Ganikïnꞌ ran nej suj dadinꞌ gàꞌ gananin nej suj riñan gakï̱nꞌïn
5
Ganikïnꞌ ran nej suj,
dadinꞌ gàꞌ gananin nej suj giꞌhiaj Ma̱ꞌan Cristo,
ni̱ si̱ gaꞌnḯn ñan ñûn nej suj ley ni̱ si̱ ganï̂n ruhuâ nej suj si ley gi̱ꞌhiaj ga̱na̱ni̱n nej suj mánj.
2 Ñùnj huin Pablo,
ni̱ gata,
ni̱ si ganï̂n ruhuâ nej suj si guendâ gaꞌneꞌ nej suj nnïnj garán raa̱ nneè nàꞌàj nej suj ni̱ gananin nej suj,
hiôꞌ ni̱ nitaj nùnj gue̱nda̱ niꞌñanj si gahuiꞌ Ma̱ꞌan Cristo rayiꞌî nej suj mánj.
3 Aꞌngô ñûn gata gu̱nïn nej sí hua̱ na̱nj gaꞌneꞌ nnïnj arán raa̱ nneè nàꞌàj,
ni̱ daꞌhui ni̱ña̱n nej suj ni̱ dagahuin nej suj daranꞌ nej sun giyiꞌnïnꞌ giꞌhiaj ley.
4 Nej suj taj si guendâ dagahuin nej suj sa taj ley ni̱ gàꞌ aché ni̱ka̱ nej suj ni̱ gatâ si gàꞌ gahuin anêj nej suj riñan Ma̱ꞌan Cristo;
ni̱ gàꞌ gaꞌanj nìꞌhià nej suj na̱nj ánj.
5 Sani̱ nej ñûnj,
ni̱ Ma̱ꞌan Espíritu huin sa giꞌhiaj ni̱ guyumân ruhuâ nej ñûnj ni̱ ganaꞌhuìj nej ñûnj si gu̱ru̱gûñuꞌun ni̱ ga̱ꞌhue gi̱ꞌhiaj nej ñûnj sa ni̱ka̱a na̱nj ánj;
6 dadinꞌ guendâ Ma̱ꞌan Cristo,
ni̱ nitaj si niꞌñanj si giyiꞌneꞌ nnïnj arán raa̱ nneè nòꞌòꞌ,
nej si nun gìyìꞌnèꞌ nnïnj arán raa̱ nneè nòꞌòꞌ,
ni̱ guendâ guyumân ruhuôꞌ ni̱ gaꞌhue ga ꞌì ruhuôꞌ niꞌînꞌ nej duguiꞌ.
7 Ni̱ gàꞌ hua̱j hueꞌê nej suj si-chrej Ma̱ꞌan Ñaꞌanj an saꞌâj.
Sani̱ ahuin si garanꞌ ñuꞌunj ni̱ nun da̱gahuin nej suj riñan nuguanꞌ yàngàꞌa ràꞌaj.
8 Ûta nìchràj ruhuâ nej suj niꞌin nej suj ley,
sani̱ nga gakḯn Ma̱ꞌan Cristo ga̱ꞌna̱ꞌ nej suj ni̱ nun ga̱ꞌnïnj suun si gi̱ꞌhiaj nej suj dànanj mánj.
9 Do̱j chru dunuꞌmanꞌan ga̱chri̱ꞌ siganï̂nj kïnj sàꞌa ni̱ gunuꞌmanꞌ daranꞌ kïnj sàꞌ dânj gi̱ꞌhia,
“huê danj ni̱ si hua̱ ꞌngo̱ sí ga̱chri̱ chrej yìꞌìi riki ꞌngo̱ yiꞌnïnꞌ guiì ni̱ gàꞌhuìꞌ yìꞌì sôꞌ daranꞌ nej guiì dânj.”
10 Ni̱ guyumân ruhuâj niꞌín Ma̱ꞌan Señor,
ni̱ nitaj si giriñun ruhuâj niꞌín nej suj dadinꞌ niꞌin nej suj si huín ꞌngo̱ sí nìkòꞌ rukû Ma̱ꞌan Cristo ni̱ gidigân nuguanꞌ yàngàꞌa riñan nej suj;
sani̱ Ma̱ꞌan Ñaꞌanj an gi̱ꞌhiaj ga̱huin kastîgu sí giꞌhiaj gachej ruhuâ nej suj,
ahuin na̱nj sí ma̱ꞌan huin na̱nj ánj.
11 Gàꞌmìn rayiꞌí di̱nï̂nj,
ni̱ si hua̱ na̱nj duguꞌnḯn giꞌhiaj guesâj ni̱ gatâ si ña̱ꞌa̱n huaj gàꞌnèꞌ nej suj nnïnj arán ga̱ni̱ka̱j raa̱ nneè nàꞌàj nej suj,
ni̱ nùnj huin saj ni̱ hua̱ na̱nj gata rùhuà nej judío ñùnj ràꞌaj,
hiôꞌ ni̱ nitaj si niꞌñanj si gananï̂nj si ginikòꞌ Ma̱ꞌan Jesús riñan rugutsìi mánj.
12 Dùgùnàj huaj si gàꞌ ꞌngo̱ gàꞌnèꞌ nej sí garanꞌ ñuꞌunj nej suj nneè nàꞌàj nej sôꞌ.
13 Dadinꞌ gàꞌ giyiꞌnï̂nj riñan nej suj,
giꞌhiaj Ma̱ꞌan Cristo na̱nj di̱nï̂nj;
sani̱ sê man guendâ si giyiꞌnï̂nj riñan nej suj ni̱ ga̱na̱huin nìhiàꞌ ruhuâ nej suj ngà nneè kú nej suj mánj,
sa gi̱ꞌhiaj nej suj huin si ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj.
