Ñanj kartâ si̱nï̱n nânj huin gachrûn Apóstol Pablo riñan nej
CORINTIOS
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Corinto
1
Ñùnj huin Pablo,
ni̱ gakḯn Ma̱ꞌan Ñaꞌanj an ñùnj ni̱ garanꞌ ruhuaj si gahuín sí ga̱ꞌa̱nj gànàtàꞌ si̱nï̱n si-nùguànꞌ Ma̱ꞌan Jesucristo,
ni̱ huê danj na̱nj gaꞌnḯn nguèj ñûnj dinï̂nt Sóstenes nuguanꞌ ni̱ꞌña̱nj an huaj riñan nej suj,
2 nej dinï̂nt gàꞌ ganahuin gè giꞌhiaj Ma̱ꞌan Cristo Jesús,
nne ruhuâ yumanꞌ snàꞌànj Corinto huin si-nùhuì Ma̱ꞌan Ñaꞌanj an,
ni̱ huin nej suj sí ganahuin gè dàj rûnꞌ huin aꞌngô nej dinï̂nt ganataꞌ duꞌhua siyu̱gui Ma̱ꞌan Señor Jesucristo nne nï̀nꞌ gàchràꞌ,
ni̱ huê Ma̱ꞌan huin Señor riñan nej sôꞌ ni̱ Ma̱ꞌan huin Señor riñan nêꞌ:
3 Ni̱ Ma̱ꞌan Ña̱ꞌanj an gi̱ꞌhiaj gùyùmàn sunuj u ni̱ ga̱ dïnꞌïnj riñan nej suj,
dadinꞌ huê Ma̱ꞌan huin Rej nêꞌ ni̱ huej huin Rej Ma̱ꞌan Señor Jesucristo.
Gàꞌhuìꞌ si guruhuâ Ma̱ꞌan Ñaꞌanj an rayiꞌî sun rikij riñunꞌ
4 Daranꞌ diû gaꞌhuí si guruhuâ Ma̱ꞌan Ñaꞌanj an rayiꞌî nej suj,
dadinꞌ ganahuin raꞌá si-su̱nu̱j Ma̱ꞌan Ñaꞌanj an giꞌhiaj Ma̱ꞌan Jesús;
5 dadinꞌ huê Ma̱ꞌan Jesús giꞌhiaj ni̱ gaꞌhue ûta nìko giniꞌin nej suj si-nùguànꞌ Ma̱ꞌan Ñaꞌanj an,
ni̱ ûta giriꞌ nej suj nuguanꞌan ga̱ꞌmi̱n nej suj,
ni̱ gahuin chru̱n nï̀nꞌ ruhuâ nej suj;
6 ni̱ huê danj na̱nj ganataꞌ nej sôꞌ rayiꞌî Ma̱ꞌan Cristo riñan nej suj ni̱ ûta ganahuin yìtï̀nj ruhuâ nej suj,
7 Ni̱ si nne nej suj ganaꞌhuìj nej suj àmàn gaꞌnaꞌ Ma̱ꞌan Señor Jesucristo,
ni̱ ga̱ꞌhue ga̱huin chru̱n nej suj daranꞌ si-su̱n Ma̱ꞌan Ñaꞌanj an;
8 ni̱ huê Ma̱ꞌan gi̱ꞌhiaj ganikïnꞌ ran nej suj nda gui gàhuìꞌ nej suj,
ni̱ ga̱ꞌhue ga̱huin nej suj sí ni̱ka̱a nda gàꞌnàꞌ ñûn Ma̱ꞌan Señor Jesús.
9 Sani̱ dàñùn hueꞌê dagahuin Ma̱ꞌan Ñaꞌanj an si-nùguànꞌanj,
rayiꞌî dan ni̱ gakï̂n si ga̱na̱ka̱j duguiꞌ nej suj ngà Ma̱ꞌan daꞌnin Jesucristo huin Ma̱ꞌan si-Seño nêꞌ.
Giyichraꞌ da̱ꞌa̱j nej dinï̂nt nìkòꞌ rukû Ma̱ꞌan Jesús
10 Gachín ni̱ꞌhia riñan nej suj di̱nï̂nj,
ngà siyu̱gui Ma̱ꞌan Señor Jesucristo,
si ꞌngo̱ rïn nuguanꞌan ga̱ꞌmi̱n nej suj,
ni̱ si̱ gachej ga̱ꞌmi̱n nej suj,
ni̱ si̱ gaꞌhue gìyìchràꞌ da̱ꞌa̱j nej suj,
ni̱ gu̱ña̱n ga̱nï̱n ruhuâ nej suj ni̱ gu̱ña̱n ga̱huin ruhuâ nej suj.
