Nuguanꞌ gananï̂n si ginikòꞌ Ma̱ꞌan Cristo riñan rùgùtsì
2
Huê danj di̱nï̂nj,
ni̱ nga guchiꞌ gànàtàj si-nùguànꞌ Ma̱ꞌan Ñaꞌanj an ñan màn nej suj,
ni̱ sê nuguanꞌ ûta nìko niꞌín huin sa gaꞌmînj riñan nej suj mánj.
2 Dadinꞌ ganï̂n ruhuâj sisi̱ si̱ gaꞌmînj rayiꞌî aꞌngô nuguanꞌan riñan nej suj dadinꞌ man ꞌngo̱ rïn nuguanꞌ garanꞌ ruhuâj gànàtàj riñan nej suj huin rayiꞌî Ma̱ꞌan Señor Jesucristo,
dadinꞌ huej huin Ma̱ꞌan sa godokoꞌ rùgùtsì nej síi.
3 Ni̱ nga guchí siganï̂nj nej suj ni̱ giꞌhia dàj rûnꞌ giꞌhiaj ꞌngo̱ sí nitaj guesâ ni̱ ûta nun yuꞌhuiꞌ ruhuâj ni̱ nda nagunanj ñùnj nga nikḯn riñan nej suj;
4 ni̱ nga ganatá si-nùguànꞌ Ma̱ꞌan Ñaꞌanj an riñan nej suj ni̱ nun gàꞌmìn dàj rûnꞌ gaꞌmin ꞌngo̱ sí chru̱n nï̀nꞌ ruhuâ guendâ gi̱ꞌhiâ si gùyùmàn ruhuâ nej suj mánj,
gaꞌnï̂n si ri̱ki̱ Ma̱ꞌan Espíritu Santo nuguanꞌan ni̱ huej gi̱ꞌhiaj gùyùmàn ruhuâ nej suj dadinꞌ huej huin sa ni̱ka̱j su̱n riñan nej suj,
5 ni̱ si guyumân ruhuâ nej suj ni̱ si̱ ga nùkuaj staꞌu ruhuâ nej suj niꞌin nej suj nej síi mánj,
ni̱ dànanj dùgùnàj huaj si gà nùkuaj ruhuâ nej suj niꞌin nej suj Ma̱ꞌan Ñaꞌanj an.
Espíritu Santo huin sa gidigân rayiꞌî Ma̱ꞌan Ñaꞌanj an
6 Sani̱ huê danj na̱nj,
gaꞌmin nej ñûnj nuguanꞌ chru̱n nï̀nꞌ ruhuâ siganï̂nj nej sí gàꞌ gahuin ran ruhuâ;
sani̱ sê nuguanꞌ chru̱n nï̀nꞌ ruhuâ niꞌin nej sí ni̱ka̱j su̱n ruhuâ yumiguì nânj huin mánj,
dadinꞌ nuguanꞌ gunâj neꞌ rùkùu huin nej nuguanꞌ dânj.
7 Sani̱ nuguanꞌ aꞌmin nej ñûnj huin sa chru̱n nï̀nꞌ ruhuâ Ma̱ꞌan Ñaꞌanj an ni̱ huin nuguanꞌ hua̱ huìi ni̱ huin nuguanꞌ chru̱n nï̀nꞌ ruhuâ Ma̱ꞌan Ñaꞌanj an ni̱ ꞌnï̱nj huij,
ni̱ gàꞌ hua̱ yu̱gui giꞌhiaj Ma̱ꞌan Ñaꞌanj an àsìj nâ guendâ ga̱ hueꞌê riñan nêꞌ.
8 Ni̱ gàꞌ si ꞌngo̱ nej sí ni̱ka̱j su̱n riñan yumiguì nânj nun gi̱ni̱ꞌin rayiꞌî nuguanꞌ nânj,
dadinꞌ si nu̱n giniꞌin nej sôꞌ,
ni̱ nitaj àmàn go̱dokoꞌ rùgùtsì nej sôꞌ Ma̱ꞌan Señor ûta hueꞌê giꞌhiaj saj mánj.
