânj riñan barkû nìko xi dânj ni̱ giyichraꞌ da̱ꞌa̱j neꞌ rùkuj.
42 Hiôꞌ ni̱ guchiꞌ nej stâdu ꞌngo̱ duꞌhua si da̱gahuiꞌ nej sôꞌ daranꞌ nej sí ꞌnïnj dukuâ gaꞌa,
daꞌnga ni̱ si̱ gunânj nej sôꞌ nga gàyìꞌì nej sôꞌ gùtàꞌ nej sôꞌ yîtàj a.
43 Sani̱ ruhuâ stâdu kapitán,
si ga̱na̱ni̱n Pablo,
ni̱ nun ga̱ra̱n yina sôꞌ nej nuguanꞌ gataj nej stâdu,
ni̱ gaꞌnïnꞌ sôꞌ suun si ga̱ꞌa̱nj si̱nï̱n nej stadû chru̱n gùtàꞌ yitaj a neꞌ ña̱an,
daꞌnga ni̱ gàꞌ si̱nï̱n nej sôꞌ gùchìꞌ ni̱ ga̱na̱huin ra̱ꞌa nej sôꞌ nej sí ꞌnïnj dukuâ gaꞌa duꞌhua hioꞌó dânj;
44 ni̱ aꞌngô da̱ꞌa̱j nej sôꞌ,
gitàj riñan nej chrun ruguechràꞌa,
ni̱ aꞌngô da̱ꞌa̱j nej sôꞌ gitàj riñan nej rasu̱n garânj sun nej sij ngà barkû nìko dânj.
Huê dânj giꞌhiaj nej sij ni̱ gunùkuaj nej sij gananin daranꞌ nej sí huaj ruhuâ barku nìko dânj ni̱ guchiꞌ daranꞌ nej sij riñan hioꞌó nàkòo.