11 Dadinꞌ gàꞌ gunḯn dàj ꞌhiaj nej suj mân nej suj,
na̱nj di̱nï̂nj,
dadinꞌ gàꞌ ganataꞌ nej dùguìꞌ Cloé,
si man ni̱na̱nj sun gunïnꞌ mân nej suj.
12 Ruhuâj gàtà si daꞌ goꞌngo̱ nej suj gataj dànanj:
“Ñùnj nikòꞌ rukû Pablo”;
ni̱ aꞌngô nej suj gataj:
“Ñùnj nikòꞌ rukû Apolos”;
ni̱ aꞌngô nej suj gataj:
“Ñùnj nikòꞌ rukû Cefas”;
ni̱ aꞌngô nej suj gataj:
“Ñùnj nikòꞌ rukû Ma̱ꞌan Cristo.”
13 Hiôꞌ ni̱ giyichraꞌ da̱ꞌa̱j Cristo na̱nj nîꞌ,
ni̱ Pablo ginikòꞌ riñan rugutsìi rayiꞌî nej suj na̱nj nîꞌ.
Ni̱ gataꞌ nne nej suj ngà siyu̱gui Pablo na̱nj nîꞌ.
14 Ni̱ gaꞌhuí si guruhuâ Ma̱ꞌan Ñaꞌanj an dadinꞌ gàꞌ si ꞌngo̱ nej suj nun du̱guataꞌ nnêj mánj,
man Crispo ngà Gayo duguataꞌ nnêj,
15 daꞌnga ni̱ si̱ gataj nej suj si gataꞌ nne nej suj ngà siyu̱guí.
16 Ni̱ huê danj na̱nj duguataꞌ nnêj nej dùguìꞌ Estéfanas;
sani̱ nun niꞌín si duguataꞌ nnêj aꞌngô nej sôꞌ mánj.
17 Dadinꞌ nun gàꞌnï̀nj Ma̱ꞌan Cristo si ga̱ꞌa̱nj duguataꞌ nnêj mánj,
dadinꞌ gaꞌnïn si ga̱ꞌa̱nj gànàtàj nuguanꞌ giꞌhiaj ga̱na̱ni̱n nej guiì;
ni̱ sê ngà nuguanꞌ niꞌin nï̀nꞌ ruhuâj huin sa gaꞌmînj mánj,
daꞌnga ni̱ si̱ nagiꞌhiaj nina si gahuiꞌ Ma̱ꞌan Cristo riñan rugutsìi.
Ma̱ꞌan Cristo huin sa ni̱ka̱j su̱n riñan daranꞌanj ni̱ sa chru̱n nï̀nꞌ ruhuâ giꞌhiaj Ma̱ꞌan Ñaꞌanj an
18 Dadinꞌ si gu̱nu̱no̱ꞌ rayiꞌî rugutsìi riñan nej sí gaꞌanj ni̱ꞌhia̱ sani̱ ganï̂n ruhuâ nej sôꞌ si huin nuguanꞌ sinún chre;
sani̱ guendâ nêꞌ gàꞌ gananin,
ni̱ huin nuguanꞌ nagiꞌhiaj nùkuaj Ma̱ꞌan Ñaꞌanj an ñùnꞌ.
19 Dadinꞌ huê danj nnunj riñan ñanj:
Ni̱ gu̱du̱rëꞌë́ nuguanꞌ niꞌin nï̀nꞌ ruhuâ nej sí chru̱un,
ni̱ gi̱ꞌhiaj anê sa garânj daꞌngàꞌ ruhuâ nej sí garânj daꞌngaꞌ rûhua.
20 Dànèꞌ mân nej sí chru̱un ni̱ dànèꞌ mân nej sí huin maestrû ràꞌaj.
Dànèꞌ mân nej sí gu̱rij gùnï̀nꞌ rayiꞌî nej sa màn ruhuâ yumiguì nânj ràꞌaj.
Sê giꞌhiaj Ma̱ꞌan Ñaꞌanj an si nitaj si niꞌñanj nej nuguanꞌ chru̱n nï̀nꞌ ruhuâ nej sí màn ruhuâ yumiguì nânj ràꞌ saj ûnꞌ.
21 Dadinꞌ Ma̱ꞌan Ñaꞌanj an huin sa chru̱n nï̀nꞌ ruhuâ,
sani̱ nun ga̱ꞌnïn si gi̱ni̱ꞌin nej sí chru̱n màn ruhuâ yumiguì nânj Ma̱ꞌan mánj,
sani̱ garanꞌ ruhuâ Ma̱ꞌan Ñaꞌanj an gi̱ꞌhia ga̱na̱ni̱n nej guiì guyumân ruhuâ nuguanꞌ duyingaꞌ nej ñûnj,
nùnj huin si riñan aꞌngô nej sij ni̱ huin ꞌngo̱ nuguanꞌ nitaj si niꞌña̱nj an.
