Si gùyùmàn ruhuôꞌ ni̱ ga̱ꞌhue ga̱na̱huin ro̱ꞌôꞌ Ma̱ꞌan Espíritu Santo
3
Aya̱ꞌ nej suj màn yumanꞌ Galatas dadinꞌ naꞌhuej nej suj ga̱ya̱ka̱j guendâ nej suj gàꞌ mánj.
Ni̱ ahuin si gidigañuꞌunj ni̱ nun ga̱ꞌhue̱j nej suj da̱gahuin nej suj riñan nuguanꞌ yàngàꞌa ràꞌaj.
Dadinꞌ ûta nîꞌnïnj gananï̂nj riñan nej suj si ginikòꞌ Ma̱ꞌan Jesucristo riñan rugutsìi.
2 Ruhuâj si du̱nanikàj nej suj nuguanꞌ nânj riñânj.
Ni̱ ganahuin ràꞌa nej suj Ma̱ꞌan Espíritu Santo guendâ dagahuin nej suj sa taj ley nîꞌ.
Si ganahuin ràꞌa nej suj Ma̱ꞌan Espíritu Santo guendâ gunïn nej suj ni̱ guyumân ruhuâ nej suj niꞌin nej suj nuguanꞌ giꞌhiaj ga̱na̱ni̱n nej suj sàꞌ.
3 Sí naꞌhuej ga̱ya̱ka̱j guendâ huin nej suj.
Dadinꞌ nga gayiꞌì si̱nï̱n nej suj ni̱ dagahuin nej suj sa taj Ma̱ꞌan Espíritu Santo,
sani̱ hia̱j ni̱ ꞌhiaj guesâ ñûn nej suj dagahuin nej suj sa taj ley.
4 Ûta giranꞌ sa̱ñu̱n nej suj rayiꞌî si-nùguànꞌ Ma̱ꞌan Ñaꞌanj an sani̱ nitaj gue̱nda̱ niꞌñanj si giranꞌ sa̱ñu̱n nej suj mánj,
yàngàꞌ hia ni̱ nitaj si niꞌñanj si giranꞌ sa̱ñu̱n nej suj mánj.
5 Ni̱ rikî Ma̱ꞌan Ñaꞌanj an Espíritu Santo riñan nej suj,
ni̱ giꞌhiaj Ma̱ꞌan sa gahuin ña̱ꞌanj ruhuôꞌ siganï̂nj nej suj,
rayiꞌî guendâ dagahuin nej suj sa taj ley nîꞌ.
Si guendâ guyumân ruhuâ nej suj nuguanꞌ gi̱ꞌhiaj ga̱na̱ni̱n nej suj sàꞌ.
Guchiꞌ Ma̱ꞌan Ñaꞌanj an ꞌngo̱ duꞌhua ngà sachij Abraham
6 Huê danj na̱nj guyumân ruhuâ Abraham nuguanꞌ gataj Ma̱ꞌan Ñaꞌanj an riñan sôꞌ,
ni̱ rayiꞌî dan ni̱ ganakaj guendâ Ma̱ꞌan Ñaꞌanj an ni̱ gahuin sôꞌ sí giꞌhiaj sa ni̱ka̱a riñanj.
7 Ruhuâj si gi̱ni̱ꞌin nej suj,
ni̱ nej guiì guyumân ruhuâ ni̱ huin ninj daꞌní sachij Abraham.
8 Ni̱ àsìj nâ ni̱ huê danj gàꞌ nnunj riñan ñanj si-nùguànꞌ Ma̱ꞌan Ñaꞌanj an,
ni̱ si gùyùmàn ruhuâ nej guiì nàsìnùnj un niꞌin ninj Ma̱ꞌan Ñaꞌanj an ni̱ ga̱ꞌhue ga̱huin ninj guiì giꞌhiaj sa ni̱ka̱a,
ni̱ gataj Ma̱ꞌan Ñaꞌanj an si rayiꞌî sa hueꞌê giꞌhiaj sachij Abraham:
“Ni̱ rayiꞌî sa giꞌhiaj sôꞌ ni̱ huê danj na̱nj ga̱na̱ni̱n daranꞌ nej guiì màn nï̀nꞌ gàchràꞌ ruhuâ yumiguìi,
guendâ guyumân ruhuâ ninj niꞌin ninj Ma̱ꞌan Jesús.”
