Duguta su̱n Ma̱ꞌan Ñaꞌanj an si gànàtàꞌ Pablo si-nùguànꞌ Ñaꞌanj an riñan nej sí nàsìnùnj un
3
Ñùnj huin Pablo ꞌngo̱ sí nne dukuâ gaꞌa rayiꞌî guendâ dagahuín riñan Ma̱ꞌan Cristo Jesús,
ni̱ huê danj na̱nj nné dukuâ gaꞌa rayiꞌî nej suj nej sí nàsìnùnj un,
2 ni̱ si gàꞌ gunïn nej suj dàj giri ra̱ Maꞌan Naꞌanj an ni̱ dàj ganï̂n àko ruhuâ Ma̱ꞌan ni̱ duguta su̱n ñùnj guendâ gànànï̀nj si-nùguànꞌanj riñan nej suj,
3 ni̱ ga̱na̱di̱ganj sa hua huì ganï̂n ruhuaj riñânj,
ni̱ gàꞌ gachrûnj doj rayiꞌî nej nuguanꞌ dânj,
4 ni̱ nga ga̱hia̱ nej suj ni̱ ga̱ꞌhue ga̱ra̱n daꞌngaꞌ ruhuâ nej suj si gàꞌ garânj daꞌngaꞌ ruhuâj rayiꞌî nej nuguanꞌ ga huì giꞌhiaj Ma̱ꞌan Cristo,
5 ni̱ nun ga̱ꞌhue ga̱ra̱n daꞌngaꞌ ruhuâ aꞌngô nej yiꞌnïnꞌ gimân gàꞌ nâ rayiꞌî sa hua̱ huì nânj,
dàj rûnꞌ ganadigân Ma̱ꞌan Espíritu Santo riñan nej sí gè gaꞌanj gi̱digân si̱nï̱n si-nùguànꞌanj ngà nej sôꞌ ganataꞌ dàj ga̱huin.
6 Dadinꞌ nej sí nàsìnùnj un ni̱ huaj ga̱na̱huin ra̱ꞌa nej sij ni̱ ga̱huin nej sij nneè kû Ma̱ꞌan Cristo Jesús,
ni̱ ga̱ꞌhue ga̱na̱huin si̱ꞌhia nej sij dadinꞌ huê danj gàꞌ gaꞌhuij si-nùguànꞌanj rayiꞌî nuguanꞌ gi̱ꞌhiaj ga̱na̱ni̱n nej guiì.
7 Ni̱ huej giꞌhiaj si gahuín sí gànàtàꞌ si-nùguànꞌ Ma̱ꞌan Ñaꞌanj an dàj rûnꞌ hua sunuj rikij riñânj ni̱ dàj rûnꞌ ûta nùkuaj hua Ma̱ꞌan.
8 Ni̱ dànanj ninaj doj huín gàꞌ daꞌ sí hua̱ lij siganï̂nj daranꞌ nej sí gèe,
sani̱ riki Ma̱ꞌan Ñaꞌanj an si-su̱nu riñânj ni̱ ganatá riñan nej sí nàsìnùnj un nuguanꞌ gi̱ꞌhiaj ga̱na̱ni̱n nej sij ni̱ nitaj dàj huaj gùnùkuôꞌ ga̱hio̱ꞌ dàj hua̱ yi̱ruꞌhue Ma̱ꞌan Cristo mánj,
9 ni̱ gànàtàꞌ hueꞌêꞌ riñan daranꞌ nej guiì dàj ginikaj su̱n Ma̱ꞌan Ñaꞌanj an riñan sa hua̱ huì dânj,
dadinꞌ giꞌnïnj huij àsìj diû ri̱ki ngà Ma̱ꞌan Ñaꞌanj an,
ni̱ huê Ma̱ꞌan Ñaꞌanj an giꞌhiaj daranꞌanj.
10 Daꞌnga ni̱ nej guiì huin si-nùhuì Ma̱ꞌan Jesús ga̱na̱di̱gân gi̱ni̱ꞌin nej sí huin ña̱an,
ni̱ nej sí ni̱ka̱j su̱n riñan nej sa màn yàtàꞌa dàj hua gàꞌì ri̱ña̱n sa chru̱n nï̀nꞌ ruhuâ Ma̱ꞌan Ñaꞌanj an,
11 dàj rûnꞌ ganï̂n ruhuaj giꞌhia àsìj nâ,
ni̱ huê danj gaꞌhue giꞌhiâ ngà Ma̱ꞌan Cristo Jesús Ma̱ꞌan si-Seño nêꞌ,
12 ni̱ huê Ma̱ꞌan huin sa gaꞌmin yàngàꞌ hia ni̱ huej gi̱ꞌhiaj ga̱ꞌhue ga̱tu̱ꞌ ni̱ hua̱ yìtï̀nj ruhuôꞌ gùchìꞌ guendâ guyumân ruhuôꞌ niꞌînꞌ Ma̱ꞌan.
