Ñanj kartâ huìj nânj huin gachrûn Apóstol Pablo riñan nej
CORINTIOS
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Corinto
1
Ñùnj huin Pablo,
ni̱ huín sí gaꞌanj gi̱di̱gân si̱nï̱n si-nùguànꞌ Ma̱ꞌan Jesucristo ni̱ giꞌhia sa garanꞌ ruhuâ Ma̱ꞌan Ñaꞌanj an,
ni̱ gaꞌnḯn nguèj ñûnj dinï̂nt Timoteo ñanj karta nânj hua riñan nej suj huin si-nùhuì Ma̱ꞌan Ñaꞌanj an nne ruhuâ yumanꞌ snàꞌànj Corinto,
ni̱ huê danj na̱nj huaj ñanj nânj riñan aꞌngô nej dinï̂nt huin sí gè man nï̀nꞌ gàchràꞌ riñan hioꞌó Acaya:
2 Ñaꞌanj huin Rej nêꞌ ni̱ huej huin Rej Ma̱ꞌan Señor Jesucristo,
ni̱ giꞌhia sunuj u ni̱ huê danj na̱nj giꞌhia si ga̱ dïnꞌïnj ruhuâ nej suj.
Giranꞌ sa̱ñu̱n Pablo
3 Ga̱ꞌmi̱n hueꞌê nêꞌ yiꞌî Ma̱ꞌan Ñaꞌanj huin Rej Ma̱ꞌan Señor Jesucristo,
dadinꞌ Ma̱ꞌan huin Rej nêꞌ ni̱ gananï̂n àko ruhuaj niꞌin nêꞌ ni̱ Ma̱ꞌan huin Ñaꞌanj giꞌhiaj ganahuin nìhiàꞌ ruhuôꞌ,
4 ni̱ Ma̱ꞌan giꞌhiaj si ganahuin nùkuaj ruhuôꞌ ngà daranꞌ nej sañun guyumân riñunꞌ,
daꞌnga ni̱ gaꞌhue gi̱ꞌhioꞌ si ga̱na̱huin nìhiàꞌ ruhuâ aꞌngô nej duguiꞌ giranꞌ sa̱ñu̱n,
rayiꞌî guendâ ganahuin nùkuaj ruhuôꞌ giꞌhiaj Ma̱ꞌan ni̱ huê danj na̱nj gi̱ꞌhiôꞌ ganahuin nìhiàꞌ ruhuâ aꞌngô nej duguiꞌ.
5 Dadinꞌ giranꞌ sa̱ñu̱n staꞌuꞌ rayiꞌî Ma̱ꞌan Cristo,
ni̱ huê danj na̱nj ûta nìko guruguñuꞌunj Ma̱ꞌan Ñaꞌanj an ñùnꞌ ni̱ ganahuin nìhiàꞌ ruhuôꞌ giꞌhiaj Ma̱ꞌan Ñaꞌanj an.
6 Ni̱ si giranꞌ sa̱ñu̱n nej ñûnj,
ni̱ giranꞌ sa̱ñu̱n nej ñûnj guendâ ga̱na̱huin nùkuaj ruhuâ nej suj ni̱ ga̱na̱ni̱n nej suj;
ni̱ si Ma̱ꞌan Ñaꞌanj an giꞌhiaj ganahuin nùkuaj ruhuâ nej ñûnj,
ni̱ huê danj na̱nj ga̱na̱huin nùkuaj ruhuâ nej suj nga guyumân sañuun riñan nej suj dàj rûnꞌ giranꞌ sa̱ñu̱n nej ñûnj.
7 Ni̱ ànùꞌhuìj nej ñûnj ni̱ hua̱ yìtï̀nj ruhuâ nej ñûnj niꞌin nej ñûnj nej suj,
dadinꞌ niꞌin nej ñûnj si gi̱ranꞌ sa̱ñu̱n nej suj ngà nej ñûnj,
sani̱ huê danj na̱nj ga̱na̱huin nùkuaj ruhuâ nej suj.
8 Di̱nï̂nj,
garanꞌ ruhuâ nej ñûnj si gu̱nïn nej suj si yàngàꞌ ni̱ ûta giranꞌ sa̱ñu̱n nej ñûnj nga gane nej ñûnj riñan hioꞌó Asia;
dadinꞌ ûta giranꞌ sa̱ñu̱n nej ñûnj ni̱ ganï̂n ruhuâ nej ñûnj sisi̱ si̱ gunùkuaj nej ñûnj,
ni̱ ganï̂n ruhuâ nej ñûnj sisi̱ si̱ ga nìꞌnàꞌ nej ñûnj.
