Ñanj kartâ nânj huin gachrûn Apóstol Pablo riñan nej
EFESIOS
Gaꞌnḯn Pablo nuguanꞌ ni̱ꞌña̱nj an riñan nej dinï̂nt nne ruhuâ yumanꞌ snàꞌànj Efeso
1
Ñùnj huin Pablo,
ni̱ Ma̱ꞌan Ñaꞌanj an huin sa garanꞌ ruhuâ si gahuín sí ga̱ꞌa̱nj gi̱di̱gân si̱nï̱n si-nùguànꞌ Ma̱ꞌan Jesucristo,
ni̱ gaꞌnï̂n ñanj karta nan hua riñan nej suj nne ruhuâ yumanꞌ snàꞌànj Efeso nej suj huin sa gèe ni̱ nej suj hueꞌê dagahuin riñan Ma̱ꞌan Señor Jesucristo.
2 Ma̱ꞌan Ñaꞌanj an huin Rej nêꞌ ni̱ huej huin Rej Ma̱ꞌan Señor Jesucristo,
ni̱ giꞌhiaj su̱nu ni̱ giꞌhia si ga̱ dïnꞌïnj riñan nej suj.
Ûta hueꞌê hua sa gi̱ꞌhiaj Ma̱ꞌan Cristo ngà nej guiì nìkòꞌ rukuj
3 Ga̱ꞌmi̱n hueꞌê nêꞌ yiꞌî Ma̱ꞌan Ñaꞌanj,
huin rej Ma̱ꞌan Señor Jesucristo,
dadinꞌ giꞌhiaj hueꞌej ngà nêꞌ ngà daranꞌ nej sa hua̱ hueꞌê ꞌnaꞌ neꞌ yàtàꞌa ñan nne Ma̱ꞌan Cristo,
4 ngà Cristo ganagui Ma̱ꞌan Ñaꞌanj an ñùnꞌ àsìj nï̀nꞌ gàchin gi̱ꞌhia yumiguìi,
ni̱ ga̱ꞌhue ga̱huînꞌ guiì gèe ni̱ si̱ gaꞌhue ga̱ gàꞌ si ꞌngo̱ gakï̱nꞌïn riñunꞌ gui nga ga̱na̱nikïnꞌ riñanj mánj,
5 ga ꞌì ruhuaj niꞌin ñùnꞌ,
ni̱ giꞌhiaj yu̱gui ñùnꞌ guendâ na̱gi̱ꞌhiaj da̱ꞌnin ni̱ ga̱huînꞌ dàj rûnꞌ huin daꞌnin rayiꞌî Ma̱ꞌan Jesucristo,
dadinꞌ huê danj garanꞌ ruhuâ Ma̱ꞌan Ñaꞌanj an ni̱ garânj yinaj,
6 ga̱ꞌmi̱n hueꞌê nêꞌ dadinꞌ ûta hueꞌê giꞌhiaj su̱nu̱j Ma̱ꞌan Ñaꞌanj an ngà nêꞌ,
ni̱ ganahuin ra̱ꞌa nêꞌ giꞌhiaj Ma̱ꞌan Jesús sa ꞌì ruhuaj,
7 ngà tun Ma̱ꞌan Jesús naruꞌhue ni̱ dunaninj ñùnꞌ,
ni̱ ginika nimân nìko rayiꞌî nej si-ga̱kïnꞌ ni̱ ûta nìko sunuj u giꞌhia ngà nêꞌ,
8 dadinꞌ giꞌhia si ga̱huin chru̱n nï̀nꞌ ruhuôꞌ ni̱ hueꞌê ga̱ra̱n daꞌnga ruhuôꞌ dàj gi̱ꞌhiôꞌ,
9 giꞌhia si ga̱ra̱n daꞌngaꞌ ruhuôꞌ rayiꞌî nej sa hua̱ huì garanꞌ ruhuaj ga̱ra̱n daꞌngaꞌ ruhuôꞌ,
dàj rûnꞌ garânj yinaj,
ni̱ dàj rûnꞌ ganï̂n ruhuaj gi̱ꞌhia,
10 ni̱ giꞌhia si ga̱na̱huin chre̱ꞌ daranꞌanj riñan Ma̱ꞌan Cristo,
ni̱ nga gìsìj diû ni̱ gi̱nikaj Ma̱ꞌan Cristo suun,
riñan nej sa màn yàtàꞌa ngà riñan nej sa màn riñan hioꞌóo.
11 Ni̱ giriꞌ nìꞌhiaj nej ñûnj nej judío gùchìꞌ nej ñûnj ga̱ne nej ñûnj nngaj,
ni̱ ganaguij nej ñûnj dadinꞌ huej giꞌhiaj daranꞌanj dàj rûnꞌ giri raj ni̱ dàj rûnꞌ garanꞌ ruhuaj,
12 hiô ni̱ nêꞌ,
ganaꞌhuìj si̱nï̱n Ma̱ꞌan Cristo,
ni̱ ga̱ꞌhue ga̱huînꞌ sa hua̱ hueꞌêꞌ ni̱ sa hua̱ sàꞌa riñanj.