13 Rayiꞌî dan,
ni̱ gachín ni̱ꞌhia riñan nej suj ni̱ si̱ gininaj ruhuâ nej suj guendâ giranꞌ sàñùnj rayiꞌî nej suj mánj,
dadinꞌ si sàꞌ Ma̱ꞌan nej suj huin si gi̱ranꞌ sàñùnj.
Dànanj hua̱j huin guendâ ꞌì ruhuôꞌ gàꞌ daꞌ sa gi̱ni̱ꞌin staꞌuꞌ
14 Rayiꞌî nânj,
ni̱ ganikïnꞌ rúdako riñan Ma̱ꞌan Reꞌ Ñaꞌanj an guendâ gàchìnj nìꞌhia rayiꞌî nej suj,
15 ni̱ huê Ma̱ꞌan huin sa nàgàꞌhuìꞌ siyu̱gui nej dùguìꞌ nej guiì màn yàtàꞌa ngà nej guiì màn riñan hioꞌóo,
16 ni̱ gachín ni̱ꞌhia riñan Ma̱ꞌan Rê si ri̱kij,
dàj nìko hua sa sàꞌa riñan Ma̱ꞌan ga̱ riñan nej suj,
ni̱ gi̱ꞌhia si ga̱na̱huin nùkuaj nanè nimân nej suj gi̱ꞌhiaj Ma̱ꞌan Espíritu Santo,
17 ni̱ gùyùmàn ruhuâ nej suj ni̱ ga̱ne Ma̱ꞌan Cristo ruhuâ nimân nej suj,
ni̱ dàj rûnꞌ gaꞌanj gùnùn hiaꞌa chrun riki hioꞌóo ni̱ huê danj ga̱ ꞌì ruhuâ nej suj niꞌin nej suj nej duguiꞌ nej suj ni̱ ga̱ ran ruhuâ nej suj ngà si-nùguànꞌ Ma̱ꞌan Ñaꞌanj an,
18 daꞌnga ni̱ gaꞌhue ga̱ra̱n daꞌnga ruhuâ nej suj dàj rûnꞌ garânj daꞌnga ruhuâ nej sí gèe,
dàj gàchràꞌ ni̱ dàj yèꞌè ni̱ dàj yàkàn ni̱ dàj gùnùn hua sa ꞌì ruhuâ Ma̱ꞌan Cristo niꞌin nêꞌ,
19 ni̱ ga̱ꞌhue gi̱ni̱ꞌin nej suj dàj nìko ꞌì ruhuâ Ma̱ꞌan Cristo niꞌin nej suj dadinꞌ dànanj nìko huin sa ꞌì ruhuaj dânj gàꞌ daꞌ nej sa ga̱huin chru̱n staꞌu nej suj,
daꞌnga ni̱ gachra nï̀nꞌ ruhuâ nimân nej suj gi̱nun sa ꞌì hua̱ riñan Ma̱ꞌan Ñaꞌanj an.
20 Dadinꞌ dànanj ûta nùkuaj Ma̱ꞌan Ñaꞌanj an gàꞌ daꞌ daranꞌ nej rasu̱un,
ni̱ ga̱ꞌhue ri̱kij nìko doj nej sa ga̱chi̱nꞌ ni̱ ri̱kij nìko doj nej sa ga̱nï̱n ruhuôꞌ ni̱ nùkuaj hua̱ Ma̱ꞌan ni̱ ga̱ꞌhue na̱du̱naj ñùnꞌ,
21 ni̱ huê Ma̱ꞌan huin sa giꞌhiaj sàꞌ ngà nej guiì huin si-nùhuì Ma̱ꞌan Jesús ni̱ ngà daranꞌ nej yiꞌnïnꞌ gàꞌ gachîn daꞌ ꞌngo̱ sientu,
ꞌngo̱ sientu hioꞌo;
ni̱ huê danj huin.