9 Ni̱ ganï̂n ruhuâ nej ñûnj si gàꞌ ꞌngo̱ giriꞌ nìꞌhiaj nej ñûnj gàhuìꞌ nej ñûnj,
ni̱ dùgùnàj ganï̂n ruhuâ nej ñûnj dadinꞌ nun gi̱nun ñan nej ñûnj ma̱ꞌan nej ñûnj mánj,
ni̱ ginun ñan nej ñûnj Ma̱ꞌan Ñaꞌanj an dadinꞌ huej huin sa gi̱ꞌhiaj ga̱na̱huin nìꞌnàꞌ nej nîman;
10 ni̱ Ma̱ꞌan Ñaꞌanj an giꞌhiaj gananin nej ñûnj,
ni̱ hua̱ na̱nj ga̱na̱ni̱n nej ñûnj riñan sañun chìꞌ xi ñan huaj gàhuìꞌ nej ñûnj,
ni̱ hua̱ na̱nj ànùꞌhuìj nej ñûnj si gi̱ꞌhia ga̱na̱ni̱n nej ñûnj riñan sañun chìꞌ xi dânj.
11 Ni̱ gu̱ru̱gûñuꞌunj nej suj gàchìnj nìꞌhiaj nej suj riñan Ma̱ꞌan Ñaꞌanj an rayiꞌî nej ñûnj,
ni̱ si gàꞌì nej suj gachín nìꞌhiaj rayiꞌî nej ñûnj ni̱ huê danj na̱nj ûta gàꞌì nej guiì gàꞌhuìꞌ si guruhuâ Ma̱ꞌan Ñaꞌanj an rayiꞌî guendâ giꞌhiaj su̱nu̱j Ma̱ꞌan Ñaꞌanj an ngà nej ñûnj.
Nùnj huin saj ni̱ nun ga̱ꞌa̱nj Pablo yumanꞌ snàꞌànj Corinto
12 Dadinꞌ rayiꞌî dan ni̱ ganahuin nìhiàꞌ ruhuâ nej ñûnj:
Dadinꞌ niꞌin sàꞌ daꞌngaꞌ nu̱n ruhuâ nimân nej ñûnj,
ni̱ nun gi̱ꞌhiaj nej ñûnj si ûta niꞌin nej ñûnj,
ni̱ dàj rûnꞌ gidigân Ma̱ꞌan Ñaꞌanj an ni̱ huê danj gaꞌmin nej ñûnj,
ni̱ nun ga̱ꞌmi̱n nej ñûnj nej nuguanꞌ gidigân nej síi mánj,
gaꞌmin nej ñûnj ngà su̱nu̱j rikî Ma̱ꞌan Ñaꞌanj an riñan nej ñûnj,
ni̱ huê danj na̱nj gaꞌanj nej ñûnj aꞌngô nej yumanꞌ màn ruhuâ yumiguìi,
ni̱ dànanj ûta nìko guruguꞌun rukû nej ñûnj ngà sa giꞌhiaj nej suj.
13 Dadinꞌ nun ga̱chru̱n nej ñûnj rayiꞌî aꞌngô nej nuguanꞌ nï̀nꞌ ga̱chin ga̱hia̱ nej suj,
sani̱ ga̱ra̱n daꞌnga ruhuâ nej suj;
ni̱ gànàꞌhuì si nda neꞌ rùkù ni̱ ga̱ra̱n daꞌnga ruhuâ nej suj;
14 dadinꞌ da̱ꞌa̱j da̱nï̱n ni̱ gàꞌ garânj daꞌngaꞌ ruhuâ nej suj ni̱ ganahuin nìhiàꞌ ruhuâ nej suj giꞌhiaj nej ñûnj,
ni̱ huê danj na̱nj ga̱na̱huin nìhiàꞌ ruhuâ nej ñûnj giꞌhiaj nej suj.
15 Huê danj ni̱ nitaj si giꞌhiaj chìꞌ man ruhuâj ni̱ guchiꞌ sìnï̀nj ñan màn nej suj,
ni̱ huê danj na̱nj ganï̂n ruhuâj gùchìꞌ ñûn ñan màn nej suj ni̱ ga̱na̱huin ràꞌa nej suj si-su̱nu̱j Ma̱ꞌan Ñaꞌanj an.
