Ganahuin ra̱ꞌa aꞌngô nej apóstol Pablo
2
Huê danj ni̱ gachîn nda yìgànꞌanj hioꞌo ni̱ gaꞌanj ñún ruhuâ yumanꞌ snàꞌànj Jerusalén ni̱ gaꞌanj Bernabé ngàj,
ni̱ huê danj na̱nj gaꞌanj Tito ngàj.
2 Sani̱ gaꞌan ñan màn nej sôꞌ ganï̂n ruhuâ si huin nej sôꞌ doj,
dadinꞌ giꞌhiaj Ma̱ꞌan Ñaꞌanj an garânj daꞌngaꞌ ruhuâj si ña̱ꞌa̱n huaj ga̱ꞌa̱nj gi̱di̱gân riñan nej sôꞌ,
dàj hua nuguanꞌ gidigán riñan nej guiì nàsìnùnj un,
ni̱ nuguanꞌ dânj huin nuguanꞌ gi̱ꞌhiaj ga̱na̱ni̱n nej guiì.
3 Ni̱ ni̱ka̱j duguiꞌí ngà Tito,
ni̱ sôꞌ huin sí ꞌna̱ꞌ yumanꞌ Grecia,
sani̱ gàꞌ danj ni̱ nun gi̱ꞌhiaj guesâj si gàꞌnèꞌ sôꞌ nnïnj arán raa̱ nneè nàꞌàj sôꞌ mánj;
4 sani̱ gatûj huì da̱ꞌa̱j nej sí gataj si huin nej sôꞌ dinï̂nt siganï̂nj nej ñûnj,
sani̱ huin nej sôꞌ si gidigañuꞌunj un,
dadinꞌ hua̱j nej sôꞌ guendâ ga̱ya̱ka̱j guendâ nej sôꞌ dàj gidigân nej ñûnj nìkòꞌ rukû Ma̱ꞌan Cristo Jesús,
dadinꞌ sa ruhuâ nej sôꞌ huin si da̱gahuin ñûn nej ñûnj sa taj ley,
5 sani̱ gàꞌ do̱j sînj nun gùyùmàn ruhuâ nej ñûnj da̱gahuin nej ñûnj nuguanꞌ gataj nej sôꞌ,
guendâ ruhuâ nej ñûnj si ga̱ gè nuguanꞌ yàngàꞌ gi̱ꞌhiaj ga̱na̱ni̱n nej guiì gùchij riñan nej suj.
6 Sani̱ rayiꞌî nej sí ganï̂n ruhuâ si huin nej sôꞌ doj riñan nej guiì aꞌngô diû ni̱ nitaj si ganahuij ruhuâj niꞌín nej sôꞌ;
dadinꞌ Ma̱ꞌan Ñaꞌanj an ni̱ nitaj si giꞌhiaj ni̱nïnj nej guiì,
ni̱ nej sí ganï̂n ruhuâ si huin nej sôꞌ doj ni̱ nitaj aꞌngô nuguanꞌ nàkà gidigân nej sôꞌ riñânj mánj.
7 Dadinꞌ giniꞌin nej sôꞌ si giꞌhiaj Ma̱ꞌan Ñaꞌanj an si gi̱di̱gán si-nùguànꞌànꞌ Ma̱ꞌan riñan nej sí nàsìnùnj un,
dàj rûnꞌ gaꞌnïnꞌ sunj riñan Pedro ni̱ giꞌhia si ga̱ꞌa̱nj gànàtaꞌ sôꞌ si-nùguànꞌanj riñan nej judío,
8 dadinꞌ Ma̱ꞌan Ñaꞌanj giꞌhiaj yu̱gui Pedro guendâ ga̱huin sôꞌ sí ga̱ꞌa̱nj gi̱di̱gân si̱nï̱n si-nùguànꞌanj riñan nej judío,
ni̱ huej huin sa giꞌhiaj yu̱gui ñùnj guendâ ga̱ꞌa̱nj gi̱di̱gân sìnï̀nj si-nùguànꞌanj riñan nej guiì nàsìnùnj un,
9 Ni̱ ganakaj guendâ Santiago,
Pedro ni̱ Juan si rikî Ma̱ꞌan Ñaꞌanj an sunuj u riñânj,
dadinꞌ nej sôꞌ ni̱kï̱nꞌ riñan nej sôꞌ nìkòꞌ rukû Ma̱ꞌan Cristo,
ni̱ ga̱na̱huin ràꞌa nej sôꞌ ñùnj ngà Bernabé,
ni̱ gaꞌnḯn nej sôꞌ gaꞌanj nguèj ñûnj riñan nej guiì nàsìnùnj un ni̱ gunâj nej sôꞌ guendâ gi̱digân nej sôꞌ riñan nej judío.
10 Ni̱ man sa gachín nìꞌhiaj nej sôꞌ riñan nej ñûnj huin si ga̱na̱nun ruhuâ nej ñûnj niꞌin nej ñûnj nej guiì ranꞌ àko;
ni̱ nga giniꞌín nej guiì ranꞌ àko ni̱ ûta hio guruguñuꞌun riñan ninj.
Ranꞌ Pablo Pedro nga nne nguèj sij ruhuâ yumanꞌ Antioquía
11 Sani̱ nga guchiꞌ Pedro ruhuâ yumanꞌ snàꞌànj Antioquía,
ni̱ ri̱ña̱n,
ri̱ña̱n gatâ gu̱nïn sij si nitaj si dùgùnàj hua sa giꞌhiaj sij.