9 Ni̱ huê dàj rûnꞌ taj riñan ñanj:
Ni̱ sa nun gi̱ni̱ꞌin rune ñan nej guiì,
ni̱ nun gu̱nïn nej guiì,
ni̱ gàꞌ nun ga̱nï̱n ruhuâ nimân nej guiì,
ni̱ nej nuguanꞌ nânj gi̱ꞌhiaj yu̱gui Ma̱ꞌan Ñaꞌanj an riñan nej guiì ꞌì ruhuâ niꞌin Ma̱ꞌan.
10 Nej nuguanꞌ nânj gidigân Ma̱ꞌan Espíritu Santo;
dadinꞌ Ma̱ꞌan Espíritu Santo huin sa nadigiꞌñûn daranꞌanj,
ni̱ niꞌin sàꞌ Ma̱ꞌan dàj hua nda gùnùn ruhuâ nimân Ma̱ꞌan Ñaꞌanj an.
11 Dadinꞌ ahuin nej sí niꞌin dàj hua ruhuâ nimân aꞌngô nej síi ràꞌaj.
Sê sa niꞌin dàj hua ruhuâ nimân nej guiì huin nanè nu̱n ruhuâ nimân ninj ràꞌ saj ûnꞌ.
Huê danj na̱nj nitaj aꞌngô sa giniꞌin dàj hua ruhuâ nimân Ma̱ꞌan Ñaꞌanj an,
dadinꞌ ꞌngo̱ rïn sa niꞌin dàj hua ruhuâ nimân Ma̱ꞌan Ñaꞌanj an huin si-Espíritu Ma̱ꞌan.
12 Sani̱ nun ga̱na̱huin ro̱ꞌoꞌ nanè yumiguìi mánj,
ganahuin ro̱ꞌoꞌ Espíritu gaꞌnḯn Ma̱ꞌan Ñaꞌanj an gaꞌnaꞌ riñun,
daꞌnga ni̱ gaꞌhue ga̱ra̱n daꞌngaꞌ ruhuôꞌ sa riki Ma̱ꞌan Ñaꞌanj an riñunꞌ;
13 huê danj ni̱ gaꞌmin nej ñûnj,
sani̱ sê si̱ gaꞌmin nej ñûnj nuguanꞌ gidigân nej síi mánj,
gaꞌmin nej ñûnj nuguanꞌ gidigân Ma̱ꞌan Espíritu,
ni̱ huê dàj rûnꞌ gidiganj ni̱ huê danj gidigân nej ñûnj.
14 Sani̱ sí nitaj si niꞌin Ma̱ꞌan Ñaꞌanj an ni̱ si̱ gaꞌhue ga̱ra̱n daꞌnga ruhuâ sôꞌ nej nuguanꞌ gidigân si-Espíritu Ma̱ꞌan Ñaꞌanj an mánj,
dadinꞌ guendâ sôꞌ ni̱ huin nuguanꞌ sinún chre,
dadinꞌ naꞌhue ga̱ya̱ka̱j guendâ sôꞌ,
dadinꞌ nej nuguanꞌ nânj ni̱ daꞌhuiꞌ ga̱ra̱n daꞌngaꞌ ruhuôꞌ dàj rûnꞌ gidigân Ma̱ꞌan Espíritu Santo.
15 Sani̱ Ma̱ꞌan Espíritu Santo ni̱ gàꞌhue ga̱na̱ka̱j guendaj daranꞌ sa giꞌhiaj nej guiì;
sani̱ rayiꞌî Ma̱ꞌan ni̱ gàꞌ si ꞌngo̱ nej guiì si gaꞌhue ga̱na̱ka̱j guendâ mánj.
16 Dadinꞌ huê danj taj riñanj:
“Dadinꞌ ahuin sí ga̱ꞌhue giniꞌin dàj anï̂n ruhuâ Ma̱ꞌan Señor.
Ni̱ ahuin sí chru̱n doj ni̱ gàꞌhue gidigân sôꞌ Ma̱ꞌan Señor ràꞌaj.”
Sani̱ ñùnꞌ ni̱ ni̱ko̱ꞌ daꞌnga Ma̱ꞌan Cristo.