9 Rayiꞌî dan ni̱ nej guiì guyumân ruhuâ dàj rûnꞌ guyumân ruhuâ Abraham ni̱ ganahuin ràꞌa ninj sa hua̱ hueꞌê.
10 Dadinꞌ daranꞌ nej guiì ginûn ñan sa taj ley ni̱ gùyùmàn sañuun riñan ninj,
dadinꞌ huê danj nnunj riñan ñanj:
“Ni̱ gi̱ranꞌ sa̱ñu̱n daranꞌ nej guiì nun da̱gahuin daranꞌ nej sun giyiꞌnïnꞌ riñan si-ley Ma̱ꞌan Ñaꞌanj an.”
11 Dadinꞌ gàꞌ si ꞌngo̱ nej guiì ni̱ si̱ ganaruhui si-ga̱kïnꞌ ninj gi̱ꞌhiaj ley mánj,
sa niꞌînꞌ huin dadinꞌ huê danj nnunj riñan ñanj:
“Ni̱ guiì giꞌhiaj sa ni̱ka̱a ni̱ guendâ guyumân ruhuâ ninj ni̱ ga̱ꞌhue ga̱ne nìgànj ninj ngà Ma̱ꞌan Ñaꞌanj an.”
12 Ley ni̱ nitaj si gidiganj si ña̱ꞌa̱n huaj si gùyùmàn ruhuôꞌ,
dadinꞌ sa ta huin:
“Nej guiì dagahuin sa taj ley ni̱ ga̱ꞌhue ga̱ nìꞌnàꞌ ninj gi̱ꞌhia.”
13 Ma̱ꞌan Cristo giꞌhiaj ga̱na̱ni̱nꞌ riñan sañun rikî ley riñunꞌ,
ni̱ gaꞌnïnꞌ ruhuaj giranꞌ sa̱ñunj rayiꞌî si-ga̱kï̂nꞌ,
dadinꞌ huê danj nnunj riñan ñanj:
“Nej sí dunikòꞌ nej sij riñan chrun ni̱ gahuin nej sôꞌ sí kï̱j huaa riñan Ma̱ꞌan Ñaꞌanj an.”
14 Rayiꞌî guendâ giranꞌ sa̱ñu̱n Ma̱ꞌan Jesús ni̱ gachîn sa hua̱ hueꞌê guyumân riñan Abraham riñan nej guiì nàsìnùnj un,
ni̱ guendâ guyumân ruhuôꞌ ni̱ ganahuin ro̱ꞌôꞌ Ma̱ꞌan Espíritu Santo.
Gataj Ma̱ꞌan Ñaꞌanj an si hua̱ sa ga̱ꞌhuij ni̱ huê danj na̱nj gaꞌhuij si-ley raꞌa nej israelita
15 Di̱nï̂nj,
gaꞌmin nuguanꞌ giri rà ma̱ꞌán:
Ni̱ nùnj si nej síi guchiꞌ ꞌngo̱ duꞌhua siganï̂nj nej ma̱ꞌan nej sôꞌ,
ni̱ neꞌ rùkù nga gisîj giꞌhiaj hia nej sôꞌ si-nùguànꞌ nej sôꞌ,
ni̱ gàꞌ si ꞌngo̱ nej sôꞌ si̱ gaꞌhue nànìkàj rùkù ñûn ni̱ gàꞌ si gaꞌhue gùnùtàꞌ nej sôꞌ nuguanꞌan yichrá nuguanꞌ gàꞌ guchiꞌ nej sôꞌ ꞌngo̱ duꞌhua mánj.
