Ñanj kartâ nânj huin gachrûn Apóstol Pablo riñan nej
GÁLATAS
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Galacia
1
Ñùnj huin Pablo,
sí gaꞌanj gi̱digân si̱nï̱n si-nùguànꞌ Ma̱ꞌan Ñaꞌanj an ni̱ sê nej síi gaꞌnḯn gaꞌân ni̱ sê nej síi gachrûn su̱n ñùnj mánj,
sa gaꞌnḯn gaꞌân ni̱ sa gachrûn su̱n ñùnj huin Ma̱ꞌan Jesucristo Ma̱ꞌan sa ganaꞌnï̂nj siganï̂nj nej nîman giꞌhiaj Ma̱ꞌan Ñaꞌanj an,
2 ni̱ gaꞌnḯn daranꞌ nej dinï̂nt nne ngàj nuguanꞌ ni̱ꞌñanj an huaj riñan nej suj huin si-nùhuì Ma̱ꞌan Jesús nne riñan hioꞌó Galacia:
3 Ma̱ꞌan Ñaꞌanj an ri̱ki̱ sunuj u ni̱ gi̱ꞌhia si ga̱ dïnꞌïnj ruhuâ nej suj dadinꞌ huê Ma̱ꞌan huin Rej nêꞌ ni̱ huej huin Rej Ma̱ꞌan Señor Jesucristo.
4 Ni̱ ga ruhuâ Ma̱ꞌan Señor Jesucristo gahuij rayiꞌî si-ga̱kïnꞌ nêꞌ guendâ gi̱ꞌhia si ga̱na̱ni̱n nêꞌ riñan nej gakï̱nꞌ kï̱j hua hua̱ diû nneꞌ hia̱j,
dadinꞌ huê dànanj huin sa garanꞌ ruhuâ Ma̱ꞌan Reꞌ Ñaꞌanj an,
5 ni̱ riñan Ma̱ꞌan huin sa ga̱ꞌmi̱n hueꞌê nêꞌ nìgànj nï̀nꞌ.
Ni̱ huê danj huin na̱nj ánj.
Nitaj aꞌngô nuguanꞌ gi̱ꞌhiaj ga̱na̱ni̱n nej guiì
6 Ûta gahuin ña̱nꞌanj ruhuâj dadinꞌ do̱j sînj diû gachin ni̱ gàꞌ gahuin anêj nej suj riñan Ma̱ꞌan Ñaꞌanj an,
dadinꞌ huê Ma̱ꞌan gakḯn gaꞌnaꞌ nej suj ngà sunuj giꞌhiaj Ma̱ꞌan Cristo ngà nej suj,
sani̱ nadaꞌa nej suj aꞌngô nuguanꞌ ganï̂n ruhuâ nej suj si gi̱ꞌhia ga̱na̱ni̱n nej suj.
7 Yàngàꞌ ni̱ nitaj si hua̱ aꞌngô nuguanꞌ gi̱ꞌhiaj ga̱na̱ni̱n nej guiì mánj,
sa huaj huin si hua̱ aꞌngô nej sí duguachej ruhuâ nej suj ni̱ giꞌhiaj daꞌ goꞌngo̱ nej suj dàj guyumân ruhuâ nej suj,
ni̱ giꞌhiaj nej sôꞌ dànanj guendâ ruhuâ nej sôꞌ si ga̱che̱j ruhuâ nej suj daꞌnga ni̱ si̱ ginikòꞌ nej suj rukû nuguanꞌ gidigân Ma̱ꞌan Cristo.
8 Nùnj huin si nej ñûnj,
ni̱ nùnj huin si ꞌngo̱ ángel gininj gaꞌnaꞌ yàtàꞌa na̱du̱na̱ gi̱di̱gân aꞌngô nuguanꞌ gi̱ꞌhiaj ga̱na̱ni̱n nej guiì ni̱ ni̱nï̱n huaj gàꞌ daꞌ nuguanꞌ gidigân si̱nï̱n nej ñûnj,
ni̱ ga̱ꞌna̱ꞌ kastîgu riñan sôꞌ gi̱ꞌhiaj Ma̱ꞌan Ñaꞌanj an.
9 Ni̱ huê dàj rûnꞌ gataj si̱nï̱n nej ñûnj,
ni̱ hue danj gataj ñún gu̱nïn nej suj,
ni̱ si hua̱ ꞌngo̱ sí ni̱nï̱n gidigân nuguanꞌ gi̱ꞌhiaj ga̱na̱ni̱n nej guiì dàj rûnꞌ hua nuguanꞌ gidigân si̱nï̱n nej ñûnj riñan nej suj,
ni̱ ga̱ꞌna̱ꞌ kastîgu riñan sôꞌ gi̱ꞌhiaj Ma̱ꞌan Ñaꞌanj an na̱nj ánj.