12 Dadinꞌ nga gaꞌnaꞌ si̱nï̱n Pedro ni̱ ya sij ngà nej sí nàsìnùnj nìkòꞌ rukû Ma̱ꞌan Cristo,
sani̱ nga gaꞌnaꞌ aꞌngô nej judío ni̱ka̱j duguiꞌ ngà Santiago ni̱ guxun sij ma̱ꞌan sij ni̱ giꞌhiaj anêj sij ma̱ꞌan sij ni̱ nun ga̱ꞌhue̱j sij ya̱ sij ngà nej sí nàsìnùnj u,
dadinꞌ yuꞌhuiꞌ sij niꞌin sij nej judío.
13 Ni̱ huê danj na̱nj gidigañuꞌunj nej judío dânj aꞌngô nej judío gàꞌ guyumân ruhuâ niꞌin Ma̱ꞌan Cristo,
ni̱ nda Bernabé gidigañuꞌunj nej sij.
14 Sani̱ nga giniꞌín si nitaj si aché ni̱ka̱ nej sij ni̱ nitaj si dagahuin nej sij dàj rûnꞌ gidigân Ma̱ꞌan Cristo,
ni̱ màn daranꞌ nej sij ni̱ ri̱ña̱n,
ri̱ña̱n gatâ gu̱nïn Pedro:
Sòꞌ,
“ni̱ huînꞌ judío,
sani̱ giꞌhiâꞌ dàj rûnꞌ giꞌhiaj nej sí nàsìnùnj un dadinꞌ nitaj si giꞌhiâꞌ dàj rûnꞌ giꞌhiaj nej judío.
Nùnj huin saj ni̱ giꞌhiaj guesâꞌ si nej sí nàsìnùnj un ni̱ da̱gahuin nej sôꞌ chrej yìñànj ni̱ka̱j nej judío ràꞌaj.”
Daꞌhui nej judío gùyùmàn ruhuâ nej sij niꞌin nej sij Ma̱ꞌan Cristo daꞌnga ni̱ gananin nej sij
15 Dadinꞌ nêꞌ ni̱ àsìj gaꞌngoꞌ ni̱ huînꞌ judío,
ni̱ nitaj si huînꞌ sí gakï̱nꞌïn dàj rûnꞌ huin nej sí nàsìnùnj un,
16 ni̱ gàꞌ niꞌînꞌ si nej judío ni̱ nùnj huin si dagahuin nej sij sa taj ley sani̱ gàꞌ danj ni̱ si̱ ganarëꞌ si-ga̱kïnꞌ nej sij,
dadinꞌ ga̱ꞌhue gànàrë̀ꞌ si-ga̱kïnꞌ nej sij guendâ guyumân ruhuâ nej sij niꞌin nej sij Ma̱ꞌan Cristo,
huê danj na̱nj guyumân ruhuâ nej ñûnj niꞌin nej ñûnj Ma̱ꞌan Cristo,
ni̱ rayiꞌî dan ni̱ gaꞌhue ganarëꞌ si-ga̱kïnꞌ nej ñûnj,
ni̱ sê ley giꞌhiaj ganarëꞌ si-ga̱kïnꞌ nej ñûnj,
dadinꞌ gàꞌ si ꞌngo̱ nej guiì si̱ gaꞌhue gànàrë̀ꞌ si-ga̱kïnꞌ giꞌhiaj ley mánj.
17 Ni̱ si nanaꞌhuiꞌ nej ñûnj Ma̱ꞌan Cristo guendâ na̱du̱rëꞌëj si-ga̱kïnꞌ nej ñûnj,
ni̱ hua̱ na̱nj hua̱ gakï̱nꞌïn riñan nej ñûnj,
hiôꞌ ni̱ Ma̱ꞌan Cristo huin sa gidigân giꞌhiaj nej ñûnj gakï̱nꞌïn na̱nj nînꞌ.
Sê danj huin mánj.
18 Ni̱ si gatâ si nitaj si niꞌñanj ley,
ni̱ neꞌ rùkù ni̱ gata si hua̱ na̱nj niꞌñanj ley,
hiôꞌ ni̱ hia ni̱ huín sí giꞌhiaj gakï̱nꞌïn na̱nj ánj.
19 Guendâ ley ni̱ huín sí gahuiꞌi,
dadinꞌ gahuiꞌ nimânj giꞌhiaj ley.
Sani̱ hia̱j ni̱ ganahuin nìꞌnàj giꞌhiaj Ma̱ꞌan Jesús.
20 Nìkòj riñan rugutsìi ngà Ma̱ꞌan Cristo,
ni̱ nitaj si ni̱ka̱j su̱n nneè kû riñânj,
dadinꞌ Ma̱ꞌan Cristo nikaj su̱n riñânj,
ni̱ sa giꞌhiâ ngà nneè kû,
ni̱ giꞌhiâ dadinꞌ guyumân ruhuaj niꞌín si Ma̱ꞌan Jesús huin Daꞌní Ma̱ꞌan Ñaꞌanj an,
dadinꞌ ꞌì ruhuâ Ma̱ꞌan Cristo niꞌin ñùnj,
ni̱ ga ruhuaj gahuij rayiꞌí.
21 Si̱ gaꞌhue gu̱du̱nâ sunuj riki Ma̱ꞌan Ñaꞌanj an riñânj,
dadinꞌ si ley gi̱ꞌhiaj ga̱ꞌhue gànàrë̀ꞌ si-gàkï̀nj,
hiôꞌ ni̱ nitaj gue̱nda̱ gahuiꞌ Ma̱ꞌan Cristo mánj.