4
Sani̱ huê danj na̱nj gatâ:
Ni̱ nga nï̀nꞌ huin ra̱n ga̱chi̱j silíj ga̱na̱huin ràꞌa nanìꞌhiaj rej,
ni̱ nitaj si aꞌnïnꞌ sôꞌ riñan sí ꞌnï̱nj giꞌhiaj sun chre riñan rej sôꞌ mánj,
nùnj huin si huin sôꞌ señor riñan daranꞌ nej rasu̱n huin siꞌhiaj rej sôꞌ;
2 sani̱ hua̱ na̱nj ni̱ka̱j ñuꞌunj sí dugumîn siꞌhiaj rej sôꞌ riñan sôꞌ,
ni̱ ga̱na̱ka̱j sôꞌ si-su̱n rej sôꞌ nda gùyùmàn gui gaꞌnïnꞌ rej sôꞌ suun riñan sôꞌ.
3 Huê danj gahuin ngà nêꞌ,
nga nï̀nꞌ gàchin ga̱ra̱n daꞌngaꞌ ruhuôꞌ ni̱ gahuînꞌ dàj rûnꞌ huin nej silíj hua̱ lij,
dadinꞌ giꞌnïnꞌ giꞌhiaj sunꞌ chre ni̱ dagahuînꞌ riñan nej nanè kï̱j hua màn ruhuâ yumiguì nânj.
4 Sani̱ nga gisîj diû,
ni̱ gaꞌnḯn Ma̱ꞌan Ñaꞌanj an gaꞌnaꞌ Daꞌnin,
ni̱ gaꞌnga Daꞌnin riki siyànàa,
ni̱ dagahuin dàj rûnꞌ gataj ley ganahuin ràꞌa Moisés.
5 Dànanj gi̱ra̱nꞌanj guendâ ga̱na̱ranj nej guiì ꞌnï̱nj riki ley,
daꞌnga ni̱ gaꞌhue na̱gi̱ꞌhiaj da̱ꞌni̱nj Ma̱ꞌan Ñaꞌanj an ninj.
6 Ni̱ rayiꞌî guendâ huin nêꞌ daꞌní Ma̱ꞌan Ñaꞌanj an ni̱ gaꞌnïn gatûj Si-Espíritu Ma̱ꞌan Ñaꞌanj an ruhuâ nimân nêꞌ,
ni̱ Ma̱ꞌan Espíritu dânj gaꞌmin nùkuaj ni̱ gata:
“Ta lij,
Taj.”
7 Huê danj ni̱ nitaj si dagahuînꞌ riñan gakï̱nꞌïn,
dadinꞌ hia̱j ni̱ huînꞌ daꞌní Ma̱ꞌan Ñaꞌanj an;
ni̱ si huînꞌ daꞌní Ma̱ꞌan Ñaꞌanj an,
ni̱ huê danj giriꞌ nìꞌhiâꞌ huînꞌ daꞌnì Ma̱ꞌan Ñaꞌanj an rayiꞌî guendâ si Ma̱ꞌan Cristo huin sa gi̱ꞌhiaj ga̱na̱ni̱nꞌ.
Dunaꞌnga Pablo sisi̱ si̱ nanikàj ñûn nej sij da̱gahuin nej sij riñan gakï̱nꞌïn
8 Yàngàꞌ hia,
ni̱ aꞌngô diû ni̱ nun gi̱ni̱ꞌin nej suj Ma̱ꞌan Ñaꞌanj an ni̱ rayiꞌî dan ni̱,
gunânj gi̱tsi nej suj riñan nej ñaꞌanj giꞌhiaj ra̱ꞌa nej síi.
9 Sani̱ hia̱j,
ni̱ niꞌin nej suj Ma̱ꞌan Ñaꞌanj yàngàꞌa,
ni̱ huê danj na̱nj niꞌin Ma̱ꞌan Ñaꞌanj an nej suj,
nùnj huin saj ni̱ nanikàj ñûn nej suj ni̱ gunânj gi̱tsi nej suj ni̱ giꞌhiaj guesâ nej suj dagahuin nej suj sa taj ley ràꞌaj.