16 Huê danj ni̱,
riñan Abraham gataj Ma̱ꞌan Ñaꞌanj an si hua̱ ꞌngo̱ sa ga̱ꞌhuij riñan sôꞌ,
ni̱ gata si na̱ga̱ne ña̱n ꞌngo̱ daꞌní sôꞌ riñan sôꞌ.
Huê danj ni̱ nun ga̱ta:
“Si na̱ga̱ne ña̱n gàꞌì daꞌní sôꞌ riñan sôꞌ mánj”,
nej si ga̱ꞌhue ga̱ra̱n daꞌngaꞌ ruhuôꞌ si ga̱ꞌna̱ꞌ gàꞌì ranꞌ nej síi na̱nikïnꞌ riñan sôꞌ,
dadinꞌ rikij ga̱ra̱n daꞌngaꞌ ruhuôꞌ si ꞌngo̱ rïn síi na̱ni̱kïnꞌ riñan sôꞌ:
“Ni̱ na̱ga̱ne ña̱n ꞌngo̱ daꞌní sôꞌ riñan sôꞌ”,
ni̱ huê danj huin Ma̱ꞌan Cristo.
17 Huê nej nânj,
huin nej sa tâ:
Ni̱ nga gataj Ma̱ꞌan Ñaꞌanj an si hua̱ ꞌngo̱ sa ga̱ꞌhuij raꞌa sôꞌ ni̱ huê nuguanꞌ dânj huin sa nagiꞌhiaj nàkaj ngà Ma̱ꞌan Cristo,
dadinꞌ gachín ga̱ꞌanj sientu tá ko̱ chi̱ꞌ hioꞌo ni̱ guyumân ley riñan Moisés,
sani̱ gàꞌ danj ni̱ nun na̱du̱rëꞌ ley nuguanꞌ guchiꞌ Ma̱ꞌan Ñaꞌanj an ꞌngo̱ duꞌhua ngà Abraham,
huê danj ni̱ nun gànàrë̀ꞌ nuguanꞌ giꞌhiaj hia ngà sôꞌ mánj.
18 Dadinꞌ si ley gi̱ꞌhiaj ni̱ ga̱na̱huin ròꞌôꞌ nanìꞌhiôꞌ,
hiôꞌ ni̱ sê rayiꞌî guendâ gataj Ma̱ꞌan Ñaꞌanj an si hua̱ ꞌngo̱ sa ga̱ꞌhuij raꞌa Abraham huin ni̱ gànàrìꞌ nanìꞌhiôꞌ gàꞌ mánj;
sani̱ gataj Ma̱ꞌan Ñaꞌanj an si hua̱ sa ga̱ꞌhuij raꞌa Abraham ni̱ gaꞌhuiꞌ yàngaj sa gata dânj riñan sôꞌ.
19 Hiôꞌ ni̱.
Ahuin gue̱nda̱ niꞌñanj ley ràꞌaj.
Ni̱ nagiꞌhiaj nìko Ma̱ꞌan Ñaꞌanj an si-ley rayiꞌî si-ga̱kïnꞌ nej guiì;
ni̱ nuguanꞌ nânj ginikaj ñuꞌunj nda guyumân “ma̱ꞌan sa na̱ga̱ne ña̱n riñan Abraham” sôꞌ rayiꞌì gataj Ma̱ꞌan Ñaꞌanj an si hua̱ sa ga̱ꞌhuij riñan sôꞌ,
ni̱ ley dânj guyumân giꞌhiaj nej ángel ni̱ Moisés ganahuin ràꞌa ley dânj.
20 Sani̱ nga ꞌngo̱ rïn síi gaꞌmin rayiꞌî sôꞌ ni̱ nitaj si garânj sun sôꞌ si ga̱nikïnꞌ aꞌngô síi ga̱ꞌmi̱n rayiꞌî sôꞌ mánj;
Sani̱ ꞌngo̱ rïn Ma̱ꞌan Ñaꞌanj an hua na̱nj ánj.