16 Ni̱ ganï̂n ruhuâj gùchìj ñan màn nej suj ni̱ neꞌ rùkù ni̱ gàꞌàn Macedonia,
ni̱ neꞌ Macedonia nànìkàj ñûn gùnùmànj ñan nne nej suj,
ni̱ gàꞌnï̀nj chrej nej suj gàꞌàn estado Judea.
17 Ni̱ nga ganï̂n ruhuâj gùchìj ñan màn nej suj.
Ni̱ nun ga̱nï̱n hueꞌê ruhuâj ràꞌ saj ûnꞌ.
Ni̱ sa ganï̂n ruhuâj dan ni̱ sa giri rà ma̱ꞌán huin na̱nj nîꞌ.
Rayiꞌî dan ni̱ gata “gàꞌhue” ni̱ neꞌ rùkù ni̱ gatâ “si̱ gaꞌhue” na̱nj nîꞌ.
18 Sani̱,
hueꞌê dagahuin Ma̱ꞌan Ñaꞌanj an dadinꞌ da̱gahuin sa gata ni̱ huej huin sa niꞌin,
rayiꞌî dan ni̱ nga ga̱ta̱j nej ñûnj “ga̱ꞌhue” ni̱ nun nànìkàj ruhuâ nej ñûnj orâ chre ni̱ ga̱ta̱j nej ñûnj “si̱ gaꞌhue” mánj.
19 Dadinꞌ Ma̱ꞌan Jesucristo huin Daꞌní Ma̱ꞌan Ñaꞌanj an,
ni̱ huê rayiꞌî Ma̱ꞌan huin sa ganataꞌ Silvano ngà Timoteo siganï̂nj nej suj,
ni̱ huê rayiꞌij ganatá riñan nej suj,
ni̱ nga gataj Ma̱ꞌan Jesús si “ga̱ꞌhue” ni̱ nun ga̱ta̱ “si̱ gaꞌhue mánj” ni̱ gaꞌhue gata;
20 Ni̱ gisîj daranꞌ nej sa gataj Ma̱ꞌan Ñaꞌanj an rayiꞌî Ma̱ꞌan Jesús,
rayiꞌî dan ni̱ gaꞌmin hueꞌê nêꞌ rayiꞌî Ma̱ꞌan Ñaꞌanj an ni̱ gataj nêꞌ si “huê danj huin” yàngàꞌ rayiꞌî guendâ guyumân ruhuôꞌ niꞌînꞌ Ma̱ꞌan Cristo Jesús.
21 Ni̱ huê Ma̱ꞌan Ñaꞌanj an huin sa nagiꞌhiaj nùkuaj daꞌ goꞌngo̱ nêꞌ,
ni̱ huê Ma̱ꞌan huin sa giꞌhiaj yu̱gui ñùnꞌ guendâ gi̱nikaj duguîꞌ ngà Ma̱ꞌan.
22 Ni̱ gachrîj Ma̱ꞌan Ña̱ꞌanj an si-da̱ꞌngaj ñùnꞌ,
ni̱ giꞌhiaj yi̱tïn ruhuâ nimûnꞌ ngà Ma̱ꞌan Espíritu Santo.
23 Ni̱ gachín nìꞌhia riñan Ma̱ꞌan Ñaꞌanj an si ganikïnj ga̱huin sa gi̱niꞌin sa gi̱ranꞌ ma̱ꞌan nimânj,
dadinꞌ ganï̂n ruhuâj gu̱ru̱gûñuꞌun nej suj rayiꞌî dan ni̱ hua̱ nun gùchìj yumanꞌ snàꞌànj Corinto.
24 Ni̱ si̱ ganï̂n ruhuâ nej suj si na̱gi̱ꞌhiaj si̱ꞌhiaj nej ñûnj sa guyumân ruhuâ nej suj mánj,
sa giꞌhiaj nej ñûnj huin si man si guruguñuꞌunj nej ñûnj guendâ ga̱na̱huin nìhiàꞌ ruhuâ nej suj;
dadinꞌ rayiꞌî guendâ guyumân ruhuâ nej suj ni̱ rayiꞌî dan ni̱ ni̱kï̱nꞌ ran nej suj.