13 Ni̱ rayiꞌij gahuin dan gunïn nej suj nej sí nàsìnùnj un,
nuguanꞌ yàngàꞌa,
nuguanꞌ gi̱ꞌhiaj ga̱na̱ni̱n nej suj,
ni̱ nga guyumân ruhuâ nej suj niꞌin nej suj Ma̱ꞌan ni̱ dàj rûnꞌ giyiꞌij daꞌngaꞌa riñan ñanj huê danj giyiꞌij daꞌngaꞌa nimân nej suj giꞌhiaj Ma̱ꞌan Espíritu Santo,
dadinꞌ gàꞌ gata si ga̱ꞌnïn ga̱ꞌna̱ꞌ rèkè Ma̱ꞌan Espíritu Santo riñan nej suj,
14 ni̱ Ma̱ꞌan Espíritu Santo huin sa giꞌhiaj ñanj riñanj si yàngàꞌ ga̱na̱huin ro̱ꞌoꞌ nani̱ꞌhioꞌ ni̱ ga̱na̱ni̱nꞌ dadinꞌ gàꞌ ganahuin si̱ꞌhiaj Ma̱ꞌan Ñaꞌanj an ñùnꞌ,
guendâ ga̱ꞌmi̱n hueꞌê nej guiì rayiꞌî Ma̱ꞌan.
Gachín nìꞌhiaj Pablo si gi̱ꞌhiaj Ma̱ꞌan Ñaꞌanj an si ga̱huin chru̱n nej dinï̂nt
15 Rayiꞌî dan,
ni̱ nga gunḯn si guyumân ruhuâ nej suj niꞌin nej suj Ma̱ꞌan Señor Jesús,
ni̱ si ꞌì ruhuâ nej suj niꞌin nej suj daranꞌ nej sôꞌ nitaj si giꞌhiaj gakï̱nꞌïn,
16 nitaj àmàn giyichinꞌ ruhuâj si gàꞌhuìj si guruhuâ Ma̱ꞌan Ñaꞌanj an rayiꞌî nej suj,
ni̱ nga gaꞌmînj ngà Ma̱ꞌan Ñaꞌanj an ni̱ gananun ruhuâj niꞌín nej suj ni̱ gachín ni̱ꞌhia rayiꞌî nej suj riñan Ma̱ꞌan.
17 Daꞌnga ni̱ Daꞌanj Ma̱ꞌan si-Seño nêꞌ Jesucristo,
Rej nêꞌ sàꞌ staꞌu,
ga̱ꞌhue ri̱kij si ga̱huin chru̱n nï̀nꞌ ruhuâ nej suj,
ni̱ ga̱ꞌhue giꞌhia ga̱ra̱n daꞌngaꞌ ruhuâ nej suj ni̱ gi̱ni̱ꞌin nej suj ahuin sa huin Ma̱ꞌan,
18 ni̱ Ma̱ꞌan gi̱ꞌhiaj gìyìgï̀n daꞌngaꞌ nej suj,
daꞌnga ni̱ gaꞌhue gi̱ni̱ꞌin nej suj ahuin rayiꞌì gakïn nej suj ni̱ ahuin sa gànàꞌhuìj nej suj ga̱na̱huin ra̱ꞌa nej suj,
dadinꞌ ûta hua hueꞌê sa ga̱na̱huin ra̱ꞌa nej guiì gèe,
19 ûta nìko ni̱ nitaj àmàn huaj ga̱na̱huij sa nùkua ngà nêꞌ gàꞌ guyumân ruhuâ niꞌin Ma̱ꞌan Ñaꞌanj an,
ni̱ guruguꞌñun ngà sa nùkua dânj rukûꞌ,
20 ni̱ gàꞌ giꞌhiaj yu̱gui Ma̱ꞌan Cristo rayiꞌî dan ni̱ giꞌhia si ganaꞌnï̂nj Ma̱ꞌan Cristo,
siganï̂nj nej nîman ni̱ gununej raꞌa neꞌ huàꞌaj neꞌ yàtàꞌa,
21 ni̱ giꞌhia si gi̱nikaj su̱n Ma̱ꞌan Cristo riñan nej sí huin ña̱an ni̱ riñan nej sí ni̱ka̱j su̱un,
ni̱ riñan nej sí nùkuaj ni̱ riñan nej sí aꞌnïnꞌïn,
ni̱ aꞌnïnj suun riñan siyu̱gui daranꞌ nej sí siyu̱gui gununâ nej guiì,
ni̱ sê man riñan diû nânj gi̱nikaj sunj,
dadinꞌ gi̱nikaj sunj riñan diû ꞌna̱ꞌa na̱nj ánj.
22 Ni̱ gachrîj Ma̱ꞌan Ñaꞌanj an riki dakó Ma̱ꞌan Jesús daranꞌanj,
ni̱ giꞌhia si gàꞌnï̀nꞌ Ma̱ꞌan Jesús riñan nej guiì huin si-nùhuij ngà riñan daranꞌ nej rasu̱un,
23 ni̱ nneè kú Ma̱ꞌan Cristo huin nej guiì nìkoꞌ rukuj,
ni̱ hua̱ daranꞌ nej rasu̱un riñan Ma̱ꞌan ga̱ꞌhuij raꞌa ninj ni̱ ga̱chra ruhuâ nimân ninj ngà nuguanꞌ sàꞌaj gi̱ꞌhia.