Sa gidigân ley
21 Hiôꞌ ni̱ gunïnꞌ ley ngà nuguan gataj Ma̱ꞌan Ñaꞌanj an si hua̱ ꞌngo̱ sa ga̱ꞌhuij na̱nj nînꞌ.
Hia ni̱ nitaj si gunïnꞌ ngue mánj.
Dadinꞌ si ga̱ꞌhue ga̱na̱huin nìꞌnàꞌ nej guiì gi̱ꞌhiaj ley,
hiôꞌ ni̱ yàngàꞌ hia ni̱ ga̱ꞌhue gi̱ꞌhiaj nej guiì sa ni̱ka̱a.
22 Sani̱ sa taj,
riñan ñanj si-nùguànꞌ Ma̱ꞌan Ñaꞌanj an huin,
ni̱ daranꞌ nej guiì ni̱ nne ni̱nï̱nꞌ ninj riñan gakï̱nꞌïn,
ni̱ nej guiì gùyùmàn ruhuâ niꞌin Ma̱ꞌan Cristo ni̱ ga̱ꞌhue ga̱na̱huin ra̱ꞌa ninj sa gataj Ma̱ꞌan Ñaꞌanj an ga̱ꞌhuij riñan ninj na̱nj ánj.
23 Nga nï̀nꞌ ga̱chin gùyùmàn ruhuôꞌ nuguanꞌ gi̱ꞌhiaj ga̱na̱ni̱nꞌ,
ni̱ gane ni̱nï̱nꞌ dukuâ gaꞌa giꞌhiaj gakï̱nꞌïn,
nda gui garânj daꞌngaꞌ ruhuôꞌ si ña̱ꞌa̱n huaj si gùyùmàn ruhuôꞌ niꞌin nuguanꞌ gi̱ꞌhiaj ga̱na̱ni̱nꞌ.
24 Ni̱ ley gahuin dàj rûnꞌ huin ꞌngo̱ maestrû gidigân ñùnꞌ,
ni̱ gi̱nika ga̱ꞌan ñùnꞌ riñan Ma̱ꞌan Cristo,
daꞌnga ni̱ si̱ gitá gakï̱nꞌïn yichrôꞌ guendâ guyumân ruhuôꞌ.
25 Sani̱ nga guyumân ruhuôꞌ niꞌînꞌ nuguanꞌ gi̱ꞌhiaj ga̱na̱ni̱nꞌ,
ni̱ nitaj si gidigân maestrû ñùnꞌ gàꞌ mánj.
26 Dadinꞌ daranꞌ nej suj huin daꞌní Ma̱ꞌan Ñaꞌanj an guendâ guyumân ruhuâ nej suj niꞌin nej suj Ma̱ꞌan Jesús.
27 Dadinꞌ daranꞌ nej guiì gataꞌ nne ngà Ma̱ꞌan Cristo,
ni̱ Ma̱ꞌan Cristo huin sa na̱gi̱ꞌhiaj nàkà ninj.
28 Ni̱ nitaj si niꞌñanj si ga̱huînꞌ judío nej si ga̱huînꞌ sí nàsìnùnj un,
ni̱ nitaj si niꞌñanj si ga̱huînꞌ sí giꞌnïnj gi̱ꞌhiaj sun chre nej si hua̱ niꞌnï̂nj riñunꞌ,
ni̱ sê si̱ huin síi doj gàꞌ daꞌ nej siyànàa mánj,
dadinꞌ ngà Ma̱ꞌan Cristo Jesús ni̱ ꞌngo̱ rïn guiì huin nêꞌ.
29 Ni̱ si huin nej suj daꞌní Ma̱ꞌan Cristo,
yàngàꞌ hia ni̱ huin nej suj daꞌní Abraham,
ni̱ ga̱na̱huin ra̱ꞌa nej suj nanìꞌhiaj sôꞌ dàj rûnꞌ gaꞌhuiꞌ Ma̱ꞌan Ñaꞌanj an si-nùguànꞌanj riñan sôꞌ.