Gu̱ru̱gûñuꞌunj nej suj ꞌngo̱ ni̱ aꞌngô nej duguiꞌ nej suj
6
Di̱nï̂nj,
ni̱ si hua̱ ꞌngo̱ nej suj giniꞌin gininj ꞌngo̱ nej dinḯn nej suj riñan gakï̱nꞌïn,
ni̱ nej suj ni̱kï̱nꞌ ran riñan Ma̱ꞌan Señor ni̱ daꞌhui nej suj guruguñuꞌunj nej suj ni̱ na̱gi̱ꞌhiaj ni̱ka̱ nej suj sí dânj;
ni̱ nìn ga̱ꞌmi̱n nej suj ngà sí dânj,
sani̱ daꞌhui nej suj ga̱ gu̱dadû nej suj,
dadinꞌ si nuhuij ni̱ du̱guaneꞌ sichre gakï̱nꞌïn riñan nej suj ni̱ ga̱huin ni̱ gi̱ni̱nj nej suj riñan gakï̱nꞌïn.
2 Gu̱ru̱gûñuꞌunj nej suj nga guyumân sa chìꞌi riñan ꞌngo̱ ni̱ aꞌngô nej suj,
ni̱ huê danj gi̱ꞌhiaj nej suj daꞌnga ni̱ gaꞌhue dagahuin nej suj si-ley Ma̱ꞌan Cristo.
3 Dadinꞌ sí ganï̂n ruhuâ si huin sôꞌ doj,
ni̱ nitaj nùnj huin sôꞌ,
ni̱ ma̱ꞌan sôꞌ gidigañuꞌunj sôꞌ.
4 Huê danj ni̱,
daꞌ goꞌngo̱ nej suj ga̱ya̱ka̱j guendâ dàj hua sa giꞌhiaj nej suj,
ni̱ ga̱ꞌhue ga̱ꞌmi̱n hueꞌê nej suj rayiꞌî nej ma̱ꞌan nej suj,
ni̱ si̱ gaꞌhue ga̱ꞌmi̱n nej suj rayiꞌî aꞌngô nej guiì mánj.
5 Dadinꞌ daꞌ goꞌngo̱ nej suj nàgàꞌhuìꞌ guendâ rayiꞌî nej ma̱ꞌan nej suj na̱nj ánj.
6 Nej suj ri̱ña̱n gidigân nej dinï̂nt si-nùguànꞌ Ma̱ꞌan Ñaꞌanj an,
ni̱ daꞌhuiꞌ nej suj ni̱ gi̱ꞌhiaj nej suj sa sàꞌa ngà nej sôꞌ ni̱ guruguñuꞌunj nej suj sa gàchin riñan nej sôꞌ.
7 Si̱ gidigañuꞌunj nej suj;
dadinꞌ si̱ gaꞌhue ga̱ꞌmi̱n dukuꞌ riñan Ma̱ꞌan Ñaꞌanj an mánj:
Dadinꞌ si giꞌhiaj nej suj sa sàꞌa nej si giꞌhiaj nej suj sa aꞌnanꞌan ni̱ huê sa giꞌhiaj nej suj dânj ga̱na̱huin ràꞌa nej suj na̱nj ánj.
8 Dadinꞌ sí giꞌhiaj gakï̱nꞌïn ngà nneè kú,
ni̱ gakï̱nꞌ giꞌhiaj sôꞌ ngà nneè kú sôꞌ gi̱ꞌhiaj ni̱ gàhuìꞌ nimân sôꞌ,
sani̱ sí dagahuin sun giyiꞌnïnꞌ giꞌhiaj Ma̱ꞌan Espíritu Santo ni̱ Ma̱ꞌan Espíritu gi̱ꞌhiaj ni̱ ga̱ nìꞌnàꞌ sôꞌ ni̱ ga̱ne nìgànj sôꞌ na̱nj ánj.
9 Si̱ gininaj ruhuâ nêꞌ,
guendâ gi̱ꞌhiaj nêꞌ sa sàꞌa mánj;
dadinꞌ gùyùmàn diû ni̱ ga̱na̱huin ràꞌa nêꞌ sa sàꞌ giꞌhiaj nêꞌ,
sisi̱ si̱ ginichre ruhuâ nêꞌ na̱nj ánj.