10 Nitaj si naꞌhuí,
si ga̱ꞌmi̱n hueꞌê nej guiì rayiꞌî mánj,
sa ruhuâj huin si ga̱ꞌmi̱n hueꞌê Ma̱ꞌan Ñaꞌanj an rayiꞌí,
ni̱ nitaj si huin ruhuâj si gùnàj hueꞌé riñan nej guiì mánj,
sa huin ruhuâj huin si gùnàj hueꞌê riñan Ma̱ꞌan Ñaꞌanj an na̱nj ánj.
Dàj gahuin nga guchiꞌ Pablo gahuin sôꞌ apóstol
11 Ruhuâj si gi̱ni̱ꞌin nej suj di̱nï̂nj,
si gaꞌmînj nuguanꞌ gi̱ꞌhiaj ga̱na̱ni̱n nej guiì riñan nej suj,
ni̱ sê nuguanꞌ giri ra̱ nej guiì huin gaꞌmînj;
12 ni̱ sê síi gidigân riñânj ni̱ sê síi rikî nuguanꞌ dânj ganahuin ra̱ꞌá dadinꞌ Ma̱ꞌan Jesucristo huin sa gidigân riñânj.
13 Dadinꞌ gàꞌ giniꞌin nej suj dàj giꞌhiâ nga giꞌnï̂n riki chrej yìñànj nikaj nej judío,
ni̱ ûta ginikó gata rùhuàj si-nùhuì Ma̱ꞌan Ñaꞌanj an,
ni̱ gàꞌ ꞌngo̱ dunahuî nej guiì nìkòꞌ rukû Ma̱ꞌan Cristo;
14 nga gané país Israel ni̱ nga giꞌnï̂n riki chrej yìñànj ni̱ka̱j nej judío ni̱ dànanj niꞌín doj gàꞌ daꞌ nej sí gu̱ña̱n añûn ruhuâ ngàj,
ni̱ dànanj ûta dagahuín doj chrej yìñànj gidigân nej yí gàꞌ daꞌ aꞌngô nej judío.
15 Ni̱ Ma̱ꞌan Ñaꞌanj an huin sa garanꞌ ruhuâ niꞌin ñùnj,
ni̱ àsìj nga ginûnj riki nnî ni̱ gàꞌ hua̱ yu̱guí giꞌhia,
ni̱ ganï̂n su̱nu̱j ruhuaj ni̱ gakï̱n ñùnj,
16 ni̱ gidiganj Ma̱ꞌan Daꞌnin riñânj,
ni̱ huê dan ni̱ gaꞌanj gànàtàj rayiꞌij siganï̂nj nej guiì nàsìnùnj un,
sani̱ nun ga̱ꞌa̱nj gàchìnj naꞌân nej síi dàj gi̱ꞌhiâ nga gànànï̀nj rayiꞌij mánj.
17 Ni̱ gàꞌ nun gàꞌàn yumanꞌ snàꞌànj Jerusalén ñan màn nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an mánj,
ñan gaꞌanj sìnï̀nj huin riñan hioꞌó Arabia,
huê dan ni̱ gunumân ñún yumanꞌ snàꞌànj Damasco.
18 Neꞌ rùkù ni̱ nda gachîn huàꞌnï̀nj hioꞌo ni̱ gaꞌân ruhuâ yumanꞌ snàꞌànj Jerusalén dadinꞌ ruhuâj ga̱na̱rï̱snaꞌan nga Pedro,
ni̱ gané yi̱nu̱nꞌ gui ngà sôꞌ;
19 sani̱ nun gi̱ni̱ꞌín riñan aꞌngô nej sôꞌ gaꞌanj gi̱di̱gân si̱nï̱n mánj,
man sôꞌ giniꞌín huin Jacobo dinḯn Ma̱ꞌan Señor Jesús.
20 Ni̱ niꞌin Ma̱ꞌan Ñaꞌanj an si yàngàꞌ hia huin nej nuguanꞌ gatâ ni̱ nitaj si gidigañuꞌûn mánj.
21 Ni̱ neꞌ rùkù ni̱ gaꞌan riñan hioꞌó Siria ngà riñan hioꞌó Silisia.
22 Sani̱ nun gànàrìꞌ duguiꞌí ngà nej dinï̂nt huin si-nùhuì Ma̱ꞌan Jesús nne estado judea,
sa huaj huin si gàꞌ niꞌin nej sôꞌ Ma̱ꞌan Cristo.
23 Man nuguanꞌ gunïn nej sôꞌ huin:
“Sí gata rùhuà niꞌin nêꞌ ni̱ sí dunahuij nej dinï̂nt gimân diû gâchin,
hia̱j ni̱ gananï̂n sôꞌ riñan nej guiì si gùyùmàn ruhuâ ninj niꞌin Ma̱ꞌan Cristo.”
24 Ni̱ rayiꞌí ni̱ gaꞌmin hueꞌê nej sij riñan Ma̱ꞌan Ñaꞌanj an.