10 Hua̱ na̱nj ni̱ka̱j chre̱j nej suj riñan nej gui nu̱n giꞌñanj an,
ni̱ ni̱ka̱j chre̱j nej suj riñan nej ahui nu̱n giꞌñanj an,
ni̱ ni̱ka̱j chre̱j nej suj riñan nej diû ni̱ ni̱ka̱j chrej nej suj riñan nej hioꞌ nu̱n giꞌñanj an.
11 Ni̱ yuꞌhuí rayiꞌî sa giꞌhiaj nej suj,
dadinꞌ man si giꞌhiaj sun chré ngà nej suj.
12 Gachín nìꞌhia si gi̱ꞌhiaj nej suj dàj rûnꞌ giꞌhiâ,
dadinꞌ ñùnj ni̱ giꞌhiâ dàj rûnꞌ giꞌhiaj nej suj,
gàꞌ si ꞌngo̱ sa yìꞌìi nun gi̱ꞌhiaj nej suj ngàj mánj.
13 Dadinꞌ gàꞌ niꞌin nej suj si rayiꞌî guendâ gaꞌnán ni̱ ganataꞌ sìnï̀nj si-nùguànꞌ Ma̱ꞌan Ñaꞌanj an riñan nej suj;
14 ni̱ nùnj si gaꞌnán sani̱ gàꞌ danj ni̱ nun gi̱ꞌhiaj nej suj si gahuín sí ninaj doj riñan nej suj,
ni̱ nun gi̱ꞌhiaj anêj nej suj ñùnj,
ni̱ ganahuin ràꞌa nej suj ñùnj dàj rûnꞌ giꞌhiaj nej suj ngà si-ángel Ma̱ꞌan Ñaꞌanj an,
ni̱ dàj rûnꞌ ganahuin ràꞌa nej suj Ma̱ꞌan Cristo huê danj giꞌhiaj nej suj ngàj.
15 Dànèꞌ gaꞌanj sa gahuin nìhiàꞌ ruhuâ nej suj dânj ràꞌaj.
Ni̱ gaꞌmin hueꞌé rayiꞌî nej sa giꞌhiaj nej suj dânj,
dadinꞌ nda huin ruhuâ nej suj si gi̱ri̱ nej suj rune ñan nej suj ni̱ ri̱ki̱ nej suj raꞌá.
16 Ni̱ rayiꞌî guendâ gatâ nuguanꞌ yàngàꞌa,
ni̱ gahuín sí gunïnꞌ ngà nej suj na̱nj nînꞌ.
17 Ûta nìchràj ruhuâ nej sij niꞌin nej sij nej suj,
sani̱ sê si̱ huin sàꞌ ruhuâ nej sij mánj,
sa huin ruhuâ nej sij huin si gi̱ꞌhiaj anêj nej sij nej suj riñânj,
daꞌnga ni̱ neꞌ rùkù ni̱ gàyìꞌì nej suj ni̱ ginùn ñan nej suj nej sij ruhuâ nej sij.
18 Dùgùnàj huaj si ga̱ nìchràj ruhuâ nej suj guendâ gi̱ꞌhiaj nej suj sa sàꞌa ngà nej guiì,
sani̱ si ruhuâ nej suj gu̱ru̱gûñuꞌunj nej suj ñùnj ni̱ gu̱ru̱gûñuꞌunj nej suj ñùnj daranꞌ diû sani̱ sê man nga nné ngà nej suj ga̱ꞌhue gi̱ꞌhiaj nej suj dânj mánj.
19 Nej suj huin daꞌnî lij,
ni̱ aꞌngô ñûn giranꞌ sàñùnj rayiꞌî nej suj dàj rûnꞌ giranꞌ ꞌngo̱ siyànà gaꞌnga daꞌní,
nda ga̱ꞌhue ga̱huin nej suj dàj rûnꞌ huin Ma̱ꞌan Cristo,
20 ganï̂n ruhuâj ni̱ si ga̱ꞌhue ni̱ nda akuanꞌ ni̱ gùchìj ñan màn nej suj,
ni̱ nàdùnàj si-nànèj,
dadinꞌ ganï̂n chìꞌ ruhuâj niꞌín nej suj.
Nuguanꞌ rán gaꞌmin rayiꞌî Sara ngà Agar
21 Ga̱ta̱j nej suj garanꞌ ruhuâ giꞌnïnj riki ley.
Nun gu̱nïn nej suj dàj taj riñan ley ràꞌ sa ûnꞌ.