10 Huê danj ni̱,
daranꞌ diû nga huaj ga̱ꞌhue gu̱ru̱gûñuꞌunꞌ aꞌngô nej guiì ni̱ huê dùgùnàj huaj si gu̱ru̱gûñuꞌunꞌ,
sani̱ ña̱ꞌa̱n doj huaj si gu̱ru̱gûñuꞌunꞌ nej duguiꞌ guyumân ruhuâ niꞌin Ma̱ꞌan Jesús na̱nj ánj.
Ga̱ꞌmi̱n hueꞌê Pablo rayiꞌî guendâ ginikòꞌ Ma̱ꞌan Señor Jesucristo riñan rugutsìi
11 Gi̱ni̱ꞌhiaj nej suj dadinꞌ ûta nìko hua nej letra gachrûnj ngà raꞌá riñan nej suj.
12 Daranꞌ nej sí garanꞌ ruhuâ da̱gahuin riñan nneè kú,
ni̱ nej sôꞌ huin sí giꞌhiaj guesâ si gàꞌnèꞌ nej suj nnïnj arán raa̱ nneè nàꞌàj nej suj,
guendâ nun ga̱ra̱nꞌ ruhuâ nej sôꞌ si ga̱ta̱ rùhuà nej síi nej sôꞌ dadinꞌ yuꞌhuiꞌ nej sôꞌ ga̱ꞌmi̱n nej sôꞌ si ginikòꞌ Ma̱ꞌan Jesús riñan rugutsìi na̱nj ánj.
13 Dadinꞌ gàꞌ nitaj si dagahuin nej sí gaꞌneꞌ nnïnj arán raa̱ nneè nàꞌàj sa taj ley;
sani̱ ganahuin nìhiàꞌ ruhuâ nej sôꞌ guendâ guyumân ruhuâ nej suj ni̱ gaꞌneꞌ nej suj nnïnj arán raa̱ nneè nàꞌàj nej suj.
14 Ni̱ gàꞌ nun ga̱ra̱nꞌ ruhuâj ga̱ꞌmi̱n hueꞌê rayiꞌî ma̱ꞌán mánj,
sa ràyìꞌì garanꞌ ruhuâj ga̱ꞌmi̱n hueꞌê huin rayiꞌî guendâ ginikòꞌ Ma̱ꞌan Señor Jesucristo riñan rugutsìi,
dadinꞌ rayiꞌî si rùgùtsì Ma̱ꞌan Cristo,
ni̱ gahuiꞌ nej sa rikî yumiguìi riñânj ni̱ huê danj na̱nj gahuín ꞌngo̱ sí gahuiꞌi riñan yumiguìi na̱nj ánj.
15 Dadinꞌ guendâ Ma̱ꞌan Cristo ni̱ sê sa niꞌñanj an huin si gàꞌnèꞌ nnïnj arán raa̱ nneè nòꞌòꞌ,
nej sisi̱ si̱ gaꞌneꞌ nnïnj arán raa̱ nneè nòꞌòꞌ,
sa ña̱ꞌa̱n huin si ga̱na̱huin nàkà ñûnꞌ riñan Ma̱ꞌan Ñaꞌanj an na̱nj ánj.
16 Ni̱ daranꞌ nej sôꞌ dagahuin dàj rûnꞌ gatâ ni̱ ga̱ dïnꞌïnj ruhuâ nej sôꞌ ni̱ gu̱ru̱gûñuꞌunj Ma̱ꞌan Ñaꞌanj an nej sôꞌ,
ni̱ huê danj na̱nj ga̱ dïnꞌïnj riñan yumanꞌ Israel huin daꞌní Ma̱ꞌan Ñaꞌanj an na̱nj ánj.
17 Gayakaj gaꞌanj neꞌ ña̱an ni̱ nun ga̱ra̱nꞌ ruhuâj si ga̱ta̱ rùhuà gàꞌ si ꞌngo̱ nej síi ñùnj;
dadinꞌ gàꞌ ûta giranꞌ sàñùnj ni̱ ni̱ka̱ daꞌngaꞌ ginikaj nneè kú Ma̱ꞌan Señor Jesús na̱nj ánj.
18 Si-su̱nu̱j Ma̱ꞌan si-Seño nêꞌ Jesucristo ga̱ne ngà nanè nimân nej suj na̱nj di̱nï̂nj.
Ni̱ huê dan huin rûꞌhuaj na̱nj ánj.