Si-su̱nu̱j Ma̱ꞌan Ñaꞌanj an giꞌhiaj ni̱ gananin nej guiì
2
Dàj rûnꞌ huin nej guiì gàꞌ gahuiꞌi gahuin nej suj rayiꞌî gakï̱nꞌ giꞌhiaj nej suj riñan Ma̱ꞌan Ñaꞌanj an,
sani̱ Ma̱ꞌan Jesús giꞌhiaj ga̱na̱huin nìꞌnàꞌ ma̱ꞌan nimân nej suj,
2 ni̱ giꞌhiaj nej suj nej gakï̱nꞌ dânj aꞌngô diû,
ni̱ gahuin chru̱n nej suj giꞌhiaj nej suj gakï̱nꞌ giꞌhiaj nej guiì nun niꞌin Ma̱ꞌan Ñaꞌanj an,
ni̱ giꞌhiaj nej suj dàj rûnꞌ garanꞌ ruhuâ sí aꞌnïnꞌ riñan nej nanè kï̱j huaa,
dadinꞌ huê sôꞌ huin sa ginikaj ñuꞌunj riñan nej guiì nitaj si dagahuin riñan Ma̱ꞌan Ñaꞌanj an,
3 ni̱ huê siganï̂nj nej guiì danj ganeꞌ aꞌngô diû ni̱ giꞌhiôꞌ sa gachín nneè kuꞌ,
ni̱ giꞌhiôꞌ sa garanꞌ ruhuâ nneè kuꞌ,
ni̱ giꞌhiôꞌ sa ganï̂n ruhuôꞌ,
ni̱ rayiꞌî nej gakï̱nꞌ giꞌhiô ni̱ ginaꞌan ruhuâ Ma̱ꞌan Ñaꞌanj an niꞌin ñùnꞌ,
dàj rûnꞌ giꞌhia ngà aꞌngô nej guiì giꞌhiaj gakï̱nꞌïn riñanj.
4 Sani̱ Ma̱ꞌan Ñaꞌanj an,
ni̱ ûta yi̱ruꞌhue hua ruhuaj,
rayiꞌî dan ni̱ gananï̂n àko ruhuaj niꞌin nêꞌ,
ni̱ huê dânj na̱nj ûta nìko ga ꞌì ruhuaj niꞌin nêꞌ,
5 ni̱ nga nï̀nꞌ gahuînꞌ sí gahuiꞌi rayiꞌî gakï̱nꞌin,
ni̱ Ma̱ꞌan Cristo giꞌhiaj si ga̱na̱huin nìꞌnòꞌ ni̱ si-su̱nu̱j Ma̱ꞌan Ñaꞌanj an giꞌhiaj ni̱ ga̱na̱ni̱n nej suj,
6 ngà Ma̱ꞌan Jesús ganaꞌnïnꞌ siganï̂nj nej nîman,
ni̱ giꞌhia si ga̱neꞌ ngà Ma̱ꞌan Cristo Jesús yàtàꞌa,
7 guendâ gi̱di̱ganj riñan nej guiì gimàn diû ꞌna̱ꞌ nêꞌ ña̱an,
dàj nìko du̱ꞌhue̱ hua si-su̱nu̱j Ma̱ꞌan ni̱ dàj nìko gananï̂n àko ruhuaj niꞌin nêꞌ rayiꞌî dan dunaninj nêꞌ ngà Ma̱ꞌan Cristo Jesús.
8 Dadinꞌ nga si-su̱nu̱j Ma̱ꞌan Ñaꞌanj an ni̱ giꞌhia guyumân ruhuâ nej suj ni̱ rayiꞌî dan ni̱ gananin nej suj;
sani̱ sê nej suj huin sa giꞌhiaj dan gaꞌhue gananin nej suj mánj,
Ma̱ꞌan Ñaꞌanj an huin sa giꞌhiaj ni̱ ga̱ꞌhue ga̱na̱ni̱n chre nej suj na̱nj ánj;
9 ni̱ sê rayiꞌî nej sa hua̱ hueꞌê giꞌhiaj nej suj dânj huin ni̱ ga̱na̱ni̱n nej suj mánj,
daꞌnga ni̱ gàꞌ si ꞌngo̱ nej suj si̱ gataj si rayiꞌî nej sa hua̱ hueꞌê giꞌhiaj nej suj huin ni̱ gananin nej suj mánj.
10 Dadinꞌ Ma̱ꞌan Ñaꞌanj an huin sa giꞌhiaj ñùnꞌ,
ni Ma̱ꞌan Jesús huin sa nagiꞌhiaj nàkà ñùnꞌ guendâ gi̱ꞌhioꞌ sa hua̱ hueꞌê,
ni̱ gàꞌ hua̱ yu̱gui sa hua̱ hueꞌê dânj giꞌhiaj Ma̱ꞌan Ñaꞌanj an ni̱ ga̱ꞌhue gi̱ꞌhiaj nêꞌ sa hua̱ hueꞌê dânj na̱nj ánj.
Guendâ gahuiꞌ Ma̱ꞌan Jesús riñan rugutsìi ni̱ ganaꞌmin nej guiì ngà Ma̱ꞌan Ñaꞌanj an
11 Huê danj,
ni̱ ga̱na̱nun ruhuâ nej suj si aꞌngô diû,
ni̱ sí nàsìnùnj un gahuin nej suj rayiꞌî nneè kú nej suj,
ni̱ gùꞌnàj nej suj sí nun gìyìꞌnèꞌ nnïnj arán raa̱ nneè nàꞌàj dadinꞌ nej sí Israelita ni̱ gahuin nej sôꞌ sí giyiꞌneꞌ nnïnj arán raa̱ nneè nàꞌàj.