14 Dadinꞌ daꞌ hua̱ gè ley ni̱ ganahuin ꞌngo̱ rïn nuguanꞌan:
“Ga̱ ꞌì ruhuâꞌ niꞌînꞌ nej duguiꞌ dàj rûnꞌ ꞌì ruhuâꞌ niꞌînꞌ ma̱ꞌanꞌ.”
15 Ni̱ si man si yaꞌhuij ñanꞌ nej suj ni̱ yâ nej suj ꞌngo̱ ni̱ aꞌngô nej duguiꞌ nej suj mân nej suj,
ni̱ gùyùmàn ꞌngo̱ gui ni̱ ga̱na̱huij ꞌngo̱ ni̱ aꞌngô nej duguiꞌ nej suj gi̱ꞌhiaj nej suj na̱nj ánj.
Sa garanꞌ ruhuâ nneè kûꞌ da̱gahuînꞌ ni̱ sa garanꞌ ruhuâ Ma̱ꞌan Espíritu Santo da̱gahuînꞌ
16 Gatâ gu̱nïn nej suj:
Ni̱ da̱gahuin nej suj sa gataj Ma̱ꞌan Espíritu,
ni̱ si̱ dagahuin nej suj sa garanꞌ ruhuâ nneè kú nej suj mánj.
17 Dadinꞌ sa garanꞌ ruhuâ nneè kuꞌ ni̱ nitaj si gininj hueꞌej riñan Ma̱ꞌan Espíritu,
ni̱ sa garanꞌ ruhuâ Ma̱ꞌan Espíritu ni̱ nitaj si gininj hueꞌej riñan nneè kuꞌ,
ni̱ unïnꞌ ngue huê danj ni̱ nitaj si giꞌhiaj nej suj dàj garanꞌ ruhuâ nej suj mánj.
18 Sani̱ si Ma̱ꞌan Espíritu huin sa gidigán dàj giꞌhiaj nej suj,
hiôꞌ ni̱ nitaj si ûta huaj si ginu̱n ñan nej suj si-ley Moisés gàꞌ mánj.
19 Ni̱ nej gakï̱nꞌ guruguiꞌ giꞌhiaj nneè kuꞌ huin nej nânj:
Ginikaj nika duguiꞌ,
aché sìgìchràꞌ,
nagiꞌhiaj kï̱j ma̱ꞌan,
ûta huin ruhuâ nngaj ngà ahuin na̱nj siyànà,
20 ginûn ña̱ꞌa̱nj riñan ñaꞌanj giꞌhiaj ra̱ꞌa síi,
garânj sun guiì stuꞌhuaj a,
nu̱n naꞌan ruhuâ niꞌin duguiꞌ,
gunïnꞌ ngà guiì,
gachrûn yìkòj,
sa hu̱e chre dan,
garán riñan duguiꞌ,
guchraꞌ da̱ꞌa̱j duguiꞌ,
gidigân nuguanꞌ nitaj si ꞌnaꞌ riñan ñanj si-nùguànꞌ Ñaꞌanj an,
21 yìkòj ruhuâ niꞌin duguiꞌ,
dagahuiꞌ guiì,
goꞌo nne berente,
ûta kï̱j ya,
ni̱ nej guiì giꞌhiaj aꞌngô gakïn hua̱ dàj rûn hua nej gakï̱nꞌ nânj,
huê rayiꞌî nej gakï̱nꞌ nânj dugunïn gàꞌìj nej suj,
dàj rûnꞌ gàꞌ gataj sìnï̀nj gu̱nïn nej suj,
ni̱ nej guiì giꞌhiaj ahuin na̱nj goꞌngo̱ ma̱ꞌan nej gakï̱nꞌ nânj ni̱ si̱ gaꞌhue ga̱tu̱ ninj ñan ni̱ka̱j su̱n Ma̱ꞌan Ñaꞌanj nne yàtàꞌa mánj.
22 Sani̱ nej sa guruguiꞌ giꞌhiaj Ma̱ꞌan Espíritu riñan nej guiì gàꞌ gananikàj ruhuâ rayiꞌî si-ga̱kïnꞌ huin nej nânj:
ꞌÌ ruhuâ,
hua̱ nìhiàꞌ ruhuâ,
hua̱ dïnꞌïnj ruhuâ,
hua̱ nùkuaj ruhuâ,
gananï̂n àko ruhuâ,
guruguñuꞌunj,
guyumân ruhuâ,
23 nìn giꞌhiaj,
daꞌngaꞌ hueꞌê giꞌhiaj,
ni̱ si giꞌhiaj nej suj nej nânj ni̱ gàꞌ dagahuin nej suj sun gaꞌnïnꞌ ley.
24 Sani̱ nej guiì huin daꞌní Ma̱ꞌan Cristo,
ni̱ gàꞌ godokoꞌ ninj daranꞌ nej sa garanꞌ ruhuâ nneè ku ninj riñan rugutsìi.
25 Ni̱ si dagahuin ninj sa taj Espíritu,
ni̱ giꞌhiaj ninj dàj rûnꞌ garanꞌ ruhuâ Ma̱ꞌan Espíritu.
26 Ni̱ si̱ giꞌhiôꞌ si ûta huînꞌ doj,
ni̱ si̱ guriꞌ gi̱na̱ꞌan ruhuôꞌ ngà ꞌngo̱ ni̱ aꞌngô nej duguîꞌ,
ni̱ si̱ gahuin yìkòj ruhuôꞌ niꞌînꞌ ꞌngo̱ ni̱ aꞌngô nej duguiꞌ mánj.