22 Dadinꞌ nej síchìj judío ni̱ gachín nej sôꞌ daꞌngaꞌa gi̱ni̱ꞌin nej sôꞌ,
ni̱ nej síchìj griego ni̱ ûta ganahuij ruhuâ nej sôꞌ guendâ ga̱huin chru̱n nï̀nꞌ ruhuâ nej sôꞌ;
23 sani̱ nêꞌ ni̱ ganatôꞌ rayiꞌî Ma̱ꞌan Cristo dunikòꞌ rùgùtsì nej sij,
ni̱ guendâ nej judío ni̱ huin ꞌngo̱ sa unïnꞌ ngà nej sôꞌ,
ni̱ guendâ nej sí nàsìnùnj un ni̱ huin ꞌngo̱ nuguanꞌ sinún chre;
24 sani̱ guendâ nej sí gakḯn Ma̱ꞌan Ñaꞌanj an ni̱ ga̱ꞌhue si huin nej sôꞌ judío ga̱ꞌhue si huin nej sôꞌ griego,
ni̱ Ma̱ꞌan Cristo huin sa ni̱ka̱j su̱n riñan daranꞌ nej sôꞌ ni̱ Ma̱ꞌan huin sa chru̱n nï̀nꞌ rûhua giꞌhiaj Ma̱ꞌan Ñaꞌanj an riñan nej sôꞌ.
25 Sani̱ nej sí naꞌhue gùyùmàn ruhuâ ni̱ ganï̂n ruhuâ nej sôꞌ si huin nuguanꞌ nitaj si niꞌña̱nj an riñan nej sôꞌ,
sani̱ dànanj huin nuguanꞌ nânj nuguanꞌ chru̱n nï̀nꞌ ruhuâ Ma̱ꞌan Ñaꞌanj an.
26 Niꞌhiaj nej suj di̱nï̂nj,
dadinꞌ gakḯn Ma̱ꞌan Ñaꞌanj an nej suj,
ni̱ nitaj si huin nej suj sí chru̱un riñan nej guiì màn ruhuâ yumiguìi,
ni̱ huê danj na̱nj nitaj si ni̱ka̱j nej suj sun yàkàan;
27 sani̱ ganagui Ma̱ꞌan Ñaꞌanj an nej guiì naꞌhue ga̱ya̱ka̱j guendâ ni̱ giꞌhia si gìrìꞌ nàꞌàj nej sí chru̱un;
ni̱ ganaguij nej sí nitaj guesâ guendâ gi̱ꞌhia si gìrìꞌ nàꞌàj nej sí nùkuaj;
28 ni̱ nej guiì ga̱ni̱ki màn ruhuâ yumiguì nânj ni̱ nej guiì nitaj si niꞌña̱nj an,
ni̱ nej guiì nitaj nùnj huin ni̱ nej guiì nitaj guesâ ganagui Ma̱ꞌan Ñaꞌanj an guendâ gu̱du̱na nej guiì aꞌnïnꞌ màn ruhuâ yumiguì nânj.
29 Huê danj ni̱ nga na̱nikïn nej guiì riñan Ma̱ꞌan Ñaꞌanj an ni̱ si̱ ganï̂n ruhuâ ninj si ûta huin ninj.
30 Sani̱ Ma̱ꞌan Ñaꞌanj an huin sa gi̱ꞌhiaj ni̱ rayiꞌî dan ni̱ ga̱ꞌhue ga̱na̱ka̱j duguiꞌ nej suj ngà Ma̱ꞌan Cristo Jesús,
ni̱ huê Ma̱ꞌan Ñaꞌanj an gi̱ꞌhiaj si ga̱huin chru̱n nï̀nꞌ ruhuâ nej suj ngà Ma̱ꞌan Cristo Jesús,
ni̱ nitaj gakï̱nꞌïn gitàj yichrá nej suj,
ni̱ nagiꞌhiaj gèj nej suj,
ni̱ giꞌhia si ga̱na̱ni̱n nej suj;
31 dadinꞌ huê danj nnunj riñan ñanj:
Ni̱ guiì ganï̂n ruhuâ si ûta huin ninj,
ni̱ dànanj dùgùnàj huaj si ga̱ta̱j ninj si Ma̱ꞌan Ñaꞌanj an huin sa giꞌhiaj hueꞌê staꞌu.