12 Nga diû nâ ni̱ nitaj si niꞌin nej suj Ma̱ꞌan Cristo,
ni̱ hua̱ ni̱nï̱n nej suj riñan yumanꞌ Israel,
ni̱ hua̱ anêj nej suj ngà nuguanꞌ guchiꞌ Ma̱ꞌan Ñaꞌanj an ꞌngo̱ duꞌhua ngà yumanꞌ Israel,
ni̱ nitaj nùnj ganaꞌhuìj nej suj ni̱ nitaj si niꞌin nej suj Maꞌan Ñaꞌanj yàngàꞌa mánj.
13 Aꞌngô diû ni̱ gane anêj nej suj riñan Ma̱ꞌan Ñaꞌanj an,
sani̱ hia̱j ni̱ ngà tun Ma̱ꞌan Cristo Jesús,
ni̱ gahuin nìchrùnꞌ nej suj riñan Ma̱ꞌan Ñaꞌanj an.
14 Dadinꞌ Ma̱ꞌan huin sa giꞌhiaj ga̱ dïnꞌïnj ruhuâ nêꞌ,
ni̱ giꞌhia si ga̱na̱huin nùguànꞌàn nej judío ngà nej sí nàsìnùnj un ni̱ ga̱na̱huin nguèj sôꞌ ꞌngo̱ rïn yumanꞌan,
ni̱ ngà nneè ku ni̱ dunatu chran ni̱kï̱nꞌ da̱nï̱n nguèj yumanꞌ dânj,
dadinꞌ chran dânj huin sa giꞌhiaj ni̱nï̱n ni̱ dugunïnj nguèj yumanꞌ dânj,
15 ni̱ ngà nneè ku giꞌhia ganarëꞌ sa dugunïnꞌ nguèj yumanꞌ dânj,
ni̱ huê danj na̱nj ganarëꞌ ley gaꞌmin rayiꞌî nej giꞌñanj an ni̱ nej sun giyiꞌnïnꞌ dagahuin nej sij,
ni̱ nagiꞌhiaj nùguànꞌanj nguèj yiꞌnïn dânj guendâ ga̱na̱huin ꞌngo̱ rïn yiꞌnïnꞌïn,
ni̱ ga̱na̱huin ninj ꞌngo̱ guiì nàkàa,
giꞌhia si ga̱na̱huin dïnꞌïnj riñan nej sôꞌ,
16 ni̱ guendâ gìnikòꞌ nneè ku riñan rugutsìi ni̱ giꞌhia si ga̱na̱ꞌmi̱n nguèj yiꞌnïn dânj ngà Ma̱ꞌan Ñaꞌanj an ni̱ ganahuin nguèj yiꞌnïnꞌ dânj ꞌngo̱ rïn nneè kúu,
ni dunahui sa gunïnꞌ nguèj yiꞌnïnꞌ dânj.
17 Gaꞌnaj ni̱ ganataj nuguanꞌ gi̱ꞌhiaj ga̱ dïnꞌïnj ruhuâ nej suj nun gìrìꞌ nìꞌhiaj gu̱nïn si-nùguànꞌ Ma̱ꞌan Ñaꞌanj an,
ni̱ huê danj na̱nj ganataj nuguanꞌ gi̱ꞌhiaj ga̱ dïnꞌïnj ruhuâ nej ñûnj gàꞌ nne nìchrùnꞌ riñan Ma̱ꞌan Ñaꞌanj an;
18 dadinꞌ Ma̱ꞌan Cristo giꞌhiaj si huê ꞌngo̱ rïn Ma̱ꞌan Espíritu Santo ga̱ꞌhue ga̱na̱huin ra̱ꞌa nej sí Israelita ni̱ nej sí nàsìnùnj un,
ni̱ ga̱ꞌhue ga̱ꞌa̱nj nichì gu̱ña̱n nguèj sôꞌ riñan Ma̱ꞌan Rej nêꞌ Ñaꞌanj an.
19 Huê danj,
ni̱ nitaj si huin nej suj sí ꞌna̱ꞌ aꞌngô país ni̱ nitaj si huin nej suj sí nàsìnùnj un,
dadinꞌ giriꞌ nìꞌhiaj nej suj ga̱na̱huin ra̱ꞌa nej suj sa ga̱na̱huin ra̱ꞌa nej sí gèe,
ni̱ ganakaj duguiꞌ nej suj ngà nej daꞌní Ma̱ꞌan Ñaꞌanj an,
20 ni̱ huin nej suj dàj rûnꞌ huin ꞌngo̱ hueꞌe,
dadinꞌ gahuin nùkuaj nej suj giꞌhiaj nej nuguanꞌ gidigán nej sôꞌ gi̱di̱gân si̱nï̱n si-nùguànꞌ Ma̱ꞌan Ñaꞌanj an ngà nej sôꞌ ganataꞌ dàj ga̱huin,
ni̱ Ma̱ꞌan Cristo huin dàj rûnꞌ huin hiëj nne sikûj ꞌngo̱ hueꞌe,
21 ni̱ Ma̱ꞌan Cristo giꞌhiaj ganayumàn daꞌ hua gè hueꞌ dânj,
ni̱ ûta hueꞌê ga̱na̱daꞌa duguiꞌ daranꞌ nej hiëj dânj nda ga̱huin ꞌngo̱ nuhuî gèe;
22 ni̱ huê Ma̱ꞌan huin sa gi̱ꞌhiaj ga̱na̱huin nùguànꞌàn ruhuâ nej suj,
guendâ ga̱huin nej suj dukuâ Ma̱ꞌan Ñaꞌanj an ñan ga̱ne Ma̱ꞌan Espíritu Santo.