22 Dadinꞌ huê danj nnunj riñan ñanj si ga huìj daꞌní Abraham,
ni̱ ga ꞌngo̱ daꞌní sôꞌ ngà Agar,
ni̱ aꞌngoj ga ngà Sara.
23 Sani̱ daꞌní sôꞌ gaꞌnga ngà Agar ni̱ gaꞌnga ngà sa ganï̂n ruhuâ ma̱ꞌan sôꞌ,
sani̱ daꞌní sôꞌ gaꞌnga ngà Sara ni̱ gaꞌnga dadinꞌ Ma̱ꞌan Ñaꞌanj an gataj si ga̱ ꞌngo̱ daꞌní sôꞌ.
24 Nuguanꞌ nânj huin ꞌngo̱ daꞌngaꞌa garânj sûnj,
ni̱ nguèj siyànà nânj huin nuguanꞌ guchiꞌ Ma̱ꞌan Ñaꞌanj an ꞌngo̱ duꞌhua ngà nej sij;
ni̱ ꞌngoj gaꞌnaꞌ raa̱ kïj sinaí,
ni̱ nej daꞌní siyànà nânj giꞌnïnj giꞌhiaj sun chre ni̱ dagahuîn ninj riñan nej nanè kï̱j huaa ni̱ giꞌhiaj guesâ ninj da̱gahuin ninj sa taj ley;
ni̱ nânj huin Agar.
25 Dadinꞌ Agar huin kïj Sinaí ni̱kï̱nꞌ riñan hioꞌó Arabia,
ni̱ huej huin Jerusalén hua̱ diû akuanꞌ,
dadinꞌ nne ngà nej daꞌnin,
ni̱ giꞌhiaj sun chre ni̱ dagahuin riñan nej nanè kï̱j huaa ni̱ giꞌhiaj guesaj da̱gahuin sa taj ley.
26 Sani̱ Jerusalén nngaj neꞌ yàtàꞌa,
ni̱ huej huin nni daranꞌ nêꞌ,
ni̱ hua niꞌnï̂nj riñanj.
27 Dadinꞌ huê danj taj riñan ñanj:
Ga̱na̱huin nìhiàꞌ ruhuâꞌ,
dadinꞌ huînꞌ siyànà a̱tïn,
sòꞌ nitaj daꞌní hua;
ni̱ ga̱na̱huin nìhiàꞌ ruhuâꞌ ni̱ ga̱gua̱j nùkuâꞌ,
dadinꞌ nun gàꞌì nneè kúꞌ gi̱ꞌhiaj neꞌej.
Dadinꞌ dànanj ûta gàꞌì daꞌní siyànà gunâj hua
gàꞌ daꞌ siyànà hua̱ nika.
28 Dàj rûnꞌ Isaac ni̱ gataj Ma̱ꞌan Ñaꞌanj an si ga̱ꞌnga̱ꞌ sôꞌ,
huê danj na̱nj nêꞌ ni̱ huînꞌ daꞌní Ma̱ꞌan Ñaꞌanj an guendâ guyumân ruhuôꞌ na̱nj di̱nï̂nj.
29 Huê dàj rûnꞌ gata rùhuà Ismael Isaac,
ni̱ huê danj gata rùhuà nej judío nej guiì nìkòꞌ rukû Ma̱ꞌan Jesús.
30 Sani̱ dàj taj riñan ñanj ràꞌaj.
“Gi̱ri̱ ruhuâ dukuât Agar huin siyànà giꞌnïnj giꞌhiaj sun chre ngà daꞌnínꞌ Ismael,
dadinꞌ si̱ gaꞌhue ga̱na̱huin ràꞌa Ismael nej sa ga̱na̱huin ràꞌa Isaac huin daꞌní Sara huin siyànà hua̱ niꞌnï̱nj riñan mánj.”
31 Huê danj di̱nï̂nj,
ni̱ sê daꞌní Agar siyànà ꞌnï̱nj giꞌhiaj sun chre huin nêꞌ mánj,
daꞌní Sara siyànà hua̱ niꞌnïnj riñan huin nêꞌ.